Josué 8 - Chuj San Sebastian Bible

'Ix lajw 'el chon̈b' Hai

¹ 'Ix yaln pax Jehová 'ixtc 'a Josué: Man̈ ach xiwoc, man̈ ach 'och 'il. 'Ij 'at smasnil eb' a soldado tic, tz'at a'nc owl 'a chon̈b' Hai. An 'oj wac' jun sreyl Hai chi 'a yol a c'ab', eb' 'anma', schon̈b' eb' yet' smasnil slum eb'.

² 'Icha wal xeyutj chon̈b' Jericó yet' sreyal, 'ixta pax tzeyutj chon̈b' Hai yet' sreyal. Ax ticnec, a tas 'ay 'a jun chon̈b' cha, tztac' cab' scan 'ayx yet' smasnil scajb'en noc' eb' 'anma cha. Wach' tzotj a'n 'och stzol-l jun owl cha, tzac' sc'ub'c 'el sb'a nan̈loc eb' soldado chi 'a spatc 'el chon̈b' cha, xchi Dios.

³ 'Ix ya'n lista sb'a Josué yet' eb' soldado yic tz'at eb' yac' owl 'a chon̈b' Hai. 'Ix si'n 'el lajn̈schawinc mil eb' soldado, 'ix yalni to tz'at eb' 'a 'ac'wl cha.

⁴ 'Ix yaln 'a eb' 'ixtic: 'Ab'c tas 'oj wala': 'Ixquec, tz'at e c'ub'nc 'el e b'a 'a spatquil 'at jun chon̈b' cha. La'n tzex cani, lista tzex 'aji yic 'oj 'och owl cha.

⁵ An xo 'oj in c'och yet' smasnil eb' 'anma tic 'a sti 'elt jun chon̈b' cha. A yic 'oj 'eltc eb' 'anma chi yac' owl quet' on̈, ax qui 'at 'elc yuj eb' on̈. 'Icha on̈ yutjec eb' 'a b'ab'l cha.

⁶ 'Oj 'och tza'n eb' cuj on̈, yic 'oj on̈ spechnc eb' 'a schon̈b' cha, yujto 'oj sna eb', to tzyac' ganar eb' on̈ spechnec 'at 'eloc.

⁷ A yic tzeyiln qui at 'elc on̈, tzex 'elt mu'c 'aj tze c'ub'j 'el e b'a cha. Tzex 'och 'a yol chon̈b' chi muc'uc, yujto a Jehová qui Diosalec, a tz'a'n jun chon̈b' chi 'a yol qui c'ab'ec.

⁸ A yic tox ex 'och 'a jun chon̈b' cha, yajn̈ej tzeya'n 'och sc'aq'uil, 'icha wal xyutj Jehová yalni. Yowlal tzeyiclj tas tzwal tic, xchi Josué 'a eb' soldado cha.

⁹ Xlajw cha, schecn 'at Josué eb' soldado cha, 'ix c'och eb' sc'ub'c 'el sb'a 'a snan̈l chon̈b' Bet-el yet' chon̈b' Hai. Ata xcan eb' 'a stojlal 'aj tz'em c'u 'a Hai cha. Ya sb'a cha, 'ix to can Josué junx 'ac'wl 'a camplamento.

¹⁰ Ax 'a junx c'u cha, caw 'ix seb' q'ue wa'an, 'ix ya'n lista eb' soldado tz'at yet'oc. 'Ix b'ab'lj yuj eb', yet' eb' yichm wincal chon̈ab', 'ix c'och eb' yac' owl 'a chon̈b' Hai.

¹¹ Smasnil eb' soldado ajun yet' Josué cha, xc'och eb' 'a yojltac cot jun chon̈b' cha. Ax 'a stojlal norte ata sb'o chan̈ eb' smantiado 'a jun niwquil 'a'lic. 'Ix can jun 'a'lic chi 'a snan̈l eb' yet' jun chon̈b' cha.

¹² 'Ix ya'n Josué sc'ub'c 'el sb'a am junc o'e mil eb' soldado chi 'a snan̈l Bet-el yet' Hai, 'a stojlal 'aj tz'em c'u 'a jun chon̈b' cha.

¹³ 'Ixta 'ix yutj spojn can snan̈l eb' soldado cha. Chac'aj 'ix yutj can 'el eb', junc'aj eb' xcan 'a stojlal 'aj tz'em c'u, ax junc'aj eb' xcan yet' smantiado 'a stojlal norte. Ax 'a jun 'ac'wl cha, 'ix b'ab'lj Josué, 'ix c'och 'a spacl jun 'a'lic cha.

¹⁴ Ax xyiln sb'a win sreyl chon̈b' Hai cha, to 'ay tas wan sc'och 'a 'a. Yuj cha, caw 'ix seb' q'ue wa'an, 'ix ya'n lista smasnil soldado. 'Ix 'elt yac' owl yet' eb' israel 'a lum 'a'lic tz'emch 'a sti a Jordán. Man̈ yojcoc eb' toto 'ay pax nan̈l xo eb' soldado chi c'ub'b'il 'el 'a spatquil 'at jun chon̈b' cha.

¹⁵ Ax Josué, 'icha to xiw yuj eb', 'ixta xyutj sb'a 'a eb'. 'Ix 'at 'elc yet' eb' soldado yuj eb' 'aj chon̈b' Hai. 'Ix 'at eb' 'a sb'el lum cusltac lu'um.

¹⁶ Smasnil eb' soldado 'a jun chon̈b' cha, 'ix 'ajx jun ley 'a eb', to smasnil eb' tz'at pechnc Josué yet' eb' soldado cha. Ax x'aji, yel xo caw najt 'ix 'el eb' 'a schon̈b' cha.

¹⁷ Man̈x 'a xon wal junc winc chi xcan 'a yol chon̈b' Hai yet' 'a chon̈b' Bet-el; c'uxn 'ix 'elt eb' spech eb' israel cha. Yuj wal snib'n eb' spech eb', 'ix can jacn schon̈b' eb' cha, man̈x 'a mach xcan tan̈wnoc.

¹⁸ Xlajw cha, xyaln Jehová 'a Josué 'ixtic: Ch'oxb't q'uen 'a lanza et' chi 'a stojlal chon̈b' Hai, yujto an tzwac' jun chon̈b' chi 'a yol a c'ab', xchi. 'Ix sch'oxn 'at Josué q'uen slanza chi 'a stojlal jun chon̈b' cha.

¹⁹ Ax eb' soldado c'ub'b'il 'el cha, 'ix 'elt eb' 'a yet'l chi muc'uc. 'Ix 'och eb' 'a jun chon̈b' cha, yajn̈ej 'ix ya'n 'och eb' sc'aq'uil.

²⁰ Ax yic xmeltzj 'at q'ueln eb' winc yic Hai chi 'a spatquil, 'ix yiln eb' to wan sq'ue wan tocc'oc stab'l schon̈b' eb' stz'a'i, xq'ue'ch jun tab' chi 'a satcha'an̈. Man̈x 'a 'aj wach' scoln sb'a eb', ax eb' israel x'at 'elc 'a lum cusltac lum cha, 'ix meltzj eb' yac' owl chi yet' eb'.

²¹ Ax xyiln Josué yet' eb' soldado to tocq'ui sq'ue wan stab'l jun chon̈b' chi stz'a yuj eb' soldado c'ub'b'il 'el cha, 'ix yojcan 'eli, to tox 'ix 'och eb' soldado 'a yol chon̈b' cha. 'Ix meltzj eb' yac' owl yet' eb' 'aj Hai cha.

²² A eb' x'och 'a yol chon̈b' cha, 'ix 'elt paxt eb'. 'Ix cot eb' 'a spatc eb' 'aj Hai cha, yuj cha 'ix can eb' 'a snan̈l chac'aj eb' soldado israel. Man̈x 'a 'aj wach' scoln sb'a eb'. C'uxn 'ix cham eb' smasnil yuj eb' israel cha.

²³ Cojxn win sreyl Hai chi ma'ix smil eb', 'ix yij 'at eb' win 'a yojltac Josué.

²⁴ Xlajw schamcn smasnil eb' 'aj Hai cha, atn eb' xpechn eb' israel cha, 'ix meltzj pax eb' israel 'a chon̈b' Hai. 'Ix swach' miln eb' smasnil eb' 'anma xcan 'a yol chon̈b' cha.

²⁵ A 'a jun c'u cha, lajchwe mil sb'isl eb' 'aj Hai chi 'ix chami, eb' winac yet' eb' 'ix 'ix.

²⁶ May xon jac 'iljelal yuj Josué yet' eb' soldado cha, masnto xlajw scham smasnil eb' 'aj chon̈b' cha.

²⁷ Ax eb' israel cha, 'ix yi'n 'at eb' no cajb'en noc' chi yico'oc, yet' smasnil tas 'ay 'a eb' 'anma 'a jun chon̈b' cha, 'icha 'ix yutj Jehová yaln 'a Josué.

²⁸ 'Ix ya'n Josué n̈usxoc chon̈b' Hai. 'Ix lan̈chj 'ejm smasnil n̈a, jun b'uln̈ xoj x'ajcni, cojxn yet'l chi checl x'ajcni.

²⁹ Ax Josué, 'ix ya'n milxoc win sreyl Hai, xya'n t'un̈xoc q'ue sniwnal win 'a sc'ab' jun niwquil te'. T'un̈n q'ue sniwnal masnto x'em c'u. Ax yic wan sq'uic'b'i 'ix ya'n Josué jiyxoc 'emt winac. Ax 'a yol sti spuertail schon̈b' win cha, ata x'at can sniwnal win yuj eb' israel cha. 'Ix si'n can q'ue b'uln eb' q'uen q'uen 'a yib'n̈ winac, caw niwquil x'ajcn chan̈ b'uln q'ue'en.

'Awtxnac ley 'a yich witz Ebal

³⁰ Xlajw cha, ax 'a yich lum witz Ebal, ata 'ix yac' Josué b'o jun yet'l xajmb'al yic Jehová, atn sDiosal Israel.

³¹ 'Ix sb'o 'icha yaj yaln can Moisés 'a eb' yit israelal, 'icha pax yajcn 'a ch'an̈ libro yic ley 'a 'aj tzyal 'ixtic: A q'uen q'uen man̈ tzeyb'iloc, a q'uen tzc'anx 'a junc yet'l xajmb'al, xchi. A 'a yib'n̈ jun yet'l xajmb'al cha, ata 'ix laj yac'q'ue eb' xajmb'al to tz'a smasnil yet' xajmb'al yic junc'ojlal.

³² Sat wal eb' yit chon̈b' cha, 'ix stz'ib'n can 'och Josué jun tzo'n̈ ley 'a eb' q'uen q'uen cha, atn jun tzo'n̈ 'ac'b'il can yuj Moisés.

³³ Ax eb' israel chi smasnil, eb' chuc chon̈b'al cajn 'a scal eb', eb' yichm wincal chon̈ab', eb' yajl yaj 'a scal eb' soldado, yet' eb' yajl tzb'on yaj eb' 'anma', 'ix spoj eb' snan̈al; nan̈l eb' 'ix can 'a yich witz Gerizim, ax nan̈l xo eb' xcan 'a yich witz Ebal. 'Ix cot q'ueln eb' schac'ajil 'a eb' ya'mal 'och sti eb' 'anma 'a Dios, atn eb' yin̈tl can Leví, eb' 'et'jnac te scaxail strato Jehová. 'Ixta 'ix 'aj yel'ch tas yaljnac can Moisés, atn win schecb' Jehová yuj tas tz'aj yalx wach' paxti 'a yib'n̈ eb' israel.

³⁴ Xlajw cha, xyawtn Josué chi smasnil jun tzo'n̈ ley tzib'b'il can cha, atn jun tzo'n̈ ley yic yaxilal yet' jun tzo'n̈ yic catab'.

³⁵ C'uxn 'ix yawtj Josué jun tzo'n̈ ley chi 'a scal eb' yit chon̈b' cha; x'awtx yab' eb' 'ix 'ix, eb' 'unin yet' pax eb' chuc schon̈b' cajn 'a scal eb' cha.