Josué 16 - Chuj San Sebastian Bible

Slum Efraín yet' Manasés

¹ A lum lum 'ix yij eb' yin̈tl José, 'ix 'el yich lum 'aj tzq'uel c'u 'a a Jordán 'a 'aj tzpac' a a yic Jericó, tz'e'x 'a cusltac lum 'a jolmctac witz, tz'at 'a Jericó tzc'och 'a Bet-el.

² A Bet-el, a pax tzcuch Luz 'a pecti', tz'e'x 'a slum eb' arquita, masnto 'a Atarot.

³ Tz'atx lum 'a stojlal 'aj tz'em c'u atn 'a slum eb' jafletita, masnto 'a smon̈jonal yic Bet-horón lum 'a yaln̈ 'ejmi, masnto tzc'och 'a Gezer, tz'elx c'och pax lum 'a a Mar Mediterráneo.

⁴ Atn lum tic schaj eb' yic Manasés yet' eb' yic Efraín smacl lumoc, atn eb' yin̈tl can José.

Slum eb' yin̈tl Efraín

⁵ A smon̈jonal slum eb' yin̈tl Efraín, tz'el yich 'a stojlal 'aj tzq'uel c'u, 'a Atarot-adar masnto tzc'och 'a Bet-horón, lum 'a yib'n̈q'ue'i.

⁶ Tzlajw cha, tz'atx lu'um, masnto tzc'och 'a a Mar Mediterráneo. A 'a snorteal slum eb' cha, ata 'ay Micmetat, axta tzmeltzj smon̈jonal chi 'a stojlal 'aj tzq'uel c'u, masnto 'a Taanat-silo. Tzlajw cha, tz'e'x 'a Janoa,

⁷ tz'atx ta', axta tz'emch 'a Atarot yet' 'a Naarat, masnto tzyamchj Jericó yu'uj, axta tz'el'ch 'a a Jordán.

⁸ Tz'elx 'a Tapúa, axta tz'atx can smon̈jonal 'a stojlal 'aj tz'em c'u, masnto tzc'och 'a a niwn a 'a yol yic Caná, axta tz'el'ch 'a a Mar Mediterráneo. Atn lum tic xyij can eb' yin̈tl Efraín, 'ix pojx 'ec' lum 'a junjn macn̈ yin̈tl eb'.

⁹ 'Ayt pax jun tzo'n̈ xo chon̈ab', yet' jun tzo'n̈ xo aldea 'ayc' 'a sat slum eb' yin̈tl Manasés, 'ix yij eb' yin̈tl Efraín pax yico'oc.

¹⁰ Palta a eb' yin̈tl Efraín, ma'ix pechx 'el eb' cananeo cajn 'a Gezer yuj eb', 'ix 'ajx pural eb' ya'n stojlb'al. Yuj cha, 'ix cann̈j eb' cananeo chi 'a scal eb'.