Josué 17 - Chuj San Sebastian Bible

Slum eb' yin̈tl Manasés

¹ Atn lum lum tic 'ix yij can eb' yin̈tl Manasés, win sb'ab'l 'unnal José. A eb' yic can Maquir, sb'ab'l 'unnal Manasés, atn smam eb' 'aj Galaad. A eb' 'ix 'i'n can lum slum Galaad cha, yet' lum yic Basán 'a stojlal 'aj tzq'uel c'u 'a a Jordán yujto caw jeln eb' ya'n owal.

² Ax jun tzo'n̈ xo eb' yin̈tl Manasés, ton̈j 'ix yac' eb' suerte yuj slu'um. 'Ixta xyutj eb' yi'n can slum cha, a tzyal jayc'aj eb' 'a smacl cha, atn eb' yin̈tl Abiezer, Helec, Asriel, Siquem, Hefer yet' Semida. A eb' tic yunnal Manasés eb', yixchicn José eb'.

³ Palta a pax Zelofehad, win yunnal Hefer yixchicn Galaad, yunnal Maquir yixchicn Manasés, may junc yunnal to winac, cojn own̈ yisl 'ay: Atn 'ix Maala, 'ix Noa, 'ix Hogla, 'ix Milca yet' 'ix Tirsa.

⁴ Atn eb' 'ix tic, xjaw 'a yojltac win ya'mal 'och sti eb' 'anma 'a Dios, atn win Eleazar yet' 'a Josué yunnal Nun, yet' 'a eb' syajlil chon̈b' cha. Xyaln eb' 'ix 'ixtc 'a eb': —A Jehová 'ix aln can 'a Moisés, chajtlto tz'ajx qui lum on̈, 'icha tz'aj yajx yic eb' quican on̈, xchi eb' 'ix. Yuj cha, xya'n Josué slum eb' 'ix, 'icha yic eb' yican smam eb' 'ix cha, yujto 'ixta yutjnac Jehová yalni.

^5-6 Yujto a eb' 'ix yisl Zelofehad, 'ix 'ajx slum eb' 'ix 'icha x'aj yajx slum eb' winac, yuj cha, to lajn̈ petn̈ slum eb' yin̈tl Manasés scha'aj. Chuc pax yaj lum yic Galaad, yet' lum yic Basán 'ix 'ajx 'a jun tzo'n̈ xo eb' yin̈tl Manasés cha, atn lum 'ay 'a stojlal 'aj tzq'uel c'u 'a sti 'ec' a Jordán. Yuj cha, ax lum Galaad 'ix 'ajx 'a jun tzo'n̈ xo eb' yin̈tl Manasés.

⁷ A lum slum eb' yin̈tl Manasés cha, tz'atn̈j lum 'a Aser, masnto tzc'och lum 'a Micmetat, atn lum 'ay 'a yojltac 'at Siquem, tz'atx 'a stojlal sur masnto tzc'och lum 'a sti a spac'b'a 'ay 'a Tapúa.

⁸ Wach'xam a lum Tapúa cha, yic eb' yin̈tl Manasés yaji, palta a jun chon̈b' cha, yicn̈ej to eb' yin̈tl Efraín yaji, yujto 'aycn 'a smon̈jonal slum eb'.

⁹ Tz'ejm pax jun mon̈jon chi 'a stojlal sur, masnto tz'emch 'a sti a a 'a yol yic Caná. A jun tzo'n̈ chon̈b' 'ay 'a sti a a 'a stojlal sur cha, yic Efraín yaj eb', wach'xam a lum lum 'ay 'a stojlal norte 'aj 'ay a a cha, yic Manasés lu'um.

¹⁰ A lum yic Efraín cha, ata xcan lum 'a stojlal sur 'a sti a a cha, ax Manasés 'ix can 'a stojlal norte. Ax a Mar Mediterráneo 'ix 'ochcn smon̈jonoc eb' 'a stojlal 'aj tz'em c'u. A lum slum eb' yin̈tl Aser 'ix can lum 'a stojlal norte, ax lum yic eb' yin̈tl Isacar, 'ix can lum 'a stojlal 'aj tzq'uel c'u.

¹¹ 'Ix yij pax eb' yin̈tl Manasés chi jun tzo'n̈ xo chon̈ab', atn eb' lum xcan 'a yol yic Isacar yet' 'a yic Aser, junjn eb' chon̈b' chi yet' yaldeail 'ay 'a stz'ey: Atn Bet-seán, Ibleam, Dor, Endor, Taanac, Meguido, yet' pax 'oxe xo chon̈b' yamn yaji.

¹² Ma'ix stac' spechn 'el eb' yin̈tl Manasés eb' cananeo cajn 'a jun tzo'n̈ chon̈b' cha, yujto ste'wtzej sb'a eb' scan cajn ta'.

¹³ Palta ax yic xyi'n eb' israel chi yip si'mb'il, 'ix 'ajx pural eb' cananeo chi ya'n stojlb'al yuj eb', palta ma'ix pechx 'el eb' yuj eb'.

Schaj eb' yin̈tl José*r* slum 'a lum calcte'

¹⁴ 'Ix yaln eb' yin̈tl José 'a win Josué 'ixtic: —¿Tas yuj cojn jun macn̈ lum lum 'ix ac' qui macl lumoc on̈? Palta an̈ tic on̈, caw niwn qui b'isl on̈, yujto a Jehová 'ix ya'n̈j syaxilal 'a quib'n̈ on̈, xchi eb'.

¹⁵ —Ya sb'a to caw niwn e b'isl ax tic, ma'ix 'e'ch lum jolmctac witz yic Efraín 'ayex, 'ixquec 'a lum calcte 'a lum yic eb' ferezeo yet' 'a lum yic eb' yin̈tl Refa. A lum chi tze ch'acte'ej, xchi Josué 'a eb'.

¹⁶ 'Ix yaln eb' 'ixtic: —Wal yel, a lum jolmctac witz, caw ma'oj 'e'choc lum 'ayn̈ on̈. Palta ax eb' cananeo cajn 'a span̈nil jun lum cha, 'ay sq'uen caruaje eb' yic owal, 'ixta pax eb' cajn 'a Bet-seán yet' eb' cajn 'a junjn yaldeail lum ya'lical Jezreel, xchi eb'.

¹⁷ Yuj cha, xta'w Josué 'a eb' yin̈tl José cha, atn eb' yic Efraín yet' eb' yic Manasés, xyaln 'a eb' 'ixtic: —Ax tic ma'oj stac' to cojn jun macn̈ lum lum tic 'oj eyic', yujto caw niwn e b'isul, caw jeln ex paxi.

¹⁸ A wal lum jolmctac witz, lum caw 'ay stel sat cha, a 'oj eyico'oc, 'oj eyac' e nab'en e c'ann te te 'ay 'a sat lum cha, yujto ax 'oj eyico'oc lum smasnil. A eb' cananeo cajn 'a sat lu'um, 'oj e pechl eb' ta', wach'xam caw jeln eb', wach'xam 'ay pax sq'uen caruaje eb', xchi Josué 'a eb'.