Jueces 16 - Chuj San Sebastian Bible

Xit'nc Sansón 'a chon̈b' Gaza

¹ 'Ix xit' Sansón 'a Gaza. Ata 'ix yil jun 'ix 'ajmul 'ix. 'Ix 'och 'a yol yatut 'ix, 'ix way win yet' 'ix 'a jun 'ac'wl cha.

² A yic 'ix yab'n eb' 'aj Gaza cha, to ata 'ayc' winac, 'ix yoyn sb'a eb' 'a spatquil chon̈b' cha. 'Ix stan̈wj eb' spuertail jun chon̈b' chi 'a jun 'ac'wl cha. Sictac yaj eb' smaclni, 'ix 'ec' 'ac'wal. At 'a sq'uin̈b'il 'a junx c'u tzmil cham eb' yalni.

³ Ax Sansón 'ix stan̈wj yoch chim'ac'wal, 'ix q'ue wa'an. Xlajw cha, 'ix sto'n 'elt spuertail jun niwquil chon̈b' cha, smarcoal yet' yijul. 'Ix scan̈ q'ue 'a squelab'. X'at ya'nc can 'a sjolm jun lum witz 'a yojltac 'at Hebrón.

Sansón yet' 'ix Dalila

⁴ Xlajw cha, 'ix ya'n 'och snab'en 'a jun 'ix 'ix tzcuch Dalila cajn 'a span̈nil lum Sorec.

⁵ 'Ix 'at eb' syajlil chon̈b' filisteo paxtinc yet' 'ix Dalila cha, 'ix yaln eb' 'a 'ix 'ixtic: —Tza montj wal Sansón cha, tza c'anb'j 'a 'a, 'aj wal tzcot yip yet' tas wal tzcutj qui jalni yic tzca'n ganar. Junjn on̈ on̈, tzcac' 1,100 q'uen tumn plata 'aych yuj a tojloc, xchi eb' 'a 'ix.

⁶ 'Ix yaln 'ix Dalila 'ixtc 'a Sansón: —Tzin tew 'ayach, to tzal 'ayin 'aj wal tzcot jun ep caw wal niwquil tic, to chuc wal yel tic. ¿'Ay am wal tas tzach 'aj a jalxi yic man̈xtzac stac' a jiyn 'el a b'a? xchi 'ix 'a 'a.

⁷ —Toto tzin jalx yet' uque'oc ch'an̈ c'utquil ch'an̈ to mantzac tacj si'mb'il, toto 'ixta', tz'el wip tic, 'icha xoj yip comn winc tzin 'ajcni, xchi.

⁸ 'Ix yij cot eb' syajlil eb' filisteo uque ch'an̈ c'ultquil ch'an̈ mantzac tacji, 'ix ya'n eb' 'a 'ix Dalila. A yet' jun cha, sjal 'ix Sansón cha.

⁹ 'Ay jun tzo'n̈ winc tox sc'ub'j 'el sb'a 'a yol yatut 'ix, caw 'ip x'el yaw 'ix, xyaln 'ix 'ixtic: —¡Sansón, tic tzjaw eb' filisteo ach wul smil chamoc! xchi 'ix. Yajn̈ cha, 'ix sn̈i'chtan 'at jun tzo'n̈ ch'an̈ cha, 'icha sc'unal sn̈i'chj 'at junc ch'al to tz'anc xo. Ax eb' filisteo ma'ix nachj xon 'el yuj eb' 'aj tzcot yip.

¹⁰ 'Ix yaln pax 'ix Dalila 'a Sansón: —Caw wal tu 'ach, tzin extj paxti'. A ticnec tzin tew 'ayach, al wal 'ayin, tas wal tzach 'aj 'a jalxi, xchi 'ix.

¹¹ —Toto tzin jalx yet' 'a't lasu to mant 'a 'aj tzc'anxi, tz'el wip, 'icha xoj yip comn winc tzin 'ajcni, xchi winac.

¹² 'Ix yi'n cot 'ix Dalila jun tzo'n̈ 'a't lasu, 'ix sjaln 'ix yet' ch'an̈. Caw 'ip 'ix 'el yaw 'ix jun 'ejm xo, 'ix yaln 'ix 'ixtic: —Sansón, tic tzjaw eb' filisteo ach wul smil chamoc, xchi 'ix. An̈jtona', 'ayx 'ec' jun tzo'n̈ winc sc'ub'c 'el sb'a 'a yol yatut 'ix, palta 'ix sn̈i'chtan pax Sansón jun tzo'n̈ lasu cha, 'icha xoj tz'aj sn̈i'chj 'at junc ch'al caw xi', 'ixta 'ix yutej.

¹³ 'Ix scha aln pax 'ix Dalila 'a Sansón: —¿Tom an̈ja 'oj in extc paxti'? ¡Tza'n̈j 'es 'ayin! Alcn 'ayn ticnec tas wal tzach cutj ach qui jalni, xchi 'ix. —Toto uc c'aj tzotj a palch'ab'n xil in jolm jucn yoc tic, yet' te ch'al to jalb'il, tz'at a pixnc 'och 'a te 'istaca, caw sin̈n̈i tzotj 'a pixni. 'Ixta tz'aj yelcn wip, 'icha xoj yip comn winc tzin 'ajcni, xchi Sansón. Xlajw cha, 'ix 'ajx wayc Sansón yuj 'ix. Ax yic tox xway cha, 'ix spalch'ab'n 'ix xil sjolm win chi yet' te ch'al cha.

¹⁴ X'at spixnc 'och 'ix 'a te 'istaca cha. Xlajw cha, 'ix 'el yaw 'ix: —Sansón, tic tzjaw eb' filisteo ach wul smil chamoc, xchi 'ix. Yajn̈j wal cha, 'ix 'el swayn̈ Sansón, xq'ue wan jucn̈joc, 'ix sto'n chan̈ te 'istaca yet' te ch'al cha.

¹⁵ Xlajw cha, 'ix yaln 'ix 'a 'ixtic: —Ach tic caw wal 'a'm ach 'es. ¿Tas yuj cob' tzal 'ayn 'ixtic: Caw wal tzach in nib'ej? xa chi. Palta man̈ yelc tzala. Yox'ejmal xo in extj paxti tic, 'in mantzac al 'ayin 'aj wal tzcot jun ep tic, xchi 'ix.

¹⁶ Ax x'aji, junjn c'u tzc'anb'n 'ix 'a winac, 'aj wal tzcot jun yip cha, jun xo 'ix tzactzj chan̈ stew 'och 'ix 'a 'a. Yuj cha, 'ix yalni tas wal yaji.

¹⁷ 'Ix yaln wal 'a smasnil sc'ojol 'aj wal tzcot yip cha, 'ix yaln 'ixtic: —Mant 'a xon 'aj tzjoxx 'el xil in jolm tic jun 'ejmoc yictax walji, yujto a yic mantzac in 'alj 'el 'a in nun, in si'n can 'el Dios yicoc. Yuj cha, toto 'ay mach tzjoxn 'el in jolm tic, 'ixta tz'aj yel wip, 'icha xoj yip junc comn winc tzin 'ajcni, xchi.

¹⁸ 'Ix nachj 'el yuj 'ix Dalila 'a jun 'ejm xo tic to yel tzyala. Xlajw cha, 'ix ya'n 'ix alxc 'a eb' syajlil eb' filisteo 'ixtic: —A ticnec cotn̈ec, tox 'ix yal Sansón 'ayn 'a smasnil sc'ojol 'aj wal tzcot yip, xchi 'ix. Yuj cha, 'ix c'och eb' 'a 'ix, yet' eb' q'uen tumn yaljnac.

¹⁹ 'Ix ya'n way 'ix Dalila Sansón, 'ix 'ec' c'otn sjolm 'a sat xub' 'ix. Xyawtn cot 'ix jun win joxm jolom, 'ix sjoxn 'el win uc topn xil sjolm jucn yoc. Xlajw cha, syamn 'och 'ix sb'uchwj 'a winac, yujto tox 'ix 'el yip.

²⁰ 'Ix 'el yaw 'ix 'ixtic: —Sansón, tic tzjaw eb' filisteo ach wul smil chamoc, xchi 'ix. Yajn̈j cha, 'ix 'el swayn̈ Sansón. A yalni to 'oj stac' to scoln sb'a, 'icha 'a junjn 'ejem. Palta man̈ yojcoc toto tox 'ix 'actx can yuj Jehová.

²¹ 'Ix yamchj yuj eb' filisteo. Xlajw cha, xyi'n 'elt eb' yol sat, xyi'n 'at eb' 'a chon̈b' Gaza. Ata xya'ch eb' q'uen cadena nab'a bronce 'a 'a, xya'n 'och eb' 'a preso. Xya'n eb' 'ajxc munljoc 'a q'uen mulino 'a yol preso cha.

²² Palta 'ix syamn 'och sq'uib'x xil sjolm jun 'ejm xo.

A schaml Sansón

²³ Ax eb' syajlil eb' filisteo cha, 'ix syam sb'a eb' 'a tzaljc'ojlal, yujto xyac' ganar eb'. 'Ix ya'n eb' xajmb'al 'a sdiosal Dagón sb'i. 'Ix b'itn eb' 'a 'ixtic: A qui diosal tic, a 'ix 'a'n 'och jun 'ajc'ojl Sansón tic 'a yol qui c'ab', xchi eb'.

²⁴ An̈jtona', 'ixta pax eb' 'anma', a yic 'ix yiln eb' Sansón, 'ix sb'itnej eb' sdiosal, xyaln eb' 'ixtic: A qui diosal, a 'ix 'a'n jun 'ajc'ojl yajch tic 'ayon̈, atn jun xn̈usntz'a qui munljelec, til wal pax eb' quit chon̈b'ec smil chamoc, xchi eb'.

²⁵ Caw 'ix tzalj eb' 'anma', 'ix sc'ann 'elt eb' Sansón cha, yic tz'elwni eb' 'a 'a. 'Ix yi'n 'elt eb' win 'a yol preso, 'ix ya'n 'och eb' 'a snan̈l jun tzo'n̈ yoyl n̈a, yuj yixtn eb'.

²⁶ 'Ix yaln win 'ixtc 'a jun win quelm quetzjnac sc'ab': —'Ij in 'at 'a stz'ey yoyl jun n̈a tic, sec tzin 'och 'ijn jac 'a 'a, xchi.

²⁷ Smasnil eb' syajlil eb' filisteo cha, eb' winac yet' eb' 'ix 'ix, caw b'ut'jnac 'el jun n̈a chi yuj eb'. 'Ay am junc 'oxe mil 'anma 'ayc' 'a schab'l piso cha, yuj smatz'n eb' tas tz'aj yixtx Sansón.

²⁸ Xlajw cha, 'ix yaln win Sansón 'ixtc 'a Jehová: Tzin tew 'aych Mamin Jehová to tzin 'a na coti. Cojxn̈ej jun 'ejm tic tzac' wip ach in Diosal, yic tzwa'n spac 'a eb' filisteo yuj chab' yol in sat 'ix yij 'elt eb' tic, xchi Sansón.

²⁹ 'Ix 'och yamn 'a chab' niwc piral b'achjnac chan̈ jun n̈a chi 'a snan̈l yojol, a swach' c'ab' 'a jun, ax surito 'a jun xo.

³⁰ Xlajw cha, caw 'ip 'ix yal win 'ixtic: ¡Wach'xam tzin chami, an̈jtona', cham cab' eb' filisteo tic wet'oc! xchi. 'Ix ya'n yip yecntelwc chab' niwc yoyl jun n̈a cha. 'Ix lan̈chj 'ejm 'a yib'n̈ eb' syajlil chon̈ab' yet' 'a yib'n̈ eb' 'ayc' ta'. Caw wal niwn 'anma xcham yuj Sansón yic xchami, 'ec'b'al 'a yib'n̈ eb' chamnc yuj 'a yic pitzan.

³¹ Xlajw cha, 'ix c'och eb' yu'tac Sansón yet' eb' yican, x'at yi'noc eb' sniwnal. 'Ix smucn eb' 'a 'aj mucb'il smam, atn win Manoa. A 'a snan̈l Zora yet' Estaol ata 'ay jun lugar cha. Junc'l ab'il 'ix yac' Sansón yajlil 'a chon̈b' Israel.