Lv 10 - Chuj San Sebastian Bible

A smul win Nadab yet' Abihú

¹ A chawn̈ eb' yunnal Aarón, atn Nadab yet' Abihú, 'ix yij cot junjn eb' stz'ab'c'ac'. 'Ix ya'n 'och eb' sc'aq'uil, xya'n pax 'ejm eb' incienso 'a yib'an̈. Xlajw cha, xya'n 'och eb' jun c'ac' chuc yel 'a yojltac Jehová, to man̈oc 'ix aln 'a eb'.

² Yuj cha, x'elt c'ac' 'a yojltac Jehová, 'ix tz'a eb' yu'uj, 'ixta x'aj eb' scham 'a yojltac.

³ Xlajw cha, xyaln Moisés 'a Aarón 'ixtic: —Yuj jun tic, x'el'ch tas yaljnac Jehová 'ayin yic yaln 'ixtic: A eb' tzin 'a'n servil, yowlal 'ay cab' wel'ch 'a sat eb'. 'Oj in ch'oxli to niwn wel'ch 'a smasnil eb' israel, xchi Dios, xchi Moisés. Ax Aarón man̈x 'a tas 'ix yala.

⁴ 'Ix yawtn cot Moisés win Misael yet' Elsafán, atn eb' yunnal Uziel, win yican Aarón, xyaln 'a eb' 'ixtic: —Cotn̈ec ax tic, 'ijc 'el sniwnal ewin eyican xcham 'a Mantiado tic, 'ijc 'el 'a spatquil 'el camplamento, xchi 'a eb'.

⁵ 'Ix c'och eb', xyi'n 'elt eb' sniwnal ewin chi 'a spatc 'el camplamento cha, 'icha xyutj Moisés yaln 'a eb'. A ewin chamnc cha, 'ayt 'och spichl ewin yic yopiso chi yu'uj.

A tas yowlal tzb'o*r* eb' ya'mal 'och sti eb' 'anma'

⁶ Yajn̈j wal cha, xyaln Moisés 'a Aarón, yet' 'a Eleazar yet' pax 'a Itamar, atn eb' yunnal Aarón pitznto cha: —Man̈ eyi'l sc'oxl e jolom, man̈ e tzil-l pax e pichul yic tze ch'oxn 'el e cusc'ojlal, axta laj x'aji, tzex chami. Nab'a 'oj cot yowl Jehová 'a quib'n̈ qui masnil an̈ israel on̈ec tic. Palta a smasnil eb' quit chon̈b'ec tic, tztac' scus eb' yuj ewin x'ajx cham yuj Jehová yet' te c'ac' tic.

⁷ Man̈ ex 'el pax 'a yol Mantiado tic, sec wach' matz ex chami, yujto ax tic, sic'b'ilx 'eli, 'ac'b'il q'ue perjuma yic Jehová 'a e jolom, xchi Moisés 'a eb'. 'Icha wal xyutj yaln cha, 'ixta xyutj sb'a eb'.

⁸ 'Ix yaln pax Jehová 'a Aarón 'ixtic:

⁹ A yic 'oj ocht ach tic, mto eb' onnal 'a yol Mantiado tic, man̈ eyuc' yal uva, mto junc xo tas jawnc xo sti', sec matz ex chami. A jun tic ley tz'ajcn 'a e cal 'a smasnil tiempo yet' 'a eb' eyin̈til.

¹⁰ Man̈ e b'o jun tzo'n̈ cha, sec tznachj 'el eyu'uj 'aj 'ay tas wico', yet' pax jun tzo'n̈ tas comn yaji. Nachj cab' pax 'el eyu'uj, tas jun tzo'n̈ wach' yaj sacb'tzax 'icha yaln ley, yet' jun tzo'n̈ tas man̈ wach'oc.

¹¹ Yowlal tze cuy pax eb' eyit israelal 'a jun tzo'n̈ ley xwac' yal Moisés 'ayex, xchi 'a Aarón.

¹² Xlajw cha, xyaln Moisés 'ixtc 'a Aarón, 'a Eleazar yet' pax 'a Itamar, cha: —'Ijec cot 'ixm harina xcan 'a 'ixm ofrenda stz'a 'a yojltac Jehová, tze b'on 'ixm pan may yich, tze wan 'a stz'ey yet'l xajmb'al, yujto a jun cha, yic Jehová yaji.

¹³ Ata tze c'ux 'a yamq'uil Mantiado, yujto a jun ofrenda tz'ajx tz'a cha, ec yaj yet' eb' onnal. Atn jun tzo'n̈ tic xyal Jehová 'ayin.

^14-15 A no xepu tzeyac' tz'a'oc, junn̈j tzeyutj eyi'n 'och no yet' no sn̈i sc'ojl tzb'achx 'och 'a yojltac Jehová cha, yet' no xub'. A no sn̈i sc'ojol yet' no xub' cha, eyic yaj no'. Ata tza chi no yet' eb' onnal yet' eb' esl 'a junc lugar to wach' yaji, yujto a jun tzo'n̈ cha, eyic yaj 'a no xajmb'al yic junc'ojlal tzyac' smasnil eb' israel. A chac'aj no chib'j cha, ec yaj no 'a smasnil tiempo yet' eb' onnal, 'icha 'ix yutj Jehová yaln 'ayin, xchi Moisés cha.

¹⁶ 'Ix sc'anb'n pax Moisés yuj no chiwo x'ajx xajmb'al-l yuj yajx lajwc mul. 'Ix yaln eb' yunnal Aarón, chajtlto tox 'ix 'ajx tz'a no'. Yuj cha, caw xcot yowl Moisés 'a Eleazar yet' 'a Itamar, atn chawn̈ xo eb' yunnal Aarón tic pitznto cha, 'ix yaln 'a eb' 'ixtic:

¹⁷ ¿Tas yuj ma'ix e chi no xajmb'al 'a yamq'uil Mantiado? A jun xajmb'al cha, yicn̈ej Jehová yaji. Yuj cha, xya'n no 'ayex, yujto a yic tze chin no', tze cuchn can smul eb' chon̈ab', sec 'ixta wal tzyutj Jehová ya'n lajwc can smul eb' cha.

¹⁸ Yujto a schic'l no xajmb'al cha, ma'ix 'ijx 'at 'a yol scajnub' Dios, yuj cha, smoj ata xe chi no 'a yamq'uil Mantiado cha, 'icha 'ix wutj waln 'ayex, xchi Moisés 'a eb'.

¹⁹ 'Ix ta'w Aarón 'ixtc 'a Moisés: —A ticnec, 'ix yac' eb' xajmb'al 'a yojltac Jehová, yuj yajx lajwc mul, yet' no xajmb'al tz'ajx tz'a smasnil. Toxn̈ej am 'ixta', palta 'ilt wal tas 'ix jaw 'a wib'an̈. Q'uinloc xin chi no xajmb'al x'ajx yuj mul cha, ¿yamto wal wach' 'a sat Jehová? xchi Aarón cha.

²⁰ A yic xyab'n Moisés jun cha, man̈x 'a tas 'ix yala.