Jueces 3 - Chuj San Sebastian Bible

Jun tzo'n̈ chon̈b' cann̈c 'a yol yic Canaán

¹ 'Ay jun tzo'n̈ chon̈b' cann̈c can yuj Jehová yic yajx prowal eb' israel, atn eb' mantzac 'alji yic yoch owl 'a lum Canaán.

² 'Ix can eb', sec wach' a eb' yin̈tl Israel tzcuy sb'a eb' ya'n owal, atn eb' mant 'a xon 'aj tzyac' owal.

³ Atn eb' tic cannac: O'e chon̈b'al eb' filisteo, smasnil eb' cananeo, eb' sidonio yet' eb' heveo, atn eb' cajn 'a lum jolmctac witz 'a Líbano, tz'atn̈j 'a lum yic Baal-hermón, masnto tzc'och 'a Hamat.

⁴ Atn yet' jun tzo'n̈ eb' tic, 'ix 'ajx prowal eb' yuj Jehová yic tzyilni toto yel yiclum eb' 'a schecnb'il, atn jun yaljnac can Moisés 'a smam yichm eb'.

⁵ 'Ixta 'ix 'aj scan eb' 'a scal eb' cananeo, eb' hitita, eb' amorreo, eb' ferezeo, eb' heveo yet' eb' jebuseo.

⁶ Ax yunnal yet' yisl eb' israel cha, 'ix yij sb'a eb' yet' yunnal yet' yisl eb' chuc chon̈b'al cha. 'Ix ya'n pax 'ejm sb'a eb' 'a sdiosal eb' cha.

Xcolx 'el eb' israel yuj Otoniel

⁷ Caw tu tas sb'o eb' israel 'a sat Jehová sDiosal, xya'n eb' sat sc'ojl 'a 'a. Cojxn 'a jun tzo'n̈ yechl comn dios tzcuch Baal yet' 'a jun tzo'n̈ yechl Asera ata xyac' 'ejm sb'a eb'.

⁸ Yuj wal cha, xcot yowl sc'ojl Jehová 'a yib'n̈ eb', 'ix 'ajx 'och eb' 'a yol sc'ab' win Cusan-risataim sreyl Mesopotamia. Wajxque ab'il 'ix 'och eb' israel chi yac' servil jun rey cha,

⁹ masnto xtew eb' 'a Jehová, ax si'n 'elt jun colwjum 'a scal eb' israel cha. A xcoln 'elt eb', atn Otoniel win yunnal Cenaz, slajb' 'u'tac Caleb.

¹⁰ Ax Yespíritu Jehová x'och 'a Otoniel, sjucb'tzan eb' yit israelal cha, xya'n owal. A Jehová a x'och yet' eb', x'ajx eb' 'ajc'ojl chi 'a yol sc'ab'. 'Ix lajw 'el eb' yu'uj.

¹¹ A yic xlajw 'ec' jun tzo'n̈ cha, chawinc ab'il xcan eb' israel 'a junc'ojlal, masnto 'a yic xcham Otoniel.

Xcolx 'el eb' israel yuj Aod

¹² 'Ix 'ochx smul eb' israel 'a sat Jehová jun 'ejm xo. Yuj cha, ax Jehová x'a'n sjelnal Eglón sreyl Moab, sec tzcan eb' 'a yaln̈ schecnb'il.

¹³ Ax Eglón cha, junn̈j xyutj sb'a yet' eb' amonita, yet' eb' amalecita, 'ix ya'n eb' owl yet' eb' israel, 'ix yi'n can 'ec' eb' jun chon̈b' 'aj caw 'ay te palma, atn Jericó.

¹⁴ Wajxclajn̈e ab'il x'och eb' israel 'a'j servil 'a win Eglón

¹⁵ masnto xtew eb' 'a Jehová. 'Ixta to b'i'an, xya'n 'och junx colwjum 'a scal eb', atn Aod win surito smunlji, yunnal Guera, yin̈tl can Benjamín. 'Ay jun c'ual, 'ix checx 'at Aod yuj eb' yit chon̈ab' yic tz'at ya'nc jun stojlb'al 'a win Eglón cha.

¹⁶ Ax Aod cha, 'ix sb'on jun sniwquil cuchlub' chab' ye. Nan̈l vara xyutj ste'il, spixn 'och 'a sjal-l snan̈al. Xya'n can 'och 'a stojlal swach' c'ab' 'a yol spichul.

¹⁷ X'at ya'nc win q'uen tojlb'al chi 'a Eglón. A win Eglón cha, caw wal b'a'ch winac.

¹⁸ Ax yic xlajw ya'n can win Aod chi q'uen tojlb'al cha, xyaln 'ixtc 'a eb' ajun yet' cha: Coyec, xchi.

¹⁹ Palta ax yic xc'och 'a 'aj 'ay jun tzo'n̈ yechl comn dios 'ay 'a Gilgal, 'ix meltzj pax win jun 'ejm xo 'a 'aj 'ay win Eglón cha, xyaln 'a 'ixtic: —'Ay wal jun in paxti tzin nib'j tzwal 'a c'ultacl 'aych mamin rey, xchi. 'Ix yaln jun rey chi 'a smasnil eb' schecb' 'ayc' 'a stz'ey, to tz'el eb' smasnil 'a yol sdespacho cha.

²⁰ Ax yic xcan Aod sch'ocj yet' Eglón, 'ix snitzn 'och sb'a 'a stz'ey winac, wocn 'ejm win 'a yol jun cuarto siclab'nac yojol, ata 'ay 'a cha'an̈. 'Ix yaln 'a win 'ixtic: —'Ay jun spaxti Dios 'oj wal 'ayach, xchi. Ax yic xyab'n win Eglón jun cha, 'ix q'ue wan win 'a yol xila.

²¹ Xlajw cha, ax Aod xya'n 'ec' surito c'ab' 'a stojlal swach' c'ab'. 'Ix yi'n 'elt q'uen scuchlub' cha, stecn 'och 'a sc'ojl win rey cha.

²² Caw 'ip stecch win q'ue'en, yuj cha, man̈ cojnoc q'uen cuchlub' chi x'ochi, palta x'och q'uen yet' yoc 'a yol sc'ojl winac. 'Ix c'axw 'el'ch q'uen 'a yich spatc winac. Yujto caw b'a'ch winac, yuj cha, ax schib'jal win chi xmacn can 'aj x'och q'ue'en, man̈x 'ic yij 'elt Aod chi q'ue'en.

²³ Xlajw cha, sch'apn can Aod te n̈a cha, 'ix macchj can te', ax 'a wentnu, ata x'el winac.

²⁴ A yic tox x'elt win Aod 'a yol te n̈a cha, 'ix jaw ewin schecb' win rey cha, ax xyiln eb' to macn te n̈a cha, 'aych pax sc'ab' te'. Xyaln eb' 'ixtic: A win rey tic, tecn to wanto am schulj winac, yuj cha, smacn can 'elt win te n̈a tic, xchi eb'.

²⁵ Caw 'ix stan̈wj eb', masnto stzactzj chan̈ eb', yujto matz jac win te n̈a cha, yuj cha, xyi'n 'el eb' sc'ab' te n̈a cha. Xlajw cha, sjacn eb' te', ax xyiln eb' t'ocn 'ec' win rey chi 'a sat lu'um, chamnc xo winac.

²⁶ Ya' sb'a tz'ec' stiempo eb' stan̈wni, ax Aod 'ipn s'at 'eloc. A yic tox 'ix 'ec' 'a 'aj 'ay jun tzo'n̈ yechl comn dios 'a Gilgal, axta x'at scol sb'a 'a Seirat.

²⁷ A yic tox xc'och 'a jolmctac witz yic Efraín, 'ix yutz'n no sch'ac calnelu, yic tzyawtn eb' israel ta'. 'Ix c'och smasnil eb' yet'oc. Junn̈j xoj x'aj eb' spaxx 'emt 'a lum jolm witz cha, xb'ab'lj Aod yuj eb'.

²⁸ Xlajw cha, xyaln 'a eb' 'ixtic: 'Ochn̈ec tza'n wu'uj, yujto a Jehová tox 'ix ya'ch eb' 'ajc'ojl yajch 'ayn̈ec 'a yol qui c'ab'ec, atn eb' moabita, xchi. Xlajw cha, x'och tza'n eb' yu'uj, axta xc'och eb' smac 'a sjayl sti a Jordán 'a yojltac 'at Moab. May xon junc moabita schaj 'ec' eb' ta'.

²⁹ A 'a yic jun tiempoal cha, 'aym lajn̈ec mil eb' moabita smil eb' israel. Smasnil jun tzo'n̈ xcham cha, caw te'n wincal eb' si'mb'il. Soldado eb', caw 'a'm owl eb', palta may junc xcolchj can 'eli.

³⁰ 'Ixta 'ix 'aj yem Moab yuj eb' israel. Xlajw cha 80 ab'il 'ix can eb' 'a junc'ojlal.

Xcolx 'el eb' israel yuj Samgar

³¹ A 'a spatquilx Aod cha, 'ix 'och junx win colwjum atn win Samgar yunnal Anat. A win xmiln waque ciente eb' filisteo. A jun te pechlab' wacax, a te sc'ana yic smiln win eb', yuj cha, xcolx pax eb' israel yuj winac.