Josué 20 - Chuj San Sebastian Bible

Jun tzo'n̈ chon̈b'*r* 'aj wach' scoln sb'a eb' milm 'anma'

¹ 'Ix yaln Jehová 'a Josué 'ixtic:

² —C'umj a b'a yet' eb' et israelal, tzaln 'a eb', to tzsi'l eb' jun tzo'n̈ chon̈b' 'aj wach' scoln sb'a, 'icha wutjnac waln 'a Moisés.

³ Q'uinloc 'ay junc mach tzmiln junc 'anma', palta man̈ sc'anc sc'ojl tzmil chamoc, tztac' 'at scolnc sb'a 'a junc eb' chon̈b' cha, yic wach' ma'oj milxoc yuj junc yican jun tzcham cha.

⁴ A junc mach tz'at scol sb'a cha, yowlal tzc'och 'a smac jun chon̈b' cha, tzlajw cha, tzyaln 'a eb' yichm wincal chon̈b' cha, yuj tas tz'el-l 'a yib'an̈. Toto 'ixta', ax ewin tzchan 'och jun 'anma chi 'a yol schon̈b' cha; tzlajw cha, tz'ajx junc yet'l 'aj wach' scan cajan.

⁵ Toto tzsayx 'ec' jun tzmilwj chi yuj junc yican to sb'a yet' jun xcham cha, ax eb' yichm wincal jun chon̈b' cha, matz yac' eb' jun xmilwj chi 'a yol sc'ab' jun cha, yujto man̈ sc'anc sc'ojl smil jun yit 'anmal cha, may yowl pax eb'.

⁶ Palta a jun tz'at scol sb'a chi ta', yowlal tzb'eyc'ojlax 'a sat eb' chon̈b' chi smasnil. Toto may smul, tzcann̈j 'a jun chon̈b' cha, masnto tzcham win sat ya'mal 'och sti eb' 'anma 'a Dios, win 'aych yopiso 'a jun tiempoal cha. Tzlajw cha, tztac' smeltzj win 'a schon̈b' 'aj 'ix cot 'elc cha, xchi 'a Josué.

⁷ Yuj cha, si'n 'el eb' israel jun tzo'n̈ chon̈b' 'aj wach' scoln sb'a eb' tzmilwji, atn jun tzo'n̈ chon̈b' tic: Quedes 'a Galilea 'a eb' lum jolmctac witz yic Neftalí, Siquem 'a jolm witz yic Efraín, Quiriat-arba (tzcuch pax Hebrón) 'a jolm witz yic Judá.

⁸ Ax 'a junx sc'axpil 'ec' a Jordán, 'a stojlal 'aj tzq'uel c'u 'a Jericó, ata si'l eb' 'oxe xo chon̈b' tic: Béser 'ay 'a lum span̈nil yic cusltac lu'um, 'a yol yic eb' yin̈tl Rubén. Ramot 'a yic Galaad, 'a yol smacb'en eb' yin̈tl Gad. Golán 'a yol yic Basán, 'a yol smacb'en eb' yin̈tl Manasés.

⁹ Atn jun tzo'n̈ chon̈b' tic si'cn 'el eb', sec ata tzcol sb'a eb' israel mto eb' chuc chon̈b'al cajn 'a scal eb'. Toto 'ay mach tzmiln junc yit 'anma'il, to man̈ sc'anc sc'ojl tzmilwji, tztac' scoln sb'a 'a junc eb' chon̈b' cha. Palta yowlal tzb'eyc'ojlax yuj eb' chon̈b' cha. Toto man̈ sc'anc sc'ojl tzmilwji, matz tac' smilx yuj junc yican jun tzcham cha.