Jueces 8 - Chuj San Sebastian Bible

'Ix yamchj eb' sreyl eb' madianita

¹ Ax smasnil eb' yin̈tl Efraín, 'ix yal eb' 'ixtc 'a Gedeón: ¿Tas yuj on̈ a patquilj can 'eli, ma'ix al cab'i toto ex 'at eyac' owl yet' eb' madianita cha? xchi eb'. Caw wal 'ix cot yowl eb' 'a 'a.

² 'Ix ta'w 'a eb' 'ixtic: —¿Tom tze na'a to niwn yel'ch tas xqui b'o 'a yib'n̈ eyic on̈? A tas xe b'o 'a slajb' xo tic, yelxo niwn yel'ch 'a yib'n̈ tas xqui b'o 'a b'ab'l on̈.

³ A Dios x'a'n eb' syajlil eb' 'aj Madían 'a yol e c'ab', atn win Oreb yet' win Zeeb. An xo tic, ¿tas junc wic chi wach' in lajb'tzan yet' tas tox xe b'o cha? xchi. Ax xyab'n eb' yin̈tl Efraín cha, to wach' tas xyal Gedeón, yuj cha, x'och wan yowx 'och eb' 'a 'a.

⁴ Ax Gedeón yet' eb' 'oxe ciente soldado chi ajun yet'oc, caw wal c'unb'nacx eb' yic xc'och eb' 'a sti a Jordán. 'Ix 'ec' eb' 'a yojl a', palta an̈j 'ijnoc tza'n 'och eb' yuj eb' 'ajc'ojl cha.

⁵ Ax yic xc'och eb' 'a Sucot, 'ix yaln Gedeón chi 'ixtc 'a eb' 'aj lugar cha: —Comnoc wal tz'el 'a e c'ojl e siyn jac tas tzc'ux eb' ajun wet' tic, yujto caw tz'el yip eb' yuj c'unb'lal, to tzqui pech eb' sreyl eb' madianita on̈, atn win Zeba yet' win Zalmuna, xchi.

⁶ Ax eb' syajlil eb' 'aj Sucot cha, xyaln eb' 'ixtic: —¿Tom 'ayx 'ec' win Zeba yet' win Zalmuna chi 'a yol e c'ab', yuj cha, tza nib'n an̈ tzcac' tas tzc'ux ewin a soldado tic? xchi eb'.

⁷ 'Ix ta'w Gedeón 'a eb' 'ixtic: —A yic tzlajw ya'n Jehová win Zeba yet' win Zalmuna chi 'a yol qui c'ab' on̈, ax yic tzon̈ meltzj pax on̈, ax ex qui ma'n can ch'iychjoc 'a tic yet' te q'ui'ix, mto yet' te loc'b'aq'uech, te tzcot 'a lum cusltac lu'um, xchi 'a eb'.

⁸ Xlajw cha, 'ix 'atx eb' 'a junx chon̈b' tzcuch Peniel, 'ix sc'ann tas tzc'ux eb' ajun yet' cha, 'icha wal xyutj yaln 'a eb' 'aj Sucot, 'ixta 'ix yutj yaln pax 'a eb'. Ax eb' 'aj Peniel cha, 'icha xyutj eb' 'aj Sucot yalni, 'ixta pax xyutj eb' yaln 'a 'a.

⁹ 'Ix yaln 'ixtc 'a eb' 'aj Peniel cha: —A yic 'oj ca'nc ganar owl chi 'on̈, ax qui meltzj paxt 'a 'aj 'ayx tic, 'oj 'ec' qui ma'cn 'ejm lan̈chjoc jun e cuartel tic on̈, xchi.

¹⁰ Ax win Zeba yet' Zalmuna, ata 'ayc' eb' 'a lum Carcor yet' olajn̈e mil soldado eb'. Cojxn eb' chi xcan scham 'a owal, yujto 'ayx 120 mil eb' tox xchami.

¹¹ Ax Gedeón yet' eb' soldado, 'ix c'och 'a 'aj 'ay scamplamento jun tzo'n̈ eb' 'anma chi 'a stojlal 'aj tzq'uel c'u 'a cusltac lu'um, atn 'a chon̈b' Noba yet' Jogbeha. 'Ix ya'n ganar eb' jun owl cha, yujto satc'ojlal yaj eb' soldado madianita yic xc'och eb'.

¹² 'Ix 'at win Zeba yet' win Zalmuna 'eloc, palta ax Gedeón, 'ix 'at yet' eb' soldado 'a spatc eb'. 'Ix yamchj ewin yuj eb', ax eb' soldado ewin cha, caw wal sactzic eb'.

¹³ A yic xmeltzj Gedeón 'a owl yet' eb' soldado, ata 'ix 'ec' 'a syuch'nal Heres.

¹⁴ Ata 'ix yamchj jun win quelm 'aj Sucot yuj eb'. 'Ix sc'anb'n 'a winac tastc sb'i junjn ewin yajl yaj 'a Sucot cha. Ax win quelm cha, a win 'ix stz'ib'n sb'i eb', xya'n win slistail eb' yajl cha. 'Ay 77 sb'isl eb' 'a smasnil.

¹⁵ Ax yic xc'och Gedeón 'a Sucot, 'ix yaln 'ixtc 'a eb' 'aj chon̈b' cha: —A ticnec, yaj win Zeba yet' Zalmuna, atn yuj ewinac in e b'uchni yic xcob' in c'annc jac tas tzc'ux ewin in soldado 'ayex, yic caw 'ay swejl eb'. Xeyaln 'ayn 'ixtic: ¿Tom tox xe yam ewinac, yuj cha, ax ca'n tas tzc'ux eb' a soldado cha? xe chi 'ayin. Ax ticnec yaj ewinac, xchi Gedeón.

¹⁶ Xlajw cha, 'ix yi'n cot eb' te q'ui'ix yet' te loc'b'a'ch tzcot 'a lum cusltac lu'um. 'Ix xumn 'och 'a eb' yajl chon̈b' Sucot cha.

¹⁷ An̈jtona', 'ix sma'n can lan̈chjoc eb' pax jun scuartel eb' soldado 'a chon̈b' Peniel cha. 'Ix smiln can eb' smasnil 'anma 'a jun chon̈b' cha.

¹⁸ Xlajw cha, sc'anb'n 'a win Zeba yet' 'a win Zalmuna chi 'ixtic: —¿Tas yilx eb' winc mac'b'il cham eyuj 'a Tabor? xchi 'a eb'. —Caw lajn wal quiln eb' 'icha ach tic, 'icha wal yilx yunnal junc win rey, 'ixta yilx eb', xchi ewinac.

¹⁹ —A ewin cha, wu'tac ewinac, junn̈j in nun yet' eb'. 'A sat Jehová tzwalni, comnoc ma'ix e mil ewinac, an̈jtona 'in, matz ex in mil chamoc, xchi Gedeón 'a eb'.

²⁰ Xlajw cha, xyaln 'ixtc 'a Jeter, atn win sb'ab'l 'unnal: —Cotan̈, mil ewin tic, xchi 'a 'a. Palta ax win quelm cha, 'ix xiw win smiln ewinac, yujto caw quelm 'unn to winac.

²¹ Yuj cha, xyaln win Zeba yet' Zalmuna 'a Gedeón 'ixtic: —Cotn̈ ach tic, ach wal tztac' on̈ a milni. Yujto ach tic, 'ojcab'il ach, to matz 'ach xiwi, caw 'ay a te'nal, xchi eb' 'a 'a. 'Ix cot Gedeón, smiln eb' rey cha, xyi'n 'ec' jun tzo'n̈ yelwnub'l sjaj scameyo ewin 'aychi.

²² Xlajw cha, xyaln eb' israel chi 'ixtc 'a Gedeón: —A ticnec, ach tzach 'och qui yajliloc yet' eb' en̈tl b'aq'uin̈, yujto on̈ a col 'elt 'a yol sc'ab' eb' madianita, xchi eb' 'a 'a.

²³ 'Ix ta'w Gedeón 'a eb' 'ixtic: —Man̈oc in 'oj wac' yajlil 'a eyib'an̈, man̈oc pax eb' wunnal b'aq'uin̈, palta a Jehová 'oj yac' yajlil 'a quib'n̈ec.

²⁴ Cojn tas tzin c'an 'ayex, comnoc tzeyac' q'uen yumchicn 'ayin yet' q'uen colc'ab' xeyij 'ec' 'a owl cha, xchi 'a eb'. —A jun tzo'n̈ cha, oron̈ej eb', yujto an̈j chi tzya'ch eb' ismaelita cha.

²⁵ 'Ix ta'w eb' israel chi 'ixtic: —Yet' smasnil qui c'ojol ax ca'n jun tzo'n̈ tic 'ayach, xchi eb'. 'Ix slich'n 'ejm eb' jun nip 'a sat lu'um, ax 'a yib'an̈, ata xyac' 'ejm eb' jun tzo'n̈ oro cha.

²⁶ Ax yic x'echtax q'uen oro xyac' eb' cha, 'ay 38 libra yalil. Chuc yaj pax jun tzo'n̈ xo q'uen q'uen wach' yilxi, yet' jun tzo'n̈ te pichl púrpura yic sreyl eb' madianita cha, yet' jun tzo'n̈ xo tas 'aych yelwnub'loc sjaj no scameyo eb'.

²⁷ Sb'on Gedeón jun yechl 'a q'uen oro yic tznan 'el junc tas, ax 'a schon̈b' Ofra, ata xcan jun yechl chi yu'uj. Ax smasnil eb' yit chon̈b' cha, 'ix spatquiln can 'el eb' Jehová yuj jun yechl cha, axta xyal sb'a eb' 'a 'a. A jun chi 'ix jun 'el snab'en Gedeón yet' eb' yunnal.

²⁸ 'Ixta x'aj yochcn eb' madianita schecb'oc eb' israel cha, man̈x 'a 'aj xya'lj eb' scoln sb'a. Chawinc ab'il xcan eb' israel 'a junc'ojlal yic 'ayc' Gedeón chi yet' eb', man̈x 'a owl x'och 'a jun lugar cha.

A schaml Gedeón

²⁹ Xlajw cha, xpax win Gedeón 'a yatut, atn win yunnal Joás.

³⁰ Til wal yunnal win x'elcni. 'Ay 70 eb' 'a smasnil, yujto niwn eb' 'ix 'ix yijnac winac.

³¹ 'Ay pax jun schab'l 'istzil win 'ay 'a chon̈b' Siquem. 'Ix 'alj jun yune 'ix yet' winac, xya'n sb'ic Abimelec.

³² Caw 'ichm winc xo Gedeón yic 'ix chami. Ata xmucx 'a 'aj mucn smam 'a chon̈b' Ofra, 'a yol smacb'en eb' yin̈tl Abiezer.

³³ A yic chamnc xo Gedeón cha, ax smasnil eb' israel, 'ix spatquiln can pax 'el eb' Dios. Ax 'a jun tzo'n̈ yechl comn dios Baal, ata xyac' 'ejm sb'a eb'. 'Ix ya'n 'och eb' sdiosalc Baal-berit.

³⁴ 'Ix yac' eb' israel sat sc'ojl 'a Jehová sDiosal. Man̈x 'ic sna cot eb', toto a xcoln eb' 'a yol sc'ab' eb' 'ajc'ojl oyn 'och 'a 'a.

³⁵ May jac spac wach' xyac' eb' 'a eb' yunnal Gedeón cha, yuj swach'c'ojlal xyac' 'a eb'.