Lv 20 - Chuj San Sebastian Bible

Yailal 'a yib'n̈ eb' tenmtac

¹ 'Ix yaln Jehová 'a Moisés 'ixtic:

² Al jun tzo'n̈ checnb'il tic yab' eb' et israelal to an tzwal 'ixtic: Tzann̈j ex ax tic, mto chuc chon̈b'al cajn 'ec' 'a e cal, toto tzyac' junc yunnal xajmb'al-l 'a jun comn dios tzcuch Moloc, yowlal tzcham jun 'anma cha. A eb' chon̈ab', a eb' tzjuln cham yet' q'uen q'ue'en.

³ 'Ay yowl in c'ojl 'a yib'n̈ junc 'anma 'ixta tzb'o'o, yuj cha, 'oj in satl 'a scal eb' yit chon̈ab', yujto tzyixtj 'el in cajnub'. Tzin spatquiln can pax 'eli, yujto tzyac' yunnal chi xajmb'al-l 'a Moloc.

⁴ Toto a eb' yit chon̈b' cha, matz yac' eb' yowlal tas tzb'o cha, matz ya'ch eb' 'a yol sc'ab' chamel,

⁵ an xo 'oj wac' yowlal 'a jun 'anma cha. Ax wa'n pax yowlal 'a yistzil, 'a yunnal yet' 'a smasnil eb' cajn 'a yol yatut. 'Oj in satl eb' 'a scal eb' yit chon̈ab', yet' eb' tzyal sb'a 'a Moloc chi yet'oc.

⁶ Toto 'ay mach tz'at sc'anb'c sb'a 'a eb' 'ajchum mto 'a eb' tzyal to tzc'umj spixn eb' chamnc 'anma', tzyiclni tas tzyal eb', an xo 'oj wac' yowlal 'a 'a, ax in satn 'el 'a scal yit chon̈ab'.

⁷ Jun 'ejmn̈ej tzeya'ch e b'a 'a yol in c'ab', wach'n̈j tzeyutj e b'a, yujto an Jehová in, e Diosal in.

⁸ A wal in ley tze b'eylb'ej, tzeyiclni paxi, yujto an Jehová in tic, an tzex wij 'och wico'oc.

⁹ Tzann̈j mach tzb'aj smam snun, a jun cha, yowlal tzchami, mun wal a tzyij cot chaml 'a yib'an̈.

¹⁰ Toto 'ay mach tzb'o 'ajmulal yet' yistzil junc yit wincal, yowlal tzcham jun winc chi yet' 'ix 'ix cha.

¹¹ Tzann̈j mach tzb'on 'ajmulal yet' yistzil smam, tzyi'n 'el sq'uixwel smam cha. A jun cha, yowlal tzchami, tzcham pax 'ix 'ix cha, mun a eb' tzyij cot chaml 'a yib'an̈.

¹² Toto 'ay mach tzb'on 'ajmulal yet' yalib', yowlal tzcham eb' schawn̈il. Mun a eb' tzyij cot chaml 'a yib'an̈. A jun tzb'o eb' cha, yel xo tu'.

¹³ Toto 'ay junc winc tzb'on 'ajmulal yet' yit wincal, 'icha tzyutj sb'a yet' junc 'ix 'ix, yowlal tzcham eb' schawn̈il. Mun a eb' tzyij cot chaml 'a yib'an̈, yujto a tas tzb'o eb' cha, yel xo yajb'entac.

¹⁴ A mach tz'i'n junc 'ix 'ix, tzyi'n pax win snun 'ix, a jun cha, caw wal maysch'olnil. Pitznto win yet' eb' 'ix 'ix cha, tz'ajx tz'a eb' 'a scal c'ac' yoxwn̈il, sec man̈x 'aj 'oj b'inaxc jun b'eyb'al chi 'a e cal.

¹⁵ Toto 'ay junc winc tzmuln yet' junc no noc', yowlal tzcham jun winc cha, tzcham pax no noc' cha.

¹⁶ Toto 'ay pax junc 'ix 'ix tzmuln yet' junc no noc', a jun 'ix cha, yowlal tzchami, tzcham pax no noc' cha. Mun wal a eb' tz'i'n cot chaml 'a yib'an̈.

¹⁷ Toto 'ay junc winc tz'och yanb' yistziloc, yanb' yuj smam mto yuj snun, 'ayx mul tzb'o eb', wal 'a sat eb' chon̈b' chi smasnil, tzcham eb' schawn̈il. Mun a eb' tzyij cot chaml 'a yib'an̈, yujto a mach tzb'on 'ajmulal yet' yanab', yel xo wal q'uixweltac.

¹⁸ Tzann̈j junc winc tzway yet' junc 'ix 'ix 'aj stiempoal yel a a', tzmuln win yet' 'ix, may yel'ch jun chi 'a winac. An̈jtona', tzyal sc'ojl 'ix sch'oxn 'el syailal cha. A eb' cha, yowlal tz'ijx 'el eb' schawn̈il 'a e cal.

¹⁹ May cab' mach tzb'on 'ajmulal yet' yanb' smam, mto snul'j snun, yujto tzyij 'el sq'uixwel mach yican to sb'a yet'oc, tzcann̈j smul eb' chi 'a yib'n̈ schawn̈il.

²⁰ Tzann̈j mach tzb'on 'ajmulal yet' yistzil yu'tac smam, mto yistzil win snul'j snun, tzyij 'el sq'uixwel eb' cha. Tzcann̈j smul eb' chi 'a yib'n̈ schawn̈il. 'Oj cham eb' 'ichn̈jta', may xon yunnal eb' 'oj 'elcni.

²¹ A mach tz'i'n 'ec' yistzil yu'tac, a jun yu'tac chi tzyij 'el sq'uixwel. A jun tic caw wal yajb'entac', 'oj cham eb' 'ichn̈jta'. May xon yunnal eb' 'oj 'elcni.

²² B'eylb'ejc in ley tic, tzeyiclni in checnb'il smasnil sec wach' ma'oj ex wac' satl lum lum 'aj 'oj e c'och cajn cha.

²³ Man̈ e b'eylb'oc sb'eyb'al eb' 'anma chi 'oj wi'l 'a eyojltac. A eb' cha, sb'ojnac eb' smasnil jun tzo'n̈ tic, yuj cha, tzin yajn 'el eb'.

²⁴ An wal wa'jnac can in ti', to 'oj wac' slum eb' chi eyico'oc. An 'oj ex wi'ch 'a sat lu'um, atn lum caw 'ay syaxil sat. An Jehová e Diosal in tic, an ex in poj 'elt 'a scal jun tzo'n̈ xo chon̈ab'.

²⁵ Yuj cha, yowlal 'ay cab' sjelpal no noc' 'a e sat. 'Ay no wach', 'ay pax no man̈ wach'oc, 'ay no ch'ic wach', 'ay pax no man̈ wach'oc. Man̈ eyixtc 'el e b'a yic tze chin no noc' man̈ wach'c cha, no ch'ic yet' no tzjucsb'a 'a sat lu'um, atn no xwala to man̈ wach'c no'.

²⁶ Ax tic, wach' cab' tzeyutj e b'a 'ayin, yujto an Jehová in tic, caw wach'nn̈ej. An ex in pojcn 'elt 'a scal jun tzo'n̈ xo chon̈ab', sec tzex 'och wico'oc.

²⁷ Toto 'ay junc winac mto junc 'ix 'ix tzyal to tzc'umj spixn eb' chamnc 'anma', mto tzyalch sb'a 'ajchumal, a jun 'anma cha, yowlal tzjulx cham yet' q'uen q'ue'en, mun a tzyij cot chaml 'a yib'an̈, xchi Dios.