Josué 24 - Chuj San Sebastian Bible

A slajb' paxti Josué 'a eb' chon̈b' cha

¹ Xlajw cha, xya'n Josué syam sb'a smasnil eb' yit israelal 'a lum Siquem, xyawtn cot eb' yichmtac wincal chon̈ab', eb' yajl yaj 'a scal eb' chon̈ab' yet' pax eb' juez, 'ix c'och eb' 'a yojltac Dios.

² 'Ix yaln Josué chi 'ixtc 'a smasnil eb' chon̈b' cha: —A Jehová qui Diosalec an̈ israel on̈c tic, a aljnac can 'ixtic: A yic pecti', ata cajn win e mam eyichm 'a sc'axpil 'ec' a Eufrates, atn win Taré yet' chawn̈ yunnal, jun win tzcuch Abraham, ax junx winac, Nacor sb'i, ata tzyac' servil eb' jun tzo'n̈ comn dios.

³ Xwi'n 'e't Abraham 'a sc'axpil 'e't a a cha, xwa'n scaj smasnil lum lum 'a yol yic Canaán, xwa'n pax jun yunnal, atn win Isaac, xwa'n pax niwtjoc yin̈til.

⁴ Xwa'n chawn̈ yunnal win Isaac cha, atn Jacob yet' Esaú. Xwa'n can lum jolmctac witz 'a yol yic lum Seir 'a Esaú, ax Jacob yet' eb' yunnal, 'ix 'atcn eb' 'a Egipto.

⁵ X'ec' jun tiempoal yuj eb' ta', xin checn 'at Moisés yet' Aarón 'a Egipto cha, xwa'n cot jun tzo'n̈ niwc yailal 'a yib'n̈ eb' 'aj lugar cha, masnto 'ix wij 'elt eb' yin̈tl Jacob chi ta'.

⁶ A yic xwi'n 'elt eb' e mam eyichm cha, ax eb' 'aj Egipto, 'ix 'och tza'n eb' yuj eb'; xyij cot eb' scaruaje yic owal, xyi'n cot eb' schej, masnto 'a a Chac Mar.

⁷ Yuj cha, x'awj eb' e mam eyichm chi 'ayn an Jehová in tic. An xo xwac' 'ejm jun niwquil q'uic'q'uinl 'a scal eb' yet' eb' 'ajc'ojl cha. Xwa'n cot a mar 'a yib'n̈ eb', xmucchj can 'ejm eb' 'aj Egipto chi yuj a'. Ax tic, eyiljnac wal si'mb'il tas xwutj eb'. Caw niwn tiempo x'ec' eb' e mam eyichm chi 'a cusltac lu'um,

⁸ masnto ex wij cot yet' eb' 'a lum slum eb' amorreo, 'a stojlal 'aj tzq'uel c'u 'a a Jordán. Xcob' yac' eb' owl eyet'oc, palta an xo xwac' eb' 'a yol e c'ab', yuj cha, x'em eb' eyu'uj, ax xo xeyique'ej can slum eb'.

⁹ Xlajw cha, ax Balac yunnal Zipor, sreyl eb' moabita, 'ix cot yac' owl eyet'oc. 'Ix 'at ya'nc 'awtxoc cot Balaam yunnal Beor, sec tzex scatb'ej can snani.

¹⁰ Palta an xo, ma'ex wac' scatb'tzoc can Balaam cha, palta to 'ix yalcn wach' paxti 'a eyib'an̈. 'Ixta wal ex wutj ex in coln can 'eli.

¹¹ Xlajw cha, ex wa'n 'e'toc 'a yojl a Jordán, axta ex jaw 'a Jericó. A eb' cajn 'a Jericó cha, yet' eb' amorreo, eb' ferezeo, eb' cananeo, eb' hitita, eb' gergeseo, eb' heveo yet' pax eb' jebuseo, 'ix yac' eb' owl cob' eyet'oc, palta an xo xwac' eb' 'a yol e c'ab', sec tz'em eb' eyu'uj.

¹² A chawn̈ eb' sreyl amorreo cha, man̈ yujoc eyespada, man̈ yujoc pax e jul-lab' x'em eb' eyu'uj, palta an xwa' cot jun niwquil xiwc'ojlal 'a yib'n̈ eb', yuj cha, x'at eb' 'elc 'ayex.

¹³ An xwac' e lum 'aj ex 'aji, palta man̈oc ex to xeyawj sb'al lu'um, xwa'n eyatut 'aj tzex can cajan, palta man̈oc ex xe b'o'o. Al ticnec, cajnexx 'ec' 'a sat lu'um, tze lon sat te uva 'ay 'a lu'um, yet' te olivo, palta man̈oc ex eyawjnac te', xchi Jehová 'ayn̈ec.

¹⁴ —Ax ticnec jun, 'ay cab' e xiwc'ojlal 'a Jehová yuj smasnil jun tzo'n̈ tic. 'A'c servil yet' wal smasnil e c'ojol. 'Ijec 'el jun tzo'n̈ comn dios 'a e cal, atn jun tzo'n̈ ya'jnac servil eb' qui mam quichmec, jun tzo'n̈ 'ayc' 'a sc'axpil 'ec' a Eufrates, yet' 'a Egipto. Cojn cab' Jehová tzeyac' servil.

¹⁵ Palta toto matz yal e c'ojl tzeyac' servil Jehová, si'c ticnec mach 'oj eyac' servil. Tom a jun tzo'n̈ comn dios ya'jnac servil eb' qui mam quichmec 'a sc'axpil 'ec' a Eufrates, mto a scomn diosal eb' amorreo 'aj cajnon̈c 'ec' tic. An xo tic yet' smasnil eb' wic cajn 'a yol watut, a Jehová 'oj ca' servil on̈, xchi Josué.

¹⁶ Yuj cha, xta'w eb' chon̈b' chi 'ixtic: —May b'a'n̈ 'oj cactc can Jehová yic tzca'n servil jun tzo'n̈ comn dios chi 'on̈.

¹⁷ Yujto a Jehová qui Diosalec, a 'on̈ 'i'nec 'elt yet' eb' qui mam quichmec 'a Egipto, 'a 'aj on̈ 'e'c mosoal. A b'ojnac jun tzo'n̈ tas caw satjub'tac yilx quiljnaquec. A 'on̈ tan̈wniec 'a yol jun tzo'n̈ b'e 'aj xlaj on̈ b'eyec, yet' 'a yic on̈ 'e'tec 'a scal jun tzo'n̈ xo chon̈ab'.

¹⁸ A Jehová, a xpechn 'el smasnil eb' chon̈b' 'ayc' 'a yol qui b'e, yet' eb' amorreo cajn 'a jun lugar tic. Yuj cha, 'oj ca' pax servil Jehová on̈, yujto a qui Diosalec yaji, xchi eb'.

¹⁹ Yuj cha, xyaln Josué 'a eb' chon̈b' chi 'ixtic: —Ax tic, ma'oj stac' eya'n servil Jehová, yujto caw matz techj yu'uj yic tzyiln 'och tas man̈ wach'oc. Caw wal ow toto tzex 'och 'emmquilal 'a jun tzo'n̈ comn dios, matz yac' niwnc'ojlal jun tzo'n̈ mul cha.

²⁰ Toto tzeyactj can Jehová, tzeya'n servil jun tzo'n̈ comn dios, 'oj meltzjoc ya'n yowl sc'ojl 'ayex, ax e satx 'el yu'uj, wach'xam til wal tas wach' sb'o 'ayex, xchi 'a eb'.

²¹ Xta'w eb' chon̈b' chi 'a Josué 'ixtic; —Ma'oj qui b'o jun chi 'ixta'. An̈ tic on̈, a Jehová 'oj ca' servil on̈, xchi eb' 'a 'a.

²² —Ax tic, mun ax xeya'ch testigoal e b'a 'ayex, chajtlto tzchaj e c'ojl eya'n servil Jehová, xchi Josué. —An̈ ton xcal on̈, xchi eb'.

²³ Xyaln pax Josué 'ixtic: —A ticnec, 'ijec 'el jun tzo'n̈ comn dios 'a e cal, 'a'c servil Jehová yet' smasnil e c'ojol, atn qui Diosalec, xchi 'a eb'.

²⁴ Xta'w pax eb' chon̈b' chi 'ixtc 'a Josué: —An̈ tic on̈, 'oj ca' servil Jehová qui Diosalec, 'oj qui yiclc tas 'oj yal 'ayn̈ on̈, xchi eb'.

²⁵ A 'a jun c'u cha, ata 'ix tzjucb'tzej Josué eb' chon̈ab' yic tzb'on eb' jun strato yet' Jehová 'a lum Siquem. Ata xyac' jun tzo'n̈ checnb'il yet' jun tzo'n̈ ley 'a eb'.

²⁶ Xlajw cha, stz'ib'n can 'a ch'an̈ libro 'aj 'aycn sley Dios, xyi'n cot jun niwquil q'ue'en, xya'n can 'och 'a yich jun te mach' 'ayc' 'a stz'ey scajnub' Jehová.

²⁷ Xyaln pax Josué 'ixtc 'a smasnil eb' chon̈b' cha: —A jun q'uen tic, a tz'ochcn testigoal yuj smasnil tas xyal Jehová 'ayn̈ec. A q'uen tz'ochcn pax testigoal 'ayex, sec ma'oj eyac' 'es 'a Dios, yuj tas xeyal tic, xchi 'a eb'.

²⁸ Xlajw cha, schecn meltzjoc Josué junjn eb' 'a slum chab'il yu'uj.

Schamlil Josué

²⁹ A yic xlajw ye'cn jun tzo'n̈ cha, xcham win schecb' Jehová, atn Josué win yunnal Nun, 110 ab'il sq'uinal yic xchami.

³⁰ Ata xmucx win 'a lum Timnat-sera, ata 'ay jun lum chi 'a jolm witz yic Efraín, 'a snorteal switzl Gaas.

³¹ A eb' israel cha, caw yiclum xyutj sb'a eb' 'a Jehová yic pitznto Josué yet' eb', an̈jtona', caw wal yiclumto eb' 'a jun tzo'n̈ ley cha yic pitznto eb' 'ichmtac winc 'a scal eb', atn eb' 'ojtnac smasnil tas sb'ojnac Jehová yuj eb'.

Xmucx sb'acl José 'a lum Siquem

³² Ax sb'acl win José yijnac cot eb' israel chi 'a Egipto, 'ix smucn can eb' 'a Siquem cha, atn lum smanjnac can Jacob 'a eb' yunnal Hamor, win smam win Siquem, lum jun ciente plata stojol, atn lum 'ochnc can yico'oc eb' yin̈tl José.

Schamlil Eleazar

³³ A yic xcham Eleazar win yunnal Aarón, ata xmucx can sniwnal win 'a lum tzaln 'ay 'a yol yic win Finees, atn win yunnal winac, lum 'ac'b'il smacloc win 'a lum jolmctac witz 'a yol yic Efraín.