Josué 18 - Chuj San Sebastian Bible

A slum jun tzo'n̈ xo eb' israel

¹ 'A yic tox 'ix yijcan 'ec' eb' israel lum lum cha, syamn sb'a eb' smasnil 'a chon̈b' Silo, 'ix sb'on chan̈ eb' jun Mantiado 'aj tzqui chaj qui b'a yet' Dios.

² Palta 'ayt uque xo 'in̈tal eb' israel mantzac schaj slu'um.

³ Yuj cha, xyaln Josué 'ixtc 'a eb': —¿B'a'n̈ wal 'oj e c'och cajn 'a sat lum lum 'ix yac' Jehová sti ya'n 'ayn̈ec, atn qui Diosalec yet' eb' qui mam quichmec?

⁴ Si'c 'elt 'oxtcwan̈oc winc 'a scal junjn 'in̈tal, yic tzin checn 'at eb' b'eyc'oc 'a sat lum lum tic smasnil, ax smeltzj paxt eb' 'ayin, ax yaln eb' wab'i' tas wal yilx lu'um, sec 'oj stac' wa'n e macl lum chi junjn ex.

⁵ A jun tzo'n̈ winc cha, uc macn̈ 'oj yutc eb' spojn lum lum cha, mun tzcancn Judá yet' slum 'a stojlal sur, ax eb' yin̈tl José, mun tzcan eb' 'a lum 'ay 'a stojlal snorteal yic Judá.

⁶ Ax yic 'oj lajwc spojnc can eb' lum lum cha, ax yi'n cot eb' 'ayin, yuj tas yaj lu'um, ax wa'n 'och suerte 'a yib'n̈ lum 'a yojltac Jehová qui Diosalec.

⁷ Ax pax eb' yin̈tl Leví, may xon slum eb' 'oj yic'. A tas yic eb' yaji, atn ya'malc 'och sti eb' 'anma 'a Dios. A pax eb' yin̈tl Gad yet' eb' yic Rubén, yet' spacl xo eb' yin̈tl Manasés, 'ayx can smacl lum eb' 'a stojlal 'aj tzq'uel c'u 'a sti a Jordán, atn lum xya'cn Moisés win schecb' Jehová, xchi Josué 'a eb'.

⁸ Ax yic wan s'at eb' winc chi 'at yechtoc lum lum cha, xyaln Josué chi 'a eb' 'ixtic: —'Ixquec 'a sat smasnil lum lum cha, tzeyi'n chan̈ yechl lu'um, ax yic tzlajw eyiln lu'um, tzex meltzj paxi, sec an 'oj wa'ch suerte 'a yib'n̈ lum 'a yojltac Jehová 'a chon̈b' Silo tic, xchi 'a eb'.

⁹ 'Ix 'at ewin pojm lum cha, 'ix 'ec' eb' yil smasnil lu'um. Uc c'aj xyutj eb' spojn lu'um, stz'ib'n eb' sb'i jun tzo'n̈ chon̈b' 'ay 'a junjn c'aj lu'um. Xlajw cha, xmeltzj eb' 'a camplamento 'a Silo, 'a 'aj 'aycn Josué.

¹⁰ 'Ix ya'n 'och win Josué suerte 'a yib'n̈ lum 'a yojltac Jehová 'a Silo cha. Xlajw cha, spojn can 'ec' lum lum chi 'a scal eb' yit israelal cha.

A slum eb' yin̈tl Benjamín

¹¹ A lum xb'ab'l 'och suerte 'a yib'an̈, atn lum xyijcan jayc'aj eb' yin̈tl Benjamín. A lum xyij eb' cha, ata xcan lum 'a snan̈l lum yic eb' yin̈tl Judá, yet' eb' yin̈tl José.

¹² Ax smon̈jonal jun slum eb' cha, a 'a norte tz'el yich 'a a Jordán, tz'at lu'um, axta tz'ec' lum 'a stojlal norte yic Jericó, tz'atx lu'um, tz'e'x lum 'a lum jolmctac witz 'a stojlal 'aj tz'em c'u, axta tz'el'ch lum 'a cusltac lum yic Bet-avén.

¹³ Tz'atxi, axta tz'e'x 'a Luz (atn pax tzcuch Bet-el) 'a stojlal sur. Tz'emxi, masnto 'a Atarot-adar, atn jun witz 'ayc' 'a stojlal sur 'a yol yic Bet-horón lum 'ay 'a yalan̈.

¹⁴ Axta tzmeltzj smon̈jonal chi 'a stojlal sur 'a lum witz 'ay 'a yojltac 'at Bet-horón, masnto 'a Quiriat-baal (tzcuch pax Quiriat-Jearim). Yic eb' yin̈tl Judá yaj jun chon̈b' cha, atn smon̈jonal lum tic 'ay 'a stojlal 'aj tz'em c'u.

¹⁵ Ax smon̈jonal lum 'ay 'a stojlal sur, ata tz'el yich 'a Quiriat-jearim, 'a stojlal 'aj tz'em c'u, masnto 'aj tzpac' a a yic Neftoa.

¹⁶ Tz'emx lu'um, masnto 'a yich lum witz 'ay 'a yojltac 'ec' span̈nil lum yic Ben-hinom, 'a snorteal lum pan̈n yic Refaim. Tzlajw cha, tz'ejm pax 'a span̈nil yic Hinom, 'a stojlal 'ec' sur yic Jebús, tz'emxi, masnto 'a 'aj tzpac' a a yic Rogel.

¹⁷ Axta tzmeltzji, tzc'ochx 'a stojlal norte, tz'elx c'och 'a En-semes, tz'atxi masnto 'a Gelilot, atn jun 'ayc' 'a yojltac 'ec' spa'nil Adumín, tz'emxi masnto 'a sjolm q'uen tenm yic Bohán, atn win yunnal Rubén.

¹⁸ Tz'e'x 'a lum yich witz 'ay 'a stojlal norte 'a yojltac 'ec' span̈nil sti a Jordán, masnto tz'e'mch 'a a Jordán cha.

¹⁹ Tz'e'x 'a snorteal yic Bet-hogla, axta tzlajw c'och 'a bahía 'a snorteal yic a Mar Muerto, 'a 'aj tzlajw can c'och a Jordán, atn smon̈jonal lum 'ay 'a stojlal sur.

²⁰ A a Jordán 'aych smon̈jonalc lum 'ay 'a stojlal 'aj tzq'uel c'u. Atn smon̈jonal lum lum tic 'ix pojx can 'ec' 'a scal eb' yin̈tl Benjamín.

^21-24 A jun tzo'n̈ chon̈b' xyij eb' yin̈tl Benjamín, chac'aj yaj lu'um. Jun b'ab'el 'ay lajchwe chon̈b' yet' yaldeail, atn eb' tic: Jericó, Bet-hogla, span̈nil Casis, Bet-arabá, Zemaraim, Bet-el, Avim, Pará, Ofra, Quefar-haamoni, Ofni yet' Geba.

^25-28 Lum schac'ajil 'ay chan̈lajn̈e chon̈b' yet' yaldeail, atn eb' tic: Gabaón, Ramá, Beerot, Mizpa, Cafira, Mozah, Requem, Irpeel, Tarala, Zela, Elef, Jebús (atn Jerusalén) Gabaa yet' Quiriat. Atn jun tzo'n̈ chon̈b' tic xyique'ej eb' yin̈tl Benjamín.