Jueces 1 - Chuj San Sebastian Bible

Yamchjnac Adoni-bezec

¹ A yic tox xcham Josué, 'ix sc'anb'n eb' israel 'a Jehová 'ixtic: ¿Mach junc 'in̈tal 'a qui cal tic on̈, tz'at sb'ab'l 'a'c owl yet' eb' cananeo? xchi eb'.

² Xta'w Jehová 'a eb' 'ixtic: A eb' yin̈tl Judá tz'at yac' owl yet' eb' b'ab'el. An 'oj wac' lum lum chi 'a eb', xchi.

³ Yuj cha, ax eb' yin̈tl Judá, 'ix 'awtn jun 'in̈tal eb' yit chon̈b' yet'oc, atn eb' yin̈tl Simeón. Xyaln eb' 'a eb' 'ixtic: Coyc quet' 'a lum lum 'ix 'ajx quico'oc on̈, ca'c owl yet' eb' cananeo. 'Oj lajwc cha, ax qui 'at eyet' on̈, yic tzca'nec owl yet' eb' 'anma a lum e lum 'ix 'ajx eyico'oc, xchi eb'. Yuj cha, 'ix 'at eb' yin̈tl Simeón yet' eb'.

^4-5 'Ix c'och eb' yin̈tl Judá yac' owl yet' eb' cananeo yet' pax eb' ferezeo; ax Jehová 'ix 'a'n eb' chuc chon̈b'al chi 'a yol sc'ab' eb'. Yuj cha, a 'a Bezec ata xcham lajn̈e mil eb' 'anma chi yuj eb', ajun pax win Adoni-bezec yet' eb' x'a'n cob' owl cha.

⁶ Wach'xam a Adoni-bezec 'ix 'at cob' 'eloc, palta x'och tza'n eb' yin̈tl Judá yu'uj, masnto xyamchj yuj eb'. Xlajw cha, stzu'n 'el eb' snun sc'ab', yet' snun yoc.

⁷ Yuj cha, xyaln Adoni-bezec 'ixtic: A 'a yic yaln̈taxi, in tzu'jnac 'el snun sc'ab' yet' snun yoc 70 eb' rey, x'och eb' sic' sc'ajl schib'l woch 'a yaln̈ in mexa. 'Icha wal wutjnac eb' rey cha, 'ixta wal xyutj Dios ya'n spac 'ayn ticnec, xchi. Xlajw cha, xyi'n 'at eb' 'a Jerusalén, axta xchami.

'Emnc Jerusalén yet' Hebrón

⁸ A eb' yin̈tl Judá, 'ix 'och eb' yac' owl 'a Jerusalén. Xlajw cha, xyi'n can 'ec' eb' jun chon̈b' cha, stzu'n can cham eb' smasnil eb' 'anma cajn ta', sn̈usn can pax eb' jun chon̈b' cha.

⁹ Xlajw cha, x'atx eb' yac' owl yet' nan̈lxo eb' cananeo, atn eb' cajn 'a lum jolmctac witz, 'a yol yic Neguev, yet' pax eb' cajn 'a lum pan̈ctac.

¹⁰ Xya'n pax eb' owl yet' eb' cananeo cajn 'a Hebrón, tzcuch Quiriat-arba 'a yic pecti'. 'Ix smiln can cham eb' win Sesai, win Ahimán yet' win Talmai.

'Emnc chon̈b' Debir yuj Otoniel

¹¹ Xlajw cha, 'ix 'at eb' yac' owl yet' eb' cajn 'a chon̈b' Debir, tzcuch Quiriat-sefer 'a yic pecti'.

¹² 'Ay jun win yajl yaj 'a scal eb' yin̈tl Judá, Caleb sb'i winac, xyal win 'ixtic: A junc mach tz'at yac' owl yet' eb' cajn 'a Quiriat-sefer, toto tzyac' ganar yi'n can 'ec' jun chon̈b' cha, 'oj wac' 'ix wisl Acsa yistloc, xchi.

¹³ Ax x'aji, a Otoniel x'a'n ganar yem jun chon̈b' cha. A Otoniel cha, yunnal win Cenaz slajb' 'u'tac Caleb. Yuj cha, xya'n Caleb 'ix yisl chi yistloc winac.

¹⁴ Ax yic wan s'at 'ix yet' winac, 'ix yaln win 'a 'ix to tzc'an 'ix juncxo slum 'a smam cha. Yuj cha, x'emt 'ix 'a yib'n̈ no sb'uru 'aj 'ay q'ue'i, 'ix sc'anb'n win Caleb 'ixtc 'a 'ix: —¿Tas tzach 'i'ni? xchi win smam 'ix cha.

¹⁵ Xta'w 'ix 'a win 'ixtic: Comnoc tz'el wal 'a a c'ojol, tza'cn junc a siylab' 'ayin, ya' sb'a a'jnacx can lum Neguev 'ayin, a cab' pax lum lum 'ay a a 'a sat, a lum tzac' 'ayin, xchi 'ix. Yuj cha xya'n Caleb junx lum lum 'a 'ix, lum 'aj 'ay a a 'a sjolmtac q'ue'i, yet' 'a yoctc 'emta.

A jun tzo'n̈ chon̈b' 'emnc*r* yuj Judá, yet' yuj Benjamín

¹⁶ A eb' yin̈tl Hobab win quenita, sn̈i Moisés, 'ix 'el eb' 'a jun schon̈b' 'aj til wal te palma, atn Jericó. 'Ix q'ue'ch eb' yet' eb' yin̈tl Judá, 'ix c'och cajn eb' 'a scal eb' 'anma cajn 'ec' 'a lum cusltac lum 'ay 'a yol yic Judá, atn lum 'ay 'a Neguev 'a stz'ey Arad.

¹⁷ 'Ixta 'ix 'aj s'atcn eb' yin̈tl Judá, yet' eb' yin̈tl Simeón, 'ix ya'n eb' owl yet' eb' cananeo cajn 'a Sefat. C'uxn satl eb' jun chon̈b' chi smasnil. Yuj cha, xya'n can eb' scuch jun chon̈b' chi Horma.

¹⁸ Palta ma'ix stac' yi'n 'ec' eb' yin̈tl Judá chi chon̈b' Gaza, Ascalón, Ecrón, yet' smasnil lum lum 'ay 'a yol yic junjn chon̈b' cha.

¹⁹ A Jehová, a 'ayc' yet' eb' yin̈tl Judá, yuj cha, sta'n yi'n 'ec' eb' lum jolmctac witz, palta ma'ix stac' spechx 'el eb' cajn 'a lum pan̈n chi yuj eb', yujto a eb' cha, 'ay sq'uen caruaje eb' yic owal.

²⁰ 'Ix ya'n eb' lum Hebrón 'a Caleb, 'icha yaj yaln can Moisés. Ax Caleb chi 'ix pechn 'el eb' 'oxwn̈ yin̈tl can yunnal win Anac.

²¹ Palta ax eb' yin̈tl Benjamín, ma'ix stac' spechx 'el eb' jebuseo cajn 'ec' 'a Jerusalén yuj eb'. Yuj cha, a eb' jebuseo yet' eb' yin̈tl Benjamín, junn̈j xcan cajn eb' 'a Jerusalén cha.

'Emnc Bet-el yuj eb' yin̈tl José

^22-23 'Ixta pax eb' yin̈tl José, 'ix 'at eb' yac' owl 'a Bet-el, atn jun chon̈b' chi Luz sb'i 'a yic pecti'. A yic mantzac 'och owl cha, xya'n 'at eb' yilmal jun lum cha yic tz'at smaclnoc eb' yila'. A Jehová a xcolwj yet' eb'.

²⁴ Ax eb' 'ilm lum cha, 'ix yiln eb' yelt jun winc 'a sti chon̈b' cha, xyaln eb' 'ixtc 'a 'a: Tzon̈ tew 'ayach, ch'ox 'ayon̈ 'ajtil wach' coch 'a yol chon̈b' tic, may 'oj ach cutoc, xchi eb'.

²⁵ Ax jun winc chi xch'oxn 'a eb' 'ajtil wach' yoch eb' 'a yol chon̈b' cha. Yuj cha, 'ix cot eb' soldado yic eb' yin̈tl José yac' owl yet' jun chon̈b' cha, ax smasnil eb' 'anma cajn ta', c'uxn stzu'x can cham eb' yuj eb'. Ax jun sch'oxn b'e chi 'a eb', 'ix yac' eb' niwnc'ojlal 'a 'a, yet' 'a smasnil eb' cajn 'a yol yatut.

²⁶ A jun winc cha, 'ix 'atcn 'a slum eb' hitita, 'ix sb'on chan̈ jun chon̈b' ta'. 'Ix ya'n can eb' sb'ic Luz.

Jun tzo'n̈ chon̈b' man̈ 'emncoc

²⁷ Eb' 'anma ma'ix techj spechn 'el eb' yin̈tl Manasés: atn eb' 'aj Bet-seán, eb' 'aj Taanac, eb' 'aj Dor, eb' 'aj Ibleam, eb' 'aj Meguido, yet' eb' 'ay 'a yaldeail jun tzo'n̈ chon̈b' cha. A eb' cananeo 'a jun tzo'n̈ chon̈b' cha 'ix ste'wtzej sb'a eb' 'a owal, yuj cha 'ix can cajn eb' ta'.

²⁸ Palta a yic caw xjelnb'i eb' yin̈tl Manasés cha, 'ix 'ajx pural eb' cananeo chi yoch munljoc 'a eb', ma'ix pechx 'el eb' yuj eb'.

²⁹ An̈jtona eb' yin̈tl Efraín, ma'ix stac' spechx 'el eb' cananeo cajn 'a Guezer yuj eb', yuj cha, 'ix can cajn pax eb' cananeo chi 'a scal eb'.

³⁰ An̈jtona pax eb' yin̈tl Zabulón, ma'ix stac' spechx 'el eb' cananeo cajn 'a Quitrón yuj eb', yet' pax eb' cajn 'a Naalal, 'ix can cajn eb' cananeo chi 'a scal eb', 'ix 'ajx pural eb' cananeo yoch munljoc 'a eb'.

^31-32 An̈jtona pax eb' yin̈tl Aser, ma'ix stac' spechx 'el eb' cananeo cajn 'a Aco yuj eb', eb' cajn 'a Sidón, 'a Ahlab, 'a Aczib, 'a Helba, 'a Afec yet' 'a Rehob. 'Ix can cajn eb' yin̈tl Aser 'a scal eb'.

³³ An̈jtona eb' yin̈tl Neftalí, ma'ix stac' spechx 'el eb' cananeo cajn 'a Bet-semes yuj eb', yet' eb' cajn 'ec' 'a Bet-anat. 'Ix can cajn eb' 'a scal eb' cananeo cha, 'ix 'ajx pural eb' cajn 'a Bet-semes yet' eb' cajn 'a Bet-anat yoch munljoc 'a eb' israel.

³⁴ A eb' amorreo cajn 'a lum pan̈ctac, ma'ix chax 'och eb' yin̈tl Dan yuj eb'. 'Ix pechx eb' yuj eb' masnto xc'ochcn eb' 'a lum jolmctac witz cha.

³⁵ 'Ixta 'ix 'aj scan cajn eb' amorreo chi 'a lum jolm witz tzcuch Heres, 'a Ajalón, yet' 'a Saalbim, palta a wal yic xyi'n eb' yin̈tl José chi yip, 'ix ya'n pural eb' yoch eb' amorreo chi munljoc 'a 'a.

³⁶ A smon̈jonal slum eb' amorreo cha, tz'atn̈j 'a spa'nil lum Acrabim, masnto 'a lum Sela, tz'atn̈j 'a yib'n̈ q'ue cha.