Lv 15 - Chuj San Sebastian Bible

Sleyl yuj tas man̈ wach'c tz'el 'a eb' winac

¹ 'Ix yaln Jehová 'ixtc 'a Moisés yet' 'a Aarón:

² Alc 'a eb' eyit israelal to an tzwal jun tzo'n̈ checnb'il tic: Toto 'ay junc winc ya'ay, 'ay tas tz'el 'a swincal yuj junc yab'il, a jun cha, man̈ wach'c yaj 'icha yaln sleyal.

³ Q'uinloc tz'eln̈j jun chi 'a smasnil tiempo mto 'ay 'aj tzmacchj yel junc tiempoal, tzlajw cha, tzyamn pax 'och yelxi, a jun winc cha, man̈ wach'c yaj 'icha yaln sleyal.

⁴ Tzann̈j waynub'al 'aj tzway jun winc cha, mto xila 'aj tz'em wocan, a jun cha, man̈ wach'c tz'ajcni.

⁵ Tzann̈j mach tzyamn junc waynub' chi 'aj tzway jun winc cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

⁶ Tzann̈j mach tz'em wocn 'a 'aj tz'em wocn jun winc cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

⁷ Tzann̈j mach tzyamn junc winc to 'ay tas tz'el 'a swincal cha, yowlal tzju'l spichul, tz'achn paxi, palta mant wach'oc masnto yic tzq'uicb' 'ejmi.

⁸ Toto a jun winc 'ay tas tz'el chi 'a 'a, tzub'wj 'och 'a junc xo mach, ax jun mach 'aj tz'och stzub' cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

⁹ Toto tzq'ue jun winc chi 'a yib'n̈ chej, ax stz'um no chej cha, man̈ wach'c tz'ajcn yu'uj.

¹⁰ Tzann̈j mach tzyamn junc tas 'aj tz'em wocn jun winc 'ay tas tz'el 'a 'a, a jun cha, mant wach'oc masnto yic tzq'uic'b' 'ejmi. Tzann̈j mach tz'i'n 'at junc tas cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

¹¹ Toto a jun winc 'ay tas tz'el 'a cha, mantzac sb'ic sc'ab' yic tzyamn junc xo mach, a jun 'anma tzyam cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

¹² Toto 'ay junc lum chen tzyam jun winc 'ay tas tz'el 'a cha, yowlal tzma'x poj lu'um, toto te yamc'ab' jun, ton̈j tzb'icx 'eli.

¹³ A yic tzb'ox sc'ojl junc winc chi yuj tas tz'el 'a 'a, yowlal tzb'is uque c'ual yic tzb'ox can sc'ojol. Tzlajw cha, tzju'n 'el spichul, tz'achn pax 'a junc spac'b'a', sec tzb'ox can 'el'chi.

¹⁴ Ax 'a yucb'ixial, yowlal tzyij cot chawn̈oc no cowojte', mto chawn̈oc no parama, tzlajw cha, tzc'och 'a yamq'uil Mantiado 'aj tzin chaj in b'a eyet'oc, tzya'n 'a win ya'mal 'och sti eb' 'anma', ax win tz'a'n 'och no 'a wojltac an Jehová in.

¹⁵ Jun no tz'ajx xajmb'al-l yuj ya'n lajwc mul, ax junx no tz'ajx tz'a'oc, 'ixta tzyutj win ya'n 'och no 'a wojltac, yuj sb'ox can 'el'ch win 'aj tz'ec' jun yailal cha.

¹⁶ Toto 'ay junc winc tztob' yin̈til, a jun winc cha, yowlal tz'achni, palta mant wach'oc masnto yic tzq'uic'b' 'ejmi.

¹⁷ Tzann̈j nipal, mto tz'um 'aj tztob' 'ejm yin̈tl win cha, yowlal tzb'icx 'el yet' a a', palta mant wach'oc masnto yic tzq'uic'b' 'ejmi.

¹⁸ Toto 'ay junc winac, 'ay tas tzb'o yet' junc 'ix 'ix, yowlal tz'achn eb' schawn̈il, palta mant wach'c eb' masnto yic tzq'uic'b' 'ejmi.

Sleyl yuj tas man̈ wach'c tz'el 'a eb' 'ix 'ix

¹⁹ A yic stiempoal yel a a 'a junc 'ix 'ix, man̈ wach'c 'ix 'a yol uque c'ual. Tzann̈j mach tzyamn junc 'ix cha, mant wach'oc masnto yic tzq'uic'b' 'ejmi.

²⁰ Tzann̈j waynub'al 'aj tz'ec' c'otn 'ix, mto xila 'aj tz'em wocan, a jun tzo'n̈ cha, man̈ wach'c tz'ajcni.

^21-23 Tzann̈j mach tzyamn junc tas 'aj tzway 'ix cha, mto tzyam junc tas 'aj tz'em wocn 'ix, a jun cha, man̈ wach'c tz'ajcni. Yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

²⁴ Toto 'ay junc mach tzway yet' 'ix, tzb'on̈x yuj tas tz'el 'a 'ix, man̈ wach'c tz'ajcn 'a uque c'ual, 'ixta pax tz'ajcn swaynub' 'aj tzway cha.

²⁵ Toto 'ay junc 'ix 'ix tz'el a a', yic man̈ stiempoaloc, mto niwn tiempo tz'el a 'a 'ix, man̈ wach'c 'ix yuj tas tz'el chi 'a 'a, 'icha to 'ayt 'och 'ix 'a yujl yiln a a cha.

²⁶ Smasnil tas 'aj tzwayi, mto junc tas 'aj tz'em wocn 'ix 'a yic an̈ja to yel a a chi 'a 'ix, a jun tzo'n̈ cha, tzjuw can 'el yu'uj, yujto 'icha to 'aych 'ix 'a yujl yiln a a cha.

²⁷ Tzann̈j mach tzyamn jun tzo'n̈ cha, man̈ wach'c tz'aji, yuj cha, yowlal tzju'l spichul, tz'achn paxi, palta mant wach'oc masnto yic tzq'uic'b' 'ejmi.

²⁸ A yic tz'och wan yel a a chi 'a 'ix, yowlal tzb'is 'ix uque c'ual, 'ixta to b'i'an, tzb'ox can 'el'ch 'ix.

²⁹ Ax 'a yucb'ixial, tzyi'n cot 'ix chawn̈oc no cowojte', mto chawn̈oc no parama, tzlajw cha, tzya'n 'ix e no 'a win ya'mal 'och sti eb' 'anma chi 'a yamq'uil Mantiado 'a 'aj tzin chaj in b'a eyet'oc.

³⁰ Ax win tz'a'n junc no xajmb'al-l 'a wojltac an Jehová in, yuj ya'n lajwc mul, ax junc xo no tz'ajx tz'a xajmb'alil. 'Ixta tzyutj win ya'n 'och no 'a wojltac, sec tzb'ox can sc'ojl 'ix yuj a a chi tz'el 'a 'a.

³¹ 'Ixta tzeyutj eyi'n 'el e b'a ax israel ex tic 'a tas man̈ wach'oc, sec ma'oj e chami, yujto 'ay smay sb'on̈x in cajnub' 'a 'aj 'ayn 'ec' 'a e cal tic, xchi Dios.

³² Atn jun tzo'n̈ ley tic 'a eb' winc 'ay tas tz'el 'a 'a, mto tztob' yin̈til, man̈ wach'c tz'ajcn eb' yuj jun cha.

³³ 'Ixta pax 'a eb' 'ix 'ix 'aj stiempoal yel a a'. A jun tzo'n̈ checnb'il tic, yowlal tzyiclj eb' 'aj 'ay jun tzo'n̈ yailal cha, toxn̈ej winac, mto 'ix, yet' pax eb' tzway yet' eb' 'ix 'ix 'aj yujl yel a a cha.