Lm 5 - Chuj San Sebastian Bible

Slesl eb' 'aj Jerusalén A eb' 'aj Jerusalén xleslwi eb' 'ixtic:

¹ Mamin Jehová, na coti jantc wal tas x'ec' 'a quib'n̈ on̈, 'ilt wal tzon̈ 'aj quixtx on̈.

² Smasnil tas 'ay 'ayn̈ on̈, yol sc'ab' eb' chuc chon̈b'al xo 'aj 'ayq'ui. A catut on̈, yic xo eb' chuc 'anmal yaji.

³ Meb'a 'unn on̈ 'ajcn on̈, man̈x 'a qui mam on̈, ax eb' qui nun on̈, 'ix can eb' sch'ocoj, man̈x 'a yichmil eb'.

⁴ A ca'al yet' qui c'atztz tzqui c'ana, to tzqui man on̈.

⁵ 'Ayn̈j 'och eb' 'ajc'ojl on̈ spechn b'eyc'oc on̈, caw tzon̈ c'unb' quec' on̈, palta matz nib'j eb' tzon̈ 'ilj xon jab'oc.

⁶ Xqui b'acht qui c'ab' 'a eb' 'aj Egipto, yet' 'a eb' 'aj Asiria, yuj qui chan jac tas tzqui c'ux 'a eb'.

⁷ A eb' qui mam quichm on̈, a eb' 'ochnc smul, palta chamnc xo eb'. Ax ticnec, a 'a quib'n̈ tzjaw yailal yuj smul eb' cha.

⁸ A ticnec, 'ayn̈ 'och 'a yol sc'ab' eb' 'aych mosoal, may mach tzon̈ coln 'a eb' on̈.

⁹ Scal xiwc'ojlal tz'at quic' jac tas tzqui c'ux on̈, yujto 'ay smay yuj eb' 'a'm owl 'a lum cusltac lu'um.

¹⁰ Caw wal tz'a qui tz'umal yuj c'ac' tzpitzw chan̈ 'ayn̈ yuj wejl on̈.

¹¹ A wal 'a chon̈b' Sión yet' 'a jun tzo'n̈ xo chon̈b' 'ay 'a Judá, caw tz'ixtx eb' 'ix 'ix yet' pax eb' 'ix cob'stac 'ix yuj ewin winac.

¹² 'Ix q'ue t'un̈n eb' qui yajlil yuj eb' 'ajc'ojl yajch 'ayn̈ on̈, man̈x 'a xon jac yel'ch eb' 'ichmtac winc 'a sat eb'.

¹³ A eb' quelm caw 'ay yip, 'ix 'ajx 'och eb' chenoc, ax eb' quelmtac 'unin, 'ix laj telw eb' 'a yaln̈ sc'atzitz.

¹⁴ Man̈x 'a eb' 'ichmtac winc tz'em wocn 'a sti spuertail chon̈ab' yic tzb'eyc'ojlwi, man̈x 'a pax eb' quelm 'unn tz'ab'x sb'itni.

¹⁵ Man̈x 'a xon jac qui tzaljc'ojlal on̈. A chan̈l yic tzaljc'ojlal, 'ix meltzj 'och 'a cusc'ojlal.

¹⁶ Man̈xtzac on̈ b'inax 'icha 'a yic yalan̈, caw 'oltac tzon̈ 'aj on̈, yujto 'ix 'och qui mul on̈.

¹⁷ Yuj cha, caw ya caj tzcab' on̈, caw wal tz'och pax 'a qui sat on̈.

¹⁸ A chon̈b' Sión, 'ix lan̈chj 'ejm can smasnil, axn̈ej no wax tzlaj 'ec' ta'.

¹⁹ Ach xo tic Mamin Jehová, caw wal Yajl ach 'a smasnil tiempo; 'ayc'n̈ej opiso 'a jun 'ejmn̈ej.

²⁰ ¿Tas yuj xac' sat a c'ojl 'ayn̈ 'a jun 'ejmn̈ej on̈? ¿Tas yuj caw niwn xo tiempo qui can oj on̈?

²¹ Mamin Jehová, 'ij on̈ meltzjoc pax 'aych jun 'ejm xo on̈, caw tzqui nib'j tzon̈ meltzj paxi. Comnoc wach' tz'ec' cuj jun 'ejm xo, 'icha xon caj 'a yic yaln̈tax on̈.

²² Palta ach tic, jun 'ejmn̈ej on̈ a patquilj 'el on̈, yel xo xcot yowl a c'ojl 'a quib'n̈ on̈.