Jueces 6 - Chuj San Sebastian Bible

'Awtb'il Gedeón yuj Dios

¹ A eb' israel caw man̈ wach'c tas 'ix sb'o eb' 'a sat Jehová, yuj cha, 'ix 'ajx 'och eb' 'a yol sc'ab' eb' madianita 'a uque ab'il yuj Jehová.

² A eb' israel cha, caw 'ipn swach' 'ixtx eb' yuj eb' madianita. Caw wal tzxiw eb' 'a eb', yuj cha, sb'on eb' israel chi sjul 'aj tzc'ub'j 'el sb'a 'a spatc eb' lum niwc witz, 'a yojl n̈aq'ue'en, yet' 'ajtil caw 'ajltac sc'och 'anma'.

³ A yic tzyawn eb' israel yawb'en 'a 'aj 'ayc' cha, ax eb' madianita yet' eb' amalecita, yet' pax jun tzo'n̈ xo eb' cajn 'ec' 'a stojlal 'aj tzq'uel c'u, tz'at eb' 'at yac' owl yet' eb'.

⁴ Sb'o eb' scamplamento 'a sat slum eb' israel cha, tzsatn 'el eb' tas 'awb'il yuj eb', masnto tzc'och 'a smon̈jonal chon̈b' Gaza. Man̈x 'a jac tzc'ux eb' israel chi tzyactj can eb'. Man̈x 'a pax no calnelu, no wacax, mto no b'uru xyactj can eb'.

⁵ Yujto yet' eb' smantiado tzc'och eb', yet' eb' swacax, man̈x yalnb'ilc scameyo eb' yet'i. Man̈xtzac b'ischj eb' yet' scajb'en noc', 'icha wal sb'ey tob'tnoc no c'ulub', 'ixta sb'ey eb' yic xc'och eb' 'at satl sb'al lum lum cha.

⁶ Yuj eb' madianita cha, 'ix 'ochcn eb' israel chi meb'a'il, yuj cha, 'ix sc'ann pax eb' scolwal Jehová.

⁷ A yic sc'ann eb' scolwal Jehová, sec tzcolx 'el eb' 'a yol sc'ab' eb' madianita cha,

⁸ ax Jehová a 'ix 'a'n cot jun schecb' 'a eb' israel cha, xyaln 'a eb' 'ixtic: 'Ixtc wal yaln Jehová qui Diosalec: An ex wij 'elt 'a Egipto, 'a 'aj 'ayx 'och mosoal, 'aj man̈ eyico'oc e b'a.

⁹ Man̈ cojnoc 'a yol sc'ab' eb' 'aj Egipto ex in col 'elta, palta ex in col 'elt pax 'a eb' x'a'n 'och e cusc'ojlal. Xwij 'el eb' 'a eyojltac, ax 'ayx xwac' slum eb'.

¹⁰ 'Ix waln 'ayex, to an tic Jehová e Diosal in. Man̈ eyac' 'ejm e b'a 'a jun tzo'n̈ scomn diosal eb' amorreo 'ayc' 'a lum lum tic 'aj cajn ex 'ec' tic; palta ax xo tic, ma'ix eyiclj 'a tas xwala, xchi Dios, xchi jun checb' cha.

¹¹ 'Ay jun c'ual 'ay jun yángel Jehová 'ix 'emli, axta x'em wocn 'a yich jun te mach' 'ay 'a Ofra. A jun lum cha, yic win Joás yin̈tl Abiezer. 'Ay pax jun yunnal win tzcuch Gedeón. A Gedeón cha, wan schayw trigo 'a c'ultaquil, sec matz yilsb'a eb' madianita 'a 'a. A 'aj tzte'x 'el yal uva, ata tzchayw trigo cha.

¹² 'Ix sch'oxn sb'a jun yángel Jehová chi 'a winac, 'ix yaln 'a 'ixtic: —Ach winc jeln a'n owal, a Jehová 'aych et'oc, man̈ 'ach xiwoc, xchi.

¹³ 'Ix ta'w win Gedeón cha, xyaln 'ixtic: —'A'n niwnc'ojlal mamin, toto 'aych Jehová quet' on̈, ¿tas yuj tzjaw jun tzo'n̈ tic 'a quib'n̈ on̈? ¿'Ajtil 'ay jun tzo'n̈ milagro yaljnac can eb' qui mam quichm on̈, yic yaln eb' chajtlto a Jehová 'ix 'i'n 'elt eb' 'a Egipto? Palta ax ticnec, on̈ yactj can qui ch'ocj on̈, on̈ ya'n can 'och 'a yol sc'ab' eb' madianita, xchi.

¹⁴ 'Ix 'och q'ueln Jehová 'a 'a, 'ix yaln 'ixtic: —An tzach in checb'ti. C'anlb'ej jun ep 'ac'b'il wu'uj, yic tza coln 'elt eb' et israelal 'a yol sc'ab' eb' madianita, xchi.

¹⁵ —'A'n niwnc'ojlal jun 'ejm xo mamin. ¿Tas 'oj wutc in coln 'el eb' wit chon̈b' tic? Yujto an tic, caw wal meb'a in yet' eb' win̈tl 'a scal eb' yin̈tl Manasés. Slajb' 'unn xoj pax waj 'a scal eb' wu'tac, xchi Gedeón.

¹⁶ Palta xyaln pax Jehová 'ixtc 'a 'a: —'Oj stac' o'oj, yujto an 'ayn 'och et'oc. 'Icha tz'aj yem junc winc to may mach tzcolni, 'ixta 'oj 'aj eb' madianita chi yem o'oj, xchi.

¹⁷ —Toto wach'n 'a a sat, tzin tew 'ayach, ch'ox junc milagro wila', sec tznachj 'el wu'uj, chajtlto schecb' ach Dios.

¹⁸ Tzin tew 'ayach, comnoc 'aych to 'ec'n̈ej 'a tic, comnoc manttoc tzach 'ati, masnto tzin japx 'aj 'aych 'ec' tic, tzin nib'j tzwij cot junc in xajmb'al 'a ojltac, xchi Gedeón cha. 'Ix ta'w Jehová 'ixtc 'a 'a: —'Oj in tan̈wc a japxi, xchi.

¹⁹ Xlajw cha, 'ix 'at Gedeón, sb'on jun no yune chiwo, xyi'n cot jun echtab' 'ixm harina, sb'on jun tzo'n̈ pan may yich. Xlajw cha, xya'n 'ejm win no chib'j chi 'a yol jun te xu'uc, ax 'a yol jun lum chen ata xyac' 'ejm win yalil no chib'j cha. Xlajw cha, xyi'n cot smasnil jun tzo'n̈ chi 'a yojltac jun ángel 'aycn 'a yich te mach' cha.

²⁰ Xyaln jun yángel Dios chi 'a win 'ixtic: 'Ij cot no chib'j yet' 'ixm pan may yich, tza'n q'ue 'a yib'n̈ q'uen q'uen tic, tza secn 'ejm yalil no cha, xchi. Ax Gedeón syiclj smasnil tas 'ix alx cha.

²¹ Ax jun yángel Jehová cha, 'ix stecn 'och sn̈i sc'occh 'a no chib'j cha, yet' 'a 'ixm pan may yich. Yajn̈j wal cha, 'ix pitzw chan̈ c'ac' 'a yib'n̈ q'uen q'uen cha. Xtz'a no chib'j chi smasnil, yet' 'ixm pan may yich cha. Ax jun yángel Jehová cha, wal 'a yajn̈ej 'ix satchan̈ 'a yojltac winac.

²² 'Ixta x'aj snachj 'el yuj Gedeón, chajtlto a jun yángel Jehová 'ix paxtin yet'oc, yuj cha xyaln 'ixtic: —¡'Ay, Mamin Jehová! ¡Caw wal q'uelc'mb'a in 'aj in paxtin yet' jun ángel checb'il cot o'oj! xchi.

²³ Palta xta'w Jehová 'ixtc 'a 'a: —Man̈ 'ach xiwoc, ma'oj a chami, xchi.

²⁴ Xlajw cha, 'ix sb'on chan̈ Gedeón jun yet'l xajmb'al yic tzyi'n chan̈ sb'i Jehová. Xya'n can scuch: A Jehová 'Ac'm Junc'ojlal, xchi. A jun yet'l xjamb'al tic, ata xcan 'a Ofra 'a yol yic eb' yin̈tl Abiezer.

²⁵ Ax 'a jun 'ac'wl cha, 'ix yaln Jehová 'a Gedeón 'ixtic: —'Ij 'elt junc no schab'l quelm wacx 'a scal swacx a mam, junc no yucl ab'il sq'uinal. Tza ma'n lan̈chjoc yet'l xajmb'al Baal, jun b'ob'il yuj a mam. Tza ch'acn pax 'ejm jun te sch'oxnb'il comn dios Asherá 'ayc 'a stz'ey jun yet'l xajmb'al cha.

²⁶ Ax 'a sjolm q'uen q'uen cha, ata tza b'o chan̈ junc yet'l xajmb'al 'a 'ayn an Jehová a Diosal in tic. Tzlajw cha, tze'n cot no quelm wacx uque ab'il sq'uinl cha, tza'n tz'a no xajmb'alil, ax te te 'oj a ch'ac 'ejm cha, a te tza'ch sc'a'loc yaln̈ no', xchi.

²⁷ Xlajw cha, xyawtn cot Gedeón chi lajn̈wan̈ ewin schecab', 'ix sb'on 'icha tas xyal Jehová 'a 'a. Ma'ix sb'o 'a c'ual, yujto tzxiw 'a eb' yican smam, yet' 'a eb' 'anma cajn 'ec' 'a jun chon̈b' cha, yuj cha, a 'a 'ac'wl 'ix sb'o'o.

²⁸ Ax 'a yic xq'uin̈lb'i 'el 'a junx c'u, 'ix q'ue wan eb' 'anma 'a jun chon̈b' cha. Ax xyiln eb' chajtlto mac'b'ilx 'ejm jun yet'l xajmb'al yic Baal, yet' pax jun te sch'oxnb'il comn dios Asherá 'ayc' 'a stz'ey cha, ch'acb'ilx 'el te'. Xyab'n pax eb' to 'ay jun no quelm wacx x'ajx tz'a xajmb'al-l 'a yib'n̈ jun yet'l xajmb'al tot xb'o cha.

²⁹ Yuj cha, xlaj sc'anb'noc junjn eb' 'a 'a: ¿Mach wal xb'on jun tic? xchi eb'. Ax yic xlajw sc'anb'n 'ec' eb', 'ix yab'n eb' chajtlto a win Gedeón 'ix b'on jun cha, win yunnal Joás. Yuj cha, 'ix 'at eb' 'anma yal 'a Joás 'ixtic:

³⁰ —'Ij 'elt win onnal, to 'oj qui ma' cham winac. Yujto smac' 'ejm win yet'l xajmb'al yic Baal, sch'acn 'el pax win jun te sch'oxnb'il Asherá 'ayc' 'a stz'ey jun yet'l xajmb'al tic, xchi eb'.

³¹ 'Ix ta'w Joás 'a smasnil eb' 'anma oyn 'och 'a stz'ey cha, xyaln 'ixtic: —¿Tom tzeya'ch e b'a e coln Baal? ¿Tom tze nib'j eyac' owl yu'uj? Toto 'ixta', tzann̈j mach tzcoln Baal cham cab'i', ya' sb'a mantzac sacb' 'eli. Toto yel Dios jun Baal cha, scol cab' sb'a sch'ocj 'a jun mach 'ix ma'n 'ejm jun yet'l xajmb'al cha, xchi Joás.

³² A wal 'a yic jun c'u cha, 'ix ya'n eb' 'anma chi scuchcn Gedeón, Jerubaal. Yujto a Gedeón 'ix ma'n 'ejm jun yet'l xajmb'al yic Baal cha, yuj cha, 'ix yaln eb' 'ixtic: Scol cab' sb'a Baal chi 'a jun cha, xchi eb'.

³³ A 'a yic jun tiempoal cha, syamn sb'a smasnil eb' madianita, eb' amalecita, yet' jun tzo'n̈ xo eb' cajn 'a stojlal 'aj tzq'uel c'u. Junxn̈ej xyutj sb'a eb'. 'Ix c'axw 'ec' eb' 'a a Jordán, axta sb'o eb' scamplamento 'a span̈nil Jezreel.

³⁴ Ax Yespíritu Jehová, a x'och 'a Gedeón; 'a yic xyutz'n no sch'ac calnelu, 'ix syamn sb'a smasnil eb' yin̈tl Abiezer yet'oc.

³⁵ 'Ix ya'n 'at pax schecb' 'a eb' yin̈tl Manasés, sec tz'och eb' yet'oc. 'Ix ya'n 'at pax schecb' 'a eb' yin̈tl Aser, yet' 'a eb' yin̈tl Zabulón, yet' pax 'a eb' yin̈tl Neftalí, yuj cha, junn̈j xyutj sb'a eb' yet'oc.

³⁶ 'Ix yaln Gedeón 'ixtc 'a Dios: Toto caw yel an tzin a c'anlb'ej yic tza coln 'el a chon̈ab', 'icha wal xotj alni, ch'ox junc senya 'ayin.

³⁷ A ticnec, 'oj wa'cn 'ejm jun stz'umal calnelu caw 'e'm xil 'a jun 'amc' 'aj tzte'x 'ixm trigo. Toto ax yic 'oj q'uin̈lb'oc 'eli, caw lojn no tz'um chi yuj chicb'cha'an̈, palta ax lum lum 'a stitc no tz'um cha, tacn̈ cab' lu'um, 'ixta 'oj wutc wojcan 'eli, chajtlto an 'oj in a c'anlb'oc 'a yic 'oj a colnc 'el a chon̈ab', xchi.

³⁸ 'Icha wal xyutj yaln cha, 'ixta wal x'aji. A yic xq'ue wan Gedeón chi 'a sq'uin̈b'ial, 'ix spitz'n 'el yalil no tz'um cha, ax x'aji, x'elt jun niwquil vaso a a 'a no'.

³⁹ 'Ix yaln pax Gedeón jun 'ejm xo 'ixtc 'a Dios: Man̈ cot cab' owl 'ayin, yujto tzin tew 'aych jun 'ejm xo. Tzin nib'j to tza ch'ox junc xo milagro 'ayn yet' no tz'um tic. A ticnec tzin c'an 'ayach, cojn cab' no tz'um tic taquin̈, ax lum lum tic, tzlojx cab' lum smasnil yuj chicb'cha'an̈, xchi.

⁴⁰ Ax 'a junx 'ac'wl cha, 'ix sb'on Dios 'icha wal xyutj win yaln cha, ax yic sacb'eli, cojn no tz'um chi taquin̈, ax smasnil lum lum cha, caw xlojx 'el lu'um.