Josué 4 - Chuj San Sebastian Bible

A lajchwe q'uen q'uen*r* xq'uet 'a yojl a Jordán

¹ A yic xlajw yec' eb' 'anma chi smasnil 'a yojl a Jordán cha, 'ix yaln pax Jehová 'ixtc 'a Josué:

² 'Awtj cot lajchwan̈oc eb' winc sic'b'il 'elt 'a scal eb' chon̈b' tic, junjn eb' 'a junjn 'in̈tal.

³ Tzaln 'a eb', to tzsic' q'uet eb' lajchwe'oc q'uen q'uen 'a yojl a Jordán tic, 'a stz'ey 'aj lin̈n 'ec' eb' ya'mal 'och sti eb' 'anma', tzyi'n 'at eb' 'a 'aj 'oj can eb' 'a jun 'ac'wl tic, axta tztuscn chan̈ eb' q'ue'en, xchi.

⁴ Xlajw cha, xyawtn cot Josué eb' lajchwan̈ winc sic'b'il 'el yuj cha,

⁵ xyaln 'a eb' 'ixtic: 'Ixquec 'a stz'ey 'aj 'ayc' scaxail strato Jehová qui Diosalec 'a spacl a Jordán cha, axta tze sic' chan̈ junjnoc e q'ue'en, junjn 'a junjn 'in̈tal, sec lajchwe tz'aj q'uen 'a smasnil.

⁶ A eb' q'uen 'oj 'ochcn nanb'ilal 'ayex, ax yic 'oj sc'anb'noc eb' eyunnal 'ayx b'aq'uin̈, ax yaln eb' 'ixtic: ¿Tas yuj 'ixtc yajcn jun tzo'n̈ q'uen tic? 'oj schic eb'.

⁷ Ax eyaln 'a eb' 'ixtic: A yic xyi'n 'e't eb' ya'mal 'och qui ti 'a Dios te scaxail strato Jehová 'a yojl 'a Jordán, ax a a cha, spoj sb'a a 'a yojltac te caxa cha, a jun tzo'n̈ q'uen tusb'il can chan̈ tic, snanb'il cot tas ujnac 'a qui calc 'a jun lugar tic, xe chi 'a eb', xchi.

⁸ 'Ix syiclni eb' chi tas xyal Josué. Si'n q'uet eb' lajchwe q'uen q'uen chi 'a yojl a Jordán cha, junjn q'uen 'a junjn eb' yin̈tl israel. 'Ix yi'n 'at eb' q'uen 'a 'aj 'ay scamplamento, axta stuscn chan̈ eb' q'ue'en, 'icha yaj yaln Jehová 'a Josué.

⁹ An̈jtona', xya'n Josué tusxoc can lajchwe xo q'uen 'a yojl a Jordán cha, atn 'aj 'ochnc wan lin̈n eb' ya'mal 'och sti eb' 'anma 'et'jnac te scaxail trato. A jun tzo'n̈ q'uen cha, 'ix cann̈j eb' ta'.

¹⁰ Ax eb' 'et'jnac te caxa cha, 'ix 'ochcn wan lin̈n eb' 'a spacl a Jordán, ya sb'a ax eb' yit chon̈b' eb' cha, xlaj sb'o eb' tas xyal Jehová 'a Josué, caw ji'lti x'e't eb' 'a yojl a'.

¹¹ A yic xlajw ye't eb' 'anma chi smasnil, 'ixta to b'i'an, xwach' 'e't eb' 'et'jnac te caxa chi 'a sat smasnil eb' chon̈b' cha.

¹² An̈jtona', 'ix 'e't pax eb' soldado yic Rubén, eb' yic Gad yet' spacl eb' yic Manasés. A eb' cha, yet'n̈j eb' syamc'ab' yic owal, xb'ab'lj eb' yuj jun tzo'n̈ xo eb' yit israelal, 'icha yaj yaln can Moisés 'a eb'.

¹³ 'Aym junc chawinc mil eb' winc chi xyac' lista sb'a yet' syamc'ab' yic owal. 'Ix b'ab'lj eb' yuj eb' 'anma chi 'a yojltac Jehová, axta x'och wan eb' smasnil 'a lum ya'lical chon̈b' Jericó.

¹⁴ A 'a yic jun c'u cha, 'ix yac' Jehová 'ijxoc chan̈ sjelnal Josué yuj eb' yit chon̈ab', to niwn yel'ch 'a sat eb', 'icha ya'jnac eb' yet' Moisés yic pitznto yet' eb'.

¹⁵ A yic xlajw ye't can eb' 'anma chi smasnil, xyaln Jehová 'a Josué 'ixtic:

¹⁶ Al 'a eb' ya'mal 'och sti eb' 'anma', sb'achx cab' eb' te scaxail trato, tzq'uet eb' yet' te 'a yojl a Jordán cha, xchi.

¹⁷ A yic xyaln Josué 'a eb', to tzq'uet eb' 'a yojl a a cha,

¹⁸ cojn wal yic xq'uet eb' 'a yojl a', 'ix ste'n 'ejm eb' yoc 'a 'aj taquin̈, ax a a cha, 'ix cotx can secnjoc a 'a sb'e 'aj tzb'eyi. 'Ix b'ut'j pax 'el sb'e a cha, caw tz'elx pulnjoc a 'a sb'e 'icha xoni.

¹⁹ A yic sc'axw can 'e't eb' chon̈b' chi 'a yojl a Jordán, lajn̈e yoch b'ab'l 'uj, ax 'a jun lugar tzcuch Gilgal 'a yojltac Jericó, 'a stojlal 'aj tzq'uel c'u, ata x'och wan eb' chon̈b' cha.

²⁰ Atn 'a jun lugar chi 'aj 'ix ya'cn tusxoc can Josué lajchwe q'uen q'uen xyij q'uet eb' 'a yojl a Jordán cha.

²¹ Ata xyal 'a eb' chon̈b' chi 'ixtic: A yic 'oj sc'anb'n eb' eyunnal 'ayx 'ixtc b'aq'uin̈: ¿Tas yuj 'ixtc yajcn jun tzo'n̈ q'uen tic? 'oj schic eb'.

²² Tzeyaln 'a eb', chajtlto tacjnac chan̈ a Jordán yic que'tec 'a yojl a'.

²³ Yujto a Jehová qui Diosalec, a 'ix 'a'n tacjoc chan̈ a Jordán, yic que't can on̈, 'icha 'ajnc stacj chan̈ a Chac Mar yu'uj yic que't 'a yojl a 'on̈.

²⁴ 'Ixta tz'aj yojcan 'el smasnil 'anma 'a yolyib'n̈q'uinl tic, chajtlto a Jehová caw 'ay spoder, yuj cha, 'ay cab' yel'ch 'a e sat 'a smasnil tiempo, xe chi 'a eb', xchi Josué cha.