Josué 2 - Chuj San Sebastian Bible

Schecb't Josué*r* chawn̈ eb' 'ilwjum 'a Jericó

¹ A yic 'ayt 'ec' Josué 'a lum Sitim, 'ix schecn 'at chawn̈ eb' 'ilwjum 'a c'ultaquil, xyaln 'a eb' 'ixtic: 'At macljec eyil lum lum cha, tzeyiln coti tas yilx chon̈b' Jericó, xchi 'a eb'. 'Ix 'at eb' 'ilwjum cha, axta xc'och eb' sc'an sposada 'a yatut jun 'ix 'ajmul 'ix Rahab sb'i 'a yol chon̈b' Jericó, ata xcan eb' ta'.

² Palta 'ay eb' 'anma chi x'iln sc'och eb', yuj cha, 'ix 'at yalnc eb' 'a win sreyl chon̈b' Jericó chi 'ixtic: —'Ay wal jun tzo'n̈ ewin israel xjaw 'a yol qui chon̈b'ec tic, yic tzwul smaclnoc ewin yila' tas yilxi, xchi eb'.

³ Yuj cha, 'ix 'at ya'nc win rey chi 'at alxoc 'ixtc 'a 'ix Rahab cha: —'Ac' 'elt jun tzo'n̈ winc 'ix jaw 'a atut cha, yujto 'ilwjum ewinac, 'ajc'ojl pax yajch ewin 'ayn̈ec, xchi winac.

⁴ Yuj cha, xyaln 'ix 'ixtic: —Yel toni 'ix jaw ewin 'a watut tic, palta man̈ wojcoc 'aj xcot ewinac.

⁵ A yic wan xo sq'uic'b'i 'ix 'atx ewinac, yujto ata yorail smacchj qui chon̈b'ec tic. Man̈ wojcoc b'i'an 'ajm xc'och ewinac. Palta q'uinloc tzex 'at 'a spatquil eb', tecn tzyamchj eb' eyu'uj, xchi 'ix.

⁶ Ticni a 'ix xchecn q'ue ewin 'a yib'n̈ span̈nil yatut, axta sc'ub'j 'el sb'a ewin 'a scal jun tzo'n̈ te lino syuchn̈il yaj sjalxi, to ata tztacj eb' te'.

⁷ Ax eb' schecb' win rey cha, 'ix 'at cob' eb' 'a spatc ewinac, masnto xc'och eb' 'a span̈nil sti a Jordán. Cojn wal yic x'elt can ewin tzpechn ewin 'ilwjum cha, 'ix macchj can spuertail jun chon̈b' cha.

⁸ A yic mantzac way ewin chawn̈ cha, xq'ue 'ix Rahab 'a span̈nil yib'n̈ yatut cha, 'ix 'at yalnc 'ix 'ixtc 'a ewinac:

⁹ —Wojc an tic, to a Jehová a tz'a'n jun lum tic 'ayex. A pax tzon̈ 'a'n 'och 'a xiwc'ojlal qui masnil 'a jun tzo'n̈ lugar tic on̈. Man̈x on̈ 'anmac tzcab'i yic tzcab'n eyab'xil.

¹⁰ Yujto 'ix cab'i, to a yic ex 'elt 'a Egipto, ax Jehová a 'ix 'a'n tacjoc chan̈ a Chac Mar yic ex 'e't 'a yojl a'. An̈jtona', 'ix cab'n paxi, to xe satl chawn̈ eb' sreyl eb' amorreo cajn 'a sti 'ec' a Jordán, atn win Sihón yet' win Og.

¹¹ Caw wal tzon̈ xiw chan̈ cab'n eyab'xil. Toc 'ayt junc on̈ tzqui te'wtzej qui b'a 'a eyojltac, yujto a Jehová e Diosal, sDiosal pax tas 'ay 'a satcha'an̈ yet' tas 'ay 'a sat lum lum tic.

¹² Yuj cha, tzin tew 'och 'ayex, to tzeya'cn e ti 'ayn 'a sat Jehová, sec 'icha wal xwutj ex in colni, 'ixta pax tzeyutj e coln can 'el smasnil eb' wican. A ticnec b'i'an, toto tzeyac' 'el'choc tas wan waln tic, 'a'c junc senya 'ayin, sec wojtac to 'oj eyac' 'el'choc e ti cha.

¹³ Tze coln can 'el in mam in nun, ewin in nul'ej, eb' 'ix in nul'ej yet' smasnil tas 'ay 'a eb'. Tzon̈ e colcn 'el qui masnil 'a yol sc'ab' chaml on̈, xchi 'ix 'a ewinac.

¹⁴ 'Ix ta'w ewin 'a 'ix 'ixtic: —Toto may 'aj tzal-l jun tic, tzcac' qui ti o'oj, to a yic 'oj ya'noc Jehová quico'oc jun lum tic on̈, 'oj ach qui na coti, ax ach qui coln can 'el on̈, xchi ewinac.

¹⁵ A 'ix Rahab cha, a 'a yib'n̈ smuroal jun chon̈b' cha, ata b'ob'il q'ue jun n̈a 'aj cajn 'ix; yuj cha, ax 'a swentnual jun n̈a cha, ata xya'l 'ix ewinac. 'Ix 'emt t'un̈n̈oc ewin 'a spatc 'el jun chon̈b' chi yuj 'ix 'a jun lasu.

¹⁶ A yic mantzac 'emt ewinac, xyaln 'ix 'a ewin 'ixtic: —'Ixquec 'a lum calcte 'a jolmctac witz cha, sec ma'oj eyilchj yuj eb' tzex sayn 'ec' cha. Ata tze c'ub'j 'el e b'a 'oxe'oc c'ual, masnto tzjapx can ewin 'a chon̈b' tic, 'ixta to b'i'an, tzex paxx 'a e b'e cha, xchi 'ix.

¹⁷ Xlajw cha, xyaln can ewin 'ixtc 'a 'ix: —An̈ tic on̈, 'oj cac' 'el'choc qui ti 'ix ca'cn 'aych tic.

¹⁸ A yic 'oj qui jaw 'a jun chon̈b' tic, ach xo tic, tza locl jun chac lasu tic 'a wentnu, ch'an̈ 'aj 'oj on̈ 'ac' 'em t'un̈n̈oc tic on̈. Tzlajw cha, tzawtn cot a mam 'a atut tic, a nun, ewin a nul'ej yet' eb' 'ix a nul'ej, yet' pax smasnil eb' ecan.

¹⁹ Toto 'ay junc mach tz'elt 'a yol atut tic, ax tz'aji tzcham yuj owl cha, mun tzyij cot chaml chi 'a yib'an̈, may caln quic 'a on̈. Palta toto 'ay junc quit chon̈b' on̈, to a tzmiln junc mach 'ayc' 'a yol atut tic, toto 'ixta', quib'n̈ tzcan b'in on̈.

²⁰ Toto tzal-l yab'xil tas tzwul qui b'o tic on̈, an̈ xo tic on̈, man̈x yowlalc tz'el'ch tas 'aj xca'cn qui ti 'ayach, xchi ewinac.

²¹ —'Ixta cab' tz'aj 'icha tzeyutj eyaln tic, xchi 'ix 'a ewinac. Xlajw xoj cha, xyaln can sb'a ewin 'a 'ix, 'ix 'at ewinac, spixn can 'och 'ix ch'an̈ chac lasu chi 'a swentnual yatut cha.

²² Ax eb' chawn̈ 'ilwjum cha, 'ix c'och eb' sc'ub'c 'el sb'a 'a lum calcte cha. 'Oxe c'u xcan eb' ta', ax eb' win tzsayn 'ec' eb' cha, ma'ix 'ilchj xon eb' yuj ewinac, yuj cha xmeltzj can pax ewin 'a Jericó.

²³ Xlajw chi b'i'an, 'ix pax 'emt ewin chawn̈ 'ilwjum chi 'a lum jolm witz cha. X'e'x eb' 'a yojl a Jordán, 'ix c'ochx eb' 'aj 'aycn Josué. Syamn 'och eb' yaln 'a 'a, tas 'ix laj 'aj eb'.

²⁴ 'Ix yaln eb' 'ixtic: A Jehová a tz'a'n jun lugar chi 'ayn̈ec, ax eb' 'anma 'ayc' ta', 'ac'b'ilx eb' 'a yol qui c'ab'ec. Man̈x 'anmac yaj snab'en eb' smasnil yuj xiwlal, xchi eb'.