Josué 21 - Chuj San Sebastian Bible

A schon̈b' eb' yin̈tl Leví

^1-2 A eb' yajl yaj 'a eb' yin̈tl Leví, x'at eb' 'a chon̈b' Silo, 'a yol yic Canaán, yic tzpaxtin eb' yet' win ya'mal 'och sti eb' 'anma 'a Dios, atn Eleazar, yet' Josué yet' pax eb' yajl yaj 'a junjn 'in̈tal eb' israel cha. Ata xyal eb' 'a eb' 'ixtic: —A Jehová 'a'jnac yalcn Moisés, chajtlto tz'ajx qui chon̈b' 'aj wach' tzon̈ can cajn on̈, yet' pax lum swalab' qui cajb'en noc' on̈, xchi eb'.

³ Yuj cha, 'ix syiclj eb' israel chi 'icha yaj yaln can Jehová. Xya'n eb' slum chi 'a eb' yin̈tl Leví cha, atn jun tzo'n̈ schon̈b' eb' yet' swalab' no cajb'en noc'.

⁴ B'ab'el, x'el-l suerte 'a yib'n̈ eb' yin̈tl can win Coat. Atn eb' ya'mal 'och sti eb' 'anma 'a Dios, eb' yic Aarón. 'Oxlajn̈e jun tzo'n̈ schon̈b' eb' x'ajxi. Ata x'elt 'a scal yic eb' yin̈tl Judá, 'a eb' yin̈tl Simeón, yet' 'a eb' yin̈tl Benjamín.

⁵ Ax jun tzo'n̈ xo eb' yin̈tl Coat cha, x'ajx pax lajn̈e chon̈b'al 'a eb'. Ata x'elt 'a yic eb' yin̈tl Efraín, 'a eb' yic Dan, yet' 'a spacl xo eb' yin̈tl Manasés.

⁶ X'ajx pax yic jun tzo'n̈ xo eb' yin̈tl Leví, eb' cotnc yin̈tl 'a win Gersón, 'oxlajn̈e schon̈b' eb' x'ajxi. Ata x'elt 'a yic eb' yin̈tl Isacar, 'a eb' yic Aser, 'a eb' yic Neftalí, yet' 'a spacl xo eb' yin̈tl Manasés 'ayc' 'a lum Basán.

⁷ Xlajw cha, x'ajx pax yic jun tzo'n̈ xo eb' yin̈tl Leví, eb' cotnc yin̈tl 'a win Merari, lajchwe schon̈b' eb' x'ajxi. Ata x'elt 'a yic eb' yin̈tl Rubén, 'a eb' yic Gad, yet' 'a eb' yic Zabulón.

⁸ 'Ixtn tic xyutj eb' israel ya'n jun tzo'n̈ chon̈b' tic 'a eb' yin̈tl Leví, yet' pax swalab' no cajb'en noc', 'icha wal yaj yaln can Jehová 'a Moisés.

⁹ A jun tzo'n̈ chon̈b' 'oj b'inaxc tic, ata 'ay 'a yol yic eb' yin̈tl Judá, yet' 'a yol yic eb' yin̈tl Simeón.

¹⁰ A eb' yin̈tl Leví x'i'n can jun tzo'n̈ tic, eb' cotnc 'a yin̈tl Coat, win smam 'ichm Aarón; a eb' sb'ab'l chaj yico'.

¹¹ A 'a lum jolmctac witz yic Judá, ata x'elt Quiriat-arba, (tzcuch pax Hebrón) atn sb'ab'l chon̈b' eb' yin̈tl can win Anac,

¹² yet' pax jantcn̈ej smacb'en jun chon̈b' cha, atn lum 'ac'b'ilx 'a win Caleb yunnal Jefone.

^13-19 A sb'isl chon̈b' x'ajx 'a eb' yin̈tl Aarón, eb' ya'mal 'och sti eb' 'anma 'a Dios, 'ay 'oxlajn̈e chon̈b' 'a smasnil yet' swalab' no cajb'en noc' 'a junjn chon̈b' cha. A 'a yol smacb'en eb' yin̈tl Judá yet' Simeón, ata 'ay b'aln̈e chon̈b' x'ajx 'a eb': Atn chon̈b' Hebrón 'aj tz'at scol sb'a eb' tzmiln junc yit 'anma'il. X'ajx pax chon̈b' Libna, Jatir, Estemoa, Holón, Debir, Aín, Juta, yet' Bet-semes. Ax 'a yol smacb'en eb' yin̈tl Benjamín, ata 'ay chan̈e xo chon̈b' x'ajx 'a eb': Atn chon̈b' Gabaón, Geba, Anatot yet' Almón.

^20-26 Ax 'a jun tzo'n̈ xo eb' yin̈tl Coat, yunnal Leví, a 'a eb' x'ajx lajn̈e chon̈ab' yet' swalab' no cajb'en noc' 'a junjn chon̈b' cha. A 'a yol smacb'en eb' yin̈tl Efraín, ata x'elt chan̈e chon̈b' cha: Atn Siquem 'ay 'a lum jolm witz, 'aj tz'at scol sb'a junc mach tzmiln junc yit 'anma'il. X'ajx pax Gezer, Kibsaim, yet' Bet-horón 'a eb'. Ax 'a lum smacb'en eb' yin̈tl Dan, ata x'elt chan̈e xo chon̈ab': Atn Elteque, Gibetón, Ajalón yet' pax Gat-rimón. Ax 'a spacl xo eb' yin̈tl Manasés, ata x'elt chab' xo chon̈ab': Atn Taanac yet' Gat-rimón.

^27-33 Ax 'a eb' yin̈tl Gersón, win yunnal Leví, a 'a eb' x'ajx 'oxlajn̈e chon̈b' yet' swalab' no cajb'en noc' 'a junjn chon̈b' cha. 'A yol smacb'en spacl xo eb' yin̈tl Manasés ata x'elt chab' xo chon̈b' cha: Atn Golán, 'ay 'a yol yic Basán, 'aj tzcol sb'a eb' tzmiln junc 'anma', yet' chon̈b' Beestera. Ax 'a yol smacb'en eb' yin̈tl Isacar, ata x'elt chan̈e xo chon̈ab': Atn Cisón, Daberat, Jarmut yet' En-ganim. 'A 'a yol smacb'en eb' yin̈tl Aser, ata x'elt chan̈e xo chon̈ab': Atn Miseal, Abdón, Helcat yet' Rehob. 'A yol yic Neftalí, ata x'elt 'oxe xo chon̈ab': Atn Cedes 'ay 'a yol yic Galilea, 'aj tzcol sb'a eb' tzmiln junc 'anma'. X'ajx pax Hamot-dor yet' Cartán 'a eb' cha.

^34-40 Ax 'a jun tzo'n̈ xo eb' yin̈tl Leví, atn eb' yic Merari, ata x'ajx lajchwe' chon̈ab' yet' swalab' no cajb'en noc' 'a junjn chon̈b' cha. 'A yol smacb'en yin̈tl Zabulón, ata x'elt chan̈e chon̈ab': Atn chon̈b' Jocneam, Carta, Dimna yet' Naalal. 'A yol smacb'en eb' yin̈tl Rubén, ata x'elt chan̈e chon̈ab': Atn chon̈b' Beser, Jahaza, Cademot yet' Mefaat. 'A yol smacb'en eb' yin̈tl Gad, ata x'elt chan̈e xo chon̈ab': atn chon̈b Ramot 'ay 'a yol yic Galaad, 'a 'aj tz'at scol sb'a eb' tzmiln junc 'anma', yet' Mahanaim, Hesbón yet' Jazer.

^41-42 A sb'isl jun tzo'n̈ chon̈b' xyique'ej eb' yin̈tl Leví chi 'a smasnil 'ay 48. A 'a junjn chon̈b' cha, xcan pax swalab' scajb'en noc' eb' levita cha.

⁴³ 'Ixtn tic wal xyutj Jehová ya'n can smasnil lum lum tic 'a eb' israel, atn lum 'aj ya'jnac can sti ya'n 'a eb' smam yichm eb'. 'Ix sb'on 'och sb'a eb' 'a sat lu'um, xlajw cha, xcan cajn eb' 'a 'a.

⁴⁴ A Jehová, xyac' 'el'choc smasnil tas 'aj ya'jnac can sti', xya'n can junc'ojlal 'a sat smasnil lum lum cha. Man̈x 'ic stac' ste'wtzan sb'a eb' 'ajc'ojl 'a eb' israel, yujto a Jehová, a x'a'n eb' 'anma chi 'a yol sc'ab' eb'.

⁴⁵ C'uxn 'ix 'el'ch smasnil 'aj ya'jnac Jehová sti 'a eb' israel cha.