Jueces 21 - Chuj San Sebastian Bible

A eb' 'ix 'ix*r* x'och yistloc eb' yin̈tl Benjamín

¹ A smasnil eb' israel xyac' eb' sti 'a yojltac Jehová 'a Mizpa, to may junc eb' 'oj yac' yisl yistzilc eb' yic Benjamín cha.

² 'Ix syamn sb'a eb' 'a scajnub' Dios 'a Bet-el, masnto xq'uic'b'i, 'ix 'oc' eb' 'a yojltac Dios, 'ix yaln eb' 'ixtic:

³ —Mamin Jehová qui Diosal ach on̈, ¿tas yuj xjaw jun tic 'a quib'n̈ on̈? ¿Tas yuj wan satl jun 'in̈tal 'a qui cal an̈ israel on̈ tic on̈? xchi eb'.

⁴ Ax 'a junx c'u 'ix seb' q'ue wan eb', sb'on eb' jun yet'l xajmb'al. 'Ix ya'n eb' xajmb'al to tz'a smasnil 'a yojltac Jehová, yet' xajmb'al yic junc'ojlal.

⁵ 'Ix sc'anb'n 'ec' eb' 'ixtic: —¿Mach junc 'a qui calc tic ma'ix xit' quet'ec 'a qui yamnil 'a yojltac Jehová 'a Mizpa? xchi eb'. Yujto ya'jnac eb' sti', toto 'ay junc mach matz 'at 'a jun yamnil 'a yojltac Jehová 'a Mizpa cha, tojln̈ej schami.

⁶ Ax eb' israel cha, caw wal tzcus eb' yuj tas 'ix 'aj eb' yic Benjamín, yujto yit israelal pax sb'a eb'. 'Ix yaln eb' 'ixtic: —A 'a jun c'u tic 'ix satl jun 'in̈tal eb' 'a qui calc an̈ israel on̈c tic.

⁷ ¿Tas 'oj cutquec tze na'a, yic tz'ochx yistzil ewin yic Benjamín xcancn tic? An̈ec tic tox 'ix ca'c qui ti 'a Jehová, to may junc on̈ec tzca'c quisl yistloc ewinac.

⁸ ¿'Aym jun c'ajoc eb' quit israelal ma'ix xit' quet'ec 'a qui yamnil x'och 'a yojltac Jehová 'a Mizpa? xchi eb'. Snan cot eb' to a eb' cajn 'a Jabes 'a yol yic Galaad, may xon junc eb' xit' 'a yamnil cha.

⁹ A yic 'ix 'awtx lista, may xon junc eb' 'aj Jabes yic Galaad chi xta'wi.

^10-11 Ax yic xyab'n smasnil eb' chon̈b' jun cha, 'ix checn 'at eb' lajchwe mil eb' soldado caw wal jeln ya'n owal, yic tz'at milxc cham eb' 'aj Jabes cha. Smasnil eb' 'ix 'ix, eb' 'unin, eb' winac, yet' pax eb' 'ix 'ayx winc tox sc'umej, c'uxn xcham eb'.

¹² A 'a scal eb' cajn 'a Jabes cha, ata 'ix 'ilchj chan̈e ciente eb' 'ix cob's 'ix mant 'a xon winc tzc'umej. 'Ix 'ijx cot eb' 'ix 'a camplamento 'a Silo 'a yol yic Canaán.

¹³ Xlajw cha, 'ix 'at yalmal mu'c yuj eb' chon̈b' 'a ewin yic Benjamín 'aycn 'at 'elc 'a sat q'uen niwquil tenm tzcuch Rimón. 'Ix 'awtx cot ewinac yic tz'och eb' 'a junc'ojlal.

¹⁴ 'Ix meltzj cot eb' yin̈tl Benjamín. Xlajw cha, 'ix ya'n eb' israel eb' 'ix 'ix x'at 'ijxoc cot 'a Jabes yistzilc ewinac, palta man̈ tz'acnoc xyij ewin yistzil smasnil.

¹⁵ Ax smasnil eb' israel cha, caw 'ix cus sc'ojl eb' yuj eb' yin̈tl Benjamín, yujto a Jehová a 'ix satn 'el jun 'in̈tal eb' chi 'a scal eb'.

¹⁶ Xlajw cha, 'ix sc'anb'n eb' yichm wincal chon̈b' 'ixtic: —¿Tas 'oj 'aj yilchj pax yistzil jaywn̈ xo ewin xcan tic, yujto 'ix cham smasnil eb' 'ix yistzil ewinac?

¹⁷ A jaywn̈ yin̈tl Benjamín xcan tic, yowlal 'oj checljoc pax chan̈ eb' 'a qui calec, sec wach' ma'oj satl jun 'in̈tal tic 'a qui calec.

¹⁸ Palta an̈ec tic, matz tac' ca'nec eb' 'ix quislec, yic tz'och eb' 'ix yistloc ewinac, yujto qui masnilec ca'jnaquec qui ti 'a Dios 'ixtic: Toto 'ay mach tzyac' yisl yistloc eb' yin̈tl Benjamín, tzcotcn catb' 'a yib'an̈, xqui chiec.

¹⁹ Palta 'in 'a junjn ab'il tznax jun niwquil q'uin̈ 'a yojltac Jehová 'a Silo, atn jun 'ay 'a stojlal norte yic Bet-el. Tzcan 'a stojlal 'aj tz'ejm c'u 'a jun b'e tz'at 'a Bet-el tzc'och 'a Siquem jun 'ay 'a stojlal sur yic Lebona, xchi eb'.

²⁰ Ax eb' yajl yaj 'a scal eb' israel cha, x'at yac' eb' alxc jun paxti tic 'ixtc 'a eb' yin̈tl Benjamín: —'Ixquec, 'at c'ub'jec 'el e b'a 'a scal te uva 'a sla'nil Silo.

²¹ Wach' tzeyutj e c'ub'n 'el e b'a ta', man̈ e ch'ox e b'a. At yic 'oj eyilnoc yelt nan̈loc eb' 'ix cob's 'ix 'aj Silo chan̈l ta', tzex 'elt 'aj tze c'ub'j 'el e b'a cha, tzeyi'n can 'at junjnoc eb' 'ix eyistzilc junjn ex. Tzlajw cha, tzex pax 'a e lu'um.

²² Toto 'oj jawc ewin smam eb' 'ix, mto ewin snul'j eb' 'ix wul yal 'ayn̈ on̈, 'oj cal 'ixtc 'a eb' on̈: —Tzqui c'an niwnc'ojlal 'ayx yuj eb' 'ix, yujto ma'ix 'ilchj yistzil ewin smasnil cuj 'a tic on̈, yic 'ix 'och owl 'a Jabes. An̈jtona', caw man̈oc ex tzeyac' eb' 'ix 'a ewinac, yuj cha, may ex tz'och e mul 'a 'aj xeyac' e ti', 'oj qui chic 'a eb' on̈, xchi eb' syajlil eb' israel cha.

²³ 'Ix schaj sc'ojl eb' yin̈tl Benjamín sb'on tas 'ix alx 'a 'a. Yuj cha, junjn ewinac, 'ix yij 'at ewin junjn eb' 'ix cob'stac' xschan̈lwi cha. Yajn̈ej 'ix yi'n 'at ewin eb' 'ix 'a 'aj 'aycn slu'um. Xlajw cha, sb'on pax chan̈ eb' schon̈b' jun 'ejm xo, 'ix can cajn ewin yet' eb' 'ix ta'.

²⁴ An̈jtona jun tzo'n̈ xo eb' yit israelal eb' cha, 'ix pax junjn eb' 'a slu'um, 'a 'aj 'aycn yin̈tl eb'.

²⁵ A 'a yic jun tiempoal cha, mant 'a xon junc rey 'a scal eb' israel, junjn eb' mun tzb'o eb' 'icha tas tzna'a.