Lc 2 - Chuj San Sebastian Bible

A yaljub'al Jesús

¹ A 'a yic jun tiempoal cha, a win yajl 'a Roma Augusto sb'i, a 'ix alni to tz'ijx q'ue wan sb'isl smasnil 'anma 'a yolyib'n̈q'uinl tic.

² Sb'ab'l to xq'ue wan sb'isl eb' 'anma 'a jun tiempoal cha. Atn 'a yic 'aych win Cirenio gobernadoral 'a Siria, ata x'ijx q'ue wan sb'isl eb' cha.

³ Smasnil 'anma', c'uxn xlaj c'och eb' 'a schon̈ab', yic tz'at laj ya'nc eb' tz'ib'xoc sb'i.

⁴ Yuj cha, 'ix 'at José 'a Nazaret 'a yol yic Galilea, 'ix c'och 'a Belén, 'a yol yic Judea, 'a 'aj 'aljnac win rey David pecti'. A José cha, yin̈tl can winac. Yuj cha, yowlal ata x'at ta'.

⁵ 'Ix 'at yac' tz'ib'xoc sb'i yet' 'ix María. Ton̈j nant 'ay strato eb', palta yet'x 'ix yune'.

⁶ Ax yic 'ayc' eb' 'a Belén, 'ix jaw stiempoal yalj jun 'unn cha.

⁷ Ata x'alj jun sb'ab'l 'une 'ix. Sb'an 'och 'ix nip 'a jun 'unn cha. Xlajw cha, sc'otn 'ec' 'ix 'a yol jun sjucb' no chej 'aj tzwa no', yujto caw man̈x 'a 'aj x'aj eb' 'a mesón.

Eb' ángel yet' eb' waymtam calnelu

⁸ A 'a sla'nil Belén cha, ata 'ay jun tzo'n̈ eb' 'ilm calnelu, tzwaymtej eb' scalnelu 'a 'ac'wal.

⁹ Yajn̈j wal cha, 'ix wul sch'oxnc sb'a jun yángel Cajlil 'a eb', ax stzictznil Cajlil cha, 'ix 'eml 'a yib'n̈ eb'. Caw wal 'ix xiw eb' yu'uj.

¹⁰ Palta xyaln jun ángel chi 'a eb' 'ixtic: —Man̈ ex xiwoc, yujto 'ay jun wach' 'ab'x tzwul wal 'ayex. Yu'uj caw 'oj jawc stzaljc'ojlal smasnil 'anma'.

¹¹ A 'a Belén, 'a schon̈b' can win rey David, ata x'alj jun e Colmal q'uiq'ui, atn CRISTO Cajlil.

¹² 'Oj eyila', b'ac'b'il 'och nip 'a jun tz'ulc 'unn cha, 'ayc' 'a yol jun sjucb' no chej 'aj tzwa no'. 'Ixta 'oj 'aj snachj 'el eyu'uj to a', xchi jun ángel cha.

¹³ Yajn̈j wal cha, til wal eb' ángel xcot 'a satcha'an̈, xwul sch'oxnc sb'a eb' yet' junx ángel cha, xyaln eb' wach' paxti 'a Dios, xlaj yalnc eb' 'ixtic:

¹⁴ ¡Alx cab' wach' paxti 'a Dios 'a satcha'an̈! ¡Ax 'a yolyib'n̈q'uinl tic, 'ay cab' junc'ojlal 'a eb' 'aj tzch'ox swach'c'ojlal! xchi eb'.

¹⁵ Xlajw cha, xpax q'ue eb' ángel chi 'a satcha'an̈, ax eb' waymtam calnelu cha, 'ix laj yalnc eb' 'ixtic: —Coyc 'a Belén, 'at quilc jun tas 'ix uj cha, atn jun 'ix yac' Cajlil alxoc 'ayn̈ec, xchi eb'.

¹⁶ Yuj cha, caw ji'ltin̈j x'at eb'. 'Ix 'ilchj María yet' José yuj eb'. 'Ix yiln eb' 'ayc' jun tz'ulc 'unn chi 'a yol sjucb' no chej.

¹⁷ Yic 'ix yiln eb' jun tz'ulc 'unn cha, c'uxn xyal eb' tastc 'ix yal jun ángel chi yu'uj.

¹⁸ Jantc eb' x'ab'n jun tzo'n̈ cha, caw 'ix sat sc'ojl eb' yab'ni.

¹⁹ Palta ax 'ix María cha, ton̈j 'ix smol 'ix jun tzo'n̈ chi 'a snab'en, caw tznab'tan̈ej.

²⁰ Ax eb' waymtam calnelu cha, xpax eb'. 'Ix yaln eb' wach' paxti 'a Dios. Xya'n eb' yuj diosal 'a 'a, yuj tastc 'ix yab' eb', 'ix yil eb', yujto x'el'ch smasnil tas 'icha xalx 'a eb' cha.

'At ch'oxb'il Jesús 'a yatut Dios

²¹ Yucb'ixial xo yalj jun 'unn cha, 'ix 'ajx 'och jun senya circuncisión 'a sniwnal. 'Ix ya'n eb' sb'ic Jesús. Atn jun sb'i tic yaljnac can jun ángel 'a María, yic mantzac pitzw 'a 'ix.

²² A sb'eyb'al eb' israel, yowlal 'ay jun tiempoal tzsacb'tzej sb'a eb' 'ix 'ix tz'alj yune', 'icha tzyal ley yic Moisés. Yuj cha, yic 'ix lajw stiempoal sacb'tzan sb'a 'ix María, 'ix yi'n 'at eb' jun tz'ulc 'unn chi 'a Jerusalén, x'at ya'nc eb' 'a Cajlil.

²³ 'Ixta xyutj sb'a eb', yujto a 'a sley Cajlil, ata tz'ib'b'il can 'ixtic: A junjn winc 'unn tzb'ab'l 'alji, a tz'ajx yico'oc Cajlil, xchi 'a Ch'an̈ U'un̈.

²⁴ X'at ya'nc pax eb' jun tzo'n̈ xajmb'al, 'icha tzyal sley Cajlil yuj eb' meb'a', yic yalx can 'ixtic: Yowlal tz'ajx chawn̈oc no parama mto chawn̈oc no cotc cowojte yuj jun 'unn cha, xchi.

²⁵ Ax 'a jun tiempoal cha, ata 'ayc' jun winc 'a Jerusalén, Simeón sb'i. Caw tojl snab'en, an̈j 'a Dios tzyal sb'a. Caw tztan̈wj sjaw jun tiempoal, yic 'oj colchjoc eb' yit israelal. Caw 'aych pax Yespíritu Dios 'a 'a.

²⁶ A 'a'jnac nachjc 'el yu'uj, to ma'oj chamoc, masnto 'oj yil Cristo, jun 'oj schec cot Cajlil.

²⁷ 'Ix 'at 'a yamq'uil yatut Dios, yujto 'ixta xyal Yespíritu Dios 'a 'a. Ax José yet' snun jun nene Jesús cha, a eb' x'i'n 'at jun 'unn chi 'a yamq'uil yatut Dios cha, yic tzb'on eb' 'icha yaj yaln can ley.

²⁸ Ax yic xc'och eb' ta', 'ix schan 'at Simeón jun tz'ulc 'unn cha, sme'ni, 'ix yaln wach' paxti 'a Dios yu'uj, 'ix yaln 'ixtic:

²⁹ Mamin, an tic wa'mal ach servil, a ticnec cham quin cab' 'a junc'ojlal, yujto x'el'ch 'icha wal otjnac a'n can a ti 'ayin.

³⁰ A yet' in sat tic, caw tzwil jun Colwjum,

³¹ atn jun tic xac' yopiso 'a sat eb' 'anma smasnil 'a yolyib'n̈q'uinl tic.

³² A jun tic 'oj 'a'nc sacq'uinl 'a eb' man̈ israeloc, ax sb'inax chon̈b' Israel yu'uj, xchi Simeón cha.

³³ Ax José yet' snun Jesús, caw 'ix sat sc'ojl eb' yab'n tas 'ix yal Simeón chi yu'uj.

³⁴ Xlajw cha, 'ix sc'ann Simeón swach'c'ojlal Dios 'a yib'n̈ eb'. 'Ix yaln 'ixtc 'a María, atn snun Jesús: —'Ab'i, a jun tz'ulc 'unn tic checl xon yaji, to niwn eb' quit israelal 'oj somchjc 'el snab'en yu'uj. Niwn pax eb' 'oj b'o snab'en yu'uj. A 'oj ch'oxnoc tas tz'aj eb' scolchji, palta niwn eb' 'oj patquilnc can 'eli.

³⁵ 'Ixta 'oj 'aj scheclj 'eli, tas tzna junjn 'anma'. Ach xo tic, 'ay jun c'ual 'oj 'och pitz'n cusc'ojlal 'aych yu'uj, 'icha to 'oj tecxc 'och junc q'uen espada 'a a pixan, xchi Simeón chi 'a María.

³⁶ Ata 'ayc' pax jun 'ix 'ix tzyac' Dios alnc 'el spaxti'. Ana sb'i 'ix. Yisl win Fanuel yin̈tl can Aser, caw chichm xo 'ix. A yic cob's to 'ix, yijnac 'ix jun yichmil, uquen̈ej ab'il yij sb'a 'ix yet' winac, scham winac.

³⁷ Ax ticnec, 84 ab'il xo scan 'ix sch'ocoj. Caw matz yactj can 'ix yatut Dios, sc'ual yac'wlil ya'n servil 'ix Cajlil. Tzya'n 'och sb'a 'a c'ajb'c'ojlal, tzleslwi paxi.

³⁸ A 'a jun rato cha, 'ix c'och 'ix 'a eb', xya'n 'ix yuj diosal 'a Dios. Xlajw cha, 'ix syamn 'och 'ix yaln 'el yab'xil Jesús 'a scal jantcn̈ej eb' wan stan̈wni sjaw jun tiempoal yic 'oj colchjoc 'el chon̈b' Jerusalén.

C'ochnc pax eb' 'a Nazaret

³⁹ Yic 'ix lajw syiclni eb' 'icha tzyal sley Cajlil yuj eb' 'unn tzat 'alji, 'ix paxx eb' 'a schon̈b' 'a Nazaret, 'a yol yic Galilea.

⁴⁰ Ax jun tz'ulc 'unn cha, 'ix q'uib'i, x'och yip, 'ix jelnb'i. Ax Dios til wal swach'c'ojlal sch'ox 'a 'a.

A Jesús yet' eb' cuywjum 'a sley Moisés

⁴¹ 'A junjn ab'il, tzc'ochc smam snun Jesús 'a Jerusalén, yic tz'at yilnc eb' q'uin̈ yic snanb'il cot yel eb' israel 'a libre.

⁴² Ax Jesús x'el 'a slajchwil ab'il, ajun xo x'at yet' eb', yujto x'at yil eb' q'uin̈ 'icha xon sley.

⁴³ A yic xlajw jun q'uin̈ cha, 'ix paxt eb'. Ax Jesús 'ix can 'a Jerusalén, palta man̈ yojcoc eb' smam snun cha, toto xcan ta'.

⁴⁴ A snan eb', to ajun 'a scal eb' 'anma chi xpax yet' eb' cha. Ax 'a yemc'ual, 'ix sayn 'ec' eb' 'a scal eb' yican, yet' 'a scal eb' swach'c'ojol,

⁴⁵ palta may mach ajun yet' eb'. Yuj cha, 'ix meltzj pax eb', x'at saync eb' 'a Jerusalén cha.

⁴⁶ At 'a yoxl c'u 'ix 'ilchj yuj eb' 'a yamq'uil yatut Dios. Wocn 'ejm yet' eb' cuywjum 'a ley yic Moisés. Wan yab'xni 'a eb', tzc'anb'n pax jun tzo'n̈ tas 'a eb'.

⁴⁷ Ax eb' wan yab'xni 'a Jesús cha, caw 'ix sat sc'ojl eb' smasnil, yujto xnachj 'el yu'uj, caw wach' xyutj spacn 'a eb'.

⁴⁸ Yic xyiln eb' smam snun cha, to ata 'ayq'ui, caw 'ix sat sc'ojl eb' yu'uj. Yuj cha, xyaln snun chi 'a 'ixtic: —Ach wune', ¿tas wal yuj 'ixtc tzon̈ otj on̈? A wal a mam tic wet'oc, caw on̈ 'och 'il oj on̈. Til wal ach qui sayc' on̈, xchi 'ix.

⁴⁹ Xlajw cha, 'ix yaln Jesús 'ixtic: —¿Tas yuj tzin e sayq'ui? ¿Tom man̈ eyojcoc to yowlal 'ayn 'ec' 'a yatut in Mam? xchi 'a eb'.

⁵⁰ Palta ma'ix nachj 'el yuj eb', tas jun xyal chi 'a eb'.

⁵¹ Xlajw cha, xpax yet' eb' 'a Nazaret. Yiclumn̈ej xyutj sb'a 'a eb', 'icha xon sley. Ax snun cha, smol jun tzo'n̈ chi 'a snab'en, caw tznab'tan̈ej.

⁵² Ax Jesús cha, an̈ja sq'uib'i, tzq'uib' pax snab'en. Caw tzalj Dios yet'oc, tzalj pax eb' 'anma yet' jun xo.