Lc 4 - Chuj San Sebastian Bible

'Ajxnac prowal Jesús yuj win diablo

¹ A Jesús caw 'aych Yespíritu Dios 'a 'a, 'ix 'atx 'a a niwn a Jordán. 'Ix 'ijx 'at yuj Yespíritu Dios chi 'a jun lum cusltac lu'um.

² Chawinq'uin̈ x'aj ta', ax win diablo x'a'n prowal. Man̈x 'a tas 'ix sc'ux Jesús 'a jun tiempoal cha, caw x'och swejel.

³ Xlajw cha, xyaln win diablo 'ixtc 'a 'a. —'In Yunnal ach Dios, yuj cha, al 'a jun q'uen tic 'och cab' panil, xchi win 'a 'a.

⁴ Palta xyaln 'a win 'ixtic: —A Ch'an̈ Un̈ tz'ib'b'il cani, ata tzyal 'ixtic: Man̈ cojnoc yuj tas tzc'uxxi, pitzn on̈ec, [palta pitzn on̈c yuj smasnil tas tzyal Dios.] 'Ixta tzyal 'a Ch'an̈, xchi 'a winac.

⁵ Xlajw cha, x'ijx 'at Jesús yuj win 'a jun niwquil tzalan. Yajn̈j wal cha, 'ix sch'oxn win smasnil jun tzo'n̈ niwc chon̈b' 'ay 'a yolyib'n̈q'uinl tic 'a 'a.

⁶ 'Ix yaln win 'ixtc 'a 'a: —'Oj ach wa'ch yajlilc smasnil jun tzo'n̈ niwc chon̈b' tic. Caw niwn 'oj el'ch yu'uj. 'Ac'b'il jun tzo'n̈ tic 'a yol in c'ab', yuj cha, tztac' wa'n 'a mach 'aj tzin nib'j tzwac'a.

⁷ Toto tzach 'em cumn 'ayin, tzaln a b'a 'ayin, 'oj wac' eco'oc jun tzo'n̈ tic smasnil, xchi win 'a 'a.

⁸ Palta xyaln pax Jesús 'a winac: —[Ach Satanás, 'ij 'el a b'a 'a in tz'ey.] Tzyal 'ixtc 'a Ch'an̈ Un̈ tz'ib'b'il cani: Cojn 'a Cajlil qui Diosalec tzeyal e b'a, cojn 'a tzeyac' servil, xchi 'a Ch'an̈ U'un̈, xchi Jesús 'a winac.

⁹ Xlajw cha, x'ijx pax 'at yuj win diablo chi 'a Jerusalén, 'ix yi'n q'ue win 'a schon yatut Dios, 'ix yaln win 'ixtc 'a 'a: —'In Yunnal ach Dios, yuj cha, jul 'ejm a b'a 'a sat lum cha,

¹⁰ yujto tzyal 'ixtc 'a Ch'an̈ U'un̈: 'Oj ya' cot Cajlil eb' yángel ach stan̈woc.

¹¹ 'Oj ach squetz chan̈ eb', sec man̈ comnoc tza tench oc 'a q'uen q'ue'en, xchi 'a Ch'an̈, xchi win diablo cha.

¹² 'Ix yaln pax Jesús 'ixtc 'a winac: —Palta tzyaln pax junx tic 'a Ch'an̈ U'un̈: Man̈ eyac' prowal Cajlil qui Diosalec, xchi 'a Ch'an̈, xchi Jesús.

¹³ Ax win diablo cha, man̈x 'a junc xo prowal xnachj yu'uj, yuj cha, xyactn can win jun tiempoal.

'Elnc yich smunlj Jesús

¹⁴ 'Ix paxx Jesús 'a Galilea, caw 'aych Yespíritu Dios yet'oc, c'uxn xpucl yab'xil 'a jun lugar cha.

¹⁵ 'Ix 'ec' cuywjoc 'a junjn scapiya eb', ax eb' 'anma', c'uxn slaj yal eb' wach'il.

'Ayc' Jesús 'a Nazaret

¹⁶ Xlajw cha, 'ix 'atx Jesús, 'ix c'ochx 'a Nazaret 'aj q'uib'nac. Ax 'a yic sc'ul 'iljelal, x'och 'a yol capiya, yujto 'ixta xon sley. 'Ix q'ue lin̈an yic tzyawtn 'elt Ch'an̈ U'un̈.

¹⁷ Yuj cha, xya'n eb' jun Ch'an̈ Un̈ 'a 'a, atn jun tz'ib'b'il can yuj jun schecb' Dios Isaías sb'i. 'Ix sjacni, sayn 'ajtil tzyal 'ixtic:

¹⁸ A Yespíritu Cajlil, a 'ix ya'ch 'ayin, yujto sic'b'iln 'el yu'uj. Checb'iln cot yu'uj, yic tzwul walnc 'el wach' 'ab'x 'a eb' meb'a'. Tzwul waln 'el yab'xil colnb'il 'a eb' 'icha preso yaji. Tzwul in jacn pax sat eb' matz uj yilni; ax eb' 'aych junc tas 'a yib'an̈, tzwul wi'cn 'elt eb' 'a libre.

¹⁹ An̈jtona', tzwul walnc 'eli, chajtlto xjaw stiempoal jun colnb'il tzyac' Cajlil, xchi Ch'an̈ Un̈ xyawtj 'elt Jesús 'a yojltac eb'.

²⁰ Xlajw cha, smacn pax Ch'an̈, 'ix ya'n pax 'a jun win 'ay yopiso 'a jun capiya cha. Xlajw cha, x'em wocan yic tzcuywj 'a eb'; ax eb' 'ayc' 'a yol jun n̈a, cha, c'uxn x'at q'ueln eb' 'a 'a.

²¹ 'Ix syamn 'och yaln 'el 'a eb' 'ixtic: —A 'a jun c'u tic wan eyilni to wan yel'ch tas tzyal Ch'an̈ Un̈ tic, xchi 'a eb'.

²² Ax eb' 'ayc' ta', c'uxn xlaj yal eb' wach'il. Caw 'ix sat sc'ojl eb', yujto caw wach' jun tzo'n̈ tas xyal 'a eb' cha. 'Ix laj yal-lanc eb' 'ixtic: —'In yunnal José jun win tic. ¿'Aj xyij sjelnal tic jun? xchi eb'.

²³ Yuj cha, xyaln 'ixtc 'a eb': —Tecn 'oj eyal 'ixtc 'ayin: Ach 'a'm remel, mun tzac' b'oxc a b'a quilnoc, til wal ab' tas xa b'o 'a Capernaum, b'o pax 'a qui chon̈b'ec tic quilnoc, 'oj e chic 'ayin.

²⁴ Wal yel tzwal 'ayex: —May junc schecb' Dios 'ay yel'ch 'a sat eb' yit chon̈ab'.

²⁵ Tze na cot yab'xil win Elías pecti', chajtl 'e'nac. Nan̈l schan̈l ab'il man̈xtoc ya'jnac n̈ab', caw niwn wejl jawnc 'a yib'n̈ eb' 'anma smasnil. A 'a jun tiempoal cha, til wal eb' 'ix quit israelal chamnc yichmil,

²⁶ palta man̈oc 'a eb' 'ix 'aj schecjnac 'at Dios Elías chi colwjoc. An̈j 'a jun 'ix man̈ israeloc 'aj Sarepta 'a sla'nil Sidón, an̈jta c'ochnc colwjoc.

²⁷ An̈jtona', tze na cot pax yab'xil jun schecb' Dios Eliseo sb'i. Til wal eb' quit israelal yamchjnac yuj lepra. Palta may junc eb' b'oxnc yuj Eliseo cha, an̈j jun win man̈ israeloc 'aj Siria, Naamán sb'i, an̈j win b'oxnc yu'uj, xchi Jesús 'a eb'.

²⁸ Ax eb' 'ayc' yet' 'a yol capiya cha, yic xyab'n eb', caw xcot yowl eb' smasnil 'a 'a.

²⁹ Yuj cha, xlaj q'ue wan eb', 'ix sto'n 'el eb' Jesús 'a sti 'el chon̈ab'. 'Ix c'och eb' 'a sjolm jun pa'n 'a stz'ey schon̈b' eb' cha, yujto snib'j eb' cob' sjulb't 'a pa'n cha.

³⁰ Palta ax Jesús, ton̈j x'elcn 'a scal eb', x'atx cani.

A jun winc 'aj 'elnc jun demonio

³¹ 'Ix c'ochx Jesús 'a Capernaum 'a yol yic Galilea, ata xcuywj 'a eb' 'anma 'a sc'ul 'iljelal.

³² Caw 'ix sat sc'ojl eb' yab'n jun tzo'n̈ cuynb'il cha, yujto a yic xyaln 'eli, 'ix checlji to caw 'ay yopiso yuj Dios.

³³ Ax 'a jun capiya 'aj 'ayc' cha, ata 'ayc' jun winc 'aych jun demonio 'a 'a, 'ix q'ue yaw jun demonio chi 'ixtic:

³⁴ —Jesús 'aj Nazaret, 'actj on̈ can on̈. ¿Tas aln ec 'ayn̈ on̈? ¿Tom tzach jaw wul on̈ a satcn 'el on̈? Wojtac mach ach, ach tic sic'b'ilch 'el yuj Dios, xchi win 'a 'a.

³⁵ Yuj cha, 'ix tumwj 'a win demonio chi 'ixtic: —Tz'in xa chi, 'eln̈ 'a winac, xchi. Yajn̈j wal cha, xtelw can 'at t'ocnjoc win yuj jun demonio cha. 'Ixta to b'i'an, x'el jun demonio chi 'a winac. Palta may jac x'i'n can winac.

³⁶ Ax eb' 'ayc' ta', caw 'ix sat sc'ojl eb' yiln jun cha, 'ix laj yal-lanc eb' 'ixtc 'a 'a: —¿Tas laj wal yaj jun tzo'n̈ paxti tic xyal tic? A wal jun tic, caw 'ay yopiso, 'ay spoder ya'n mandar ewin demonio, 'in tz'el ewin yu'uj, xchi eb'.

³⁷ Yuj cha, c'uxn xpucl yab'xil Jesús 'a scal eb' 'anma 'a jun tzo'n̈ lugar 'a sla'nil cha.

B'oxnac 'ix sn̈i Pedro yuj Jesús

³⁸ 'Ix 'elt Jesús 'a yol capiya cha, 'ix c'och 'a yatut Simón. Ax 'ix sn̈i Simón cha, caw tzcham 'ix yuj c'a'l yab'il. Yuj cha, 'ix tew 'och eb' 'a Jesús sec tzyac' b'oxc 'ix.

³⁹ Yuj cha, 'ix c'och lin̈n 'a stz'ey 'ix, stenn 'och wan jun c'a'l yab'il cha. Yajn̈j wal cha sicb' 'a 'ix, 'ix q'ue wan 'ix, xya'n servil 'ix eb'.

Til wal eb' b'oxnac yuj Jesús

⁴⁰ Ax 'a yic yemc'ual, c'uxn x'ijx cot eb' ya'ay 'a 'aj 'ayc' Jesús. Chucchc yab'ilal tz'i'n junjn eb'. 'Ix stzayn 'och sc'ab' 'a junjn eb'. 'Ixta to b'i'an, xlaj b'ox can eb' yu'uj.

⁴¹ Til wal eb' 'aj 'ix yij 'el ewin demonio, xlaj yalnc chan̈ ewin demonio chi 'ixtic: —Ach tic, Yunnal ach Dios, xchi ewin 'a 'a. Palta 'ix stenn 'och wan Jesús ewinac, ma'ix schaj paxtinc ewinac, yujto yojc xon ewinac to a Cristo.

'E'nc Jesús yal-l spaxti Dios*r* 'a yol yic Galilea

⁴² Ax 'a yic sacb'i, 'ix 'at Jesús 'a sti 'el chon̈ab', 'ix c'och 'a 'aj may 'anma'. Palta ax eb' 'anma', xlaj 'at eb' sayq'ui, 'ix c'och eb' 'a 'aj 'ix c'och cha. Caw xtew 'och eb' 'a 'a, yujto tznib'j eb' matz 'ati.

⁴³ Palta xyaln 'a eb' 'ixtic: —Yowlal tz'ec' wal-l pax wach' 'ab'x 'a eb' 'anma 'a jun tzo'n̈ xo chon̈ab', sec 'oj yab' pax eb', chajtl tz'aj eb' yoch 'a yol sc'ab' Dios. Yuj wal jun tic checb'iln coti, xchi 'a eb'.

⁴⁴ Yuj cha, x'ec' yalnc 'el spaxti Dios 'a junjn capiya 'a yol yic Galilea cha.