Lv 2 - Chuj San Sebastian Bible

Ofrenda tz'ijx 'el 'a tas tzc'uxxi

¹ Toto 'ay junc mach tz'i'n cot 'ixm harina ofrendail 'ayn an Jehová in, a cab' 'ixm caw wach' tzyij coti, ax 'a yib'an̈, ata tz'ajx 'ejm aceite yet' incienso.

² Tzlajw cha, tzyi'n cot 'a eb' ya'mal 'och sti eb' 'anma', atn eb' yunnal Aarón. A junc eb' tz'i'n chan̈ jun jopoc 'ixm harina yet' aceite, yet' smasnil incienso, tzya'n tz'a jun ofrenda chi 'a yib'n̈ yet'l xajmb'al, yuj sch'oxn coti to a smasnil ofrenda cha, wic yaji. A jun cha, caw wach' sjab' tzwab' an Jehová in.

³ Ax jacx ofrenda tzcan cha, yic Aarón tz'ajcn yet' eb' yunnal. Caw niwn yel'ch jab'x cha, yujto yitb'eymn̈ej sb'a yet' jun ofrenda tz'ajx tz'a 'a wojltac.

⁴ A yic tz'ajx junc ofrenda c'anb'nac 'a yol jorna 'ayin, b'ob'il cab' yet' 'ixm harina caw wach', 'ixm may yich, pim tz'aj sb'o'i, tzcalx yet' aceite. Tztac' pax sb'o c'oxoxal, b'on̈b'il cab' yet' aceite.

⁵ Toto a junc ofrenda cha, mayb'il 'a yol xalten, b'ob'il cab' 'a 'ixm harina caw wach', calb'il cab' yet' aceite, palta may cab' yich.

⁶ Tzb'uychtax cab'i', choc' cab' tz'aji, tz'ajx cab' 'och aceite 'a 'a, yujto a jun ofrenda cha, to tzc'uxxi.

⁷ Toto tz'an̈b'il junc ofrenda chi 'a yol chen, b'ob'il cab' yet' 'ixm harina caw wach', calb'il cab' pax yet' aceite.

⁸ A yic tox 'ix b'o jun ofrenda chi yet' jun tzo'n̈ cha, tz'ijx cot 'a wojltac an Jehová in. Tzlajw cha, tz'ajx 'a junc eb' ya'mal 'och sti eb' cha, ax tz'i'n cot 'a yet'l xajmb'al.

⁹ Ata tzyac' tz'a jac jun ofrenda cha, yuj snax cot smasnil ofrenda tz'a'i. A jun ofrenda cha, caw wach' sjab' tzwab' an Jehová in.

¹⁰ Ax jacx jun ofrenda tzcan cha, yic Aarón tz'ajcn yet' eb' yunnal. Caw niwn yel'ch jab'x cha, yujto yitb'eymn̈ej sb'a yet' jun tzo'n̈ ofrenda tz'ajx tz'a 'a wojltac cha.

¹¹ A smasnil jun tzo'n̈ ofrenda tz'ajx 'ayn 'a tas tzc'uxxi, may cab' yich, 'ixta pax no yal chab', matz tac' yajx tz'a no 'icha xajmb'al-l 'a wojltac.

¹² Tztac' yajx yich pan yet' no yal chab' ofrendail 'a yic tzwul 'ajxoc can b'ab'l sat 'awb'en, palta matz 'ajx tz'a 'a yib'n̈ yet'l xajmb'al, 'a 'aj tz'a xajmb'al wach' sjab' tzwab'i.

¹³ A smasnil ofrenda tz'ijx 'el 'a 'ixm sat trigo mto 'ixm cebada, yowlal tz'em yatz'mil. May junc ofrenda chi matz 'em yatz'mil, yujto a tzch'oxn cot in trato in b'ojnac eyet' an e Diosal in tic.

¹⁴ Toto tz'ajx junc ofrenda 'ayn an Jehová in yuj b'ab'l sat 'awb'en, yowlal a jaye'oc 'ixm jolm trigo caw 'ec'um, a tz'ajx c'anb'oc 'a scal c'ac', yaxto wali tzb'uchx 'eli.

¹⁵ A 'a yib'n̈ jun ofrenda cha, yowlal tz'em aceite yet' incienso, yujto ofrenda yic 'ixm trigo.

¹⁶ Ax junc eb' ya'mal 'och sti eb' 'anma', a tz'a'n tz'a jac 'ixm sat trigo cha, calb'il cab' yet' aceite yet' pax incienso, sec a tz'a'n naxc cot smasnil ofrenda chi tz'ajx 'ayin, xchi Dios.