Jueces 13 - Chuj San Sebastian Bible

Yaljub'al win Sansón

¹ 'Ix 'ochx smul eb' israel 'a yojltac Jehová, yuj cha, chawinc ab'il 'ix can eb' 'a yol sc'ab' eb' filisteo yu'uj.

² A 'a chon̈b' Zora 'a scal eb' yin̈tl Dan, ata 'ay jun winc Manoa sb'i. A 'ix yistzil winac, may xon yune 'ix, yujto man̈ 'unewumoc 'ix.

³ Palta ax jun yángel Jehová a 'ix sch'ox sb'a 'a 'ix. 'Ix yaln 'a 'ix 'ixtic: Ach tic, may xon junc one 'ix el satoc, ax ticnec jun, 'oj a cuchcnchan̈ jun a winc 'unin.

⁴ A ticnec b'i'an man̈xtzac o'j te yal uva, man̈x oc' junc tas ow yu'xi, man̈ a comn c'uxc junc tas to man̈ wach'c yaji.

⁵ A jun one 'oj 'aljoc cha, man̈ ac' joxxoc 'el xil sjolom, yujto a jun 'unn cha, to yicn̈ej Dios yaj winac yic 'oj 'aljoc. 'Oj syamch ex scoln 'el 'a yol sc'ab' eb' filisteo, xchi jun ángel cha.

⁶ Xlajw cha, x'at 'ix 'at yal 'a win yichmil cha, xyaln 'ix 'ixtic: 'Ay wal jun win schecb' Dios xjaw 'a 'aj 'ayn 'ec' cha. Caw wal sat in c'ojl yu'uj. Lajn wal yilx 'och 'icha junc eb' yángel Dios. Ma'ix in c'anb'j 'a 'a, 'ajtil xcoti, man̈oc 'ix aln pax sb'i 'ayin.

⁷ A tas xyal 'ayin, tolab' 'oj wil satc junc wune'. Yuj cha, a ticnec man̈xtzac ab' stac' wu'n te yal uva yet' junc tas ow yu'xi. Matz tac' ab' in comn c'uxn junc tas man̈ wach'oc, yujto a jun 'unn cha, to yicn̈ej ab' Dios tz'aj winac yic 'oj 'aljoc, masnto ab' yic 'oj chamoc, xchi 'ix.

⁸ Yuj cha, 'ix leslwi Manoa 'ixtc 'a Jehová: Mamin, tzin tew wal 'ayach, comnoc tza chec paxt win a checb' chi 'ayn̈ jun 'ejm xo, sec tzwul yalcn wal 'ayn̈ on̈, tas wal 'oj qui b'o yet' jun 'unn chi 'on̈ yic 'oj 'aljoc, xchi winac.

⁹ 'Ix yab' Dios tas sc'an win Manoa 'a slesal. 'Ix sch'oxn pax sb'a jun yángel Dios chi 'a 'ix yistl win cha yic 'ayc' 'ix 'a scal smunljel. Ax Manoa, man̈ 'ayc 'ec' yet' 'ix 'a jun lugar cha.

¹⁰ Yuj cha, carela x'at 'ix 'at yal 'a win yichmil cha: —Lem, cotn̈ muc'uc. A win winc sch'oxjnac sb'a 'ayn 'a jun 'el, 'ix japx winac, xchi 'ix.

¹¹ Yajn̈ej 'ix cot win Manoa cha. 'Ix c'och yet' 'ix 'a 'aj 'aycn jun winc cha. 'Ix yaln 'ixtc 'a winac: —¿Ach am tic wulnc ach 'ec' paxtinc yet' 'ix wistzil tic 'a jun 'el? xchi. 'Ix ta'w win 'a 'ixtic: —N', an ton tic, xchi.

¹² 'Ix yaln Manoa 'ixtc 'a 'a: —A yic 'oj 'el'choc jun tzo'n̈ a paxti tic, ¿tas wal 'oj cutc qui q'uib'tzan jun 'unn chi 'on̈? ¿Tas yowlal 'oj qui b'o yet' on̈? xchi.

¹³ 'Ix ta'w win yángel Jehová chi 'ixtc 'a 'a: —Syiclc cab' 'ix estl chi tas xwal 'a 'a:

¹⁴ Man̈ yuc' 'ix te yal uva, yet' jun tzo'n̈ xo tas ow yu'xi. May xon sat te uva chi tztac' slon 'ix, matz tac' scomn c'uxn 'ix junc tas man̈ wach'oc. Syiclc cab' 'ix tas xwal 'a 'a, xchi jun ángel cha.

^15-16 Ma'ix yojquej 'el Manoa toto yángel Jehová jun cha, 'ix yaln 'ixtc 'a 'a: —Tzin tew wal 'ayach, comnoc tz'el 'a a c'ojl a can quet' on̈, to 'oj qui b'o a chi junc quelm chiwo, xchi winac. 'Ix ta'w jun ángel chi 'ixtc 'a 'a: —Wach'xam tzin can eyet'oc, palta ma'oj stac' in c'uxn tas tze c'ux cha. A no e chiwo cha, tztac' eya'n no xajmb'al-l 'a Jehová, xchi.

¹⁷ Yuj cha, xyaln pax Manoa 'ixtc 'a jun yángel Jehová cha: —Comnoc tzalcn a b'i 'ayn̈ on̈, sec a yic 'oj 'el'choc jun tas tzalcn tic, 'oj ach qui na coti, xchi.

¹⁸ 'Ix ta'w jun yángel Jehová chi 'ixtc 'a 'a: —¿Tas yuj tze nib'j eyojcoc 'el in b'i cha? An tic, satjub'tac yalx in b'i, xchi.

¹⁹ Xlajw cha, xyi'n cot Manoa no quelm chiwo cha, xyi'n cot pax jun tzo'n̈ 'ixm sat trigo ofrendail. 'Ix ya'n q'ue 'a yib'n̈ jun niwquil q'ue'en, axta xyac' tz'a xajmb'al-l 'a Jehová. Ax jun ángel cha, satjub'tac yilx tas sch'ox yil win yet' yistzil.

²⁰ A yic xq'uen̈ilnjoc sc'a'l jun xajmb'al chi stz'a 'a yib'n̈ yet'l xajmb'al cha, ax xyiln eb', x'och jun yángel Jehová chi 'a scal jun c'ac' cha. 'Ix pax 'a satcha'an̈. A yic xyiln eb' jun cha, 'ix 'em c'umnjoc eb' 'a sat lu'um.

²¹ 'Ixta to b'i'an, 'ix nachj 'el yuj winac to a jun ángel cha, to schecb' Jehová yaji. Ye'n̈j xoj cha, man̈x 'a 'aj sch'ox sb'a jun yángel Jehová chi 'a eb'.

²² 'Ix yaln Manoa chi 'a yistzil 'ixtic: —A ticnec ach wistzil, tecn 'oj qui chami, yujto 'ix quil Dios, xchi.

²³ Palta 'ix ta'w 'ix 'ixtic: —Q'uinloc to tznib'j Jehová on̈ smila', toto 'ixta', ma'ix schaj am qui xajmb'al yet' qui ofrenda xca'c 'a 'a. Toc am 'ay tas sch'ox quil 'icha jun tzo'n̈ tic. May pax am tas xyala to 'oj 'aljoc junc cunnal, xchi 'ix.

²⁴ 'Ix c'och stiempoal yalj yune 'ix 'ix cha, xya'n 'ix sb'ic Sansón. 'Ix q'uib' win 'unn cha, xya'n Jehová swach'c'ojlal 'a yib'an̈.

²⁵ Ax Yespíritu Jehová, 'ix syamn 'och sch'oxn sb'a 'a Sansón yic 'ayc' 'a scamplamento eb' yin̈tl Dan. Ata tzcan jun chi 'a snan̈l chon̈b' Zora yet' Estaol.