Jueces 5 - Chuj San Sebastian Bible

A sb'it 'ix Débora yet' win Barac

¹ A wal 'a yic jun c'u cha, 'ix b'itn 'ix Débora yet' win Barac, yunnal Abinoam, xyaln eb' 'ixtic:

² B'itn coyc qui masnil 'a Jehová, yujto a x'a'n 'och jun tzo'n̈ eb' yajl 'a chon̈b' Israel, yujto caw 'ay pax eb' soldado 'a chon̈b' tic caw c'asn sc'ojl ya'n owal.

³ ¡Ex rey yet' ex yajal, 'ab'c wal tas 'oj cal 'on̈! ¡B'itn coyc 'a Jehová! ¡B'itn coyc 'a qui Diosalec!

⁴ Mamin Jehová, a wal yic ach 'elt 'a lum switzl Seir, yet' yic a b'eyc' 'a lum Edom, caw wal x'ib'x lum lu'um, xcot pax n̈ab' 'a satchan̈ yuj 'asun.

⁵ Caw x'ib'x eb' lum witz 'a ojltac Mamin Jehová. A wal lum witz Sinaí, caw wal x'ib'x lum 'a ojltac, ach qui Diosal an̈ israel on̈ tic on̈.

⁶ A wal 'a yol stiempoal Samgar win yunnal Anat, yet' 'a yol stiempoal Jael, smasnil eb' 'anma x'elq'ui, man̈x 'ic b'ey eb' 'a niwn b'e, cojxn 'a 'utzn b'e xb'ey eb'.

⁷ Smasnil yaldeail lum chon̈b' 'ix 'actx cani, cusltac xoj x'ajcni, masnto in 'och an Débora in tic, 'icha junc nunb'il, 'ixta in 'ajch 'a jun chon̈b' tic.

⁸ A wal yic sayn 'ec' eb' wit israelal jun tzo'n̈ comn dios, caw wal tzjaw eb' 'a'm owl 'a sti spuertail chon̈ab'. Man̈x xon junc tzmacn sat jul-lab', man̈x xon lanza tzwil 'a scal junc 40 mil eb' wit chon̈ab'.

⁹ A in pixan, caw 'ayc' yet' eb' syajlil chon̈ab', 'ayc' pax yet' eb' c'asn sc'ojl s'at 'a owal. ¡Tzwal wach' paxti 'aych Mamin Jehová!

¹⁰ Ex wit chon̈ab', e masnil ex tzex q'ue 'a yib'n̈ no sac b'uru, ex niwc winc tzex 'em wocn 'a yojl te xila man̈x jantcoc sja'l sposmtacl yojol, yet' ex tzex b'ey 'a eyoc, b'itnan̈ec.

¹¹ Caw najt tz'at sjaj te son eyu'uj, yet' jun tzo'n̈ q'uen platillo 'aj 'ay a 'uc'b'il a', alc 'el sjelnal Jehová yujto xyac' ganar owal, xyac' ganar yi'n can pax 'ec' yaldeail chon̈b' Israel.

¹² Ach Débora, jucub'tzej eb' 'anma 'a b'it. Ach xo Barac, yunnal Abinoam. 'Ixic, 'ij 'at eb' xyamchj can oj 'a scal owal.

¹³ Ax eb' syajlil eb' quit chon̈b' caw jeln ya'n owal, 'ix 'eml eb', atn eb' soldado Jehová xyac' owl yet' jun tzo'n̈ xo eb' soldado jeln 'a owal.

¹⁴ 'Ix 'eml eb' soldado yic Efraín 'a lum 'a'lic, tza'n yeml eb' soldado yic Benjamín yuj eb'. 'Ix 'eml pax eb' syajlil eb' soldado Maquir yet' eb' syajlil chon̈b' yic Zabulón.

¹⁵ 'Ixta pax eb' yajl yaj 'a eb' yin̈tl Isacar, 'ix jaw eb' quet' on̈, an Débora in tic yet' in an Barac in; caw xcolwj eb' quet' on̈, 'ix 'at eb' quet' 'a owl 'a lum niwn pan̈an. Ax 'a scal eb' yin̈tl Rubén, caw 'ay chab'c'ojlal.

¹⁶ ¿Tas yuj ex cancn 'aj macn no calnelu 'a yol scolal, xe maclni eyab' yawtn ewin tan̈m calnelu chi no scalnelu cha? ¡Wal yel, a wal 'a scal eb' yin̈tl Rubén tic, caw 'ay chab'c'ojlal!

¹⁷ A eb' yin̈tl Galaad, ata xcan eb' 'a sc'axpil 'ec' a Jordán; eb' yin̈tl Dan, ata xcan eb' 'a stz'ey eb' te barco. Ax eb' yin̈tl Aser, ata xcan eb' 'a sti a mar, man̈x 'ic yij 'el sb'a eb' jac 'a stz'ey puerto 'aj wach' sc'och te barco cha.

¹⁸ Ax eb' yin̈tl Zabulón yet' eb' yin̈tl Neftalí, caw xyac' eb' sq'uinl 'a yol sc'ab' chamel, 'ix 'at eb' 'a owal.

¹⁹ Xlajw cha, xjaw eb' rey yac' owal. Xjaw eb' sreyl Canaán yac' owl 'a Taanac, 'a sti a a tzcuch Meguido, palta may tumin, may ricoal xyij eb'.

²⁰ A c'anal 'ay 'a satcha'an̈, yet' jun tzo'n̈ xo tas 'ay 'a 'a, a eb' x'a'n owl yet' win Sísara.

²¹ A a Cisón, a x'i'n 'at eb' smasnil, palta pecti xon 'ay a'. Ca'c quip qui 'at 'a cojltac.

²² Caw wal xc'an̈ sb'ey yoc no chej yic x'at no yac' owal.

²³ Ax jun yángel Jehová xaln 'ixtic: Jaw cab' scatb' Jehová 'a yib'n̈ chon̈b' Meroz, yet' 'a yib'n̈ smasnil eb' 'anma cajn 'a 'a, yujto ma'ix 'och eb' yet' Jehová yic xya'n owal, 'icha xyac' jun tzo'n̈ xo eb' soldado ma'ix xiwi, xchi.

²⁴ A 'ix Jael yisl win Heber, win quenita caw wach' yic 'ix 'a yib'n̈ jun tzo'n̈ xo eb' 'ix. Caw wach' yic 'ix 'a yib'n̈ eb' 'ix 'ix 'ayc' 'a yoltc mantiado.

²⁵ A yic sc'ann win yuc' a 'a 'ix, ax lech xyac' 'ix yuc' winac. Xya'n 'ix sc'ux win crema 'a yol jun 'uc'b' caw wach' yilxi.

²⁶ Xlajw cha, xyi'n cot 'ix jun te 'istaca yet' sc'ab' 'a surito, ax swach' c'ab' 'ix x'i'n cot jun martillo tzc'anlb'ax 'a yic tzma'x 'ejm 'istaca. Xlajw cha, sma'n 'ejm 'ix te 'istaca chi 'a yol sjolm win Sísara cha, xc'axw 'ec' te 'a yol sjolm winac.

²⁷ Toxn̈ej xb'alb'n 'ec' win yab'n syal 'a sat lum 'a yojltac 'ix, a wal 'aj x'ec' b'alb'noc win cha, ata xchami.

²⁸ A yic q'ueln 'elt 'ix snun win Sísara 'a swentnual yatut, caw wal somc'ojlal yaj 'ix, xyaln 'ix 'ixtic: ¿Tas yuj tz'ec' tiempo sjaw scaruaje winac? ¿Tas yuj caw tz'ec' tiempo sjaw scaruaje win yic owal? xchi 'ix.

²⁹ 'Ay jun tzo'n̈ eb' 'ix 'ix caw 'ay snab'en 'ayc' yet' 'ix, an̈jtona 'ix xyaln eb' 'ixtic:

³⁰ Tecnto wan spojn 'ec' win jantc tas 'ix yijcan 'ec' 'a owl cha. Wan am si'lni ewin junjnoc eb' 'ix cob'stac chi yistloc, mto chatcwan̈oc eb' 'ix 'a junjn ewinac. Am te pichl caw wach' yilx yelwnub'l xyique'ej win Sísara cha; jun am wal xyij winac, mto chab' xyij winac, am te caw wach' yaj stz'isx 'ejm yelwnub'l sat 'a schapaq'uil, am te 'oj ya'ch win 'a sjaj yujto xyac' ganar owl cha, xchi eb' 'ix.

³¹ Mamin Jehová, 'ixta cab' wal tz'aj satl eb' 'aych 'ajc'ojlal chi 'ayach, ax eb' tzach chamc'ojlani, 'icha cab' stzictznil yoc c'u, 'ixta cab' yilx eb', xchi 'ix Débora chi yet' win Barac 'a sb'it. A yic xlajw ye'cn jun tzo'n̈ owl cha, chawinc ab'il x'ochcn junc'ojlal 'a chon̈b' Israel.