Lv 13 - Chuj San Sebastian Bible

Checnb'il yuj jun yab'il tzcuch lepra

¹ 'Ix yaln pax Jehová 'a Moisés yet' 'a Aarón 'ixtic:

² Toto 'ay junc 'anma tzmal chan̈ sniwnal, mto tzq'ue pochn̈joc yalil, mto c'on yab'il tzq'ue 'a 'a, mto tzchacb' chan̈ yu'uj, toq'ue lepra jun yab'il cha. Yowlal tz'ijx cot 'a Aarón, mto 'a jun tzo'n̈ xo eb' ya'mal 'och sti eb' 'anma', atn eb' yin̈tl Aarón.

³ Ax junc win ya'mal 'och sti eb' 'anma cha, yowlal a tz'iln jun yab'il cha. Toto tzsacb' xil jun 'anma chi 'aj tz'elt jun yab'il cha, an̈jtona', chequel toto man̈ cojnoc 'a stz'umal 'ay, palta 'ayx yich jun yab'il cha. Toto 'ixta', lepra jun cha. A yic tox x'ilx jun 'anma chi yuj win ya'mal 'och sti eb' 'anma cha, ax win tzalni chajtlto man̈xtzac stac' yaj 'a scal eb' yit chon̈ab'.

⁴ Q'uinloc sac yilx sat stz'umal jun 'anma chi 'aj 'ay jun yab'il cha, mant 'a yich jun yab'il chi 'a stz'umal, man̈ sacc pax yilx xil cha, toto 'ixta', yowlal tzmacx jun 'anma chi yuj win ya'mal 'och sti eb' 'anma chi 'a uque'oc c'ual.

⁵ Ax yic tzlajw uque c'u cha, tz'ilx pax jun 'anma chi yuj win jun 'ejm xo. Toto a jun yab'il cha, yajn̈j yaji, matz b'eyi, tzmacx can pax jun 'anma chi uque'ocx c'u.

⁶ Ax yic tzlajw pax uque xo c'u cha, tz'ilx pax yuj win ya'mal 'och sti eb' 'anma chi jun 'ejm xo. Toto a jun yab'il cha, wan xo sati, matz b'ey 'a stz'umal, toto 'ixta', tzyaln winac to man̈ lepraoc jun yab'il cha, comn yab'iln̈ej. Tzju'n 'el jun 'anma chi spichul. 'Ixta to b'i'an, tztac' yochx 'a scal eb' yit chon̈ab'.

⁷ Palta toto a jun yab'il cha, to tzb'eyi, wach'xam tox 'ix yal win ya'mal 'och sti eb' 'anma cha to man̈ lepraoc, yowlal tzc'ochx jun 'anma chi 'a win jun 'ejm xo, yic tzyiln pax win jun yab'il cha.

⁸ Toto ax tzyiln winac to tzniwtj paxi, tztac' yaln winac to lepra jun yab'il cha.

⁹ Toto 'ay junc 'anma 'aych lepra 'a 'a, yowlal tz'ijx cot 'a win ya'mal 'och sti eb' 'anma cha.

¹⁰ Sec a win tz'ilni toto wan smali, sacx yilx stz'umal, wan xo pax sacb' xil cha, chacx yilx sat jun yab'il cha.

¹¹ Toto 'ixta', lepra jun yab'il cha. Toto cotc xoj scal tzch'oxn sb'a 'a stz'umal jun 'anma cha, to 'ixta', ax win ya'mal 'och sti eb' 'anma chi tzalni to man̈xtzac stac' jun tz'aj yet' yit 'anma'il, man̈x yowlalc tzmacx 'a yol n̈a.

^12-13 Palta toto tox xtacj sat jun yab'il cha, tox 'ix b'ut'j 'el smasnil sniwnal yu'uj, a tzyal tas tzyutj win ya'mal 'och sti eb' 'anma chi yiln 'ochi, tztac' xo yaln winac to man̈x 'a smay, tztac' yoch 'a scal yit 'anma'il.

^14-15 Palta q'uinloc tzcheclj pax chan̈ jun yab'il chi jun 'ejm xo, to 'ixta', tzwul sch'oxx 'a win ya'mal 'och sti eb' 'anma cha. Ax tz'iln 'och jun yab'il cha. Toto chacx yilx sat, ax win tzalni to lepra jun cha. A jun 'anma cha, man̈xtzac stac' jun tz'aj yet' yit 'anma'il.

¹⁶ Palta toto a schib'jal jun 'anma cha, tzsacb' pax 'el jun 'ejm xo, yowlal tzcotx 'a win ya'mal 'och sti eb' 'anma cha.

¹⁷ Tzsayn pax win yila', toto sacx yilx jun yab'il cha, ax win tzalni to man̈x 'a smay, tzax stac' yoch 'a scal yit 'anma'il.

¹⁸ Q'uinloc 'ay junc mach 'aj tzq'ue junc malel 'a sniwnal, palta tzc'och 'ijnoc stacji,

¹⁹ ax tz'aji tzcheclj chan̈ junc yab'il sac mto chac yilx 'a sjech'l jun yab'il cha. A jun cha, yowlal tzcot 'a win ya'mal 'och sti eb' 'anma cha.

²⁰ Ax win tz'ilni toto man̈ cojnoc 'a stz'umal 'aychi. Toto sacx yilx xil yu'uj, ax win tzalni to lepra jun yab'il cha, man̈xtzac stac' jun tz'aj yet' yit 'anma'il.

²¹ Toto tzyil winac to a jun yab'il cha, may yich 'ay't 'a xab', matz sacb' xil yu'uj, cojn 'a stz'umal 'ay, mto wan xo stacji, toto 'ixta', a jun 'anma cha, yowlal tzmacx 'a yol n̈a uque'oc c'ual.

²² Toto yelc'ojlal tzb'ey jun yab'il chi 'a stz'umal jun 'anma cha, to 'ixta', tzyaln win ya'mal 'och sti eb' 'anma cha, to lepra jun yab'il cha. Yuj cha, man̈xtzac stac' jun tz'aj yet' yit 'anma'il.

²³ Palta toto matz b'ey jun yab'il cha, tzyal 'el'chi to cojn sjech'l jun yab'il chi tzcani. Toto 'ixta', ax win ya'mal 'och sti eb' 'anma chi tzalni chajtlto man̈x 'a smay jun yab'il cha.

²⁴ An̈jtona', toto 'ay junc mach 'ay junc tz'anc 'a sniwnal, tzcheclj schib'jal 'a 'aj tz'anc cha, axta tzcheclj chan̈ junc tas sac yilxi, mto chac yilxi, to tzb'eyi.

²⁵ Ax win ya'mal 'och sti eb' 'anma chi tz'ilni, toto a xil sat cha, wan sacb'i, mto wan xo s'at yich 'a xab', toto 'ixta', lepra jun yab'il chi tzcheclj chan̈ cha. Ax win ya'mal 'och sti eb' 'anma chi tzalni to lepra xo jun cha, yuj cha, man̈xtzac stac' jun tz'aj jun 'anma chi yet' yit 'anma'il.

²⁶ Palta toto a yic tzyiln win ya'mal 'och sti eb' 'anma cha, to may xil jun yab'il chi tzsacb'i, man̈ wanoc s'at yich 'a xab', wan stacj jun yab'il cha, yowlal tzmacx jun 'anma chi uque'oc c'u 'a yol n̈a.

²⁷ Ax yic tzlajw uque c'u cha, tzyiln pax winac; toto tzb'ey 'a stz'umal jun 'anma cha, ax win tzalni to ya xo 'ay jun 'anma chi yuj lepra, yuj cha, man̈xtzac stac' jun tz'aj yet' yit 'anma'il.

²⁸ Palta toto a 'aj tz'anc cha, wan xo sb'oxi, ton̈j malnc cani yujto tz'anac, ax win ya'mal 'och sti eb' 'anma chi tzalni, to a jun yab'il cha, man̈x 'a may, yujto cojn sjech'l jun tz'anc chi tzcani.

²⁹ Toto a junc winac, mto junc 'ix 'aj tzq'ue junc c'on yab'il 'a sjolom, mto 'a yaln̈ sti',

³⁰ ax win ya'mal 'och sti eb' 'anma cha, yowlal tzyil win jun yab'il cha. Toto wan s'at yich 'a xab', mto wan sc'anb' 'el xil chi yu'uj, ax win tzalni to man̈xtzac stac' jun tz'aj jun 'anma chi yet' yit 'anma'il, yujto 'ayxq'ue lepra chi 'a 'a.

³¹ Palta toto ax yic tzyiln winac, to a jun yab'il cha, may yich, mant 'a pax xil tzq'uic'b'i, yowlal tzmacx uque'oc c'u 'a yol n̈a.

³² Ax yic tzlajw uque c'u cha, tzyiln pax winac, toto matz b'ey jun yab'il cha, may yich, may pax xil tzc'anb' 'eli,

³³ tztac' yaln winac to tzjoxx 'el xil 'a stitc jun yab'il cha, tzmacx pax jun 'anma chi uque'ocx c'u.

³⁴ Ax yic tz'ec' uque xo c'u cha, tzyiln pax win jun 'ejm xo. Toto matz b'eyi, matz 'at pax yich 'a xab', ax yaln winac to man̈x 'a smay jun yab'il cha. Tzlajw cha, tzju'n 'el jun 'anma chi spichul, tztac' yochx 'a scal yit 'anma'il.

³⁵ Palta q'uinloc a yic tox 'ix alxi chajtlto wach'x jun 'anma cha, ax tz'aji, tzyamn 'och sb'eyx jun yab'il chi 'a 'a,

³⁶ ax win ya'mal 'och sti eb' 'anma cha, yowlal tzyil win jun yab'il chi jun 'ejm xo. Toto tzb'eyx 'a stz'umal jun 'anma cha, man̈x yowlalc tzsay win yil xil cha, tzyal 'el'chi to lepra jun yab'il cha, man̈xtzac stac' yaj jun 'anma chi 'a scal yit 'anma'il.

³⁷ Palta toto wan xo scotx xil q'uic' yilxi, wan xo pax stacj sat cha, a yic tzyiln win jun cha, tzyaln winac chajtlto man̈x 'a smay jun yab'il cha.

³⁸ An̈jtona', toto 'ay junc winac, mto junc 'ix 'ay sacjech' 'a stz'umal,

³⁹ ax junc win ya'mal 'och sti eb' 'anma chi tz'iln stz'umal cha, toto sac yilxi, palta man̈ n̈echch'ic yilx sat, toto 'ixta', comn yab'il jun cha, ax jun 'anma cha, tztac' tzcan 'a scal yit 'anma'il.

^40-41 Toto 'ay junc winc tzpucl xil sjolom, tzann̈j 'aj tzpucl 'a sjolm cha, man̈x 'a xil tzcani, a jun cha, man̈ yab'iloc, may smay jun cha.

^42-44 Palta toto tzq'ue junc c'on yab'il 'a 'aj may xil sjolm cha, to sac mto chac yilxi, lajn yilx 'icha lepra. Toto 'ixta', yowlal tzch'oxx yil win ya'mal 'och sti eb' 'anma', ax win tzalni chajtlto lepra jun 'ayx 'och 'a jun 'anma cha, man̈xtzac stac' scan 'a scal yit 'anma'il.

⁴⁵ A mach ya'ay yuj lepra cha, yowlal jatquixtac spichl tzya'chi, tz'el pax sc'oxl sjolom, tzmacx sat yic tz'at 'a scal 'anma'. Yowlal tz'el yaw tz'eq'ui. 'Ixtcn̈ej tzyutj yalni: 'Aych yab'il 'ayin, man̈ ex jawc 'a in tz'ey, xchi.

⁴⁶ A yic 'aych jun yab'il chi 'a 'a, yowlal tz'ijx 'el 'a scal 'anma', yujto 'ay smay jun yab'il cha, ata tz'at cancn 'el sch'ocj 'a spatc 'el camplamento.

⁴⁷ A yic tzc'uxmax yilx junc pichul, lana mto lino,

⁴⁸ a tzyala tas yaj sb'o'i, to ch'umb'il mto jalb'il, mto junc no tz'um yamc'ab', mto junc xo tas tz'um yaj sb'o'i,

⁴⁹ toto yax yilxi, mto chac yilx jun tzo'n̈ sc'uxmtacl cha, yowlal tzch'oxx 'a win ya'mal 'och sti eb' 'anma cha.

⁵⁰ Ax win tz'iln jun tzo'n̈ c'uxmtac cha, tztac' smacx junc chi 'a yol n̈a uque'oc c'u.

⁵¹ Ax 'a yic tzlajw uque c'u cha, tz'ilx pax jun chi jun 'ejm xo. Toto tzb'ey 'a sat te pichl cha, mto 'a jun tz'um tzc'anx cha, a jun cha, sc'uxmtacl 'aych 'a 'a. A jun tzo'n̈ yamc'ab' cha, caw 'ay smay.

⁵² Tzann̈j pichlal, mto yamc'ab' to 'ayx jun c'uxmtac chi 'a 'a, yowlal tz'ajx tz'a smasnil, yujto a jun cha, niwn tas tztac' sjuw 'el yu'uj.

⁵³ Palta toto a yic tzyiln win ya'mal 'och sti eb' 'anma cha, to matz b'ey jun c'uxmtac cha,

⁵⁴ toto 'ixta', tzyac' win b'icxc 'el jun yamc'ab' cha, tzya'n pax win macx uque'ocx c'u.

⁵⁵ Ax yic tox 'ix b'icx 'eli, tzlajw cha, tzyiln pax win ya'mal 'och sti eb' 'anma cha, to matz sat jun c'uxmtac cha. Wach'xam matz b'eyi, yowlal tz'ajx tz'a'oc, wach'xam a 'a spatquil 'aychi, mto 'a yojol. A jun cha, caw 'ay smay.

⁵⁶ Palta toto ax yic tzyiln winac, to wan xo sati, to 'ixta', tzlot'x 'eli, mto tzpolx 'el 'a jun pichl cha, mto 'a jun yamc'ab' cha.

⁵⁷ Toto tzcheclj pax chan̈ jun sc'uxmtac chi jun 'ejm xo, a jun cha, yowlal tz'ajx tz'a b'i'an.

⁵⁸ A pax jun tzo'n̈ tas 'aj tzsat jun tzo'n̈ c'uxmtac cha, yowlal tzb'icx 'el pax jun 'ejm xo, sec tzb'ox can 'el junc yamc'ab' mto junc pichl cha, xchi Dios 'a Moisés yet' 'a Aarón.

⁵⁹ Atn jun tzo'n̈ checnb'il tic, yuj jun tzo'n̈ c'uxmtac tzpitzw chan̈ 'a junc pichl ton̈j ch'umb'il, mto jalb'il, lana mto lino, mto 'a junc tz'u'um, sec 'ixta tz'aj scheclj 'eli, 'aj 'ay tas 'ay smay yet' tas may smay.