Josué 6 - Chuj San Sebastian Bible

A tas x'aj yoch owl 'a Jericó

¹ A chon̈b' Jericó caw wal sin̈n̈i yaj smacchj spuertail, yujto caw tzxiw eb' 'anma chi yuj eb' israel cha. Man̈x 'a junc 'anma tztac' yelta mto tz'och 'a yol chon̈b' cha.

² Palta xyaln Jehová 'a Josué 'ixtic: A ticnec tzwac' chon̈b' Jericó 'a yol e c'ab' yet' sreyal yet' pax eb' soldado.

³ E masnil ax soldado israel ex tic, 'a junjn c'u tzex oyy 'ec' junjn 'ejm 'a spatquil 'elt chon̈b' tic, waque c'u 'oj e b'o jun tic.

⁴ Tzb'ab'lj ucwn̈ eb' ya'mal 'och sti eb' 'anma yuj te scaxail trato, junjn eb', tzyij eb' scacha b'ob'il 'a no sch'ac calnelu; ax 'a yucl c'u cha, uc 'ejm tzex oyy 'ec' 'a spatquil 'elt jun chon̈b' tic, ax eb' ya'mal 'och sti eb' 'anma cha, 'oj yutz'c eb' scacha cha.

⁵ A yic tzeyab'ni to man̈xtzac 'och wan yoc' no cacha cha, caw 'ip tzex 'awj cha'an̈, ax scot lan̈njoc smuroal jun chon̈b' cha. Tzlajw cha, tzex 'at tza'njoc junjn ex 'a eyojltac, yic tzex 'och 'a yol chon̈b' cha, xchi.

⁶ Ax Josué, 'ix yawtj cot eb' ya'mal 'och sti eb' 'anma cha, xyaln 'a eb' 'ixtic; 'Ijec te scaxail strato Jehová, tzex b'ab'lj ucwn̈oc ex yet' e cacha 'a yojltac te caxa tic, xchi.

⁷ 'Ix yaln pax 'a smasnil eb' 'anma chi 'ixtic: 'Ixquec, 'at oymtejc jun chonb' cha, ax ewin soldado, b'ab'lj cab' ewin yuj te scaxail strato Jehová, xchi.

⁸ 'Ix syiclj eb' smasnil tas xyal Josué. A ucwn̈ ewin ya'mal 'och sti eb' 'anma cha, xb'ab'lj eb' yuj te scaxail strato Jehová, xyutz'n eb' scacha chi yucwn̈il.

⁹ Ax eb' soldado, 'ix b'ab'lj eb' yet' syamc'ab' yuj eb' ya'mal 'och sti eb' 'anma cha. 'Ay jun c'aj xo eb' 'ix 'och tza'n yuj te scaxail trato cha, xlaj yutz'nc eb' scacha.

¹⁰ 'Ix yaln Josué 'a eb' soldado chi 'ixtic: Sictacn̈ej e b'eyi, may mach tz'el yaw, may mach tzpaxtini, masnto an 'oj wal 'ayex, ax eya'n 'el eyaw 'a 'ip, xchi 'a eb'.

X'em chon̈b' Jericó

¹¹ 'Ix yaln Josué to tz'ec' eb' yet' te caxa chi jun 'ejmoc 'a spatquil 'elt chon̈b' cha. Xlajw cha, 'ix meltzj pax eb' 'a 'aj 'ay scamplamento, ata x'ec' jun 'ac'wl yuj eb'.

¹² Ax 'a yic junx c'u cha, 'ix seb' q'ue wan Josué, 'ix sb'achn pax eb' ya'mal 'och sti eb' 'anma chi te caxa cha.

¹³ A eb' ucwn̈ cha, b'ab'l s'at eb' 'a yojltac te caxa cha tzyutz'n̈ej eb' scacha. Ax eb' soldado b'ab'l s'at eb' yuj eb', 'ay pax jun c'aj xo eb' tza'n yuj te caxa cha.

¹⁴ Ax 'a schab'l c'ul cha, 'ix yoymtan pax eb' jun chon̈b' cha, xlajw cha, 'ix meltzj eb' 'a 'aj 'ay scamplamento. 'Ixtan̈ej xyutj eb' jun chon̈b' chi 'a waque c'ual.

¹⁵ Ax 'a yucl c'ual, caw seb' q'ue wan eb', 'ix yoymtan eb' jun chon̈b' chi 'icha xon tzyutej, palta a 'a jun c'u cha, uc 'ejm 'ix yoymtej eb'.

¹⁶ A yic xyutz'n eb' no scacha chi 'a yuc 'ejmal, 'ix yaln Josué 'a eb' 'anma chi 'ixtic: Ca'c 'el caw, yujto a Jehová tox 'ix yac' jun chon̈b' tic 'a yol qui c'ab'ec.

¹⁷ Tox 'ix yala to tzsatl jun chon̈b' tic yet' smasnil 'anma cajn 'a 'a. Cojxn 'ix Rahab, 'ix 'ajmul 'ix, cojxn 'ix 'oj colchjoc can 'el yet' eb' xc'och scol sb'a 'a yatut 'ix, yujto a 'ix xc'ub'n 'el eb' 'ilwjum qui checjnaquec coti.

¹⁸ Ax xo tic, tzeyil wal e b'a, man̈ e comn 'i'c junc tas 'ay 'a eb' 'anma tzsatl cha, yujto a jun tzo'n̈ cha, to tzsatl smasnil, man̈ e nib'c 'ochi. Toto 'ay tas 'oj eyic' 'a jun tzo'n̈ 'anma tzsatl cha, 'oj eyi' cot catb' 'a quib'n̈ec. Eyu'uj ax qui lajwec 'el qui masnil.

¹⁹ Cojn q'uen oro, q'uen plata, q'uen bronce yet' q'uen hierro, cojn tzeyij 'at yico'oc Jehová, tze moln can 'aj 'ay yet'ul, xchi 'a eb'.

²⁰ A yic 'ix 'utz'x no cacha cha, 'ix 'el yaw smasnil eb' soldado. Yajn̈j wal cha 'ix cot lan̈n̈joc smuroal jun chon̈b' cha. Ax eb' soldado cha, 'ix 'at tza'njoc eb' 'a stojlal 'aj 'ayq'ui, 'ix 'och eb' 'a yol jun chon̈b' cha.

²¹ Xlajw cha, xlaj smilnoc can eb' soldado chi eb' 'anma cha, eb' winac, eb' 'ix 'ix, eb' quelem, eb' 'ichmtac 'anma', no wacax, no calnelu yet' no b'uru, c'uxn xlajw can 'el smasnil yuj eb'.

²² Ax Josué cha, yaljnacx 'a eb' chawn̈ xit'nc 'ilj lum cha, to tz'at yic' 'elt eb' 'ix 'ajmul 'ix 'a yol yatut, tzyi'n 'elt eb' smasnil eb' 'ayc' scol sb'a 'a yol yatut 'ix cha, 'icha yaj ya'n can eb' sti 'a 'ix.

²³ Yuj cha, x'at ewin yic' 'elt 'ix Rahab 'a yol yatut cha, smam 'ix, snun 'ix, eb' snul'ej yet' smasnil eb' yican. 'Ix yi'n can 'el ewin eb' 'a sti 'el scamplamento cha.

²⁴ Xlajw xoj cha, xya'n 'och eb' soldado sc'a'l jun chon̈b' cha, c'uxn stz'a smasnil tas 'ay 'a 'a, cojxn q'uen plata, q'uen oro, q'uen bronce yet' q'uen hierro xyij can 'elt eb'. 'Ix 'at smolnc can eb' 'a 'aj 'ay yet'l yuj eb' 'a scajnub' Jehová.

²⁵ A Josué 'ix scolcn 'el 'ix Rahab yet' smasnil eb' yican yet' pax smasnil tas 'ay 'a 'ix, yujto a 'ix c'ub'jnac 'el eb' 'ilwjum schecjnac cot Josué 'a chon̈b' Jericó. Atxo 'a yic jun tiempoal cha, ata x'el yich scan eb' yin̈tl 'ix Rahab 'a scal eb' israel.

²⁶ Xlajw cha, xyaln Josué jun tzo'n̈ spaxti tic 'ixtic: Scatb'oc cab' Jehová junc mach tznib'j b'onc pax chan̈ jun chon̈b' tic b'aq'uin̈. Cham cab' sb'ab'l 'unnal yic tz'em smuroal yich, ax yic tz'och spuertail, a cab' win stza'n 'unn tzchami, xchi.

²⁷ A Jehová caw wal xcolwj yet' Josué, yuj cha, 'ix puc yab'xil 'a smasnil jun tzo'n̈ lugar cha.