Jueces 19 - Chuj San Sebastian Bible

A win levita yet' 'ix schab'l 'istzil

¹ A 'a jun tiempoal yic mant 'a junc rey 'aych 'a chon̈b' Israel, 'ay jun levita cajn 'a jun lugar caw najat. 'Icha ula yec' 'a lum jolmctac witz 'a yol yic Efraín. 'Ix yij win jun 'ix 'aj Belén 'a yol yic Judá.

² Palta 'ix muln 'ix 'a yol sc'ab' winac, yuj cha, 'ix paxx can 'ix 'a smam 'a Belén cha. A yic tox xlajw chan̈e 'uj sc'och 'ix ta',

³ 'ix 'at win yichmil 'ix chi smontc pax jun 'ejm xo, sec tzcotx 'ix yet'oc. 'Ix yij 'at win jun schecab', yet' chawn̈ no b'uru, schaj 'ix sc'och win 'a yatut smam cha.

⁴ An̈jtona pax win smam 'ix cha, 'ix 'elt win wul scha win levita chi 'a tzaljc'ojlal. 'Ix yaln win smam 'ix 'ix cha, to tzcan win yet' eb'. Yuj cha, 'ix can win yet' jun schecb' chi 'a 'oxe c'u ta'. Tzwa eb', tzyu'n eb' tas tzyuq'uej, tzway pax eb' ta'.

⁵ Ax 'a sq'uin̈b'il 'a yic schan̈l c'ual, 'ix seb' q'ue wan eb' yic tzseb' cot eb' yalni. Ax yic wan xo scot eb', 'ix yaln win smam 'ix 'ix chi 'a win sn̈i chi 'ixtic: —Wajec can junc wa'il, ax e 'ati, sec wach' 'ay eyip e b'eyi, ax cab' e 'at b'i'an, xchi winac.

⁶ 'Ix 'em wocn eb' schawn̈il, 'ix wa eb', xyu'n eb' tas xyuq'uej, ax win smam 'ix 'ix cha, 'ix tew 'och win 'a eb' to tzcan eb' junc xo 'ac'wl 'a tzaljc'ojlal.

⁷ Wach'xam 'ix seb' q'ue wan jun levita cha, yic tzseb' coti, palta 'ix tewn̈ej 'och win sn̈i win chi 'a 'a, 'ix yaln pax sc'ojl win scani.

⁸ Ax 'a yol c'ual, 'ix seb' q'ue wan win levita chi 'a sq'uin̈b'ial, sec tzseb' paxta, palta xtew pax 'och win smam 'ix chi 'a jun 'ejm xo yic tzwa eb', sec wach' 'ay yip eb' sb'eyi. 'Ix wa eb', ya' sb'a wan sq'ue c'u.

⁹ Ax yic xcot jun levita chi yet' 'ix schab'l 'istzil cha, yet' jun win schecab', 'ix yaln pax win sn̈i win chi 'a 'a, chajtlto, tox x'ec' c'u, yuj cha, 'ix tew pax 'och 'a winac, yic tzcan junc xo 'ac'wl 'a tzaljc'ojlal. At 'a junc xo c'u tzseb' q'ue wan eb', tzpaxt eb' 'a yatut.

¹⁰ Ax jun levita cha, man̈x 'ic yal sc'ojl tzcan junc xo 'ac'wal. 'Ix cot win yet' 'ix 'ix cha, win schecab' yet' chawn̈ no b'uru 'aych xila tz'um 'a 'a. A yic xjaw eb' 'a yojltac 'at Jebús, atn Jerusalén, wan xo s'at c'u.

¹¹ 'Ix yaln win checb' chi 'a win levita chi 'ixtic: —¿Tas xa chi ach tic, q'uinloc tzon̈ wayc junc 'ac'wl 'a chon̈b' Jebús tic? xchi winac.

¹² 'Ix yaln win levita chi 'a 'ixtic: —Ma'ay, matz on̈ wayc 'a jun chuc chon̈b'al tic, coyec masnto 'oj qui c'ochc 'a Gabaa.

¹³ Ca'c 'ip qui 'ati, a 'a Gabaa 'oj 'ec' 'ac'wl cujec, mto 'a Ramá, xchi winac.

¹⁴ 'Ix cotn̈j eb', wan xo sq'uic'b'i xjaw eb' 'a Gabaa. A jun chon̈b' cha, yic eb' yin̈tl Benjamín.

¹⁵ 'Ix 'el eb' 'a yol b'e, 'ix 'och eb' 'a yol chon̈b' Gabaa yic tz'ec' 'ac'wl yuj eb' ta'. 'Ix 'at 'em wocn eb' 'a plas 'a yol jun chon̈b' cha, palta may mach tz'a'n sposada eb'.

¹⁶ Palta wan xo wal sq'ue 'ac'wal, 'ix 'ec' jun win 'ichm winc ta', spet win 'a smunljel. A win 'ichm winc cha, 'aj lugar 'a eb' lum jolmctac witz 'a yol yic Efraín. Ax 'a Gabaa cajn 'eq'ui, 'icha ula'il yajc' 'a jun lugar cha.

¹⁷ A yic 'ix yiln 'och win 'ichm winc chi jun win b'eymal 'anma chotn 'ec' 'a yol chon̈b' cha, 'ix sc'anb'n win 'a 'ixtic: —¿'Ajtil ach coti? ¿'ajtil pax tzach 'ati? xchi winac.

¹⁸ 'Ix ta'w win levita chi 'a 'ixtic: —Ton̈j tzon̈ 'ec' 'a tic. Ata on̈ cot 'a Belén 'a yol yic Judá, tzon̈ 'at 'a junc lugar caw najt 'a eb' lum jolmctac witz 'a yol yic Efraín, yujto ata in xit' jaye c'u 'a Belén cha, ax ticnec tzin pax 'a 'aj 'ay scajnub' Jehová, palta may junc mach tz'a'n in posada 'a tic.

¹⁹ 'Ay yan̈ e no in b'uru tic, 'ay tas tzin c'uxu, yet' tas tzwu'j yet' 'ix wistzil tic, yet' jun in checb' tic, may tas tzyac' palta 'ayn̈ on̈, xchi.

²⁰ 'Ix ta'w win 'ichm winc chi 'ixtc 'a winac: —Junc'ojlal cab' aji. An 'oj wac' smasnil tastc 'ay tz'och o'oj. Matz yal in c'ojl to 'oj a can 'a plas 'a jun 'ac'wl tic, xchi winac.

²¹ Yuj cha, 'ix yi'n 'at win 'ichm winc chi win 'a yatut. 'Ix ya'n 'och win yan̈ e no b'uru cha, ya' sb'a ax eb' b'eymal 'anma cha, wan sb'icn eb' yoc. 'Ix wa eb', xyu'n eb' tas tzyuq'uej.

²² Wanto wal stzalj eb' cha, 'ix jaw jun tzo'n̈ ewin 'aj chon̈b' cha, caw maysch'olnil snab'en ewinac. 'Ix 'och oyn eb' 'a spatquil te n̈a cha, syamn 'och eb' sma'n poj spuertail te'. 'Ix yaln eb' 'ixtc 'a win 'ichm winc 'ay yic te n̈a cha: —'Ac' 'elt win 'ayc' ula'il chi 'ayach. Tzqui nib'j tzquixtej, xchi ewinac.

²³ 'Ix yaln win 'aj n̈a chi 'ixtc 'a eb': —¡Caw ma'ay, ex wit 'anma'il! ¡Tzin tew wal 'ayex, man̈ e nalb'oc e b'on maysch'olnil yet' jun winc 'ayc' ula'il 'ayn tic!

²⁴ 'Ay jun 'ix wisl caw wal cob'sto, yet' pax jun 'ix 'ix ajun yet' winac. A eb' 'ix tztac' wa'n 'el 'ayex, yic tze b'on tas tze nib'j 'a eb' 'ix. Palta man̈ e nalb'oc e b'on maysch'olnilal yet' jun winc tic, xchi winac.

²⁵ Caw ma'ix schaj eb' yab' tas xyal win 'ichm winc cha. Yuj cha, 'ix ya'n 'elt win levita chi 'ix yistzil chi 'a yol caye. Smasnil 'ac'wl 'ix yixtj ewin 'ix, masnto sacb'i, 'ixta to b'i'an 'ix yactn can ewin 'ix.

²⁶ A yic wan xo sacb'i, 'ix meltzj 'ix 'a yatut win 'ichm winc 'aj 'ayc' win yichmil 'ix cha. A yic 'ix jaw 'ix 'a sti puerta, 'ix telw 'ix, xcham 'ix ta'.

²⁷ Ax yic 'ix q'ue wan win yichmil 'ix cha, 'ix sjacn win te puerta yic tz'atxi, ax xyilni t'ocn 'ec' 'ix yistzil win chi 'a yol sti smac n̈a cha, jiln can 'at sc'ab' 'ix 'a yib'n̈ smarcoal jun n̈a cha.

²⁸ 'Ix yaln win 'ixtc 'a 'ix: —Q'uen̈ wa'an, con̈, xchi winac. Palta man̈x 'ic ta'w 'ix 'a winac. Yuj cha, 'ix sme'n q'ue wan win sniwnal 'ix, xya'n q'ue win 'a yib'n̈ no sb'uru, xyi'n 'at 'a yatut.

²⁹ Ax yic 'ix c'och 'a yatut cha, 'ix yi'n cot jun q'uen cuchlub', scotc tzu'n 'at win sniwnal 'ix cha. Lajchwe x'eli. Xlajw cha, xya'n 'at win 'a smasnil yol smacb'en eb' yit israelal cha.

³⁰ A smasnil eb' x'iln jun cha, 'ix yaln eb' 'ixtic: —Yictax on̈ 'eltec 'a Egipto, mant 'a xon 'aj xquilc junc 'icha jun tic. Yowlal tzcham qui nanec yuj jun tic, tas wach' 'oj cutquec qui b'a yet'oc, xchi eb'.