Lc 15 - Chuj San Sebastian Bible

A yab'xil jun calnelu tzsati

¹ Smasnil eb' tecm 'el tumin, yet' jun tzo'n̈ xo eb' maysch'olnil sb'eyb'al, 'ix jaw eb' 'a Jesús yic tz'ab'xni eb' 'a 'a.

² Yuj cha, xcot yowl ewin fariseo yet' ewin cuywjum 'a ley yic Moisés, 'ix yaln ewin 'ixtic: —A win tic, tzchajn̈ej win eb' maysch'olnil sb'eyb'al tzc'och 'a 'a, 'in tzwa yet' eb', xchi ewinac.

³ Yuj cha, xyaln Jesús jun 'ab'x tic 'a ewinac:

⁴ Q'uinloc 'ay junc winc 'a e cal, 'ay junc ciente scalnelu. Toto tzsat junoc, tzyactn can win no 99 chi 'a 'a'lic cha, tz'at saync 'ec' win jun no tzsat cha, masnto tzchax yu'uj.

⁵ A yic tzchaxi, tzme'n cha'an̈, tzcaw tzalj yet' no'.

⁶ Ax yic tzc'ochx 'a yatut, tzyawtn cot eb' swach'c'ojol yet' eb' 'ay 'a stz'ey, tzyaln 'a eb' 'ixtic: Tzaljan̈c wet'oc, yujto 'ay jun in calnelu sati, al ticnec, x'ilchj pax no wu'uj, xchi 'a eb'.

⁷ An̈jtona', q'uinloc 'ay junc 99 'anma toxn tojl snab'en, man̈ yowlalc tzna sb'a snani. May tzaljc'ojlal 'a satchan̈ yuj eb'. Palta an tzwal 'ayex, toto 'ay junc maysch'olnil sb'eyb'al tzna sb'a yuj smul, yel xo wal niwn tzaljc'ojlal yuj jun chi 'a satcha'an̈.

A yab'xil jun tumn tzsati

⁸ Q'uinloc 'ay junc 'ix, 'ay lajn̈ec stumin, toto tzsat junoc, tzya'ch staj, tzmesn 'elt yol yatut. Caw wal tzsayq'ui masnto tzchax yu'uj.

⁹ Ax yic tzchax yu'uj, tzyawtn cot eb' swach'c'ojol, yet' eb' 'ay 'a stz'ey, tzyaln 'ixtc 'a eb': Tzaljan̈c wet'oc, yujto 'ay jun in tumn 'ix sati, palta xchax wu'uj, xchi 'a eb'.

¹⁰ Yuj cha, tzwal 'ayex, toto 'ay junc maysch'olnil sb'eyb'al tzna sb'a yuj smul, caw tzalj eb' yángel Dios yu'uj, xchi Jesús.

A yab'xil jun 'unnab'il tzsatb'ti

¹¹ 'Ix yaln pax Jesús junx 'ab'x tic: 'Ay jun winac, 'ay chawn̈ yunnal.

¹² A win tza'n 'unin, xyaln win 'ixtc 'a smam: Mamin, 'a'cn xon nan̈loc in macl to wic xon yaj 'aych tic, xchi. Yuj cha, a tas 'ay 'a win mamb'il cha, spojn can 'ec' win 'a eb' schawn̈il.

¹³ Ax yic jaye nant c'u, xchon̈n can 'el win tza'n 'unn chi jantcn̈ej tas xchaj 'a smam cha, 'ix 'at win 'a junx chon̈b' 'a najat. Ax 'ix c'och win 'a jun chon̈b' cha, amancotn xyutj win slajn 'el stumn chi muc'uc, ton̈j slaj win 'a spatc jun tzo'n̈ maysch'olnil 'ix sb'o sc'och ta'.

¹⁴ C'uxn wal slajw 'ejm stumn winac. 'Ix jaw jun niwn wejl 'a yib'n̈ jun chon̈b' chi 'aj 'ayc' cha. Ax winac, man̈x 'a jac tas tzc'uxu.

¹⁵ Yuj cha, x'at sc'annc win smunljel 'a jun win 'aj chon̈b' cha. 'Ix 'ajx smunljel winac, 'ix checx 'at win tan̈j chitm 'a jun lum 'aj 'ayc' e no chitm cha.

¹⁶ Palta ax winac, caw tzcham win yuj wejel. Tznib'j wal win tzb'ut'j sc'ojl yet' jun tzo'n̈ tas tzc'ux no chitm cha. Palta may mach tz'a'n jac tas 'a winac.

¹⁷ 'Ixta to b'i'an, snan win 'ixtic: ¿Tas yuj 'ixtc tzwutj in b'a? Ticni caw 'ay eb' smajn in mam, caw tzyac' sobra tas tzc'ux eb'. An xo tic, wan wa'n cham in b'a yuj wejl 'a tic.

¹⁸ 'Oj in pax 'a in mam cha, ax waln 'ixtc 'a 'a: Mamin, caw x'och in mul 'a Dios, x'och pax in mul 'ayach.

¹⁹ Man̈x smojc tzin al onnaloc. Comnoc toxn̈ej tzin a mosoej, 'oj in chioc, xchi winac.

²⁰ Yuj cha, 'ix paxt win 'a 'aj c'ochnc cha. Ax yic najt to wal sjawi, 'ix yiln sb'a smam cha, caw x'o'ch sc'ojl 'a 'a. 'Ix 'at schanoc. Caw carela x'ati. Xlajw sc'ochi, 'ix sla'n coti, stz'ub'n 'elt sti jun yunnal chi yuj tzaljc'ojlal.

²¹ Xyaln win 'unnab'il chi 'ixtic: Mamin, caw x'och in mul 'a Dios. X'och pax in mul 'ayach. Ax ticnec, man̈x smojc tzin al onnaloc, xchi win 'a smam cha.

²² Palta ax smam cha, xyaln 'ixtc 'a eb' smoso: 'Ixquec muc'uc, 'at 'ijec cot jun tzo'n̈ pichl caw wach', tzeya'n 'och 'a jun wunnal tic. Tzeya'ch scolc'ab', tzeya'n 'och xan̈ab'.

²³ Tzlajw cha, tz'at eyi'nc cot no wacx b'a'ch yajx servil, tze milni. To 'oj qui wa'ec, ax ca'nec 'och sq'uin̈.

²⁴ Yujto a jun wunnal tic, 'icha to chamnc xo, palta ax ticnec 'icha to xpitzw paxi. Satnc ton 'ati, palta xjapx 'ayin, xchi smam cha. Yuj cha, xya'n 'och eb' sq'uin̈ cha.

²⁵ Ax win sb'ab'l 'unnal winac, 'ayb't win 'a smunljel. Ax yic xjapx win 'a sla'nil yatut cha, 'ix yab'ni to 'aych son, wan ya'n eb' chan̈al.

²⁶ Yuj cha, xyawtn 'at win jun smoso smam chi 'a 'a. 'Ix sc'anb'n win 'ixtc 'a winac: ¿Tas yuj 'aych jun q'uin̈ tic? xchi win 'a win moso cha.

²⁷ Yuj win o'tac, yuj cha 'aychi. To xjapxi, ax a mam x'a'n milxoc no quelm wacx b'a'ch yajx servil, yujto a jun o'tac cha, may x'i'ni. Wach' sc'ojol, 'ix japxi, xchi jun moso chi 'a winac.

²⁸ Yuj cha, caw xcot yowl winac. Toxn man̈x 'ic yal sc'ojl win x'och 'a yol n̈a cha. Ax smam winac, a x'el ta. 'Ix tew 'och 'a winac, to tz'och win 'a yol n̈a cha.

²⁹ Palta xyaln win 'ixtc 'a smam cha: 'In ojtac, niwn xo yab'lil tzach wac' servil, mant 'a jun 'ejmoc matz in yiclj tas tzala. Wach'xam junc quelm chiwo, toxn matz ac' xon junc wico', yic tzwa'n 'och junc in q'uin̈ yet' eb' in wach'c'ojol.

³⁰ Palta ax jun onnal tic, ton̈j scomn laj win a tumn yet' eb' 'ix 'ajmul 'ix, ax ticnec, tzjapx winac. Yuj winac xa'n milxc cham no wacx b'a'ch yajx servil, xchi win 'a smam cha.

³¹ Palta xyaln smam win chi 'ixtc 'a 'a: Ach wunnal, 'aych 'ec' wet' 'a smasnil tiempo, jantcn̈ej tas 'ay 'ayin, ecn̈ej wet'oc.

³² Palta a ticnec, smoj xwa'ch jun q'uin̈ tic, sec tzon̈ tzaljec. Yujto a jun o'tac tic, 'icha to chamnc xo, palta ax ticnec, 'icha to xpitzw paxi. Satnc ton 'ati, palta xjapx 'ayin, xchi smam win chi 'a 'a, xchi Jesús.