Lv 22 - Chuj San Sebastian Bible

Eb' matz tac' sc'uxn ofrenda*r* tz'ajx 'a Jehová

¹ 'Ix yaln Jehová 'a Moisés 'ixtic:

² An Jehová in, an tzwala. Al jun tic 'a Aarón yet' 'a eb' yin̈til, to yowlal tzya'iljsb'a eb' yet' jun tzo'n̈ ofrenda tzyac' eb' eyit chon̈b' 'ayin, toto ma'ay, may wel'ch 'a sat eb' tzyal cha.

³ Tzaln 'a 'a, ticnec yet' 'a b'aq'uin̈, toto 'ay eb' yin̈tl man̈ wach'c yaj 'icha yaln ley, tzyamn eb' jun tzo'n̈ xajmb'al chi tzyac' eb' eyit chon̈b' 'ayin, toto 'ixta 'oj yutc eb', jun 'ejmn̈ej 'oj 'ijxoc 'ec' yopiso eb' in ya'n servil.

⁴ May cab' junc eb' yin̈tl Aarón 'aych lepra 'a sniwnal, mto tztob' yin̈tl 'a swincal, tzc'uxn tas to wic yaji, palta masnto tzb'ox sc'ojol, 'ixta to b'i'an, tztac' sc'uxni. Toto 'ay mach tzyamn junc tas man̈ wach'oc, yuj junc chamnc 'anma', mto tzyam junc mach tztob' yin̈tl 'a swincal,

⁵ mto junc mach tzyamn junc no noc' tzjucsb'a 'a sat lu'um, atn no man̈ wach'c 'icha yaln ley, a jun tzyamn no cha, tzjuw can 'eli, man̈ wach'c tz'ajcn yuj tas tzyam cha.

⁶ Toto man̈ wach'c yaji, matz tac' sc'uxn tas to wic yaji, masnto yic tzq'uic'b' 'ejmi, tz'achn can paxi.

⁷ At yic tzmucn sb'a c'u, tzb'ox can 'el'chi. Tzlajw cha, tztac' xo sc'uxn tas to wic yaji, yujto yic xon yaji.

⁸ An Jehová in, an tzwala. Matz tac' schin schib'jal no noc' mun tzchami, mto junc no tzmilx cham yuj junc no calte'al noc', sec wach' matz yixtj 'el sb'a yuj no chib'j cha.

⁹ Al 'a eb' to tzyiclj eb' in checnb'il tic, yic wach' matz 'och smul eb', sec matz cham eb' yuj may yel'ch in checnb'il 'a sat eb'. Yujto an Jehová in, an in si'jnac 'och eb' wico'oc.

¹⁰ May wal junc 'anma to may yuj sb'a yet' win ya'mal 'och sti eb' 'anma chi tztac' sc'uxn tas to wic yaji. Eb' ton̈j cajn 'ec' 'a 'a, mto eb' ton̈j 'ayc' munljoc 'a 'a, matz tac' pax sc'uxn eb' tas to wic yaj cha.

¹¹ Palta toto a win ya'mal 'och sti eb' cha, tzman win junc smoso, a jun moso cha, tztac' sc'uxn jun tzo'n̈ tas to wic yaj cha. 'Ixta pax eb' 'aljnac 'a yatut winac, tztac' sc'uxn eb' tas tzc'ux win cha.

¹² Toto 'ay junc yisl win ya'mal 'och sti eb' 'anma cha, tzyij sb'a yet' junc win chuc wincal 'a scal eb' ya'mal 'och sti eb' 'anma cha, caw matz tac' sc'uxn 'ix jun tzo'n̈ ofrenda chi tz'ajx 'a eb' ya'mal 'och sti eb' 'anma cha.

¹³ Palta toto chamnc xo yichmil 'ix, mto spojjnac sb'a 'ix yet' yichmil cha, may pax yune 'ix yic tzc'ochx can 'ix 'a yatut smam, 'icha xon 'a yic cob'sto 'ix, to 'ixta', tztac' cab' sc'uxn 'ix tas tzc'ux smam cha. Palta ax eb' comn 'anma', matz tac' sc'uxn eb' tas tzc'ux winac.

¹⁴ A mach tzcomn c'uxn tas to wic yaji, yic mant yojcoc toto wic jun tzo'n̈ cha, yowlal tzya'x sjel 'a win ya'mal 'och sti eb' cha, yet' pax junc xo yomacn̈il 'icha tas 'ix sc'ux cha.

¹⁵ Man̈ comnoc xoj tze chaj c'uxxoc tas tzyac' eb' israel 'ayn an Jehová in.

¹⁶ Toto comn xoj tze chaj c'uxxoc, ax jun mul cha, matz can 'a yib'n̈ eb' tzc'uxn cha, palta to a 'a eyib'n̈ tzcani. A mach tzc'uxn cha, yowlal pax tztojo, yujto scomn c'uxej. An Jehová in, an tzwala, to wic yaj jun tzo'n̈ cha, xchi Dios.

Ley yuj no noc' tz'ajx xajmb'alil

¹⁷ 'Ix yaln Jehová 'a Moisés 'ixtic:

¹⁸ Al jun tic 'a Aarón yet' 'a eb' yunnal, yet' pax 'a smasnil eb' eyit israelal to an tzwal jun tzo'n̈ tic: Toto 'ay junc ex ax israel ex tic, mto junc eb' chuc chon̈b'al cajn 'ec' 'a e cal, tznib'j tzyac' junc xajmb'al tz'ajx tz'a 'a wojltac an Jehová in, yic tzya'n 'el'choc junc sti', mto ton̈j tz'el 'a sc'ojl ya'ni,

¹⁹ yowlal a junc no smam tzyac'a. Junc no may spaltail a tzyac'a, sec chab'il 'a 'a. Tztac' ya'n junc no quelm wacax, mto junc quelm calnelu, mto junc no chiwo,

²⁰ palta man̈oc cab' junc no 'ay spaltail tzyac'a, yujto man̈ chab'ilc e no cha.

²¹ Tzann̈j mach tzyac' junc xajmb'al yic junc'ojlal 'ayin, yic tzya'n 'el'choc 'ajtil ya'jnac can sti', mto ton̈j tz'el 'a sc'ojl ya'ni, a cab' junc no quelm wacax mto junc no calnelu may spaltail tzyac'a, sec chab'il no 'a 'a.

²² Man̈ eyac' junc no noc' may yol sat xajmb'al-l 'ayin, no lajwnac, no coxo, no cutin, no 'ay snoc'al, yet' no 'ay c'on yab'il 'a sniwnal. A jun tzo'n̈ noc' cha, matz tac' yajx tz'a no xajmb'al-l 'ayn an Jehová in 'a yib'n̈ yet'l xajmb'al.

²³ Toto ton̈j tz'el 'a e c'ojl eya'n junc xajmb'al, tztac' cab' eya'n junc no man̈ lajnocn̈ej yoc, palta toto xajmb'al yic tzeya'n 'el'choc junc e ti', a jun tzo'n̈ noc' cha, man̈ chab'ilc 'ayex.

²⁴ An̈jtona no noc' 'elnc sq'ue'en, matz tac' eya'n e no xajmb'al-l 'ayin. Man̈ e b'eylb'oc eyi'n 'el sq'uen no 'a sat lum e lum cha.

²⁵ Man̈ e cha jun tzo'n̈ no noc' 'ixta yaj 'a eb' chuc chon̈b'al, yic tzeya'n no xajmb'al-l 'ayin, yujto a jun tzo'n̈ noc' 'ixta yaj cha, man̈ tz'acnoc e no', yuj cha, man̈ chab'ilc e no wu'uj, xchi Dios, xa chi 'a eb', xchi Dios 'a Moisés.

²⁶ 'Ix yaln Jehová 'a Moisés 'ixtic:

²⁷ A yic tz'alj junc yune e wacax, mto junc yune e calnelu, mto junc yune e chiwo, yowlal tzcan no yet' snun uque'oc c'u, ax 'a swajxquil c'u yalj no', tzax stac' yajx tz'a no xajmb'al-l 'a wojltac an Jehová in.

²⁸ Man̈ junn̈joc sc'ul tze mil no nun wacx yet' yune', mto junc no nun calnelu yet' yune cha.

²⁹ A yic tzeya'n e xajmb'al yic alj yuj diosal 'ayn an Jehová in, tzeyac' 'ayn 'icha wal yaln ley, sec chab'il no wuj 'ayex.

³⁰ An̈jtona', yowlal tze chicn no 'a jun c'u cha, may cab' no tzcan yico'oc junc xo c'u. An Jehová in, an tzwala.

³¹ B'eylb'ejc in checnb'il tic, tzeyiclni.

³² May cab' tu paxti'al tzalx 'ayn eyu'uj. A tas tze b'o'o, to tzeyij chan̈ in b'i 'a scal eb' eyit israelal. An Jehová in tic, an ex in si'cn 'och wico'oc.

³³ Ex wij 'elt 'a Egipto, yic tzin 'och e Diosaloc. An Jehová in, an tzwala, xchi Dios.