Josué 14 - Chuj San Sebastian Bible

Xpojx 'ec' lum Canaán yuj Josué

^1-2 A nan̈l slajn̈c'ajil eb' yin̈tl Israel mantzac schaj slu'um, 'ix schaj eb' slum chi 'a lum Canaán, lum xpojx can 'ec' yuj win Eleazar ya'mal 'och sti eb' 'anma 'a Dios, yet' Josué yunnal Nun, yet' eb' yajl yaj 'a junjn c'aj eb' yin̈tl Israel. Ton̈j xya'ch eb' suerte 'a yib'n̈ lu'um yic xpojx 'ec' can lum 'a eb', 'icha wal yaj yaln can Jehová 'a Moisés.

³ A 'a yic yaln̈taxi, 'ix ya'n can Moisés lum 'ay 'a sc'axpil 'ec' a Jordán 'a nan̈l yoxc'ajil 'in̈tal.

⁴ Chapojn̈ x'ajl eb' yin̈tl José, atn eb' yic Manasés, yet' eb' yic Efraín. Ax eb' yin̈tl Leví, may smacl lum eb' scha'aj, cojn jun tzo'n̈ chon̈b' x'ajx 'a eb' yet' 'aj tzwa scajb'en noc' eb' 'a stitc chon̈b' cha.

⁵ 'Icha wal yaj yaln can Jehová 'a Moisés, 'ixta xyutj eb' israel spojn can 'ec' lum lum chi 'a 'a.

Schaj Caleb smacl lu'um

⁶ A eb' yin̈tl Judá, 'ix jaw eb' 'a lum Gilgal, yic xpaxtin eb' yet' Josué, ax Caleb win cenezeo yunnal Jefone, 'ix yaln win 'ixtc 'a Josué cha: Na cot tas 'ix yalcn Jehová 'a win Moisés atn win schecab', yic xyaln oj ach tic yet' pax wuj an tic, yic 'ayn̈ 'ec' 'a lum Cades-barnea.

⁷ An tic, 'ayx chawinc ab'il in q'uinal yic on̈ schecn cot Moisés 'a lum Cades-barnea, yic tzwul qui maclnoc tas wal yilx jun lum tic; ax yic on̈ meltzjec, 'icha wal yilxi, 'ixta wal 'ix wutj waln yet' smasnil in c'ojol.

⁸ Ax pax jun tzo'n̈ xo ewin xwulc' quet'oc, caw man̈ wach'c xyutj ewin yalni, caw xib'tj ewin eb' 'anma'. Palta an̈ xo tic, caw wach' xcutj calni, tojl xcutj qui nab'en 'a sat Jehová qui Diosalec.

⁹ Yuj cha, xya'n can Moisés sti 'ayin, xyaln 'ixtic: A lum lum 'aj ach xitc' cha, caw ec 'oj 'aj lum yet' eb' en̈til, yujto caw tojl xotj a nab'en 'a sat Jehová qui Diosalec, xchi can 'ayin.

¹⁰ A jun tic, 'ayx 45 ab'il yaln can 'ayn yuj Jehová, 'a yic 'ayn̈ec 'ec' 'a lum cusltac lu'um. Yujn̈ej jun alb'il can cha, yuj cha, pitzn in to ticnec. Ax ticnec, 'ayx 85 ab'il in q'uinal.

¹¹ Palta caw wal an̈ja 'ayt wip tzwab'i, 'icha 'a yic in schecn cot Moisés wul in maclnoc wil lum lum tic, 'ixta to in te'nal tzwab'i, tztac' to in b'eyq'ui tztac' to pax wa'n owal.

¹² Yuj cha, tzin c'an 'aych ticnec, to tzac' lum jolmctac witz tic 'ayin, 'icha yutjnac yaln can Jehová. Ab'jnac ach tic 'a yic jun tiempoal cha, chajtlto ata cajn eb' niwc winac, eb' yin̈tl can win Anac; caw niwc yaj schon̈b' eb' sb'oni, wach' pax yajch smuroal schon̈b' eb' cha. Palta an tic, caw tzwa'ch Jehová yipc in c'ojol, to 'oj colwjoc wet'oc yic 'oj wi'nc 'el eb' ta', 'icha yaj yaln cani, xchi Caleb.

¹³ Yuj cha, xyaln Josué wach' paxti 'a yib'n̈ Caleb, 'ix ya'n can lum Hebrón smacl lumoc, yet' 'a smasnil eb' yin̈til.

¹⁴ 'Ixta 'ix 'aj yochcn lum Hebrón yico'oc win Caleb yet' eb' yin̈til, yujto caw tojl yaj snab'en win 'a sat Jehová Dios.

¹⁵ A chon̈b' Hebrón cha, Quiriat-arba sb'i 'a yic pecti', yujto Arba sb'i jun win niwc winc b'inab'il 'a scal eb' yin̈tl can win Anac. A yic xlajw ye'cn jun tzo'n̈ tic, 'ix 'och junc'ojlal 'a jun lugar cha.