Jueces 17 - Chuj San Sebastian Bible

Jun tzo'n̈ comn dios yic Micaía

¹ A 'a eb' lum jolmctac witz yic Efraín, ata 'ix 'ec' cajn jun winc Micaía sb'i.

^2-3 A jun cha, 'ix yal 'a snun 'ixtic: —A yic 'ix 'elc'x q'uen a tumn nunin, q'uen 1,100 tumn plata, ata 'ix al catb' paxti 'a yib'n̈ jun 'elc'm cha, palta ticni a 'ayn 'ayc' q'ue'en, an 'ix wel'j q'uen 'ayach, xchi. Yuj cha, 'ix yaln snun chi 'ixtc 'a 'a: —A cab' Jehová tzyac' yaxilal 'a eb'n̈ ach wune', xchi 'ix. A yic 'ix ya'n win meltzjoc q'uen tumn chi 'a snun cha, 'ix yaln pax snun chi 'ixtic: —Ach wune', a ticnec a jun tumn cha, tzwac' q'uen 'a Jehová yic tzb'o junc yechl to tzeyb'il, yet' junc tzb'o 'a yol molde, ax ticnec, an xo tzwac' meltzjoc q'uen 'ayach, xchi 'ix.

⁴ A yic xya'n meltzjoc Micaía q'uen tumn chi 'a snun, ax snun chi 'ix a'n chab' ciente q'uen tumn 'a jun win b'om plata, yic tzb'on junc yechl to tzeyb'il, to tz'ajx 'och plata 'a 'a. Xlajw cha, x'ajx 'och 'a yol yatut Micaía.

⁵ 'Ixta 'ix 'aj yatut Micaía yoch yatutoc comn dios. 'Ix ya'n win b'o jun chaleco yic eb' ya'mal 'och sti eb' 'anma', yet' jun tzo'n̈ xo yechel. 'Ix ya'n pax 'och win junc eb' yunnal ya'malc 'och sti' eb' 'anma 'a sdiosal cha.

⁶ A 'a yic jun tiempoal cha, may sreyl eb' israel, junjn eb', tzb'o eb' 'icha tas tznib'ej.

⁷ A 'a chon̈b' Belén 'a yol yic Judá, ata cajn jun quelm levita, ula yaj 'a yol yic Judá.

⁸ A jun quelm cha, 'ix 'el 'a yol yic Belén, yic tz'at saynoc 'aj tzc'och cajan. 'Ix 'ec' 'a lum jolmctac witz 'a yol yic Efraín. Xlajw cha, 'ix c'och 'a yatut win Micaía.

⁹ —¿'Ajtil ach coti? xchi Micaía 'a 'a. 'Ix yaln 'ixtic: —A 'a Belén, 'a yol yic Judá in coti. An tic levita in, tzin 'ec' in say 'aj 'oj in can cajan, xchi.

¹⁰ —Toto 'ixta', cann̈ wet' 'a watut tic, sec wach' ach tzach 'och ya'malc 'och in ti 'a in diosal, 'icha wal in mam 'oj aji. 'Oj wac' lajn̈ec tumn plata a tojloc 'a junjn ab'il, ax wa'n pax a pichul yet' tas tza c'uxu, xchi Micaía 'a winac.

¹¹ 'Ix schaj sc'ojl win levita scan cajn yet' winac, 'icha wal yunnal xyutej.

¹² 'Ix ya'n 'och win Micaía win quelm levita chi ya'malc 'och sti 'a sdiosal. 'Ixta x'aj scan win 'a yatut.

¹³ 'Ix sna winac, to 'oj scha syaxilal Jehová, yujto levita jun 'aych ya'malc 'och sti 'a sdiosal cha.