Jueces 20 - Chuj San Sebastian Bible

'Ix 'och owl 'a eb' yin̈tl Benjamín

¹ Yuj cha, 'ix syamn sb'a eb' israel 'a yojltac Jehová 'a Mizpa. 'Ix cot eb' 'a smasnil yol yic Israel, a chon̈b' Dan 'ay a stojlal norte masnto 'a Beerseb'a 'ay 'a stojlal sur yet' 'a Galaad 'a stojlal 'a 'aj tzq'uel c'u. Junxn̈ej xyutj sb'a eb'.

² Smasnil eb' yajl yaj 'a junjn 'in̈tal eb' israel atn eb' schon̈b' Dios syam sb'a cha. 'Ay chan̈e ciente mil eb' soldado lista xo yaji, yet' eb' syamc'ab' yic owal.

³ (Yuj cha, 'ix yab'n eb' yin̈tl Benjamín speclal chajtlto tox 'ix syam sb'a jun tzo'n̈ xo eb' yit israelal eb' 'a Mizpa.) Ax eb' syajlil jun tzo'n̈ xo eb' israel yamnxo cha, 'ix sc'anb'n eb' 'ixtc 'a win levita cha: —Al 'ayn̈ on̈ tas 'ix 'aj yoch jun chaml cha, xchi eb'.

⁴ 'Ix yaln win levita cha, win yichmil 'ix xcham cha: —In jaw yet' 'ix wistzil 'a chon̈b' Gabaa, 'a yol yic Benjamín, yic tz'ec' junc 'ac'wl wuj ta'.

⁵ Ax 'a jun 'ac'wl cha, 'ix syamn sb'a eb' winc cajn 'a jun chon̈b' cha. Xyoyn sb'a eb' 'a spatquil te n̈a 'aj 'ayn 'ec' cha, yic tzin smiln cham eb' yalni. Ax x'aji, 'ix yixtn eb' 'ix wistzil cha, masnto xcham 'ix yuj eb'.

⁶ Xlajw cha, xin me'n q'ue wan sniwnal 'ix, xin cotc poln 'ati. 'Ix wa't 'a smasnil yol qui macb'enec tic, sec wach' tzeyil e masnil tas jun mul caw wal maysch'olnil tic.

⁷ Ax ticnec, totn to wit israelal ex jun, ax xo 'oj e na', tas 'oj 'aj jun tic, xchi win 'a eb'.

⁸ Junn̈j xyutj sb'a eb' smasnil, 'ix yaln eb' 'ixtic: —May junc on̈ec tzon̈ paxc 'a catut masnto tzqui b'oc yaj jun tic.

⁹ A ticnec, a jun tas 'oj qui b'o'ec, to 'oj ca'c b'ul sec wach' 'oj quila', machtc on̈ec tzon̈ 'atc ca'c owl yet' chon̈b' Gabaa.

¹⁰ Ax pax 'a junjn lajn̈wan̈ 'a junjn 'in̈tal, tzcan 'a yib'n̈ eb' sayn tas tzqui c'ux an̈ soldado on̈c tic; an̈ xo qui masnil, tzon̈ 'at ca'c spac 'a eb' 'aj Gabaa yuj jun maysch'olnil sb'o eb' cha, xchi eb'.

¹¹ Junn̈j 'ix yutj sb'a eb' israel smasnil, yic tzya'n eb' owl yet' jun chon̈b' cha.

¹² 'Ix ya'n 'at eb' schecb' 'a yol smacb'en smasnil yic Benjamín. X'ec' yalnc eb' 'ixtic: —Caw wal maysch'olnil jun xe b'o jaywn̈oc ex ax tic.

¹³ A ticnec, 'a'c 'elt jun tzo'n̈ winc 'aj Gabaa 'ayn̈ on̈, eb' xb'on jun maysch'olnilal 'a e cal, ax qui miln cham eb'. 'Ixta 'oj 'aj yel jun maysch'olnilal 'a qui calc an̈ israel on̈ec tic, xchi eb'. Palta ma'ix chaj eb' yin̈tl Benjamín yab' 'a eb' yit israelal cha.

¹⁴ A yic eb', to 'ix syam sb'a eb' 'aj chon̈b' Gabaa yic tz'at eb' 'at yac' owl yet' jun tzo'n̈ xo eb' yit israelal cha.

¹⁵ 'Ay waqueschawinc mil eb' soldado xcot 'a smasnil eb' chon̈b' 'ay 'a yol smacb'en eb' yin̈tl Benjamín. Lista xo yaj eb' yet' syamc'ab' yic owal. Chuc pax eb' uque ciente soldado sicb'ilx 'eli, to caw wal jelan, 'aj Gabaa eb'.

¹⁶ A 'a scal smasnil eb' soldado cha, 'ay uque ciente eb' surito. A yet' surito eb' chi tzjulw yet' smejech'. A eb' cha, wach'xam a junc xil jolm tzjul eb', may junc eb' to matz yamchj jun chi sjulni.

¹⁷ Ax pax 'a jun tzo'n̈ xo eb' israel cha, 'ay chan̈e ciente mil eb' soldado caw jeln 'a owal, lista xo yaj eb' yet' syamc'ab', yic tzya'n eb' owl yet' eb' yic Benjamín.

¹⁸ 'Ix 'at eb' israel 'a scajnub' Dios, 'ix sc'anb'n eb' 'a Dios yic tzyojcan 'el eb', mach junc 'in̈tal eb' yowlal tzb'ab'l 'a'j owl yet' eb' yin̈tl Benjamín. 'Ix yaln Jehová 'ixtic, to a eb' yic Judá tzb'ab'l 'och 'a owal.

¹⁹ Caw 'ix seb' q'ue wan eb' israel 'a sq'uin̈b'ial. 'Ix 'at sb'onc eb' scamplamento 'a sla'nil Gabaa.

²⁰ 'Ix 'at eb' yac' owl yet' eb' yic Benjamín, 'a sla'nil chon̈b' Gabaa.

²¹ Ax eb' yic Benjamín, 'ix 'elt eb' 'a yol chon̈b' cha. 'A 'a jun c'u cha, 22 mil eb' yit israelal eb' chi smilcn chamoc.

^22-24 Yuj cha, 'ix 'at eb' israel 'a Bet-el, yic tz'oc' eb' yuj cusc'ojlal 'a yojltac Jehová masnto xq'uic'b'i. 'Ix sc'anb'n eb' 'ixtc 'a Jehová: —¿Tzam on̈ 'at cac' owl yet' eb' quit israelal, atn eb' yin̈tl Benjamín? xchi eb'. 'Ix yaln Jehová: —'Ixquec, xchi. Yuj cha, xyi'n pax eb' sniwnal sc'ojol. Ax 'a junx c'u 'ix 'atx eb' yac' owl yet' eb' yin̈tl Benjamín cha. An̈j 'ijnoc a 'aj 'ix 'och owl yuj eb' 'a b'ab'el, ata xcan eb' jun 'ejm xo.

²⁵ An̈jtona', a 'a scha'ejmal cha, 'ix 'el paxt eb' yic Benjamín yac' owl yet' eb', smiln cham eb' junx wajxclajn̈e mil eb' soldado israel.

²⁶ Xlajw cha, ax eb' soldado israel smasnil, yet' smasnil eb' chon̈ab', 'ix 'atx eb' 'a scajnub' Dios 'a Bet-el. 'Ix 'oc' eb' 'a yojltac Jehová 'a smasnil c'u masnto xq'uic'b'i. May jac tas sc'ux eb', 'ix ya'n eb' xajmb'al tz'a'i, yet' xajmb'al yic junc'ojlal.

^27-28 A yic jun tiempoal cha, a te scaxail strato Jehová, ata 'ayc' te 'a scajnub' Dios. A win Finees yunnal Eleazar yixchicn Aarón, a 'aych ya'malc 'och sti eb' 'anma 'a Dios. 'Ix sc'anb'n eb' israel 'ixtc 'a Jehová: —¿Tom caw yowlal tzcac' owl yet' eb' quit israelal yin̈tl Benjamín jun 'ejm xo, mto tztac' cab' qui lajw 'el 'ixta'? xchi eb'. 'Ix yaln Jehová 'a eb' 'ixtic: —'A'c owl yet' eb', yujto 'oj wac' eb' 'a yol e c'ab' q'uic'an, xchi.

²⁹ Yuj cha, sc'ub'n 'el sb'a jaywn̈ eb' soldado israel 'a spatquil 'el chon̈b' Gabaa cha,

³⁰ ax jun tzo'n̈ xo eb', 'ix 'at eb' yac' owl yet' eb' soldado yic Benjamín. Stzol-l xyutj sb'a eb' yic tzya'n eb' owl yet' eb' 'a chon̈b' Gabaa, 'icha xyutj sb'a eb' 'a b'ab'el yet' 'a schalal.

³¹ 'Ix 'el paxt eb' yin̈tl Benjamín 'a yol chon̈b' 'a owal, najt 'ix 'elt eb' 'a sti 'el chon̈b' yac' owl yet' eb' yit israelal cha. 'Ix yac' ganar eb' smiln cham 30 xo eb' israel 'a stitc b'e tzcot 'a Gabaa tzc'och 'a Bet-el.

³² A snan eb', to wan yajx ganar eb' israel yuj eb', 'icha xyac' eb' 'a b'ab'el yet' 'a schalal. Ax eb' israel cha, 'ix 'atx eb' 'elc 'a eb' 'ajc'ojl cha, sec 'ixta tz'aj eb' 'ajc'ojl chi yelcn 'a sti 'el schon̈ab'.

³³ Ax yic xc'och eb' israel chi 'a Baal-tamar, yajn̈ej sb'on 'och sb'a eb' 'a stzol-l ya'n owl yet' eb' soldado yic Benjamín. An̈jtona', 'ix 'el paxt eb' sc'ub'jnac 'el sb'a chi 'a spatquil chon̈b' Gabaa cha.

³⁴ Lajn̈e mil eb' sic'b'il 'el 'a scal eb' soldado yic Israel, eb' to caw jeln ya'n owal. 'Ix ya'n eb' owl yet' chon̈b' Gabaa cha. Caw yelc'ojlal tzniwtj chan̈ owal. Ax eb' yic Benjamín man̈ yojcoc eb' toto jab'xoj slajw 'el eb'.

^35-36 A Jehová 'ix 'a'n yac' ganar eb' israel 'a yib'n̈ eb' yic Benjamín. Ax xyiln cot sb'a eb' yin̈tl Benjamín, chajtlto tox 'ix 'ajx ganar eb'. 25,100 eb' soldado xcham yuj eb' israel. A 'a b'ab'el a eb' soldado israel 'ix 'at 'elc 'a eb' yic Benjamín cha. Najt 'ix 'at eb' 'eloc yujto 'a eb' soldado sc'ub'j can 'el sb'a 'a spatquil Gabaa 'a eb' yipc'ojlal yaj yuj eb'.

³⁷ Ax eb' soldado sc'ub'j 'el sb'a cha, yajn̈ej 'ix 'och eb' 'a Gabaa, 'ix smiln eb' smasnil eb' cajn ta'.

³⁸ Yujto yaljnac can eb', to a yic tox 'ix 'ajx ganar jun chon̈b' cha, tzn̈usn can eb'. 'Oj q'ue wan stab'l stz'a'i, sec tznachj 'el yuj eb' to tox 'ix 'ajx ganar jun chon̈b' cha.

³⁹ A yic wan s'at eb' israel 'elc 'a eb' yic Benjamín, ax yic 'ix yiln eb' to tzq'ue wan tocc'oc jun tab' cha, 'ix meltzj eb', 'ix ste'wtzan sb'a eb' 'a yojltac eb' yic Benjamín. Tox 'ix cham 30 eb' israel yuj eb' yic Benjamín, yuj cha, 'ix snan eb' yic Benjamín cha, to tox 'ix 'ajx ganar eb' chi yuj eb' 'icha 'ix yutj eb' ya'n ganar 'a b'ab'el.

⁴⁰ Palta ax yic schan 'el yich sq'ue wan tocc'oc stab'l jun chon̈b' cha, 'ix yiln 'at eb' 'a spatquil, chajtlto tocq'ui sq'ue wan stab'l schon̈b' eb' 'a satchan̈ stz'a'i.

⁴¹ Yuj cha, 'ix swach' te'wtzan sb'a eb' israel 'a yojltac eb' yic Benjamín. Ax eb' 'ajc'ojl cha, caw 'ix xiw eb' yuj tas 'ix jaw 'a yib'n̈ cha.

⁴² Yuj cha, 'ix 'at eb' 'elc 'a eb' israel cha. 'Ix 'atcn eb' 'a 'aj tz'atcn sb'el lum cusltac lu'um, palta matz tac' yel eb', yujto 'ix yamchj eb' yuj eb' israel x'elt 'a yol chon̈b' cha, xmilx cham eb' yuj eb'.

⁴³ 'Ix 'och oyn eb' israel 'a spatquil eb' yic Benjamín cha, 'ix pechx b'ey eb'. X'el xon yich scham eb' 'a Menúha, masnto xc'och eb' scham 'a stojlal 'aj tzq'uel c'u 'a chon̈b' Gabaa.

⁴⁴ 'Ixta x'aj scham wajxclajn̈e mil eb' soldado yic yin̈tl Benjamín.

⁴⁵ Ax jun tzo'n̈ xo eb' xmeltzj cani, 'ix 'at eb' 'elc 'a lum custltac lu'um, 'a sc'axpil 'ec' q'uen niwquil tenm tzcuch Rimón. O'e mil eb' xcham 'a yol b'e. An̈j 'ijnoc pechb'il eb' yuj eb' israel masnto xc'och eb' 'a Guidom. 'Ix 'ajx ganar eb' yuj eb' israel cha. Chab' mil to eb' soldado 'ix cham ta yuj eb' israel cha.

⁴⁶ A sb'isl eb' soldado yic yin̈tl Benjamín 'ix cham 'a jun c'u cha, o'eschawinc mil eb', eb' caw jeln ya'n owal.

⁴⁷ Palta waque to ciente eb' yic Benjamín chi 'ix 'atnc 'elc 'a lum cusltac lu'um. Chan̈e 'uj 'ix can eb' 'a sat q'uen niwquil tenm tzcuch Rimón.

⁴⁸ Ax pax eb' israel xmeltzj cha, 'ix stzu'n cham eb' nan̈l xo 'anma xcan 'a junjn schon̈b' eb' yin̈tl Benjamín cha. Sma'n cham can pax eb' no noc', yet' smasnil tastc 'ix 'ilchj yuj eb'. 'Ix sn̈usn can pax eb' junjn chon̈b' cha.