Lv 14 - Chuj San Sebastian Bible

Checnb'il 'a eb' 'e'nc lepra 'a 'a

¹ 'Ix yaln Jehová 'a Moisés 'ixtic:

² Atn wal jun ley tic 'oj syiclc eb' 'anma tz'ec' lepra 'a 'a. A junc 'anma 'aj 'aych lepra cha, yowlal tz'ilx paxi.

³ Tz'el win ya'mal 'och sti eb' 'anma chi 'a spatquil 'el camplamento yil jun ya'ay cha.

⁴ Toto wach'xo, to 'ixta', tzyac' 'ijxoc cot chawn̈oc e no ch'ic pitzan, atn e no caw wach', tzcot pax te c'ute', te chac nip, yet' pax te hisopo.

⁵ Tzlajw cha, tzya'n win ya'mal 'och sti eb' 'anma chi milxoc cham junc no ch'ic chi 'a yib'n̈ junc lum chen, 'a 'aj 'ay 'ejm a a caw wach', a tzcot 'a 'aj tzpac' a', sec tz'em schi'l no 'a scal a a cha.

⁶ Tz'ijx pax cot junx no ch'ic chi pitznto cha, yet' te c'ute', te chac nip, yet' pax te hisopo. Tzlajw cha, tzlab'x 'ejm jun tzo'n̈ chi 'a scal a a caln yaj yet' schic'l no ch'ic cha.

⁷ Ax win 'oj tzicnc 'och uc 'ejmoc schic'l no ch'ic chi 'a junc 'anma 'aj tz'ec' lepra cha, tzyaln winac, to tztac' xo yaj 'a scal yit 'anma'il. Ax no ch'ic pitzn to cha, tz'actx can pax 'el no 'a libre.

⁸ A mach 'aj tz'ec' jun yab'il cha, yowlal tzju'l spichul, tz'achni, tzjoxn pax 'el sb'a, yic tzb'ox can 'el'chi, sec tztac' yochx 'a yol camplamento, palta uque to c'u tzcan 'a spatc 'el smantiado.

⁹ Ax 'a yucl c'u cha, caw wach' tz'aj sjoxx 'el xil sjolm smasnil, wach' tzyutj yi'n 'el xil sti', tzjosn 'el xil sat yet' smasnil xil smatzab', tzju'n 'el spichul, tz'achn paxi, 'ixta to b'i'an, tztac' yochx 'a yol yatut.

¹⁰ Ax 'a yucb'ixial, tzyi'n cot chawn̈oc no quelm calnelu, yet' pax junc no cob's calnelu jun ab'il sq'uinal, e no may spaltail. Tzcot pax 'oxlajn̈ec libra 'ixm harina caw wach' calb'il yet' aceite, tz'ajx ofrendail, yet' pax 'oxe'oc octavo aceite.

¹¹ Ax win ya'mal 'och sti eb' 'anma cha, a win tzchecn 'och lin̈n junc 'anma chi yet' jun tzo'n̈ yofrenda chi 'a wojltac, 'a yamq'uil Mantiado 'a 'aj tzin chaj in b'a eyet'oc.

¹² Tzlajw cha, tz'ijx cot junc no quelm calnelu chi yet' 'oxe octavo aceite cha, tzb'achx 'och 'a wojltac an Jehová in. A jun cha, xajmb'al yuj stojl mul.

¹³ A 'aj tzcham xon no tz'ajx xajmb'al-l yuj yajx lajwc mul, yet' no xajmb'al tz'a smasnil, ata tzmilx pax no quelm calnelu cha. A jay macn̈ no xajmb'al tic, yic win ya'mal 'och sti eb' 'anma chi tz'ajcn no'. Caw niwn yel'ch junc'aj no xajmb'al cha.

¹⁴ Tzlajw cha, tzyi'n cot win ya'mal 'och sti eb' chi jac schic'l no xajmb'al yic tztojx lajwc mul cha, tzb'on̈n 'och 'a jun 'anma tzb'ox sc'ojl cha, tz'och 'a sjayl sti schicn 'a swach', 'a snun sc'ab' 'a swach', yet' pax 'a snun yoc 'a swach'.

¹⁵ An̈jtona', tzyi'n pax cot win jac aceite, tzsecn 'ejm 'a yol sc'ab' 'a surito.

¹⁶ Tzlab'n 'ejm yune sc'ab' 'a swach' 'a scal aceite 'ayc' 'a yol sc'ab' cha. A yet' yune sc'ab' chi tzyac' tzicnc 'ejm uc 'ejmoc aceite chi 'a wojltac an Jehová in.

¹⁷ Ax jantc to aceite tzcan 'a yol sc'ab' winac, tzsuccn 'och 'a jun 'anma chi tzb'ox sc'ojl cha, tzsucch 'a sjayl sti schicn 'a swach', 'a snun sc'ab' 'a swach', yet' pax 'a snun yoc 'a swach', 'a 'aj 'ayx 'och schic'l no xajmb'al yuj stojl mul.

¹⁸ Ax jacx aceite tzcant 'a yol sc'ab' winac, tzwach' sucj can q'ue 'a sjolm jun 'anma cha, sec 'ixta tz'aj yajx can lajwc smul 'a wojltac.

¹⁹ Tzlajw cha, tzya'n pax 'och win ya'mal 'och sti eb' 'anma chi no xajmb'al chi 'a wojltac, no tz'ajx yuj yajx lajwc mul cha. 'Ixta tz'aj slajw can smul junc 'anma tzb'ox sc'ojl yuj tas man̈ wach'oc. Tzlajw cha, tzmilx no calnelu tz'ajx tz'a smasnil xajmb'alil.

²⁰ Ax win ya'mal 'och sti eb' 'anma cha, a win tz'a'n q'ue no 'a yib'n̈ yet'l xajmb'al yet' ofrenda yic 'ixm harina. 'Ixta wal tz'aj sb'ox can junc 'anma chi 'a wojltac, tztac' xo yochx 'a scal yit 'anma'il.

²¹ Toto meb'a junc 'anma chi 'aj tz'ec' jun yab'il cha, may stumn ya'n no xajmb'al cha, cojn cab' junc no quelm calnelu tzyij coti, yic tz'ajx xajmb'alil, yic tz'ajx lajwc smul, yet' chan̈e'oc libra 'ixm harina caw wach', calb'il yet' aceite, yet' pax 'oxe'ocx octavo aceite cha.

²² Tzyi'n cot pax chawn̈oc no cowojte', mto chawn̈oc no parama, a tzyal tas tztechj yuj junc 'anma cha, jun no tz'ajx xajmb'al-l yuj yajx lajwc smul, ax junx no tz'ajx tz'a smasnil xajmb'alil.

²³ Ax 'a yucb'ixial, tzyi'n cot jun 'anma chi jun tzo'n̈ tic 'a win ya'mal 'och sti eb' 'anma cha yic tzb'ox can sc'ojol. A jun tzo'n̈ tic, tz'ajx 'och 'a wojltac an Jehová in, 'a yojltac Mantiado 'aj tzin chaj in b'a eyet'oc.

²⁴ Tzlajw cha, tzyi'n cot win ya'mal 'och sti eb' 'anma no quelm calnelu yuj stojl mul, yet' 'oxe'oc octavo aceite. Tz'at sb'achnc 'och 'a wojltac an Jehová in.

²⁵ Tzmiln cham win no quelm calnelu tz'ajx xajmb'al-l yuj stojl mul cha, tzyi'n cot win jac schic'l no', tzb'on̈n 'och 'a sjayl sti schicn junc 'anma chi 'a swach', 'a snun sc'ab' 'a swach', yet' pax 'a snun yoc 'a swach'.

²⁶ Ax win ya'mal 'och sti eb' 'anma cha, tzyac' 'ejm jac aceite 'a yol sc'ab' 'a surito,

²⁷ ax yet' yune sc'ab' 'a swach', a tzyac' tzicnc 'ejm jun aceite chi uc 'ejmoc 'a wojltac.

²⁸ Tz'ajx pax 'och jun aceite chi 'a junc 'anma tzb'ox sc'ojl cha, tz'ajx 'och 'a sjayl sti schicn 'a swach', 'a snun sc'ab' 'a swach', yet' pax 'a snun yoc 'a swach', atn 'a 'aj tox x'ajx 'och schic'l no xajmb'al cha.

²⁹ Ax jacx aceite chi tzcani, tzwach' sucj can q'ue win 'a sjolm jun 'anma tzb'ox sc'ojl cha, sec 'ixta tz'aj slajw can smul jun 'anma chi 'a wojltac.

³⁰ An̈jtona', tzyi'n 'och win ya'mal 'och sti eb' 'anma chi junc no cowojte', mto junc no parama cha.

³¹ A junc no ch'ic cha, tz'ajx no xajmb'al-l yuj yajx lajwc mul, ax junc xo no tz'ajx tz'a xajmb'al-l yet' 'ixm harina, 'ixm tz'ajx ofrendail 'ayn an Jehová in. 'Ixta tz'aj slajw can smul junc 'anma cha, xchi Dios 'a Moisés.

³² Atn jun ley tic 'a eb' 'ajtil tz'ec' jun yab'il tzcuch lepra, yet' 'a eb' matz techj ya'n jun tzo'n̈ xajmb'al 'a 'icha wal sleyal, yic tzalxi to tzb'ox can 'el'ch sc'ojol.

Sleyl yuj tas tz'aj sacb'tzax te n̈a

³³ 'Ix yaln pax Jehová 'a Moisés yet' 'a Aarón 'ixtic:

³⁴ A yic 'ayx xo 'ec' e masnil 'a lum Canaán, atn lum 'oj wac' eyico'oc, toq'ue 'oj wa't tas c'uxmtac syab'ilc yol n̈a 'a e chon̈b' cha,

³⁵ a mach 'ay yic te n̈a cha, yowlal tz'at 'a win ya'mal 'och sti eb' 'anma', tzyaln 'a win 'ixtic: 'Ay jun tzo'n̈ c'uxmtac yilx wan spitzw chan̈ 'a yol watut, xchi cab'i'.

³⁶ A yic mantzac 'och win ya'mal 'och sti eb' 'anma chi 'a yol n̈a cha, yowlal tzyala to tz'elt smasnil tas 'ay 'a yojl te n̈a cha, toq'ue tzyal winac to locn jun tzo'n̈ chi man̈x wach'c yet' te n̈a cha. Tzlajw cha, tz'och win yila', tas yab'ilal jun chi c'uxmtac yilx 'a yol n̈a cha.

³⁷ Toto a yic tzyiln 'och winac, to a 'a sat yich n̈a cha, 'ay tas petquixtac yilxi, mto chac yilxi, yelc'ojlal tz'at 'a xab',

³⁸ toto 'ixta', tz'elt win 'a yol n̈a cha, tzyalni to tzmacx can jun n̈a chi uque'oc c'u.

³⁹ Ax 'a yucb'xial cha, tz'at yilnc pax win jun 'ejm xo. Toto an̈j 'ijnoc sb'ey jun c'uxmtac chi 'a sat yich n̈a cha,

⁴⁰ tzyaln winac to tzlipx 'elt smasnil q'uen q'uen 'ajtil 'ayx 'och jun petquixtac cha. Tzlajw cha, tz'at julxoc can 'el 'a 'aj 'ay junc lugar man̈ wach'c 'a sti 'el chon̈b' cha.

⁴¹ Tzyaln pax winac, to yowlal tzjosx 'el sat smasnil yich n̈a chi 'a yojol, ax smasnil spoccal chi tzjosx 'elt cha, tz'at julxoc can 'el 'a 'aj 'ay junc lugar man̈ wach'c cha.

⁴² Tzlajw cha, chucx q'uen q'uen tz'ochx can sjelc q'uen tzlipx 'elt cha, chucx pax lum lum tz'ochx can spixloc, sec tzmacchj can pax 'el yich te n̈a cha.

⁴³ Toto tzcheclj pax chan̈ jun c'uxmtac yilx chi jun 'ejm xo, 'a yic tox 'ix lipx 'elt q'uen q'uen cha, yic tox 'ix josx 'elt sat yich n̈a cha, yet' 'a yic tox 'ix 'ochx can sjel cha,

⁴⁴ tz'ochx win ya'mal 'och sti eb' 'anma chi yil jun 'ejm xo. Toto wan sniwtj pax jun c'uxmtac cha, to 'ixta', a jun c'uxmtac cha to wan sb'eyi, a jun n̈a cha, man̈x wach'oc.

⁴⁵ Yuj cha, yowlal tzpojx 'ejmi, smasnil q'uen q'ue'en, yet' lum lum 'aych 'a 'a, tz'at julxoc can 'el 'a junc lugar man̈ wach'c 'a sti 'el chon̈ab'.

⁴⁶ Tzann̈j mach tz'och 'a yol jun n̈a chi 'a yol uque c'u cha, 'a yic tox 'ix yal win ya'mal 'och sti eb' 'anma to tzmacx cani, a jun cha, caw man̈ wach'c tz'ajcn 'icha yaln sleyal, masnto yic tzq'uic'b'i.

⁴⁷ A mach tzwa'i mto tzway 'a yol jun n̈a cha, yowlal tzju'l spichul, sec tzb'ox cani.

⁴⁸ Toto a yic tz'ochx win ya'mal 'och sti eb' 'anma chi yil jun n̈a cha, ax tzyilni to a jun c'uxmtac cha matz b'eyi, yictax 'ix b'ox can te n̈a cha, ax yaln b'i'an, chajtlto tox xb'ox can jun n̈a cha, yujto man̈x 'a jun yab'il chi 'a te'.

⁴⁹ A yic tzsacb'tzax can te n̈a chi jun 'ejm xo, tz'ijx cot chawn̈oc no ch'ic, te c'ute', te chac nip, yet' pax te hisopo.

⁵⁰ Ax win ya'mal 'och sti eb' 'anma cha, a win tzmiln junc no ch'ic chi 'a yib'n̈ junc lum chen, 'a 'aj 'ay 'ejm a a tzcot 'a 'aj tzpaq'ui.

⁵¹ Tzlajw cha, tzyi'n cot win te c'ute', te hisopo, te chac nip, yet' pax no ch'ic pitznto, tzlab'n 'ejm 'a scal schic'l no ch'ic to chamnc xo cha, atn jun chic' caln yaj yet' a a', tzlajw cha, tzicx 'och uc 'ejmoc 'a te n̈a cha.

⁵² 'Ixta tz'aj sacb'tzax can junc n̈a chi yuj schic'l no ch'ic, yet' a a tzcot 'a 'aj tzpaq'ui, yet' pax no ch'ic pitznto cha, te c'ute', te hisopo, yet' pax te chac nip.

⁵³ Tzlajw cha, tz'actx can pax 'at no ch'ic pitznto chi 'a sti 'el chon̈b' cha, sec 'ixta tz'aj syiclx sleyal yic tzsacb'tzax junc n̈a, xchi Dios.

^54-56 Atn jun tzo'n̈ checnb'il tic 'a yib'n̈ jun yab'il tzcuch lepra, yuj tas tz'aj spitzw chan̈ 'a junc 'anma', junc ton̈j tzmal cha'an̈, mto c'on yab'il, mto sacjech', mto yuj sc'uxmtacl te pichul mto yuj tas petquixtac 'a te n̈a,

⁵⁷ sec 'ixta tz'aj snachj 'eli, 'aj 'ay jun tzo'n̈ tas wach', yet' pax jun tzo'n̈ tas man̈ wach'oc. Atn 'a tic tzlajw can c'och jun tzo'n̈ checnb'il tic 'a yib'n̈ jun yab'il tzc'uch lepra.