Josué 7 - Chuj San Sebastian Bible

Smul win Acán

¹ Palta 'ay jun win tzcuch Acán, yin̈tl can Judá, yunnal win Carmi, yixchicn Zabdi, schab'l 'ichicn Zera. 'Ix yij 'at win jun tzo'n̈ tas to 'ay yowlal yijx 'ati, atn jun tzo'n̈ to tz'ajx lajwoc. Ax x'aji, 'ix locchj c'och smasnil eb' yin̈tl Israel yab'n syal yuj smul jun winc cha, yujto 'ix yij 'at jun tzo'n̈ tas to 'ay yowlal, yuj cha, caw wal 'ix cot yowl Jehová 'a yib'n̈ eb' chon̈ab'.

'Ajxnac ganar eb' israel 'a Hai

² A yic 'ayc' Josué yet' eb' yit chon̈b' 'a Jericó, 'ix schecn 'at jaywn̈ eb' winc smaclc yil chon̈b' Hai, jun 'ay 'a stojlal 'aj tzq'uel c'u 'a chon̈b' Bet-el, 'a sla'nil pax chon̈b' Bet-avén. 'Ix yaln 'a ewinac, to tz'atq'ue ewin smaclc yil jun lugar cha. Yuj cha, 'ix 'at ewinac.

³ Ax yic xmeltzj ewinac, 'ix yaln eb' 'a Josué 'ixtic: Matz 'at cab' eb' 'anma tic yac' owl smasnil 'a chon̈b' Hai cha. Nab'an̈ej tz'at yixtc sb'a eb', yujto man̈ niwnoc eb' tan̈wjnac jun chon̈b' cha. Colb' cab' s'at chab'oc mil mto 'oxe'oc mil eb' soldado tic, xchi eb'.

⁴ Yuj cha, cojn am junc 'oxe mil eb' soldado yic Israel chi 'ix 'at yac' owl yet' eb' 'aj chon̈b' Hai. Palta ax 'ix 'aji, ma'ix techj yuj eb' soldado cha, 'ix 'at eb' 'elc 'a eb' 'aj lugar cha.

⁵ 'Ix pechx eb' yuj ewin 'a 'aj 'ay spuertail chon̈b' cha, masnto 'a jun lugar 'a 'aj tz'ijx 'elt q'uen q'uen tzeyxi. Ax 'a spa'nil 'ejm jun chon̈b' cha, ata xmilx 36 eb' soldado israel cha. Yuj cha, 'ix jaw schab'c'ojlal eb' israel, caw tzsicb' 'el eb' tzyab'i.

⁶ Yuj cha, 'ix stziln 'el Josué spichl yet' eb' yichm wincal chon̈ab', xlaj sjopn q'ue eb' pococ 'a sjolom yic tzch'oxn 'el eb' scusc'ojlal cha. Xlajw cha, 'ix 'em cumn eb' 'a yojltac 'elt scaxail strato Jehová masnto x'emch quiln sat eb' 'a lu'um, 'ixtan̈ej yaj eb' masnto 'ix 'em c'u.

⁷ Ax Josué 'ix yaln 'ixtic. —¡'Ay, Mamin Jehová! ¿Tas wal yuj 'ix a chaj 'e't eb' chon̈b' tic 'a yol a Jordán? ¿Tom yuj on̈ satn 'el eb' amorreo, yuj cha, on̈ e'n 'e't 'a jun lugar tic on̈? Comnoc on̈ cancn 'a sc'axpil 'ec' sti a Jordán cha.

⁸ ¡'Ay, Mamin! ¿Tas wal to 'oj wutc walni, a ticnec a eb' wit chon̈b' tic, 'ix 'at eb' 'elc 'a eb' 'ajc'ojl cha?

⁹ A eb' cananeo yet' smasnil eb' cajn 'a jun tzo'n̈ lugar tic, 'oj yab' eb' speclal tas on̈ 'aji, 'oj syam sb'a eb' ax on̈ satn can 'el eb' on̈, man̈x 'a 'aj 'oj qui b'inax 'a sat lum lum tic on̈. Ach xo tic, tu 'oj yal eb' 'anma chi 'a a patic, xchi Josué.

¹⁰ 'Ix ta'w Jehová 'ix yaln 'ixtic: Lem, q'uen̈ wa'an, ¿tas tza b'o 'ejm lachn 'a sat lum cha?

¹¹ A eb' et chon̈b' tic to 'ix 'och smul eb', yujto ma'ix syiclj eb' tas xwala. 'Ix yel'j cot eb' tas 'ix wal to tzsatli, 'ix sc'ultac 'ij cot eb', sc'ub'n 'el eb' 'a yet'l 'aj molb'il tas yu'uj.

¹² Yuj cha, matz tac' ste'wtzan sb'a eb' 'a yojltac eb' 'ajc'ojl cha. To smoj wal satl eb', 'oj 'atx eb' 'elc yuj eb' 'ajc'ojl cha. Toto ma'oj e satl jun tzo'n̈ chi 'a e cal, atn jun tzo'n̈ xwal to yowlal tzsatx 'eli, 'oj wi'l in b'a 'a e cal, man̈x 'oj in colwj eyet'oc.

¹³ Q'uen̈ wa'an, al 'a eb' chon̈b' tic to tzyac' lista sb'a eb' yic tzjaw eb' 'a wojltac q'uic'an, yujto an Jehová e Diosal in, an tzwal 'ixtic: Ex yin̈tl Israel, a 'a e cal tic, 'ay tas xeyij cot 'a tas xwal to tzsatli. Ya sb'a mantzac eyij 'el jun tzo'n̈ chi 'a e cal, matz tac' e te'wtzan e b'a 'a yojltac eb' 'ajc'ojl yajch 'ayex.

¹⁴ A 'a sq'uin̈b'il q'uic'an, junjn 'in̈tal ex tzex jaw 'a wojltac, wul e ch'ox e b'a. Ax 'a e cal, ata 'oj in sic' 'elt junc 'in̈tal ex. A 'a junc 'in̈tal cha, ata 'oj in sic' 'elt junc macan̈. Ax 'a scal junc macn̈ cha, ata 'oj in sic' 'elt jun c'ajoc eb' yican sb'a. A eb' cha, junjnal 'oj wul sch'ox sb'a eb' winc chi 'a wojltac, ax 'a scal eb' winc cha, ata 'oj in sic' 'elt mach 'ay smul cha.

¹⁵ A mach tz'ilchj yet' tas 'ayc' 'a cha, atn jun tzo'n̈ xwal to tzsatli, a jun cha, milx cab' chamoc, tzlajw cha, tz'ajx tz'a yet' yunnal yet' pax smasnil tas 'ay 'a 'a, yujto 'ix yij 'och tas maysch'olnil 'a scal yit chon̈ab', ma'ix syiclj strato wet'oc, xchi Jehová, xa chi, xchi Dios.

Schamlil win Acán

¹⁶ Ax 'a junx c'u cha, 'ix seb' q'ue wan Josué, 'ix yaln 'a eb' 'anma cha, to yamn tzcan junjn 'in̈tal eb' 'a stz'ey. Yajn̈ej 'ix sch'oxn 'och Jehová eb' yin̈tl Judá.

¹⁷ Ax Josué 'ix yalni to macq'uixtac sch'oxn sb'a eb' yin̈tl Judá cha, ax 'a scal eb', ata x'ijx 'elt jun macn̈ eb' yic Zera. A 'a scal eb' cha, ata 'ix 'ijx 'elt junc'aj eb' yican sb'a, atn eb' yic Zabdí.

¹⁸ Junjn eb' winc cha 'ix jaw eb' 'a yojltac Josué. A 'a scal ewin cha, ata x'elt can win Acán, win yunnal Carmi, yixchicn Zabdi, schab'l 'ichicn Zera 'a eb' yin̈tl Judá.

¹⁹ Xlajw cha, xyaln Josué 'a win Acán chi 'ixtic: —Ach 'un, 'a sat Jehová qui Diosalec an̈ israel on̈c tic, tza jacn a ti'oc, tas wal jun maysch'olnil chi 'ix a b'o'o, man̈ a c'ub'c 'eli, xchi 'a winac.

²⁰ 'Ix ta'w win Acán chi 'a Josué 'ixtic: —Wal yel 'ix 'och in mul 'a Jehová qui Diosalec. Yaj ton jun tzo'n̈ in mul tic:

²¹ A 'a scal jun tzo'n̈ tas 'ay 'a Jericó, ata xwij cot jun te pichl cotnc 'a Babilonia, yujto caw wach' yilxi. Xwi'n cot chab' ciente q'uen plata yet' jun teln̈ q'uen oro, 'ec'b'al jun libra yalil. 'Ix in nib'j 'och jun tzo'n̈ tic, yuj cha, xwi'n coti. Ata mucn eb' wuj 'a yol in mantiado. A 'a yaln̈ te pichl cha, ata c'ub'b'il 'el q'uen tumn chi wu'uj, xchi winac.

²² 'Ix schecn 'at Josué jaywn̈ eb' winc chi 'at say yil jun tzo'n̈ chi 'a yol smantiado win Acán cha. Yajn̈j wal cha, 'ix 'ilchj jun tzo'n̈ chi yuj eb'. A 'a yaln̈ te pichl cha, ata c'ub'b'il 'el q'uen tumn plata yet' q'uen oro cha.

²³ 'Ix yi'n cot eb' 'a Josué, sch'oxn eb' yil smasnil eb' chon̈b' cha. Xlajw cha, xya'n 'och eb' 'a yojltac Jehová.

²⁴ Xlajw xoj cha, 'ix ya'n Josué 'ijxoc 'at win Acán chi yuj eb' 'anma 'a jun niwn 'a'lic tzcuch Acor. 'Ix 'ijx 'at yet' q'uen plata, te pichl wach' yilxi, jun teln̈ oro, eb' yunnal, yisil, swacax, sb'uru, scalnelu, smantiado yet' smasnil tas 'ay 'a 'a.

²⁵ 'Ix yaln Josué 'a 'ixtic: —¿Tas wal yuj 'ix 'ej cot jun cusc'ojlal tic 'a quib'n̈ec?. Ax ticnec, a cab' Jehová tza'n cot yailal 'a eb'an̈, xchi. Xlajw yaln jun tzo'n̈ paxti tic, ax smasnil eb' 'anma cha, 'ix syamn 'och eb' sjul q'uenan win Acán yet' eb' yunnal. Xlajw scham eb', 'ix 'ajx tz'a eb' yet' smasnil tas 'ay 'a 'a.

²⁶ Xlajw cha, 'ix si'n can eb' syam sb'a q'uen q'uen chi 'a yib'n̈ eb'. 'Ix q'uecn b'uln̈ q'ue'en. A jun b'uln̈ q'uen q'uen cha, 'ix cann̈j q'uen ta'. Yuj cha, a jun niwn 'a'lic cha, an̈j 'ijnoc Acor sb'i. 'Ixtnta wal 'ix 'aj yoch wan yowl sc'ojl Jehová 'a yib'n̈ chon̈b' Israel 'a jun tiempoal cha.