Lc 24 - Chuj San Sebastian Bible

Pitzwnac pax Jesús

¹ Ax yic wanto sacb' 'el 'a domingo, 'a sb'ab'l c'ul seman, 'ix 'at eb' 'ix 'a 'aj mucb'il 'och sniwnal Jesús. Yet' eb' 'ix jun tzo'n̈ yal su'q'ui sjab' b'ob'il yu'uj. ['Ay pax jun tzo'n̈ xo eb' 'ix x'at yet' eb'.]

² Ax 'ix c'och eb', xyiln eb' 'elnc xo smac q'ue'en.

³ 'Ix 'och eb' 'a yojl q'ue'en, 'ix yiln eb', man̈x 'a sniwnal Cajlil Jesús 'ayc' ta'.

⁴ Caw 'ix sat sc'ojl eb' yilni. Ax 'ix yiln eb', 'ayc' chawn̈ ángel 'icha winc yilxi. Lin̈n 'ec' 'a stz'ey eb', caw tzictzni spichl eb' ángel cha.

⁵ Yuj cha, xcaw 'och xiwlal 'a spixn eb'. 'Ix 'em q'uelnjoc eb' 'a sat lu'um. Ax eb' ángel chi xaln 'a eb' 'ixtic: —¿Tas yuj a 'a yol yet'l eb' chamnc tic tze say jun pitzan?

⁶ Man̈x 'ayc 'ec' 'a tic, tox 'ix pitzw paxi. Nac coti tas alb'il can yuj 'ayex, yic 'ayc' 'a Galilea:

⁷ Chajtlto a 'Ochnc 'Anma'il, palta yowlal 'oj 'ajxc 'och 'a yol sc'ab' eb' maysch'olnil, ax yajx 'och 'a spenc culus. Ax 'a schab'jial, ax spitzw paxi. 'In 'ixta yutjnac yaln 'ayex, xchi eb' 'a eb'.

⁸ Yuj cha, 'ix snan cot eb' 'ix, tas alb'il yuj Jesús 'a eb'.

⁹ Xlajw cha, xpax eb'. 'Ix 'at yalnc eb' yab'xil jun chi 'a eb' schecb' Jesús yuxlchwan̈il, yet' 'a eb' scuywum smasnil.

¹⁰ A eb' x'at alnc yab'xil jun tzo'n̈ cha, atn María Magdalena, Juana, yet' junx María atn snun Jacobo. 'Ay pax jun tzo'n̈ xo eb' 'ix ajun yet' eb'.

¹¹ Palta ax eb' schecb' cha, snan ewinac to ton̈j tzyal eb' 'ix. Yuj cha, matz chaj ewin yab'i'.

¹² Ax Pedro xq'ue lin̈njoc. 'Ix sc'oln yip s'at 'a jun q'uen cha. Ax 'ix c'ochi, xyiln 'och 'a yojl q'ue'en. Cojxn jun tzo'n̈ nip lan̈n can 'eq'ui. Xlajw cha, xpaxi, caw sat sc'ojl yuj jun cha.

Sch'oxjnac sb'a Jesús 'a eb' chawan̈

¹³ Ax 'a jun c'u cha, 'ay chawn̈ eb' scuywum x'at 'a jun b'e tzc'och 'a chon̈b' Emaús. A jun chon̈b' cha, 'aym 'oxe'oc legua scal yet' Jerusalén.

¹⁴ Yic wan sb'ey eb', tzyaln eb' yuj jantcn̈ej tas 'ix laj uji.

¹⁵ An̈j 'ijnoc yaln eb', xc'och Jesús yet' eb'. Moln xb'ey yet' eb'.

¹⁶ 'Ix moychj sat eb' yu'uj. Yuj cha, ma'ix tojlb'i yiln 'och eb', toto a'.

¹⁷ 'Ix sc'anb'n Jesús 'a eb' 'ixtic: —¿Tas wan eyalni, yic tzex b'ey tic? ¿Tas yuj tzex caw cusi? xchi 'a eb'.

¹⁸ 'Ay jun win xta'w mu'c 'a 'a, Cleofas sb'i, xyaln 'ixtic: —'Intax c'uxn yojc eb' 'anma smasnil tas 'ix uj 'a Jerusalén 'a chab'j 'oxji tic. Ach xo tic, ¿tom ma'ix ab' jac jun? 'In ach 'ec' ta', xchi eb' 'a 'a.

¹⁹ —¿Tas jun tzo'n̈ 'ix uj chi ta jun? xchi 'a eb'. —'Ay jun 'aj Nazaret Jesús sb'i, caw schecb' Dios. A 'a sat Dios, yet' 'a sat eb' 'anma smasnil, caw niwn yel'ch tas 'ix sb'o'o, yet' tas 'ix yala.

²⁰ Palta ax ewin sat ya'mal 'och qui ti 'a Dios, yet' ewin yajl yaj 'ayn̈ec, xya'ch ewin 'a yol sc'ab' chamel. Yuj cha, x'ajx 'och 'a spenc culus.

²¹ A jun Jesús cha, xca'ch yipc qui c'ojl on̈, chajtlto 'oj qui colchj 'el an̈ israel on̈c tic yu'uj. Ax ticnec, chab'ji xo 'ix uj jun tzo'n̈ cha.

²² Palta 'ay jun tzo'n̈ eb' 'ix 'ix, quitb'eym qui b'a yet' on̈, sat qui c'ojl on̈ xcab'n on̈, to a sacb'i, x'at yilnc eb' 'a jun q'uen 'aj 'ochnc sniwnal Jesús cha.

²³ 'Ix yiln ab' eb', to man̈x 'ayc 'ec' sniwnal. Xlajw cha, xit' yalnc eb' 'ayn̈ on̈, chajtlto 'icha waychil x'aj eb' yiln jun tzo'n̈ ángel. 'Ix yaln ab' eb' ángel chi 'a eb', chajtlto pitzn Jesús.

²⁴ Xlajwn̈ej cha, 'ay jun tzo'n̈ eb' quitb'eym x'at 'ilnoc pax on̈, 'ix yiln eb' 'icha wal xyal eb' 'ix cha. Palta ax Jesús, ma'ix yil eb', xchi eb' 'a 'a.

²⁵ Yuj cha, xyaln pax 'a eb' 'ixtic: —Ax tic, caw may e nab'en, caw teb'il tzeya'ch e c'ojl 'a jantcn̈ej tas yaljnac can eb' schecb' Dios pecti'.

²⁶ A Cristo, toxn to yowlal xyab' syal jun tzo'n̈ cha, yic mantzac 'och Yajlil, xchi 'a eb'.

²⁷ Xlajw cha, 'ix syamn 'och yaln 'a eb', 'ajtc 'ay yab'xil 'a Ch'an̈ U'un̈. 'Ix syamn 'och yaln tastc tz'ib'b'il can yuj Moisés. 'Ix yaln pax jantcn̈ej tas tz'ib'b'il can yuj junjn eb' schecb' Dios pecti'.

²⁸ Ax yic xc'och eb' 'a jun chon̈b' 'aj tzc'och cha, a Jesús 'ijn wal c'ax 'e'l x'eq'ui.

²⁹ Palta xyac' pural eb' syamn 'och wa'an, 'ix yaln eb' 'ixtc 'a 'a: —'Ochn̈ wan quet' on̈, yujto wan yejm c'u, wan sq'uic'b'i, xchi eb' 'a 'a. Yuj cha, x'och Jesús 'a yol n̈a, 'ix 'och wan yet' eb' ta'.

³⁰ Ax yic x'och wocn 'a te mexa yet' eb'. 'Ix yi'n chan̈ jun pan. 'Ix ya'n yuj diosal 'a Dios yu'uj. Xlajw cha, sch'iyn 'ec' 'a eb'.

³¹ Yajn̈j wal cha, 'icha wal to tot xjacw sat eb'. 'Ixta to b'i'an, xyiln 'och eb', to a Jesús. Palta 'ix sat chan̈ 'a stz'ey eb', ax xyiln eb', man̈x 'a mach.

³² 'Ix yaln eb' 'ixtic: —Yel toni, caw xjaw qui c'ojl yu'uj, yic xyaln 'ayn̈ 'a yol b'e, yic xya'n nachjc 'el cu'uj, tastc tzyal 'a Ch'an̈ U'un̈, xchi eb'.

³³ Yajn̈j wal cha, xq'ue wan eb', xpax eb' 'a Jerusalén. Ata x'ilchj eb' schecb' Jesús yuxlchwan̈il yuj eb', yet' jun tzo'n̈ xo eb' yitb'eym eb' yamn yaj ta'.

³⁴ Ax eb' cha, xyaln eb' 'a eb' chawn̈ chi 'ixtic: —Wal yel xpitzw pax Cajlilec. 'Ix sch'ox sb'a 'a Simón tic, xchi eb'.

³⁵ Xlajw cha, xyaln pax eb' chawn̈ cha, tas 'ix 'aj eb' 'a yol b'e. 'Ix yaln pax eb', chajtl x'aj yilchj 'el Jesús yuj eb', yic 'ix sch'iyn 'ec' jun pan 'a eb'.

Sch'oxjnac sb'a Jesús 'a eb' scuywum

³⁶ Wanto yaln eb' jun tzo'n̈ cha, 'ax yiln eb', 'ayx 'ec' Jesús 'a scal eb'. —'Ay cab' e junc'ojlal, xchi 'a eb'.

³⁷ Ax eb' cha, ton̈j xcaw sat sc'ojl eb'. Xlaj xiw chan̈ eb', snan eb' to lab' jun chi wan yiln eb'.

³⁸ Palta xyaln pax 'ixtc 'a eb': —¿Tas yuj ton̈j tzcaw somchj e nab'en in eyilni? ¿Tas yuj chab'c'ojlal tzeyutj e nab'en 'ayin?

³⁹ 'Iltec in c'ab', yet' woc tic. An ton tic, yamnec nab'an. 'Ochn̈ec q'ueln 'ayin. A junc lab', ¿tom 'ay sb'a'chil, tom 'ay sb'acl tztac' eyamn 'icha wic tic? xchi 'a eb'.

⁴⁰ Xlajw yaln jun cha, 'ix sch'oxn sc'ab' 'a eb' yet' yoc.

⁴¹ Wach'xam tzalj eb', palta an̈j 'ijnoc matz te 'a'j 'och wal eb' 'a sc'ojol, yujto ton̈j tzsat sc'ojl eb'. Yuj cha, sc'anb'n pax Jesús 'ixtc 'a eb': —¿Mam 'a jac tas tzin c'ux 'a tic? xchi 'a eb'.

⁴² Yuj cha, xya'n eb' jab' b'olb'il chay 'a 'a, [yet' jab' yal chab' yet' sc'ate'al.]

⁴³ 'Ix chani, sc'uxn 'a sat eb'.

⁴⁴ Xlajw cha, xyaln pax 'a eb' 'ixtic: —A ticnec, 'ix 'el'ch 'icha yaj waln 'ayex, yic in 'ec' eyet'oc. 'In waljnac 'ayex, to yowlal 'oj 'el'choc jantcn̈ej wab'xil tz'ib'b'il can 'a ley yic Moisés, yet' tas tz'ib'b'il can yuj eb' schecb' Dios, yet' jun tzo'n̈ xo wab'xil 'a ch'an̈ libro salmos, xchi 'a eb'.

⁴⁵ Xlajw cha, xya'n jawc 'a sc'ojl eb', sec tznachj 'el yuj eb' tas tz'ib'b'il can 'a Ch'an̈ U'un̈.

⁴⁶ 'Ix yaln pax 'a eb' 'ixtic: —A 'a Ch'an̈ U'un̈, ata tz'ib'b'il can wab'xil an Cristo in tic, chajtlto yowlal in chami, ax 'a schab'jial in pitzw pax 'a scal eb' chamnac.

⁴⁷ An̈jtona', yowlal 'oj alxc 'el wab'xil 'a scal eb' 'anma 'a junjn nacion̈, to yowlal tzna sb'a eb', sec 'oj 'ajxc can lajwc smul eb'. A 'a Jerusalén tic 'oj b'ab'l alxc 'el wab'xil, ax spuc 'a junjn chon̈ab'.

⁴⁸ Ax tic, 'oj eyac' testigoal e b'a yuj jun tzo'n̈ tic.

⁴⁹ Ya'jnac can Dios sti', chajtlto 'ay jun 'oj 'emlc 'ayex, atn jun chi 'oj 'at in chec coti. Palta tan̈wjec 'a Jerusalén tic, masnto 'oj e cha e poder 'oj 'ajxc 'emt 'a satcha'an̈, xchi Jesús 'a eb'.

Paxnc q'ue Jesús 'a satcha'an̈

⁵⁰ Xlajw cha, xyi'n 'at Jesús eb' scuywum 'a sla'nil chon̈b' Betania. Ata xyac' chan̈ sc'ab', sc'ann swach'c'ojlal Dios 'a yib'n̈ eb'.

⁵¹ Wanto sc'ann jun cha, 'ix 'ijx 'at 'a satcha'an̈, xcan eb' yu'uj.

⁵² Xlajw ya'n 'ejm sb'a eb' 'a 'a. Caw tzaljc'ojlal xmeltzj eb' 'a Jerusalén.

⁵³ Junjn c'u tz'och eb' 'a yamq'uil yatut Dios, tzyaln eb' wach' paxti 'a Dios. [Ya' cab'i'.]