Josué 23 - Chuj San Sebastian Bible

Xpaxtin Josué 'a eb' chon̈ab'

¹ Niwn xo tiempo scan eb' israel 'a junc'ojlal yuj Jehová yet' eb' 'ajc'ojol, ax yic caw 'ichm winc xo Josué,

² xya'n 'awtxoc cot smasnil eb' yit israelal, eb' yichmtac wincal chon̈ab', eb' juez, yet' pax eb' yajl smasnil, xyaln 'a eb' 'ixtic: An tic caw 'ichm inx winac, 'ayx pax in q'uinal.

³ Ax tic, eyiljnac wal tas sb'ojnac Jehová qui Diosalec yet' jun tzo'n̈ chon̈ab', jun tzo'n̈ eb' ste'wtzej sb'a ya'n owl quet'ec, palta a Jehová a x'a'n owl cujec.

⁴ An xin pojcn 'ec' smasnil lum lum tic 'a scal junjn 'in̈tal. Man̈ cojnoc lum tox xquijec 'ec' tic xin pojcn 'ec' 'ayex, palta yet' jun tzo'n̈ xo lum tot 'oj eyi'q'ui, tz'atn̈j lum 'a a Jordán, masnto tzc'och lum 'a a Mar Mediterráneo 'a stojlal 'aj tz'em c'u.

⁵ A Jehová a 'oj 'i'nc 'el eb' 'anma cajn 'a sat lum lum cha, ax xo, 'oj eyico'oc lu'um, 'icha wal yutjnac Jehová qui Diosalec ya'n can sti'.

⁶ 'A'c wal eyip eyiclni smasnil tas tzyal ch'an̈ un̈ 'aj tz'ib'b'il can ley yic Moisés, 'icha wal cab' yaj stz'ib'x cani, 'ixta tzeyutj eyiclni.

⁷ Caw man̈ junc tzeyutj e b'a yet' eb' 'anma cajnto 'ec' 'a e cal ticnec. Man̈ eyac' 'emmquilal 'a sdiosal eb', man̈ eyiclc tas tzyal eb', man̈ e b'inoc pax sb'i jun tzo'n̈ comn dios cha, man̈ ex 'em cumn 'a yojltac.

⁸ 'Ochn̈ec tza'n yuj Jehová Dios, 'icha wal on̈ 'ajc qui b'eycot 'a yictax yalan̈, masnto ticnec.

⁹ A 'ix 'i'n 'el jun tzo'n̈ niwc chon̈b' 'a cojltaquec, caw jeln cob' eb', palta mant 'a junc eb' tztac' ste'wtzan sb'a 'a cojltaquec, masnto ticnec.

¹⁰ A junc on̈ec tic, tztac' s'at 'elc junc mil eb' cu'uj, yujto a Jehová a tz'a'n owl cujec, 'icha wal yaj ya'n can sti'.

¹¹ Caw tze tan̈wj e b'a, tze chamc'ojlan Jehová qui Diosalec.

¹² Tzin nib'j tzeyojquej 'el jun tzo'n̈ tic: Toto tzeyij 'el e b'a 'a stz'ey Dios, toto junn̈j tzex 'aj yet' eb' 'anma 'ayt 'ec' 'a e cal tic, tzeyi'n e b'a yet' yisl eb', junn̈j tzex 'aj yet' eb', junn̈j pax tz'aj eb' eyet'oc,

¹³ eyojc xon wal b'i'an, to a Jehová man̈x 'oj yi'l jun tzo'n̈ eb' 'anma chi 'a e cal. 'Oj sc'anlb'oc eb' 'icha junc ch'an̈ ya'al sec tzex 'em yuj eb'. 'Icha no tz'um tz'och 'a yich e patic, 'icha pax te q'uix tz'at 'a yol e sat, 'ixta 'oj ex yutc eb', masnto 'oj e satl 'a sat lum lum caw wach' 'ix yac' Jehová Dios 'ayn̈ec.

¹⁴ An tic jab'xoj 'oj in chami, palta eyojc si'mb'il to 'ix 'el'ch smasnil tas wach' 'aj ya'jnac can Jehová sti ya'n 'ayn̈ec. C'uxn 'ix 'el'ch eb' smasnil.

¹⁵ Palta 'icha wal x'aj yel'ch smasnil tas wach' 'aj ya'jnac can sti ya'n 'ayn̈ec, 'ixta pax 'oj yutc ya'n cot smasnil yailal 'a eyib'an̈, masnto 'oj e satl e masnil 'a sat lum lum caw wach' 'ix yac' 'ayn̈ec.

¹⁶ Toto ma'oj eyiclc jun strato Jehová qui Diosalec, jun xya'cn 'ayn̈ec, ax 'a jun tzo'n̈ comn dios 'aj 'oj eyac' 'emmquilal, tzex 'em n̈ojn 'a yojltac eb'; toto 'ixta', caw 'oj cot yowl 'ayex, yajn̈ej ax ex satn 'el 'a sat jun lum caw wach' tic, xchi Josué.