Jueces 14 - Chuj San Sebastian Bible

Snupnel Sansón yet' jun 'ix filistea

¹ 'Ay jun tiempoal, 'ix 'at 'ejm Sansón b'eyc'oc 'a jun chon̈b' tzcuch Timnat 'a yol smacb'en eb' filisteo, axta 'ix ya'ch sat 'a jun 'ix cob's filsitea cha.

² Ax yic xc'ochx 'a yatut smam cha, 'ix yaln 'ixtc 'a smam snun: —'Ay wal jun 'ix cob's xwil 'a chon̈b' Timnat, 'a scal eb' 'ix yisl ewin filisteo. Caw tzcan in nab'en 'a 'ix, yuj cha, tzwaln 'ayex, to tz'at e c'an wic' 'ix, xchi.

³ Xyaln smam snun 'a 'ixtic: —¿Tas yuj a 'a scal eb' chuc chon̈b'al cha, ata tz'at a nib'c cot estzil? ¿Tom may eb' 'ix cob's 'ix 'a scal eb' quit chon̈ab'? xchi eb' 'a 'a. —'At c'anc 'ix cob's chi wic', yujto a 'a 'ix tzcan in nab'en, xchi Sansón.

⁴ Man̈ yojcoc eb' mamb'il cha, toto a Jehová 'ay snab'en jun cha, yujto wan sayn tas tz'aj slajw 'el eb' filisteo yuj owal. A 'a jun tiempoal cha, a eb' israel 'aycn 'a yaln̈ schecnb'il eb' filisteo.

⁵ Xlajw cha, 'ix 'at Sansón yet' smam snun 'a chon̈b' Timnat. Ax yic x'emch 'a 'aj 'ay nan̈l te snun uva 'awb'il yuj eb' 'aj chon̈b' cha, 'ix 'elt jucnjoc jun no quelm león 'a winac, caw tz'el yaw no scot 'a 'a.

⁶ Ax Yespíritu Jehová 'ix jaw 'a yib'n̈ Sansón, 'ix caw 'och yip. May xon jac tas yet' 'a sc'ab', cojn yet' yip chi 'ix yac' milnc cham no león cha. 'Ix stoc' jecchjoc win no 'icha wal sto'x jecchjoc junc no yune chiwo, 'ixta 'ix yutej. May xon jac tas xyal 'a smam snun yuj tas sb'o cha.

⁷ Xlajw cha, 'ix c'och paxtinc yet' 'ix cob's 'ix cha, 'ix can snab'en win 'a 'ix.

⁸ 'Ix 'ec' jaye c'u, 'ix 'atx eb' 'a 'aj 'ay schon̈b' 'ix 'ix cha, yic tznupn win yet' 'ix. A yic 'ix 'e'x win 'aj chamnc can no león cha, 'ix 'at yilnc pax win sniwnal no'. Ax yic xc'och 'a stz'ey sjoymtel no cha, 'ix yilni to 'aych jun no chab' 'a yol sjoymtel no'. Caw wal 'ay yalil no' chab' cha.

⁹ Xyi'n 'elt win no yalil chi yet' sc'ab'. 'Ix yi'ni, wan stz'ub'n win no yal chab' cha yic xc'ochx 'a spatquil eb' smam snun cha. 'Ix ya'n win no yal chab' chi 'a eb', xlaj stz'ub'nc eb'. May tas xyal win 'a eb', toto a 'a yol sjoymtel no león chi xyij 'elt jun yal chab' cha.

¹⁰ Xlajw cha, xc'och smam Sansón chi yet' 'a 'aj 'ay 'ix cob's 'ix cha. 'Ix ya'n 'och Sansón chi jun q'uin̈ yuj snupnel, yujto 'ixta sb'eyb'al eb' quelmtac 'a jun lugar cha.

¹¹ Ax yic xyiln sb'a eb' filisteo chi 'a Sansón to 'ayx 'ec' ta', yuj cha, 'ix yawtn cot eb' lajn̈schawinc eb' quelmtac, sec tzyil eb' yoch jun nupnel cha.

¹² Ax Sansón 'ix yal 'a eb' 'ixtic: —A ticnec 'ay jun tzo'n̈ tas 'oj wac' e nali. Toto a 'a scal uque c'u q'uin̈ tic, ata tojl 'oj eyutc eya'n spac 'ayin, toto 'ixta', 'oj wac' junjnoc e pichl 'a te lino wach' yaj sb'o'i, ax wa'n pax junjnoc e pichl tzeya'ch 'a yic 'ay junc q'uin̈.

¹³ Palta toto matz eyac' spac 'ayin, toto 'ixta', ax xo 'oj eyac' junjn in pichl chi 'a te lino cha, junjn pax in pichl yic q'uin̈ chi 'oj eyac' junjn ex, xchi 'a eb'. 'Ix ta'w ewin 'ixtc 'a 'a: —Al cab'noc tas jun tzo'n̈ tza nib'j tzal cha, xchi ewinac.

¹⁴ 'Ix yaln Sansón 'ixtic: A 'a jun mach tzchiwji, ata x'elt tas wach' sc'uxxi; a 'a jun mach caw 'ay yip, ata x'elt tas caw chi', xchi. 'Oxe c'u xyac' eb' snan 'el jun tzo'n̈ paxti cha, palta ma'ix nachj xon 'el yuj eb'.

¹⁵ Ax 'a schan̈l c'u cha, 'ix yaln eb' 'ixtc 'a 'ix yistzil win Sansón cha: —Montj wal ab' 'a win echmil chi muc'uc, tas tzyal 'el'ch jun tzo'n̈ paxti tzyac' win qui nal tic. Tzlajw yaln win 'ayach, ach xo tzalx cab' on̈. Toto ma'ay, 'oj ach qui n̈ustz'a yet' smasnil mach 'ayc' 'a yol yatut a mam. 'Into ton̈j tzon̈ eyawtj coti, yic tze c'ann 'ec' tas 'ay 'ayon̈, xchi ewinac.

¹⁶ Xlajw cha, 'ix c'och 'ix yistzil win Sansón chi 'a yojltac, caw ji'jmtac yoc' 'ix, 'ix yaln 'ix 'a win 'ixtic: —Ach tic, 'into tzin a yaja, matz in a nib'ej, yuj cha, 'into matz al 'ayin, tas tzyal 'el'ch jun tzo'n̈ paxti tzac' snal eb' wit chon̈b' tic, xchi 'ix. 'Ix ta'w Sansón 'ixtc 'a 'ix: —'Intax to may tas tzwal yab' in mam in nun, 'at am wal 'aych tic 'oj wala', xchi.

¹⁷ Ax 'ix, 'oc'ln̈ej sb'o 'ix 'a yojltac win 'a uque c'ul cha, yic 'aych cob' sq'uin̈ eb'. Palta 'aychn̈ej 'ix smontn win 'a junjn c'u, ax 'a yucl c'u chi b'i'an, 'ix yaln win 'a 'ix tas tzyal 'el'ch jun tzo'n̈ paxti cha. Cojn wal yic xyab'n 'ix tas yaji, 'ix 'at yalnc yab' eb' yit chon̈b' cha.

¹⁸ Ax 'a yic wan sq'uic'b' 'a yucl c'ul cha, 'ix 'at eb' filisteo chi 'at yal 'ixtc 'a Sansón: May junc xo tas yel xo wal chi' 'a yib'n̈ no yal chab'. May junc xo tas yel xo wal 'ay yip 'a yib'n̈ no león, xchi ewinac. 'Ix ta'w Sansón 'a eb' 'ixtic: Yujto xe montj eyab' 'a 'ix in q'uixnal tic, yuj cha, sta'n eya'n spac chi 'ayin, toto ma'ay, toxn ma'ix nachj xon 'el eyu'uj, xchi 'a eb'.

¹⁹ Xlajw cha, 'ix japx Yespíritu Jehová 'a yib'n̈ Sansón, 'ix 'at sma'nc cham lajn̈schawinc eb' filisteo 'a chon̈b' Ascalón. 'Ix yi'n 'el spichl eb' cha, ax jun tzo'n̈ pichl chi xyac' stojloc eb' x'a'n spac jun tzo'n̈ paxti cha. Caw wal 'ay cot yowl si'mb'il yic 'ix pax 'a yatut smam.

²⁰ Mant najtloc cha, ax 'ix yistzil Sansón cha, 'ix 'ajx 'ix 'a jun win ajun yet' win Sansón cha, 'ix nupn win yet' 'ix.