Lm 1 - Chuj San Sebastian Bible

B'it yic cusc'ojlal*r* yuj yailal 'a Jerusalén Tzyal win schecb' Dios 'ixtic:

¹ Cusltac xoj yilx x'ajcn chon̈b' Jerusalén, atn jun niwquil chon̈b' 'aj til wal 'anma 'a pecti'. Lajn xoj yilx x'ajcn 'icha junc 'ix 'ix chamnc yichmil. A 'a pecti cha, 'icha to yajl yaj 'a scal jun tzo'n̈ xo nacion̈, ax ticnec, 'ix 'ajx pural yoch 'a munljel.

² Lajn 'icha junc 'ix 'ix ji'jmtac yoc' 'a junjn 'ac'wal; jichlji yem yal sat 'a spac'b'il sti'. Ax eb' nacion̈ wach' cob' yaj yet'oc, may junc eb' tz'a'n sniwnal sc'ojol. Smasnil eb' swach'c'ojl cha, 'ix meltzj 'och eb' 'ajc'ojlal 'a 'a.

³ A eb' 'aj Judá, caw wal ya tzyab' eb' yujto ya munljel 'aj 'aych eb', 'ix 'ijx 'at eb' 'icha presoal. A ticnec, 'ayx 'ec' eb' 'a scal jun tzo'n̈ xo nacion̈, toxn matz 'ilj xon eb' jac smunlji. 'Ayx 'ec' eb' 'a scal yailal, 'ix yamchj eb' yuj eb' tzpechn b'eyc'oc.

⁴ A jun tzo'n̈ b'e yic Sión, caw wal cusltac yilxi, toc 'ayt mach tzjaw 'ilj q'uin̈. A spuertail chon̈ab', cusltac yilxi. Ax ewin ya'mal 'och qui ti 'a Dios, caw wal tz'oc' eb' si'mb'il. A eb' 'ix cob'stac 'ix tzb'itn 'a yatut Dios caw wal tacn̈c sc'ojl eb' 'ix. A jun chon̈b' tic, caw wal tzyab' syal si'mb'il.

⁵ A eb' 'ajc'ojl yajch 'a 'a, 'ix 'ajx ganar yuj eb', a eb' 'ajc'ojl cha, caw wal tzq'ue'ch eb'. A Jehová a 'ix 'a'n 'och syailal jun chon̈b' tic, yujto caw niwn maysch'olnil 'ix sb'o'o. A eb' 'anma cajn 'a 'a, tox 'ix 'ijx 'at eb' 'icha presoal yuj eb' 'ajc'ojl cha.

⁶ 'Ix sat 'ejm swach'l yilx chon̈b' Jerusalén. A eb' 'aych yajlil 'a 'a, caw wal tz'el yip eb' 'icha no c'ultquil chej matz 'ilchj tas tzc'uxu, ch'umchnixn̈ej sb'ey 'a yojltac eb' pechjnac.

⁷ A eb' 'aj Jerusalén, a wal yic 'aych eb' 'a sc'ul yab'n syal yuj tas tz'aj yixtxi, a yic cha, tznan cot eb' smasnil sricoal 'ay 'a yaln̈taxi. A yic x'ejm eb' yuj eb' 'ajc'ojol, toc 'ay mach xcoln eb'. A wal yic tz'ilx 'och eb' yuj eb' 'ajc'ojl cha, tzlaj b'uchx eb' yuj eb', yujto 'ix 'ejm eb'.

⁸ A eb' 'anma 'a chon̈b' Jerusalén, caw wal x'och smul eb', yuj cha, 'ix chacx 'el eb'. A eb' niwn yel'ch jun chon̈b' chi 'a sat 'a pecti', ax ticnec, caw tzyaj eb', yujto xyac' sq'uixwloc 'a sat eb'. Yuj cha, caw wal tz'oc' eb' 'aj Jerusalén, man̈xtzac sch'ox eb' sat yuj q'uixwelal.

⁹ A smul eb' 'anma cha, caw wal checl yaji; palta may tas tzna eb' toto 'ay tas wan sjaw 'a yib'n̈ eb'. Caw wal satjub'tac x'aj slajw 'el schon̈b' eb'; may xon mach x'a'n sniwnal sc'ojl eb'. Yuj cha, tzyaln eb' 'ixtic: Mamin Jehová, 'ilt on̈ cot yet' wal qui yailal on̈, a eb' 'ajc'ojl yajch 'ayn̈ on̈, caw wal xyac' eb' sgana on̈ satn 'el on̈, xchi eb'.

¹⁰ A eb' 'ajc'ojl yajch 'a Jerusalén, tox 'ix yij 'ec' eb' smasnil sricoal jun chon̈b' tic. 'Ix yiln pax eb' 'anma yoch eb' 'ajc'ojl chi 'a yol scajnub' Dios, atn jun tzo'n̈ 'anma yaljnac Dios to matz tac' yochi.

¹¹ A smasnil eb' cajn 'a jun chon̈b' tic, caw wal ji'jmtac yoc' eb' yic tzlaj cob' sayn 'ec' eb' jac tas tzc'uxu. A smasnil sricoal eb', a 'ix yac' eb' sjelc tas tzc'an sc'ux cha, sec matz cham eb' yuj wejel, xchi winac. Mamin Jehová, 'ochn̈ wal q'ueln 'ayn̈ on̈, 'ilt wal tzon̈ 'aj qui lajw 'ejm on̈. Mamin Jehová, 'o'ch cab' a c'ojl eln 'och qui yailal on̈.

Tzyaln eb' 'aj Jerusalén chi 'ixtic:

¹² Ex 'anma tzex laj b'ey 'a b'e, 'ochn̈ec wan lin̈an, tze nan jab'oc, ¿tom 'ay eyailal 'icha quic tic on̈? Yujto an̈ tic on̈, yel xo wal niwn tzcab' syal on̈. A Jehová a tz'a'n cot jun yailal tic 'a quib'n̈ yuj yowl sc'ojol.

¹³ 'Icha wal junc c'ac', 'ixta xyutj Jehová ya'n cot qui yailal 'a satcha'an̈, caw wal tzc'ux lajwc qui b'acl tzcab'i. 'Icha pax junc ch'an̈ yal tz'ejm 'a cojltac 'ixta 'on̈ yutj yet' qui yailal on̈, yuj cha, on̈ meltzj 'a qui patic. On̈ yactj can qui ch'ocoj, 'a junjn rato tzcab'n syal on̈.

¹⁴ 'Ix yil Dios to caw x'och qui mul on̈, yuj cha, mun a qui mul chi on̈ jaln 'ejm on̈. A jun cha, caw wal 'al yaj q'ue quiln 'a quib'n̈ 'icha junc 'icatz, caw wal tz'el quip yuj on̈. Tox on̈ ya'ch Cajlil 'a yol sc'ab' eb' 'ajc'ojl yajch 'ayn̈ on̈. Caw wal man̈x 'ic stac' qui coln qui b'a 'a eb' on̈.

¹⁵ Caw wal najt xyijcan 'el Cajlil eb' 'anma caw jeln on̈ scoln on̈. Ax eb' soldado 'ajc'ojl yajch 'ayn̈ on̈, a eb' xyij coti, sec tzlajw 'el smasnil eb' qui soldado caw jeln on̈ scolni. An̈ 'aj Judá on̈ tic on̈, on̈ te'x can 'ejm yuj Cajlil 'icha tz'aj ste'x 'el yalil te uva.

¹⁶ Yuj wal jun tzo'n̈ tic tzon̈ 'oc' on̈. Caw wal jichlji yem yal qui sat. Toc 'ayt mach tz'a'n jac sniwnal qui c'ojol, man̈x 'a mach tz'a'n ste'nal qui nab'en on̈. Scal yailal xcan smasnil eb' cunnal on̈, yujto caw wal jeln eb' 'ajc'ojl chi 'a quib'n̈ on̈, xchi eb'.

Tzyaln win schecb' Dios chi 'ixtic:

¹⁷ An̈ 'aj Sión on̈c tic, 'ix cob' b'a'cht qui c'ab' yic tzcalnec qui b'a 'a junc mach, palta may xon junc mach x'a'n sniwnal qui c'ojlec. A Jehová 'ix aln 'a eb' cajn 'a qui tz'eyec, yic tzya'n eb' owl quet'ec. Caw wal spatquilj can 'el eb' chon̈b' Jerusalén tic, xchi winac.

Tzyaln eb' 'aj Jerusalén chi 'ixtic:

¹⁸ A Jehová sb'o wal 'icha tas smoj sb'oni, yujto caw wal tenmtac xcutjec qui b'a 'a schecnb'il. E masnil ex chon̈ab', 'ab'c wal tas 'oj cal on̈, 'iltec wal nab'n yilx qui yailal on̈. A eb' qui quelmtac on̈, yet' eb' 'ix qui cob'stac on̈, tox 'ix 'ijx 'at eb' 'icha presoal.

¹⁹ 'Ix cob' qui c'an scolwal jun tzo'n̈ xo nacion̈ 'aych quet' 'a calni, palta ton̈j on̈ yixtj paxti eb' on̈. A eb' ya'mal 'och qui ti 'a Dios yet' eb' yichm wincal chon̈ab', 'ix laj 'elt eb' cob' say jac tas tzc'ux 'a yol caye, palta ax x'aji, xlaj chamcn eb' ta'.

²⁰ Mamin Jehová, 'ilt on̈ cot yet' qui yailal tic on̈, a wal tzcutj cab'n on̈, 'ijn wal tzn̈i'chj sn̈i qui c'ojl cab'n syail. Caw wal tzcab' syal yet' qui pixn on̈, yic tzqui nan cot qui mul xlaj 'ochi. A 'a spatc 'el chon̈ab', til wal eb' tzcham yuj owal, 'ixta 'a yol 'oxt chon̈b' tic, til pax mach tzchami.

²¹ A eb' 'anma', tzlaj yab' eb' yel caw yuj qui cusc'ojlal on̈, palta may mach tz'a'n sniwnal qui c'ojol. A smasnil eb' 'ajc'ojl yajch 'ayn̈ on̈, yojc xo eb' to 'aych qui yailal on̈. Caw wal tzalj eb' yuj yailal tza'ch 'a quib'n̈ tic on̈. Jaw cab' jun c'u alb'il can oj 'a pecti', sec lajn tz'aj eb' 'icha tzon̈ 'aj tic on̈.

²² Na coti jantc smul eb' xya'ch 'a ojltac; 'icha cab' tzon̈ otj tic on̈, 'ixta cab' pax tzotj eb' jun xo. An̈ tic on̈, caw wal niwn xo tzon̈ 'oc' yuj cab'n syail, caw wal tz'el quip tzcab'i, xchi eb' 'aj Jerusalén 'a Dios.