Lv 11 - Chuj San Sebastian Bible

No noc' tzchixi, yet' no matz chixi

¹ 'Ix yaln Jehová 'a Moisés yet' 'a Aarón 'ixtic:

^2-3 Alc yab' smasnil eb' eyit israelal cha, to a 'a scal smasnil no noc' 'ay 'a sat lum lum tic, 'ay no wach' e chini: atn no tzjax yan̈, no chaxaln̈ cab' yech.

^4-7 Palta 'ay jun tzo'n̈ xo no 'oj wal tic, ma'oj stac' e chin no', wach'xam tzjax no yan̈, toto man̈ chaxaln̈oc yech no', yowlal tzeyojquej 'eli, to may sleyl tzchix no': no cameyo tzjax no yan̈, palta man̈ chaxaln̈oc yech no'; no chich tzjax no yan̈, palta niwn yech no'; no liebre tzjax no yan̈, palta niwn yech no'; no chitam chaxaln̈ yech no', palta matz jax no tas tzc'uxu.

⁸ Matz tac' e chin jun tzo'n̈ no noc' tic, caw matz tac' eyamn pax no 'a yic chamnc xo no'.

⁹ Ax pax no 'ay 'a yojl a', no 'ay 'a yojl a mar mto 'a yojl a b'eymal a', a no 'ay sma'lab' yet' no 'ay solcal, cojn no tztac' e chini.

¹⁰ Palta ax no may sma'lab', yet' no may solcal cha, yowlal tzeyojquej 'eli, to yajb'il 'el no', wach'xam 'a yojl a mar mto 'a yoltc a b'eymal a 'ay no'.

¹¹ Man̈ e chi schib'jal no', yujto yajb'il 'el no', caw matz tac' eyamn pax no', yic chamnc xo no'.

¹² Smasnil no noc' 'a yol a', no may sma'lab', yet' no may solcal, yowlal tzeyojquej 'eli, to yajb'il 'el no'.

^13-19 'Ixta pax 'a scal no ch'ic, may sleyl tze chi jun tzo'n̈ no 'oj wal tic, yowlal tzeyojquej 'eli, to yajb'il 'el e no': no salt'iw, no niwc xulem, no salt'iw yic a mar, no milano, smasnil no niwc c'uc'um, smasnil no joj, no avestruz, no tonton, no gaviota, smasnil no salc'uc'um, no cujub', no cormorán, no ibis, no cisne, no pelícano, no 'usej, no cigüeña, smasnil no julm chay, no abubiya yet' no sotz'.

²⁰ Yet' pax smasnil no cotc noc' tzjen̈wi mto tzb'ey xecxnoc 'a sat lu'um, may sleyl tze chi no', yowlal tzeyojquej 'eli chajtlto yajb'il 'el no'.

²¹ Palta ax no 'ay yip yoc sb'atjchan̈ 'a sat lu'um, wach'xam tzjen̈w no', wach'xam tzb'ey pax no 'a sat lu'um, tztac' e chin no'.

²² A 'a scal smasnil no cha, tztac' e chin smasnil no 'oj wal tic: no turin, no niwc yax turin, no chilich yet' no b'ojch'in.

²³ Palta ax smasnil no cotc noc' tz'ec' jen̈n̈oc mto tzb'ey 'a sat lu'um, a no cha, may sleyl tze chi no', yowlal tzeyojquej 'eli chajtlto yajb'il 'el no'.

²⁴ Toto tzeyam jun tzo'n̈ no noc' tic, caw man̈ wach'c tzex 'ajcni. Tzann̈j mach tzyamn sniwnal junc chamnc noc', caw man̈ wach'c tz'ajcn yu'uj, masnto yic tzq'uic'b'i.

²⁵ Tzann̈j mach tzsi'n chan̈ sniwnal junc no chamnc noc', yowlal tzju'l spichul, palta man̈ wach'c tz'ajcn yu'uj masnto yic tzq'uic'b'i.

²⁶ A smasnil no noc' 'ay yech, man̈ chaxaln̈oc yech no cha, matz jax pax no yan̈, a jun tzo'n̈ noc' cha, yowlal tzeyojquej 'eli chajtlto may sleyl tze chi no'. Tzann̈j mach tzyamn no', caw man̈ wach'c tz'ajcni.

²⁷ Tzann̈j noc'l to chan̈e yoc, niwn pax sc'ab', a jun tzo'n̈ noc' cha, may sleyl tze chi no'. A mach tzyamn junc no noc' chi 'a yic chamnc xo no', caw man̈ wach'c tz'ajcni, masnto yic tzq'uic'b'i.

²⁸ 'Ixta pax junc mach tzsi'n chan̈ sniwnal junc no chamnc noc' cha, yowlal tzju'l spichul, palta man̈ wach'c tz'ajcn yu'uj, masnto yic tzq'uic'b'i, yujto man̈ wach'c jun tzo'n̈ noc' cha.

^29-30 An̈jtona smasnil no noc' tzjucsb'a 'a sat lu'um, caw man̈ wach'c no', atn no tic: no chaclajway, no ch'o'ow, no pajtza' yet' smasnil no tzjucsb'a, no q'uix'uchum, no 'ayin, no lagarto, no 'intam, no patix, yet' no tzaljcab'.

³¹ A smasnil no tic, man̈ wach'c no'. Tzann̈j mach tzyamn junc no noc' tic 'a yic chamnc xo, man̈ wach'c tz'ajcni, masnto yic tzq'uic'b'i.

³² Q'uinloc 'ay junc tas 'aj tz'em no chamnc noc' chi 'a yib'an̈, a jun tzo'n̈ cha, man̈ wach'c tz'ajcn yuj no'. 'Icha junc te yamc'ab', junc pichul, junc tz'u'um, junc coxtal, junc yamc'ab' yic munljel. A jun tzo'n̈ cha, yowlal tzlab'x 'ejm 'a yol a', yujto man̈ wach'c tz'ajcn yu'uj, masnto tzq'uic'b'i; tzlajw to chi b'i'an tzb'ox cani.

³³ Q'uinloc tz'em sniwnal junc no chamnc noc' chi 'a yol junc lum chen, a smasnil tas 'ay 'ejm 'a yojl lum cha, man̈ wach'c tz'aj yuj no', ax jun chen cha, yowlal tzma'x pojoc.

³⁴ Smasnil tas wach' sc'uxx 'aj tz'ejm a a 'ay 'a yojl lum chen cha, man̈ wach'c tz'ajcn yu'uj. Mto 'ay 'ejm 'uc'b'il 'ixm 'a yol jun chen cha, an̈jtona man̈ wach'c tz'ajcn yu'uj.

³⁵ Smasnil tas 'aj tz'em junc no chamnc noc' chi 'a yib'an̈, a jun tzo'n̈ cha, man̈ wach'c tz'aji; 'icha junc jorna, mto junc yet'l c'ac', yowlal tzpojx 'ejmi. A jun yamc'ab' cha, man̈ wach'c tz'ajcn yu'uj. Yowlal tzeyojquej 'eli chajtlto man̈ wach'c jun tzo'n̈ cha.

³⁶ Palta q'uinloc a 'a yol junc a 'uc'b'il a tz'em no', mto 'a 'aj tzpac' jun a cha, wach'n̈j a', may tz'aj sjuwi; palta a mach tz'i'n q'uet no 'a yojl a', atn jun chi man̈ wach'c tz'ajcni.

³⁷ Q'uinloc tz'em sniwnal junc no chamnc noc' chi 'a yib'n̈ jun c'ajoc 'in̈at, a jun c'aj 'in̈t cha, wach'n̈ej.

³⁸ Palta q'uinloc a jun c'ajoc 'in̈t lab'b'il xo 'aj tz'em junc no chamnc noc' chi 'a yib'an̈, a jun tzo'n̈ 'in̈t cha, man̈x wach'oc.

³⁹ Q'uinloc 'ay mach 'aj tzcham junc no noc', no to tzchix xoni; a mach tzyamn sniwnal no chamnc noc' cha, man̈ wach'c tz'ajcn jun 'anma chi yuj no', masnto yic tzq'uic'b'i.

⁴⁰ A mach tzchin schib'jal no chamnc noc' cha, a jun cha, yowlal tzju'l spichul, yujto man̈ wach'oc, masnto yic tzq'uic'b'i. A mach tz'i'n 'el jun chamnc noc' cha, yowlal tzju'l pax spichul, yujto man̈ wach'c tz'aj yuj no' masnto yic tzq'uic'b'i.

^41-42 Man̈ e chi smasnil no noc' tzjucsb'a 'a sat lu'um, wach'xam no tzb'ey yet' schan̈l yoc, mto no niwn yoc. A jun tzo'n̈ noc' cha, yajb'il 'el no'.

⁴³ Man̈ eyixtc 'el e b'a yuj no noc' man̈ wach'c cha, yujto tzex juw can 'el yuj no'.

⁴⁴ An tic Jehová e Diosal in, yuj cha, 'ijec 'el e b'a 'a jun tzo'n̈ tas man̈ wach'c cha. Yowlal wach'n̈j tzeyutj e b'a, yujto an tic, caw wach'nn̈ej. Yuj cha, caw matz tac' eyixtn 'el e b'a yuj jun tzo'n̈ no noc' cha.

⁴⁵ An tic Jehová in, an ex wij 'elt 'a Egipto, yic tzin 'och e Diosaloc, caw wach'n̈j tzeyutj e b'a, yujto an tic, caw wach'nn̈ej, xchi Dios.

^46-47 Atn wal jun tzo'n̈ checnb'il tic tzyal yuj smasnil no noc', sec wach' tznachj 'el cujec, 'aj 'ay no noc' wach' schixi, yet' pax no matz chixi: atn yuj no ch'ic, no noc' 'ay 'a yojl a', yet' smasnil no tzjuc sb'a 'a sat lu'um.