Lc 17 - Chuj San Sebastian Bible

'Ay smay tzca'c juwc 'el junc xo mach

¹ 'Ix yaln Jesús 'a eb' scuywum 'ixtic: —Yowlal 'ay jun tzo'n̈ tas tz'a'n juwc 'el qui nab'en; palta 'oltac wal eb' tz'a'n juwc 'el snab'en eb' yit 'anma'il.

² Toto 'ay mach tz'a'n juwc 'el snab'en junc eb' 'unn to, octom tzjalx 'och junc niwquil q'uen cha 'a sjaj, tzjulx can 'at 'a yojl a mar yic mantzac juw 'el snab'en jun chi yu'uj, toto 'ixta', yel xo wal wach' yico'.

³ Yuj cha, caw tzeyac' cuenta e b'a. Toto 'ay junc eyit 'anmal tz'och smul 'ayex, tze tench wa'an. Q'uinloc tzna sb'a, tzeyac' niwnc'ojlal 'a 'a.

⁴ Wach'xam uc 'ejm tz'och smul 'ayx 'a junc c'u, toto tz'at yal pax sb'a uc 'ejmoc, tzyaln 'ayx 'ixtic: Man̈x b'a'n̈ 'oj in b'o 'ixta', toto xchi, yowlal tzeyac' niwnc'ojlal 'a 'a, xchi Jesús.

Toto tzca'ch Dios 'a qui c'ojol

⁵ Ax eb' schecb' Cajlil, xyaln eb' 'ixtc 'a 'a: —Comnoc tzac' wal qui wach' 'a'c 'och qui c'ojl 'a Dios on̈, xchi eb'.

⁶ Yuj cha, xyaln Cajlilec 'a eb' 'ixtic: —Toto yel tzeya'ch Dios 'a e c'ojol, wach'xam caw jab' 'icha jun pilc sat te rechiwo, 'oj stac eyaln 'ixtc 'a jun niwquil te tic: Q'uen̈ ta yet' smasnil a ch'an̈l yib' tic, 'ixc 'a a mar, 'at 'awj pax a b'a ta', toto 'oj e chioc, 'oj sb'o te 'icha 'oj eyal cha.

Qui cuenta ca'nec servil Dios

⁷ Q'uinloc 'ay junc on̈ 'ay junc qui moso tzon̈ 'a'n servil. 'Ayb't munljoc cu'uj, mto 'ayb't 'ilj calnelu. Ax yic tzjapxi, ¿tom tzcal 'ixtc 'a 'a: 'Ochan̈, 'emn̈ wocan, wa'an̈, tom xqui chi 'a 'a?

⁸ Ma'ay, tecn tzcal 'ixtc 'a 'a: Pil chan̈ sc'ab' a camix. 'Ac' lista tas 'oj in c'uxu', sec tzin ac' servil yic wan in wa'i. 'Oj lajwc cha, ax a wa pax jun xo, tecn xqui chi 'a 'a.

⁹ Ax jun qui moso cha, ¿tom tzca'c yuj diosal 'a 'a, yujn̈ej to tzb'o tas tzcalc 'a 'a? tecn ma'ay.

¹⁰ 'Icha junc moso cha, 'ixta ex pax jun xo, a yic tox xlajw eyiclni smasnil schecnb'il Dios, smoj tzeyal 'ixtic: An̈ tic, wach'xam ya'mal on̈c servil Dios, caw may quel'chi, yujto ton̈j xqui b'o jun tzo'n̈ tas qui cuenta xon qui b'oni, xe chi, xchi Jesús 'a eb'.

Eb' lajn̈wan̈ b'onc yuj Jesús

¹¹ Ax Jesús, an̈ja sb'eyb't 'a jun b'e tz'at 'a Jerusalén. 'Ix b'ey 'a smon̈jon Samaria yet' Galilea.

¹² Ax yic wan sc'och 'a jun aldea, 'ay lajn̈wan̈ winc 'ayc' 'a yol b'e, ya'ay ewin yuj lepra. Yuj cha, ma'ix jaw ewin 'a stz'ey.

¹³ Tonj x'awj 'at ewin 'ixtc 'a 'a: —Mamin, comnoc tz'o'ch a c'ojl 'ayn̈ on̈, xchi ewinac.

¹⁴ Yic xyiln Jesús ewinac, xyaln 'ixtic: —'Ixquec, 'at ch'oxc e b'a 'a eb' ya'mal 'och qui ti 'a Dios, xchi 'a ewinac. Axn wan sb'ey ewinac, xb'ox sc'ojl ewin smasnil.

¹⁵ 'Ay jun 'a scal ewinac, yic xyilni to xb'ox sc'ojol, 'ix meltzj pax 'a spatquil muc'uc. Caw 'ip xyutj yaln wach' paxti 'a Dios.

¹⁶ Cojnn̈ej xjaw 'a yojltac Jesús, x'ejm cumnjoc, masnto x'e'mch snan̈l sat 'a sat lu'um. 'Ix ya'n yuj diosal 'a Jesús. A jun winc cha, 'aj Samaria winac.

¹⁷ Yuj cha, xyaln Jesús 'ixtc 'a eb' 'ayc' chi ta': —¿Tom man̈ tz'acnoc xb'ox sc'ojl eb' slajn̈wan̈il? Ax laj eb' b'aln̈wan cha, ¿'aj laj til 'ay eb'?

¹⁸ Cojxn jun win tic, tzwul yac' yuj diosal 'ayin, palta 'in man̈ quit chon̈b'oquec winac, xchi Jesús 'a eb'.

¹⁹ Xlajw cha, xyaln pax 'a jun winc chi 'ixtic: —Q'uen̈ lin̈an, paxan̈. Tic ach b'oxi, yujto xa'ch a c'ojl 'a Dios, xchi 'a winac.

A tas 'oj 'aj Dios yoch Yajlil

²⁰ 'Ay jun tzo'n̈ ewin fariseo xc'anb'n 'a Jesús 'ixtic: ¿B'a'n̈ wal 'oj jawc stiempoal yoch Dios Cajliloc? xchi ewin 'a 'a. —A yic tz'och Dios Yajlil, matz tac' quiln yet' qui sat.

²¹ Matz tac' calni: Yaj 'a tic, mto yaj 'a cha, man̈ xqui chioc. Yujto a 'a qui pixan, ata tz'och Dios Yajlil, xchi Jesús 'a eb'.

²² Xlajw cha, xyaln 'ixtc 'a eb' scuywum: —'Ay wal jun tiempoal 'oj jawoc, 'oj eyal 'ixtic: Comnoc wal tzjaw pax jun 'Ochnc 'Anmal jun 'ejm xo, quen cab' wal junc c'u, 'oj e chioc, palta ma'oj eyila'.

²³ 'Ay eb' 'oj alnc 'ayex: Yaj 'a tic, mto yaj 'a cha, 'oj cob' schic eb'; caw man̈ ex 'atoc, man̈ ex 'och tza'n yuj eb'.

²⁴ Yujto 'icha wal junc raya, caw tzsacb' 'el satchan̈ smasnil yu'uj, 'ixta 'oj 'aj in jaw 'a jun c'u yic 'oj in jaw an 'Ochnc in 'Anmal tic.

²⁵ Palta b'ab'el, yowlal caw 'oj wab' syail, 'oj in patquilx can 'el yuj eb' 'anma 'ayc' 'a jun tiempoal tic.

²⁶ Ax yic 'oj in japxi, lajn 'oj 'aj 'icha jun tiempoal yic yec' win Noé.

²⁷ Yujto a eb' 'anma 'a jun tiempoal cha, ton̈j wanc eb', yu'n eb' tas tzyuq'uej. 'Ay eb' xlaj nupni, 'ay eb' laj ya'jnac 'och yisl yistzilc eb' winc cha, toc sna eb' toto 'ay tas tzjaw 'a yib'n̈ eb'. 'Ixta 'e'nc eb', masnto 'a jun c'u yic yoch win Noé 'a yol te barco. Ata ya'jnac jun owl yaxn̈ab', scham eb' smasnil.

²⁸ An̈jtona', 'ixta eb' 'anma 'a jun tiempoal yic yec' win Lot: May tas sna eb', ton̈j wanc eb', yu'n eb' tas tzyuq'uej. Tzlaj smannc eb' tas, tzlaj schon̈nc pax eb', tzlaj yawnc eb' slu'um, tzlaj sb'onc eb' yatut.

²⁹ Palta at yic yel win Lot 'a jun chon̈b' Sodoma cha, yemt wal jun c'ac' 'a satcha'an̈, yet' jun tzo'n̈ cotc q'uen caw xilxni stz'a'i. 'Icha wal yem n̈ab', 'ixta wal yemli. Yuj cha, c'uxn chamnc eb' yu'uj.

³⁰ 'Icha wal 'ajnc jun tiempoal cha, 'ixta 'oj 'aj wal jun c'u yic 'oj in jaw an 'Ochnc in 'Anmal tic.

³¹ A 'a jun c'u cha, a mach 'ay q'ue 'a span̈nil yib'n̈ yatut, wach'xam 'ay tas 'aycn 'a yol n̈a cha, man̈x cab' 'och yic' 'el ta. Yet' eb' 'ayb't munljel, man̈x cab' jawc eb' 'a yatut.

³² Caw tze na cot tas 'ajnc 'ix yistl win Lot.

³³ A wal eb' tznib'j matz chami, 'oj satl sq'uinl eb' 'a jun 'ejmn̈ej. A pax eb' tzyac' cham sb'a wu'uj, 'oj scha eb' sq'uinl 'a jun 'ejmn̈ej.

³⁴ Tzwal 'ayex, q'uinloc 'ay chawn̈oc mach waync 'a sat sch'at 'a jun 'ac'wl cha, jun 'oj 'ijxoc 'ati, jun 'oj canoc.

³⁵ Q'uinloc 'ay chawn̈oc 'ix wan scheni, jun 'oj 'ijxoc 'ati, jun 'oj canoc.

³⁶ [An̈jtona', q'uinloc 'ay pax chawn̈oc winc 'ayb't munljel, jun 'oj 'ijxoc 'ati, jun 'oj canoc, xchi Jesús 'a eb' scuywum cha.]

³⁷ Ax yic 'ix yab'n eb' jun tzo'n̈ cha, 'ix sc'anb'n eb' 'a 'ixtic: —Mamin, ¿'ajtil 'oj yac' jun chi 'ixta'? xchi eb'. 'Ix yaln 'ixtc 'a eb': —'Icha tzcheclj 'aj 'ay sniwnal junc no chamnc noc', yujto ata tzyam sb'a no 'usej, 'ixta 'oj aj jun cha, xchi Jesús.