San Judas 1 - Chuj San Sebastian Bible

Tz'el yich scarta Judas

¹ An tic Judas in, ya'mal in servil Jesucristo. Wu'tac in b'a yet' Jacobo. Tic tzin tz'ib'j 'at jun in carta tic 'ayx ax 'awtb'ilx xo 'el yuj qui Mam Dios. Chamc'ojlb'ilx xo yu'uj. Tan̈b'ilx xo yuj Jesucristo.

² 'O'ch cab' sc'ojl Dios 'ayex. Ya' cab' sjunc'ojlal yet' schamc'ojlal 'ayx ta'.

A eb' maysch'olnil 'a scal eb' creyente

³ Ex chamc'ojlb'il wu'uj, caw xin nib'j xwa't junc in carta 'ayex, yic tzwaln 'at 'ayx yuj qui colnb'ilec. Palta ax ticnec, 'ay jun caw yowlal 'oj walb't 'ayex. Tzin tew 'at 'ayex, caw tzeyac' eyip, sec may tz'aj sjuw jun tzo'n̈ cuynb'il 'aj tzca'c 'och qui c'ojol. Yujto an̈ec yic on̈c xo Dios tic, a 'ayn̈ec ya'jnac can jun tzo'n̈ cuynb'il tic 'a jun 'ejmn̈ej.

⁴ Tzwalb't jun tzo'n̈ tic 'ayex, yujto 'ay eb' x'och 'a qui calc 'a c'ultaquil. Caw man̈ wach'c eb', yujto tzyal eb' 'ixtic: Colchjnacn̈ec xo yuj swach'c'ojlal Dios. Yuj cha, tzta'n̈j qui b'onec maysch'olnil 'icha tzqui nib'ej, xchi cob' eb'. An̈ec xo tic, cojxn Jesucristo tzon̈ 'a'nec mandar, cojxn Yajl yaj 'ayn̈ec. Palta ax eb' cha, caw tzpatquilj can 'el eb'. Tz'ib'b'il can yab'xil eb' 'a Ch'an̈ Un̈ 'a pecti', chajtlto yowlal 'oj 'atcn eb' 'a scal yailal.

⁵ A jun 'oj walb't 'ayx tic, eyojc xoni. Palta tzin nib'j tze na cot jac wet'oc. A eb' wit israelal 'a pecti', colchjnac 'elt eb' smasnil 'a Egipto yuj Cajlilec. Palta xlajw cha, satcn 'el nan̈l eb' ma'ix ya'ch sc'ojl 'a 'a.

⁶ An̈jtona', tze nan cot tas yaj jun tzo'n̈ eb' ángel, atn eb' yijnac 'el sb'a 'a yopiso, yactn can eb' yet'ul. Jalxnac can 'och q'uen cadena 'a eb' 'a jun 'ejmn̈ej. A ticnec, preso yaj eb' 'a q'uic'q'uinl yuj Dios. 'Ixta yajcn eb', masnto 'oj jawc jun c'u caw niwn yel'chi, atta 'oj b'eyc'ojlaxc eb'.

⁷ An̈jtona', tze nan cot tas 'ajnc eb' 'aj Sodoma yet' eb' 'aj Gomorra, yet' eb' 'a jun tzo'n̈ xo chon̈b' 'a sla'nil. 'Icha yutjnac sb'a eb' ángel cha, 'ixta yutjnac pax sb'a eb'. Caw ya'jnac 'at sb'a eb' 'a scal 'ajmulal. An̈jtona sb'ojnac eb' jun tzo'n̈ xo 'ajmulal yet' yit wincal. A eb' cha, ch'oxnb'il yaj eb' 'a smasnil 'anma ticnec, yujto wan yab'n eb' syal 'a scal c'ac' 'a jun 'ejmn̈ej.

⁸ Palta ax eb' 'aych 'a qui calc ticnec, ton̈j tzcob' sna eb', to niwn yel'ch eb'. Yuj cha, caw tzya't eb' sniwnal 'a scal maysch'olnil, may jac yel'ch spoder Cajlilec 'a sat eb'. Ton̈j tzb'uchwj pax eb' 'a jun tzo'n̈ xo caw niwn yel'ch 'a satcha'an̈.

⁹ Tzqui nacc cot jun sat ángel Miguel sb'i, ya'jnac owl yet' win diablo 'a jun 'el, yic sten sb'a yet' win yuj sniwnal Moisés. A Miguel cha, wach'xam caw niwn spoder, palta ma'ix ste'wtzej sb'a sb'uchwj 'a win diablo cha. Ma'ix yal smul winac. Cojn 'ixtc xyutj yaln 'a winac: Comnoc a Dios 'oj a tumni, schin̈j 'a winac.

¹⁰ Ax eb' tic, ton̈j tzcomn b'uchwj eb' 'a junc man̈ yojcoc. 'Ay jun tzo'n̈ tas yojc eb', atn tas yojc xon junc noc' may snab'en. A 'a jun tzo'n̈ tic tzwach' 'a'j juwc 'el sb'a eb'.

¹¹ Caw 'oltac wal eb', yujto lajnn̈ej tzyutj eb' sb'eyb'al 'icha win Caín. Yujn̈ej tumin, tzchon̈n 'at sb'a eb', 'icha yutjnac sb'a win Balaam. 'Icha win Coré, milxnac chamoc, yujto cob' ya'jnac owl yet' Dios, 'ixta 'oj 'aj eb' smilx cham jun xo.

¹² A yic tzeya'n mol wa'el, tze ch'oxn e chamc'ojlal, caw tzeyac' e q'uixwloc yuj eb'. Yujto ton̈j tzcomn 'och eb' wac eyet'oc, may jac xiwc'ojlal eb'. 'Icha junc tan̈m calnelu cojxn wal tzya'ilj sb'a, 'ixta eb'. 'Icha junc tacn̈ 'asn ton̈j tzb'eyc' yuj 'ic', 'ixta pax eb'. Lajn eb' 'icha junc te may xon 'aj tzyac' junc sat. Ton̈j tztacj 'eli, tzchami. Tzlajw cha, c'uxn tz'ijx q'uet yet' sch'an̈lyib' smasnil, tzwach' satli.

¹³ 'Icha wal tzyac' yib'n̈ a mar, caw ow sq'ue wan chel-loc, 'ixta 'eb', yujto toxn matz tac' stenx 'och wan eb' 'a maysch'olnil. 'Icha swom a a tzcan 'a sti', til wal tastc maysch'olnil 'aych 'a scal, 'ixta eb' yuj jun tzo'n̈ q'uixwelal chi tzb'o cha. Q'uinloc 'ay junc c'anal tzsat 'a sb'e, 'ixta eb'. Yowlal 'oj c'och eb' 'a scal jun niwquil q'uic'q'uinal. Ata 'oj can eb' 'a jun 'ejmn̈ej.

¹⁴ A win Enoc, yucl xo yin̈tl Adán yajcn winac. A Dios 'a'jnac yalcn 'el win yab'xil eb' 'ay 'a qui calc tic. Yic yaln win 'ixtic: 'Ab'ec. A yic 'oj jawc Cajlilec, man̈ jantcoc eb' yic 'oj jawc yet'oc.

¹⁵ Atta 'oj sb'eyc'ojloc smasnil 'anma'. Jantcn̈ej eb' maysch'olnil, 'oj ya'ch yailal 'a yib'n̈ eb' yuj smul, yujto maysch'olnil eb'. A eb' tu tzaln 'a spatc Cajlilc cha, eb' caw maysch'olnil snab'en, 'oj ya'ch pax yailal 'a yib'n̈ eb', xchi win Enoc cha.

¹⁶ A eb' 'ay 'a qui calc tic, chichnc'ojlaln̈ej yaj eb'. Ton̈j tzyal eb' maysch'olnil 'a spatc junc xo. An̈j 'a jun tzo'n̈ tas tznib'j 'och eb' yet' sniwnal, an̈jta tzya'ch eb' snab'en. Caw ton̈j jeln tzcob' yutc eb' spaxtini. Tzann̈j junc mach, tzcob' stz'ac eb' yal wach'il, yujn̈ej to tznib'j eb' tzyac' ganar tas 'a spatic.

Checnb'il 'a eb' yic xo Dios

¹⁷ Ax xo chamc'ojlb'ilx wu'uj, tzlaj e na cot jun tzo'n̈ 'oj walb't 'ayx tic. Yictax pecti', a eb' schecb' Cajlil Jesucristo,

¹⁸ yaljnac can eb' 'ixtic: A 'a jun slajb' tiempoal, 'ay eb' 'oj comn b'uchwjoc. 'Oj sb'eylb'oc eb' jun tzo'n̈ maysch'olnil tznib'j 'ochi, xchi eb'.

¹⁹ Yuj eb' cha, 'oj spojl sb'a eb' yic xo Dios. An̈j jun tzo'n̈ tas tznib'j 'och eb' yet' sniwnal 'aj tzya'ch snab'en. May Yespíritu Dios 'aych 'a eb'.

²⁰ Palta ax xo chamc'ojlb'ilx wu'uj, caw tze wach' te'wtzej e b'a 'a jun cuynb'il 'aj 'aych e c'ojol, yujto cojxn jun tic yic Dios. Caw tzex leslwi yet' spoder Yespíritu.

²¹ Caw tzeyil wal e b'a, sec ma'oj eyel 'a schamc'ojlal Dios. Qui tan̈wquec sjaw jun c'u, yic 'oj wach' 'o'ch sc'ojl Cajlil Jesucristo 'ayn̈ec, ax ya'n qui q'uinlec 'a jun 'ejmn̈ej.

²² A eb' chab'c'ojlal yaji, qui montquec eb', sec 'oj te'nb'oc pax eb'.

²³ Yet' pax eb' 'icha to 'ay't 'a scal c'ac', qui colc 'elt eb'. 'Icha to wan qui to'nec can 'elt eb' 'a scal c'ac' cha. 'Ay pax jun tzo'n̈ xo eb', yowlal tz'o'ch qui c'ojlec 'a eb'. Palta xiw coyc cab' pax yuj eb', yujto 'ay smay tzon̈ juwc 'el yuj sb'eyb'al eb'. Ax jun tzo'n̈ maysch'olnil chi tzb'o eb' cha, caw qui yajc can 'el smasnil, 'icha tzqui yajc 'el junc pichl caw b'i'chtac.

Tzalx wach' paxti 'a Dios

^24-25 Yuj Cajlil Jesucristo tzcalnec wach' paxti 'a Dios qui Colmalec. Cojn Dios tztac' on̈ stan̈wniec yic wach' matz on̈ telwec, sec may jac qui paltailec, ax ya'n qui tzaljc'ojlalec 'a yojltac 'a 'aj 'ay swach'il. A Dios smoj yalx yu'uj to caw niwn swach'il, niwn yel'chi, caw 'ay spoder, cojn Yajl yaj 'a smasnil tas. Smoj yalx 'ixta 'a 'a, yujto 'ixta xon yaji yic mantzac b'o yolyib'n̈q'uinl tic, 'ixta yaj ticnec yet' pax 'a smasnil tiempo. B'o cab' 'ixta'.