Jueces 15 - Chuj San Sebastian Bible

¹ A yic 'ayxtax wal cha, yic wan yoch polj trigo, 'ix 'at win Sansón chi 'at yil 'ix yistzil, yet' win jun no yune chiwo. Ax yic xc'ochi, 'ix yaln 'ixtc 'a win sn̈i cha: —Tzin nib'j tzin 'och wil 'ix wistzil 'a yol scuarto, xchi. Palta man̈x 'ic chax 'och win yuj win sn̈i cha.

² 'Ix yaln win smam 'ix chi 'ixtc 'a 'a: —A 'in nani man̈xtoc nab'il 'ix o'oj, yuj cha, 'ix wa'n 'ix 'a jun win a wach'c'ojol. Palta 'ayt junx 'ix snul'j 'ix tza'nto 'a 'a, caw wal wach' yilx 'ix 'a yib'n̈ 'ix estzil cha. Tztac' a 'ix tzej pax sjelc 'ix, xchi win sn̈i win cha.

³ 'Ix ta'w Sansón, 'ix yaln 'ixtc 'a winac: —A ticnec b'i'an, matz 'och cab' jun tic in muloc, yuj tas 'oj wutc eb' filisteo tic wixtni, yuj in pacn in b'a, xchi.

⁴ 'Ix 'at Sansón, x'at yi'nc cot 'oxe ciente no wa'ax, 'ix spixn 'och win te taj 'a sn̈e chatcwan̈ e no wax cha.

⁵ Xlajw cha, 'ix ya'n 'och win sc'a'l te', 'ix yactn 'at win e no 'a scal 'ixm strigo eb' filisteo. 'Ix tz'a 'ixm polb'ilxo, 'ixm jun b'uln yaji, 'ixm 'ayt 'och 'a yoc, te uva yet' pax te olivo.

⁶ 'Ix sc'anb'n 'ec' eb' filisteo mach 'ix b'on jun chi 'ixta'. 'Ix alx 'a eb' to a win Sansón, win sn̈i win 'aj Timnat, a 'ixta 'ix 'utni, yuj ya'n spac, yujto 'ix 'ijx 'ec' yistzil, ax 'a jun swach'c'ojl cha, ata x'ajx 'ix. 'Ix jaw eb' filisteo wul sn̈ustz'a 'ix 'ix chi yet' smam.

⁷ Yuj cha, 'ix yaln Sansón 'ixtic: —Yujto 'ixta xeyutej, yuj cha, tzwac' in ti' to ma'oj woch wan ex wixtni, masnto 'oj wa'cn in pac 'ayex, xchi.

⁸ 'Ix cot wal yowl si'mb'il. Til wal 'anma 'ix smilcn chamoc. Xlajw cha, 'ix 'at cajn 'a q'uen n̈aq'uen 'a Etam.

A sb'acl yaln̈ sti no b'uru

⁹ 'Ix jaw eb' filisteo 'a yol yic Judá, xlajw cha, 'ix sb'on chan̈ eb' scamplamento 'a span̈nil yic Lehi.

¹⁰ Ax eb' 'aj Judá 'ix sc'anb'n 'a eb' 'ixtic: —¿Tas yuj tzex jaw wul eyac' owl quet' on̈? xchi eb'. —Tzon̈ jaw wul qui yam win Sansón on̈, ax ca'n 'och syailal 'icha wal on̈ yutj on̈ yixtni, xchi eb' filisteo cha.

¹¹ A yic 'ix yab'n eb' yin̈tl Judá jun cha, 'oxe mil eb' x'at 'ilnoc Sansón 'a q'uen n̈aq'uen 'ay 'a Etam. 'Ix yaln eb' 'a 'ixtic: —¿Tom man̈ ojcoc to 'ayn̈ 'och 'a yaln̈ schecnb'il eb' filisteo? ¿Tas yuj 'ixta tzon̈ otej? xchi eb'. —'Icha wal in yutj eb', 'ixta pax tzwutj eb', xchi Sansón.

¹² —An̈ tic on̈, tzon̈ jaw wul ach qui jal on̈, ax ach ca'n 'och 'a yol sc'ab' eb', xchi eb' 'a winac. 'Ix yaln Sansón 'a eb' 'ixtic: —'A'c e ti 'ayn 'an, toto yel matz in e mil chamoc, xchi 'a eb':

¹³ —Ma'ay, matz ach qui mil chamoc, cojn ton̈j tzach qui jala, ax ach ca'nc 'och 'a yol sc'ab' eb', xchi eb'. Xlajw cha, 'ix sjaln eb' yet' chab' 'a't lasu, 'ix yi'n 'elt eb' 'a yojl q'uen n̈aq'uen cha.

¹⁴ A yic 'ix c'och eb' 'a Lehi, 'ix 'elt eb' filisteo scha sc'ochi. Caw wal tz'el yaw eb' yuj tzaljc'ojlal. Yajn̈ej 'ix jaw Yespíritu Jehová 'a Sansón yic tzya'n yip. Ax ch'an̈ lasu pixjnac sc'ab', 'ix sn̈i'chtan 'at ch'an̈ 'icha sc'unal tz'anc nip, 'ix 'em lan̈njoc ch'an̈.

¹⁵ Yajn̈ej 'ix 'ilchj jun sb'acl yaln̈ sti b'uru to yaxto wali. A yet' jun chi 'ix sma' cham jun mil eb' filisteo cha.

¹⁶ Xlajw cha, 'ix yaln Sansón 'ixtic: Cojn jun sb'acl yaln̈ sti b'uru 'ix wa'lb'ej, 'ix q'uecn cha 'ox b'uln̈ chamnc 'anma wu'uj: Cojn yet' jun sb'acl yaln̈ sti b'uru, jun mil eb' winc xin ma'cn chamoc, xchi.

¹⁷ Xlajw spaxtin cha, 'ix sjuln can 'el jun sb'acl yaln̈ sti no b'uru cha. Ramat-lehi, 'ix yac' sb'ic jun lugar cha.

¹⁸ Ax Sansón, caw wal 'ay stacn̈ti'al, 'ix 'awj 'a Jehová, 'ix yaln 'ixtic: —Ach 'ix ac' wip yic xwa'n ganar eb'. ¿Palta tom 'oj in a cha cham yuj tacn̈ti'al, ax sjapx jun tzo'n̈ chuc chon̈b'al in yixtoc? xchi.

¹⁹ Xlajw cha, 'ix sjacn Dios jun a spac'b'a 'ay 'a Lehi cha. 'Ix yu'n Sansón a a cha, caw wal 'ix japx sc'ojl tzyab'i. 'Ix 'ochx yip jun 'ejm xo. Yuj cha, a jun a spac'b'a 'ay 'a Lehi cha, scuchcn En-hacore. (Tzyal 'el'chi yuc'b'ila mach tz'awji).

²⁰ Junc'l ab'il 'ix 'och Sansón syajlilc eb' yit israelal, ya' sb'a 'aych eb' 'a yol sc'ab' eb' filisteo.