Josué 3 - Chuj San Sebastian Bible

X'ec' eb' israel 'a yojl a Jordán

¹ Ax 'a junx c'u cha, 'ix seb' q'ue wan Josué, x'ochx 'a b'eyl yet' eb' yit chon̈ab'. 'Ix 'el paxt eb' 'a lum Sitim, 'ix jaw eb' 'a sti a Jordán. 'Ix 'och wan eb' ta 'oxe c'u.

² Xlajw yec' 'oxe c'u cha, 'ix 'ec' eb' yajl yaj 'a scal eb' 'a camplamento.

³ 'Ix laj yalnc eb' 'ixtc 'a eb' 'anma cha: A yic tzeyiln yi'n 'ec' eb' levita ya'mal 'och qui ti 'a Dios, te scaxail strato Jehová 'a yojl a Jordán tic, ax xo, tzex 'och tza'n e masnil yuj te'.

⁴ 'Ixta 'oj eyutc eyojcan 'el jun b'e 'aj 'oj eyec' cha, yujto mant 'a xon junc mach 'ojtnac jun b'e cha. Palta man̈ ex c'och 'a sla'nil jun caxa cha, najt tza'n e 'ati. Tzex can cab' junc kilómetro 'a spatquil, xchi eb' 'a eb' 'anma cha.

⁵ 'Ix yaln Josué 'ixtc 'a eb': A ticnec sacb'tzejc e b'a, yujto q'uic'an 'oj sch'ox Jehová quilc tas satjub'tac yilx 'a qui calc tic, xchi 'a eb'.

⁶ Xyaln 'ixtc 'a eb' ya'mal 'och sti eb' 'anma cha: 'Ijec te scaxail trato, tzex b'ab'lj yuj eb' 'anma tic yic tzex 'ec' 'a yojl a tic, xchi 'a eb'. Yuj cha 'ix sb'achn eb' te scaxail trato cha, 'ix b'ab'lj eb' yuj eb'.

⁷ Xlajw cha, xyaln Jehová 'ixtc 'a Josué: A ticnec, tz'el yich ach wi'n chan̈ yet' opiso 'a sat eb' et israelal tic, sec 'oj yil eb' to 'ayn 'och et'oc, 'icha 'ix wac' yet' Moisés.

⁸ Ax ticnec, ach 'oj al 'a eb' ya'mal 'och sti eb' 'anma 'et'jnac te scaxail trato, to a yic tzc'och eb' 'a sti a cha, tzaln 'a eb' to tz'och wan lin̈n eb' 'a spacl snan̈l a', xchi.

⁹ Xlajw cha, xyawtn cot Josué eb' yit chon̈b' chi 'a stz'ey, xyaln 'a eb' 'ixtic: Cotn̈ec, tze maclni eyab' tas tzyal Jehová qui Diosalec.

¹⁰ A yuj tas 'oj ch'oxxoc eyila', ax snachj 'el eyu'uj, to a jun Dios pitzan a 'ayc' 'a qui calec. A 'oj 'i'noc 'el jun tzo'n̈ eb' 'anma 'ay 'a jun tzo'n̈ lugar 'aj 'oj queq'uec: atn eb' cananeo, eb' hitita, eb' heveo, eb' ferezeo, eb' gergeseo, eb' amorreo yet' eb' jebuseo.

¹¹ 'Oj eyila', to a te scaxail strato Dios, atn jun Dios 'ay yic lum lum tic, 'oj b'ab'ljoc te cujec yic tzon̈ 'e'c 'a yojl a Jordán tic.

¹² Yuj cha, si'c 'elt lajchwan̈oc eb' winc 'a qui calc tic, junjn tz'elt 'a scal junjn 'in̈tal on̈ec.

¹³ Ax eb' ya'mal 'och qui ti 'a Dios 'et'jnac te scaxail strato Jehová, atn jun Dios 'ay yic lum lum tic. Cojn wal yic 'oj ste'nc 'ejm eb' yoc 'a yojl a Jordán, ax spojn sb'a snan̈l a', a a tz'eml tic, 'oj 'och wan a sb'eyi, ax span̈b'tzan sb'a a', xchi 'a eb'.

¹⁴ Xlajw cha, xyi'n chan̈ eb' israel chi smantiado, 'ix 'ec' eb' 'a yojl a Jordán cha, ax eb' ya'mal 'och sti eb' 'anma 'et'jnac te scaxail trato, xb'ab'lj eb' yuj smasnil eb' chon̈b' cha.

¹⁵ A 'a jun tiempoal cha, a a Jordán cha, caw wal b'ut'n a', tzlaj pultz'j 'el a 'a sb'e cha, (atn 'a stiempoal spolx 'ixm trigo 'a jun lugar cha.) A yic xc'och eb' 'et'jnac te caxa chi 'a sti 'a, cojn wal xya'n 'ejm eb' yoc 'a yojl a', 'ix 'och wan a'.

¹⁶ Span̈tzan sb'a a 'a snajtil 'el sti chon̈b' Adam, masnto 'ix c'och a ste'n sb'a 'a 'aj 'aych smuroal chon̈b' Saretán. Ax a xcan 'a yaln̈ 'ejm cha, 'ix b'eyn̈j 'at a', masnto xlajw c'och 'a a Mar Muerto. 'Ix tacj can chan̈ sb'e a cha, ya sb'a x'ec' eb' israel 'a yojl a'.

¹⁷ Ax eb' ya'mal 'och sti eb' 'anma cha, 'ix 'ochcn wan lin̈n eb' 'a snan̈l 'aj tzb'ey a Jordán cha, Caw tacn̈ lum lum 'aj 'ix 'och wan lin̈n eb', ya sb'a x'ec' smasnil eb' 'anma 'a lum tacn̈ lum 'a yojl a Jordán.