Lm 3 - Chuj San Sebastian Bible

Yailal, najb'ail, yet' yipc'ojlal Tzyaln win schecb' Dios 'ixtic:

¹ An tic, caw niwn xwab' syal yuj yowl sc'ojl Dios.

² In spechcn 'at 'a scal q'uic'q'uinl 'aj may xon jac sacq'uinal. In ya'n b'ey 'a b'e yic may in cantil wet'i.

³ 'Aychn̈ej in sma'ni tz'ec' c'u yet' yowl sc'ojol.

⁴ 'Ix yac' 'ichmb'oc in niwnal, choc' xyutj can in b'aquil.

⁵ 'Ix meltzj 'och yac' owl wet'oc, 'ix 'och oyn yailal 'ayn yu'uj, man̈x jantcoc somc'ojlal xjaw 'ayin.

⁶ A 'a scal q'uic'q'uinl in ya'cn 'ati, lajn waj 'icha yaj eb' pectix chamnac.

⁷ 'Icha to in smacch 'a yol col-l 'aj man̈xtzac stac' weli; 'icha to in sjal yet' niwc cadena.

⁸ Wach'xam tzat cob' 'el waw in c'ann scolwal, man̈xtzac schaj xon in lesal.

⁹ 'Icha to smac in b'e yet' q'uen q'ue'en, yic tzin jeln in b'e 'aj tzin b'eyi.

^10-11 Lajn wal xyutj sb'a 'ayn 'icha junc no oso tzc'ub'j 'el sb'a, mto 'icha junc no león tznib'j tzin smil chamoc, tzin sjucn 'el no 'a sti b'e yic tzin sch'iychtani, tzlajw cha, tzin yactn cani.

^12-13 'Icha wal to stojlb'tzej 'och Dios chi sjul-lab' 'ayin, in slin̈n 'och 'a sat sjul-lab' cha, sjuln 'och 'ayn xwab'i, 'icha to xc'axw 'ec' 'a in niwnal.

¹⁴ Smasnil eb' wit chon̈ab', cojxn b'uchwal paxti tzyal eb' 'a in patic, an xoj tzin yal eb' 'a scal sb'uchwal spaxti'.

¹⁵ Caw wal xwab' syal tas in yutej, man̈x 'a jac sja'l wico'.

¹⁶ 'Icha to in yec telwoc xin ma'n 'ejm we, xb'ut'j yol in ti yet' pococ yet' tzaq'ue'en.

¹⁷ Man̈x 'a in junc'ojlal, man̈x nanoc tzaljc'ojlal wu'uj.

¹⁸ Yuj cha, xwaln 'ixtic: A ticnec x'el wip, man̈x 'ayc 'och Jehová yipc in c'ojol, xin chi.

¹⁹ A yic tzin nan cot in cusc'ojlal, yet' yic in can in ch'ocoj; caw wal tzwab' syal si'mb'il.

²⁰ A wal yic tzin nan cot jun tzo'n̈ cha, caw man̈x in 'anmac tzwab'i.

²¹ Palta 'ay jun tas tzin nib'j 'ayc'n̈ej 'a in nab'en, atn jun chi tzwa'ch yipc in c'ojol.

²² Yujn̈ej schamc'ojlal Jehová, yuj cha, matz on̈ satc 'eli, yujto tz'o'chn̈ej sc'ojl 'ayn̈ec.

²³ 'A junjn sq'uin̈b'ial, tzquilnec to tz'o'ch sc'ojl 'ayn̈ec.

²⁴ Yuj cha, tzwaln 'ixtic: 'Aychn̈ej Jehová wet'oc, cojxn tzwa'ch yipc in c'ojol, xin chi.

²⁵ Caw wach' Jehová 'a eb' to tzya'ch sc'ojl 'a 'a, atn eb' tzya'ch sb'a 'a yol sc'ab'.

²⁶ Yel xo wach' sictacn̈ej tzon̈ 'ajc qui tan̈wni, masnto yic tzcolwj Jehová 'ayn̈ec.

^27-28 Yel xo wach' yic 'unn on̈t 'anma', tzqui yamnec 'och ca'n techjoc yailal. Sictac cab' tzon̈ canc qui ch'ocoj yuj yailal tznalb'ej Jehová ya'n 'och 'ayn̈ec.

²⁹ Yowlal tzquijec 'ejm qui b'a 'a 'a, lemb'il tz'o'ch to sc'ojl 'ayn̈ec.

³⁰ Toxn̈ej to tzon̈ ma'xec, mto tzon̈ b'uchxec, qui chan̈jec qui cuchu'.

³¹ A Jehová, matz on̈ yactjec can 'a jun 'ejmn̈ej.

³² Wach'xam tzya'ch wal qui yailalec, palta tz'o'ch pax sc'ojl 'ayn̈ec, yujto caw wal niwn schamc'ojlal.

³³ Wal yel, matz nib'j to tzon̈ ya'c 'och 'a cusc'ojlal mto 'a yailal.

³⁴ A Jehová, matz nib'j to tz'ixtx eb' 'anma 'aych 'a preso,

³⁵ mto tz'ijx 'ec' junc tas 'a junc mach to a Dios 'a'jnac 'a 'a, atn jun Dios to Cojxn Niwn Yel'chi.

³⁶ Caw man̈ wach'c tzyil Dios, toto matz b'eyc'ojlax eb' 'anma 'a stojlal.

³⁷ Toc 'ay mach tz'el'ch junc tas tzna'a, toto man̈oc Jehová tzalni.

³⁸ A yic tzjaw wach'il mto yailal 'a quib'n̈ec, a Dios 'ixta tz'el 'a sc'ojol.

³⁹ ¿Tas yuj tzcot cowlec 'a Dios, toto yuj qui mulec tz'och qui yailal?

⁴⁰ Qui b'eyc'ojloquec qui b'a tas yilx qui b'eyb'alec, tzlajw cha, tzon̈ meltzjec, tzcalnec pax qui b'a 'a Jehová.

⁴¹ Ca'c 'at qui nab'en 'a Dios 'a satcha'an̈, tzcalnec 'a qui lesl 'ixtic:

⁴² 'Ix 'och wal qui mul on̈, caw tenmtac xcutj qui b'a 'aych on̈, yuj cha, ma'ix ac' niwnc'ojlal qui mul on̈.

⁴³ 'Ix a' cot wal yowl a c'ojl 'a quib'n̈ on̈, on̈ a pechn b'eyc'oc, on̈ a satn 'eli, man̈x 'ic 'o'ch a c'ojl 'ayn̈ on̈.

⁴⁴ 'Icha to xa c'ub'j 'el a b'a 'a scal 'asun, sec man̈x tzac ab' qui lesl on̈.

⁴⁵ 'Icha xoj pax c'alem on̈ otjcan 'a sat jun tzo'n̈ xo eb' chon̈ab'.

⁴⁶ Smasnil eb' 'ajc'ojl yajch 'ayn̈ on̈, 'ix sjac wal eb' sti on̈ sb'uchn on̈.

⁴⁷ A xiwc'ojlal, tas 'ay smay, yailal yet' satl qui chon̈ab', a chi xjaw 'a quib'n̈ o'oj, xqui chiec.

⁴⁸ Mamin Jehová, caw wal jichlji yem yal in sat yuj cusc'ojlal, yujto wan slajw 'ejm eb' wit chon̈ab'.

⁴⁹ Caw wal matz in 'och wan woq'ui, yujto an̈ja wab'nn̈ej syail,

⁵⁰ masnto 'oj on̈ el 'emt 'a satcha'an̈.

⁵¹ Caw wal tzq'ue syal yol in sat woq'ui, tzcus pax in c'ojl yuj tas tz'aj yixtx eb' 'ix 'ix 'a yol in chon̈ab'.

⁵² A eb' 'ajc'ojol, in spech b'eyc' eb' 'icha tz'aj spechxb'ey junc no ch'ic, palta may in mul 'a eb'.

⁵³ In sjuln 'ejm eb' 'a yojl jun xab', ax jun niwquil q'uen xyac' q'ue eb' smacloc sti jun xab' cha, man̈xtzac stac' in q'ueta.

⁵⁴ In 'atcn ch'ub'n 'a scal a', yuj cha, xin nani, to 'oj in lajw 'eli.

⁵⁵ Palta yajn̈ej xwaln in b'a 'aych Mamin Jehová, yic 'ayn 'ec' 'a xab'l yich jun oln cha.

⁵⁶ Caw in tew 'ayach yic tzin a colni. 'Ix ab' tas xin c'ana.

⁵⁷ A 'a yic ach wawtn 'a jun c'u cha, ach jaw 'a in tz'ey, 'ix aln 'ayn 'ixtic: Man̈ ach xiwoc, xa chi.

⁵⁸ Mamin, ach in a colcn 'elt 'a yol sc'ab' chamel.

⁵⁹ Mamin Jehová, tzel wal tzin 'aj wixtxi, b'onyaj 'a stojlal.

⁶⁰ Caw ojc tas nab'il yuj eb' 'anma 'a in patic, yuj tas tznib'j eb' tzin yutej.

⁶¹ Mamin Jehová, ojc wali jantc wal tas tzyal eb' 'a in patic, yet' tas tu nab'il yuj eb'.

⁶² Ach tic, ojtac jantc tas tu tzyal eb' 'a wib'an̈ yic tz'ec' c'u, tzna eb' in yixtni.

⁶³ Ojtac to sc'ual yac'wlil in sb'uchn eb'.

⁶⁴ Mamin Jehová, 'ac' spac 'a eb', 'a 'icha wal tas smoj schan eb' yuj tas tz'el sb'oni.

⁶⁵ 'A' pitb'oc 'el snab'en eb', 'a' cot catb' 'a yib'n̈ eb'.

⁶⁶ Pech b'eyc'oc eb' yet' yowl a c'ojol. Sat cab' 'el eb' 'a yolyib'n̈q'uinl tic, xchi Jeremías win schecb' Dios.