Lv 23 - Chuj San Sebastian Bible

Jun tzo'n̈ q'uin̈ yic Dios

¹ 'Ix yaln Jehová 'a Moisés 'ixtic:

² Al jun tzo'n̈ tic 'a eb' et israelal: Atn jun tzo'n̈ q'uin̈ tic to wic an Jehová in, ata tzeyam e b'a yic tzex 'och 'emmquilal 'ayin.

Sc'ul 'iljelal

³ Waque c'u tzex munlji, ax 'a yucl c'ual, ata tzeyam e b'a yic tzex 'och 'emmquilal 'ayin. Yaln̈ej 'ajtil 'ayx 'eq'ui, may xon junc mach tzmunlji, yujto sc'ul 'iljelal yic tzin eyi'n cha'an̈.

Q'uin̈ yic tznax cot yel eb' israel 'a libre

⁴ Atn pax jun tzo'n̈ q'uin̈ tic to niwn yel'chi yic tzeyi'n chan̈ in b'i, tze yamn e b'a yuj eyoch 'emmquilal 'ayn an Jehová in, atn jun tzo'n̈ c'u alb'ilx wu'uj:

⁵ A 'a chan̈lajn̈e yoch b'ab'l 'uj yic junjn ab'il, 'a yic yemc'ual, ata tze na q'uin̈ yic eyelt 'a libre, yuj yi'nb'ilc chan̈ in b'i.

⁶ Ax 'a olajn̈e yoch jun 'uj cha, ata tze na jun q'uin̈ yic 'ixm pan may yich, yuj yi'nb'ilc chan̈ in b'i an Jehová in. A 'a yol uque c'u cha, cojn 'ixm pan may yich tze wa'aj.

⁷ A 'a b'ab'l c'u cha, tzeyam e b'a yic tzex 'och 'emmquilal 'a wojltac. May cab' junc munljel tztac' e b'on 'a jun c'u cha.

⁸ A 'a yol uque c'u cha, yowlal tzeyac' tz'a e xajmb'al 'a wojltac, ax 'a jun yucl c'u cha, tzeyam e b'a yic tzex 'och 'emmquilal 'a wojltac. May cab' junc munljel tztac' e b'on 'a jun c'u cha, xchi Dios.

Q'uin̈ yic b'ab'l sat 'awb'en

⁹ 'Ix yaln Jehová 'a Moisés 'ixtic:

^10-11 Al jun tzo'n̈ tic 'a eb' et israelal: A yic tox ex c'och 'a sat lum lum tzwac' eyico'oc, a yic 'oj e polnc e cebada, a jun yuchn̈ 'ixm tze b'ab'l polj cha, tzeyij can 'eli. Ax yic yewial xo yec' sc'ul 'iljelal, tzeyi'n cot 'a win ya'mal 'och sti eb' 'anma', ax win tz'a'n 'och 'ixm ofrendail 'a wojltac, sec wach' chab'il wuj 'ayex.

¹² A 'a jun c'u yic tzeya'n 'ixm cha, a pax ta tzeyac' junc no quelm calnelu xajmb'al-l 'ayin, junc no jun ab'il sq'uinal, no may spaltail. A jun xajmb'al tz'a cha, caw wal wach' sjab' tzwab' an Jehová in.

¹³ Tzeya'n pax b'aln̈e'oc libra 'ixm harina caw wach' yet' no', caln tz'aj yet' aceite, sec ax yic tz'ajx tz'a 'a wojltac, su'q'ui cab' yec' sjab'. Tzeya'n junc litro yal uva ofrendail yet' jun tzo'n̈ cha, sec a tzsecx q'ue 'a yib'an̈.

¹⁴ Man̈ e comn wac 'ixm 'ac' cebada mto 'ixm tzb'olxi, mto 'ixm tzeyax c'uxej, masnto cab' tzeyac' 'ixm jun yuchn̈ chi ofrendail 'ayn an e Diosal in, 'ixta to b'i'an, tztac' e c'uxn 'ixim. A jun tic, ley tz'ajcn 'ayx yet' 'a eyunnal b'aq'uin̈, yaln̈ej 'aj 'ayx 'eq'ui.

Q'uin̈ yic sat 'awb'en

¹⁵ A 'a jun c'u domingo cha, yic tzeya'n 'ixm jun yuchn̈ cebada chi ofrendail 'ayin, tz'el yich e b'isn uque seman tz'acan.

¹⁶ Ax 'a junx c'u cha, yic tox xtz'acw uque seman cha, atn yic tz'acw 50 c'u, ata tzeyac' junc xo ofrenda yic 'ixm 'ac' trigo chi 'ayin.

¹⁷ Junjn n̈a'il tzyij cot chab'oc 'ixm niwc pan ofrendail, 'ixm wach' yaj sb'o 'a 'ixm 'ac' harina, tz'em yich, chan̈e libra harina tz'och 'a jun jun. A jun cha, ofrenda tz'ajx 'och 'a wojltac an Jehová in, yuj sb'ab'l sat 'awb'en.

¹⁸ A yet' 'ixm pan cha, yowlal tz'ajx ucwn̈ no quelm calnelu xajmb'alil, no junjn ab'il sq'uinal, no may spaltail, jun quelm wacax yet' chawn̈ mam calnelu. A jun tzo'n̈ noc' cha, tz'ajx tz'a 'a wojltac, yujto wach' sjab' tzwab'i, tz'ajx pax harina yet' yal uva ofrendail yet' e no'.

¹⁹ An̈jtona', tzeyac' pax junc mam chiwo xajmb'al-l 'ayn yuj e mul, chawn̈ quelm calnelu junjn ab'il sq'uinal, sec tz'och e no xajmb'alil, yuj e ch'oxn 'eli to 'ay junc'ojlal 'a e cal wet'oc.

²⁰ Ax win ya'mal 'och sti eb' 'anma', a win tz'a'n 'och no calnelu, yet' 'ixm pan xajmb'al-l 'a wojltac, atn tas to wic yaji. Tzlajw cha, tzcancn 'a win ya'mal 'och sti eb' 'anma cha.

²¹ A 'a jun c'u cha, yowlal tzeyam e b'a yic tzex 'och 'emmquilal 'ayin, may pax junc mach tztac' smunlji. A jun tic ley tz'ajcn 'a e cal yet' 'a eb' eyin̈tl b'aq'uin̈, yaln̈ej 'aj 'ayx 'eq'ui.

²² A yic tzc'och stiempoal e poln e cebada mto e trigo, man̈ e pol 'ixm 'ayc' 'a stitac, man̈ e sic' pax 'ixm schon tzlaj can eyu'uj. A jun tzo'n̈ cha, tzeya'cn yico'oc eb' meb'a', yet' eb' chuc chon̈b'al 'ayc' 'a e cal. An Jehová e Diosal in, an tzwala, xchi Dios.

Q'uin̈ yic eb' q'uen trompeta

²³ 'Ix yaln Jehová 'a Moisés 'ixtic:

²⁴ Al jun tzo'n̈ tic 'a eb' et israelal to an tzwal 'ixtic: A 'a b'ab'l c'u yic yucl 'uj, ata tzex 'ilji. Tzeyamn e b'a yic tzex 'och 'emmquilal 'ayin. Tzeyutz'n q'uen trompeta yic tzin e nan coti.

²⁵ Yowlal tzeyac' tz'a e xajmb'al 'ayin. May mach tzmunlj 'a jun c'u cha, xchi Dios.

Sc'ul yic tz'ajx lajwc mul

²⁶ 'Ix yaln Jehová 'a Moisés 'ixtic:

²⁷ A 'a lajn̈e yoch yucl 'uj cha, ata 'ay sc'ul yic tz'ajx lajwc mul. Yowlal tzeyam e b'a yic tzex 'och 'emmquilal 'ayin, tzex 'och 'a c'ajb'c'ojlal, tzeya'n tz'a eyofrenda xajmb'al-l 'ayin.

²⁸ May mach tzmunlj xon 'a jun c'u cha, yujto a wal 'a yic jun c'u cha, 'oj 'ajxoc can lajwc e mul 'a in sat an Jehová e Diosal in tic.

²⁹ A mach matz 'och 'a c'ajb'c'ojlal 'a jun c'u cha, yowlal tzijx 'el 'a e cal.

³⁰ Tzann̈j mach tzmunlj 'a jun c'u cha, 'oj wac' satxoc 'eli.

³¹ May xon junc mach tzmunlj 'a tzann̈j munljel-l 'a jun c'u cha. A jun tic ley tz'ajcn 'a e cal, yet' 'a scal eb' eyin̈tl 'a smasnil tiempo, yaln̈ej 'aj 'ayx 'eq'ui.

³² A jun c'u cha, sc'ul 'iljelal tz'ajcn 'ayex, sc'ul pax yic tzex 'och 'a c'ajb'c'ojlal. Tz'el yich 'a yemc'ual, 'a b'aln̈e yoch jun 'uj cha, masnto 'a yemc'ul 'a junx c'u, xchi Dios.

Q'uin̈ Chinama

³³ 'Ix yaln Jehová 'a Moisés 'ixtic:

³⁴ Al jun tzo'n̈ tic 'a eb' et israelal to an tzwal 'ixtic: A 'a olajn̈e yoch yucl 'uj cha, ata tze na uque c'u q'uin̈ Chinama, yuj eyi'n chan̈ in b'i.

³⁵ A 'a b'ab'l c'u cha, tzex 'och 'emmquilal 'ayin, may junc mach tzmunlji.

³⁶ A 'a yol uque c'u cha, tzeyac' tz'a e xajmb'al 'a wojltac, yic tzeyi'n chan̈ in b'i, ax 'a swajxquil c'u, tzex 'ochx 'emmquilal 'a wojltac, tzeya'n tz'a pax e xajmb'al. A jun c'u cha, sc'ul yic tzeyamn e b'a, yuj cha, may junc mach tztac' smunlji.

³⁷ (Atn jun tzo'n̈ q'uin̈ tic checl tz'ajcn 'ayx wu'uj, atnta smoj eyoch 'emmquilal 'ayin. A pax ta tzeyac' tz'a e xajmb'al 'a wojltac, tzeyi'n 'el eyofrenda 'a 'ixm sat trigo mto 'ixm cebada, yet' pax yal uva, a tzyal sc'ul 'aj smoj yajxi.

³⁸ Chuc pax yaj sc'ul 'iljelal 'aj tz'ijx chan̈ in b'i an Jehová in, a pax ta smoj eya'n tas tze siyj 'ayin. Ata tzeyac' pax tas ta'wb'il eyu'uj, mto e xajmb'al ton̈j tz'el 'a e c'ojl eya'n 'ayn an Jehová in.)

³⁹ Palta a 'a olajn̈e yoch yucl 'uj cha, 'a yic tox xlajw e molnchan̈ sat smasnil eyawb'en, ata tze na uque c'u q'uin̈, yic tzeyi'n chan̈ in b'i an Jehová in. A 'a b'ab'l c'u cha, tzex 'ilji, 'ixta pax 'a yucl c'u cha.

⁴⁰ A 'a b'ab'l c'u cha, tzlaj eyi' cot sat te te wach' sloxi, tzeyi'n cot te xil palma, eb' te xil sauce, yet' eb' te niwc xil 'ay 'a stitc a'. 'Ixta 'oj eyutc eya'n tzaljoc e c'ojl 'a yol uque c'u 'a wojltac an Jehová e Diosal in tic.

⁴¹ 'A junjn ab'il, yic tz'och jun yucl 'uj cha, tze nan jun q'uin̈ tic 'a uque c'ual, yic tzeyi'n chan̈ in b'i. A jun tic ley tz'ajcn 'a e cal yet' 'a eb' eyin̈tl b'aq'uin̈.

⁴² A 'a yol uque c'u cha, e masnil ax israel ex tic, yowlal tzex 'aj cajn 'a yol chinama, 'a yic 'ay q'uin̈ cha,

⁴³ sec smasnil eb' eyin̈tl b'aq'uin̈, 'oj yojcoc 'el eb' to yol chinama 'aj ex laj 'ec' cajan, yic eyelt wuj 'a Egipto. An Jehová e Diosal in, an tzwala, xchi Dios.

⁴⁴ 'Ixta pax 'ix yutj Moisés ya'n yojcoc 'el eb' yit israelal cha, yuj sc'ul jun tzo'n̈ niwc q'uin̈ tz'ochi yuj yijx chan̈ sb'i Jehová.