Josué 5 - Chuj San Sebastian Bible

¹ Ax smasnil eb' sreyl eb' amorreo cajn 'a junx sc'axpil 'ec' sti a Jordán, 'a stojlal 'aj tz'em c'u, yet' pax eb' sreyl eb' cananeo cajn 'a sla'nil sti a Mar Mediterráneo, 'ix yab' eb' yab'xil, to tacjnac chan̈ a Jordán yuj Jehová yic ye't chon̈b' Israel 'a yojl a'. Yuj cha, caw wal xiw chan̈ eb', may xon junc eb' ste'wtzej sb'a sjaw yac' owl yet' eb' israel.

'Ac'b'il circuncidar*r* eb' israel 'a Gilgal

² Atn 'a yic jun tiempoal cha, ata yaljnac Jehová 'ixtc 'a Josué: B'o jaye'oc q'uen cuchlub' 'a q'uen suyq'ue'en, tza'n pax circuncidar eb' et chon̈b' tic, xchi.

³ 'Ix sb'on Josué eb' q'uen cuchlub' cha. Xlajw cha, 'ix ya'n 'ajxoc circuncidar eb' yit chon̈b' chi 'a lum tzaln Aralot.

⁴ 'Ix yac' 'ajxoc circuncidar eb' winc cha, yujto a smasnil eb' winc stiempoal xo yoch soldadoil yic yelt eb' 'a Egipto, c'uxn xchamcn eb' 'a yol b'e 'a lum cusltac lu'um.

⁵ A eb' cha, 'ac'b'ilx circuncidar eb' yic yelt eb' 'a Egipto; ax pax eb' xlaj 'alj 'a yoltc b'e 'a lum cusltac lu'um, man̈ 'ac'b'ilc circuncidar eb'.

⁶ Yujto chawinc ab'il 'ix b'eyc' eb' 'a lum cusltac lu'um, ax smasnil ewin quelmtac stiempoal xo yoch soldadoil, a eb' cha, caw pit xyutj sb'a eb'. Yuj cha, xya'n can Jehová sti', to ma'oj yil eb' 'anma chi lum lum 'aj ya'jnac sti ya'n 'a smam yichm eb', atn lum til wal syaxil sat.

⁷ Yuj cha, xya'n circuncidar Josué ewin yunnal ewin xchamcn cha, sec ax eb' tzcanx sjelc ewinac. A eb' cha, mant 'ac'b'ilc circuncidar eb', yujto 'aych eb' 'a b'eyel.

⁸ A yic xlajw yajx circuncidar eb' winc cha, 'ix 'ochcn wan eb' yet' scamplamento 'a jun lugar cha, masnto xb'ox sc'ojl eb'.

⁹ Yuj cha, xyaln Jehová 'a Josué 'ixtic: A yuj jun circuncisión tic, 'ix wij can 'el sb'uchwal paxti eb' 'aj Egipto 'a eyib'an̈, xchi. Ax jun lugar cha, 'ix scuchn can Gilgal.

¹⁰ A yic 'ayc' eb' 'anma chi yet' scamplamento 'a lum Gilgal 'a lum span̈nil chon̈b' Jericó, ax 'a yemc'ul 'a yic chan̈lajn̈e yoch jun 'uj cha, 'ix snan eb' israel chi q'uin̈ yic yel eb' 'a libre.

¹¹ Ax 'a junx c'u q'uin̈ cha, 'ix sc'ux eb' tas tz'el 'a sat lum lum cha, swaj eb' 'ixm pan may yich, 'ix sc'uxn pax eb' 'ixm sat trigo mayb'il.

¹² Atnta 'ix 'och wan sjaw maná 'a eb' 'anma cha, man̈x 'a 'aj sc'ux eb' maná yic syamn 'och eb' sc'uxn sb'al sat lum lum cha. A 'a jun ab'il cha, cojn tas tz'el 'a lum Canaán, a chi sc'ux eb'.

Xyil Josué*r* win syajlil eb' soldado Jehová

¹³ A yic 'ayc' Josué 'a sla'nil Jericó, 'ay jun c'ual 'ix yilni to 'ay jun winc lin̈n 'ec' 'a yojltac. A jun winc cha, yamb'il jun espada yu'uj. Ax Josué 'ix c'och 'a stz'ey, sc'anb'n 'a 'ixtic: —¿Tom quitb'eym qui b'a et'oc, mto etb'eym a b'a yet' eb' 'ajc'ojl yajch 'ayn̈ on̈? xchi 'a winac.

¹⁴ Ax jun winc cha, 'ix ta'w 'a Josué 'ixtic: —Ma'ay, an tic tzin jaw in jucb'tzoc eb' soldado Jehová, xchi. A yic xyab'n Josué to 'ixta yaj jun winc cha, 'ix 'em n̈ojnjoc 'a sat lu'um, 'ix yaln 'ixtc 'a 'a: —¿Mamin, tas tza nib'j tzin b'o an a checb' in tic? xchi.

¹⁵ Ax win syajlil eb' soldado Jehová, 'ix ta'w win 'ixtc 'a Josué: —'Ij 'el a xan̈ab', yujto a jun lugar 'aj lin̈n ach 'ec' tic, to yicn̈ej Jehová yaji, xchi. Ax Josué, 'ix syiclj tas 'ix alx 'a 'a.