Lv 1 - Chuj San Sebastian Bible

A jun tzo'n̈ xajmb'al tzn̈usxi

¹ 'Ix yawtn Jehová Moisés 'a yol Mantiado 'aj tzchaj sb'a yet' eb' 'anma', 'ix yaln 'a 'ixtic:

² Al yab' eb' et israelal, to an tzwal jun tzo'n̈ checnb'il tic: Toto 'ay junc mach tz'i'n cot junc no noc' xajmb'al-l 'ayn an Jehová in, a cab' 'a scal swacax, mto 'a scal scalnelu, mto 'a scal schiwo tzyij 'elt no noc' cha.

³ Toto wacx no tzyac' xajmb'al-l cha, a wal junc no quelm wacx caw wach' may spaltail, a tzyij cot 'a wojltac 'a yamq'uil Mantiado.

⁴ Yowlal tzyac' q'ue jun 'anma chi sc'ab' 'a sjolm no noc' cha, sec chab'il no 'a 'a, yuj yajx lajwc smul.

⁵ Tzlajw cha, tzmiln cham no 'a wojltac an Jehová in, ax eb' yunnal Aarón, atn eb' ya'mal 'och sti eb' 'anma', a eb' tz'i'n cot schic'l no', tzicn 'och eb' 'a schan̈paq'uil jun yet'l xajmb'al 'ayc' 'a yojltac Mantiado.

⁶ A mach 'ay yic no noc' cha, a tzpatz'n 'el stz'umal no', tzcotc tzu'n 'at schib'jal no'.

⁷ Ax eb' ya'mal 'och sti eb' 'anma cha, ax eb' tz'a'n q'ue c'atztz 'a yib'n̈ yet'l xajmb'al, tzya'n 'och sc'aq'uil,

⁸ sec ata tz'ajx q'ue no chib'j cotc yaj stzu'x chi 'a yib'n̈ te c'atztz cha, no sjolom yet' pax xepual no sch'an̈quin.

⁹ A mach tz'a'n no xajmb'al cha, yowlal a tzmaxn 'el no yol sc'ojol, no xub' yet' pax no yoc. Ax win ya'mal 'och sti eb' 'anma cha, a win tz'a'n tz'a no smasnil 'a yib'n̈ yet'l xajmb'al cha. A jun xajmb'al cha, caw wach' sjab' tzwab' an Jehová in.

¹⁰ Toto calnelu mto chiwo no tz'ajx xajmb'al-l cha, yowlal a junc no smam tzyac' junc mach cha, no may spaltail.

¹¹ A 'a stojlal norte 'a jun yet'l xajmb'al cha, ata tzmilx cham no 'a wojltac, ax eb' yunnal Aarón, a eb' tzicn 'och schic'l no 'a yib'an̈ yet' 'a schan̈paq'uil jun yet'l xajmb'al cha.

¹² Tzlajw cha, tzcotc tzu'x 'at schib'jal no', ax win ya'mal 'och sti eb' 'anma chi tz'a'n q'ue no chib'j cotc tzuc'b'il chi 'a yib'n̈ c'ac' cha, junn̈j tz'aj stz'a yet' no sjolom, yet' pax xepual no sch'an̈quin.

¹³ A mach tz'a'n no xajmb'al cha, yowlal a tzmaxn 'el no yol sc'ojol, no xub' yet' pax no yoc; ax win ya'mal 'och sti eb' 'anma cha, a tz'a'n tz'a no smasnil 'a yib'n̈ jun yet'l cha. A jun xajmb'al cha, caw wach' sjab' tzwab' an Jehová in.

¹⁴ Toto ch'ic junc no xajmb'al tz'ajx tz'a 'a wojltac, yowlal a junc no cajb'il ch'ic, junc no cowojte', mto junc no parama tz'ajxi.

¹⁵ Ax win ya'mal 'och sti eb' 'anma chi tz'i'n cot no 'a yet'l xajmb'al, ax win tzto'n 'el sjaj no', tz'el no sjolm cha. Tzlajw cha, tz'ajx tz'a no 'a yib'n̈ yet'l xajmb'al, yowlal pax tzicx 'och schic'l no 'a junc spac'b'il jun yet'l xajmb'al cha.

¹⁶ Tz'ijx 'el spal yoch no', yet' xil no', tzjulx can 'at 'a yojltac 'at jun yet'l xajmb'al cha, 'a stojlal 'aj tzq'uel c'u, 'a 'aj tzmolb'tzax stan̈il c'ac'.

¹⁷ Tzyamx sc'axl no', tzjecchtax 'at sb'acl yich spatc no', palta matz poj snan̈l no 'a jun 'ejmn̈ej. Tzlajw cha, tz'ajx tz'a no 'a yib'n̈ te c'atztz 'ay q'ue 'a yib'n̈ yet'l cha. A jun xajmb'al cha, caw wach' sjab' tzwab' an Jehová in.