Josué 12 - Chuj San Sebastian Bible

Eb' rey 'emnc yuj Moisés

¹ 'Ay chawn̈ eb' rey 'emnc yuj eb' israel 'a lum lum 'ay 'a stojlal 'aj tzq'uel c'u, 'a sc'axpil 'ec' a Jordán. A smasnil lum lum xyij can 'ec' eb' cha, tz'atn̈j lum 'a a a tzcuch Arnón, masnto 'a lum jolm witz Hermón, yet' smasnil lum span̈nil sti a Jordán, 'a stojlal 'aj tzq'uel c'u.

² A jun rey b'ab'l 'emnc cha, atn win Sihón sreyl eb' amorreo cajn 'a chon̈b' Hesbón. A smacb'en 'aj xyac' yajlil, tz'eln̈j yich 'a chon̈b' Aroer, jun 'ay 'a sti a a tzcuch Arnón, tz'ec' 'a spacl snan̈l lum span̈nil sti a Jaboc, atn a 'aych smon̈jonoc lum slum eb' yin̈tl Amón, (tzyal 'el'chi atn nan̈loc lum yic Galaad).

³ A pax tz'a'n yajlil 'a yib'n̈ lum span̈nil sti a Jordán 'a stojlal 'aj tzq'uel c'u, tz'el yich 'a a niwquil pama tzcuch Cineret, masnto 'a a Mar Muerto, 'a stojlal Bet-jesimot, 'a stojlal sur, masnto 'a yich witz Pisga.

⁴ Ax win schab'l cha, atn win Og, win sreyl Basán, cojxn jun winc chi cann̈c can 'a scal eb' yin̈tl Refa, ata 'e'nc cajn win 'a Astarot yet' 'a chon̈b' Edrei.

⁵ A smacb'en 'aj tzyac' yajlil, tz'eln̈j yich 'a lum jolm witz Hermón, tz'ec' 'a Salca, 'a smasnil yol yic Basán, tzc'och 'a smon̈jonal yic Gesur yet' yic Maaca, masnto 'a junx lum spacl yic Galaad, lum yic can win Sihón sreyl Hesbón.

⁶ Atn eb' rey chi 'emnc yuj Moisés win schecb' Jehová, yet' pax yuj eb' soldado israel. Ax Moisés cha, a 'ix 'a'n can jun tzo'n̈ lum tic 'a eb' yin̈tl Rubén, 'a eb' yin̈tl Gad yet' 'a spacl eb' yin̈tl Manasés.

Eb' rey 'emnc yuj Josué

^7-8 Xlajw cha, ax Josué yet' eb' yit israelal cha, 'ix yac' eb' owl yet' jun tzo'n̈ eb' rey. 'Ix 'ejm eb' yuj eb' israel, atn eb' 'ay 'a sc'axpil 'ec' sti a Jordán 'a stojlal 'aj tz'em c'u, tz'atn̈j 'a lum Baal-gad 'a span̈nil lum Líbano yet' eb' 'ay 'a lum jolm witz Halac 'a stojlal norte, tzcan 'a stz'ey stojlal sur yic Edom. Locn eb' 'ay 'a lum yichtc witz 'a stz'ey lum span̈nil sti a Jordán 'a stojlal 'aj tz'em c'u, yet' eb' 'ay 'a lum cusltac lum tzcan 'a stojlal sur. 'Ix yij 'ec' eb' israel slum eb' hitita, eb' amorreo, eb' cananeo, eb' ferezeo, eb' heveo yet' eb' jebuseo. Ax Josué 'ix pojn 'ec' jun tzo'n̈ lum chi 'a eb' yit israelal.

^9-24 A eb' lum chon̈b' 'emnc sreyl yuj eb' israel, atn eb' lum tic: Jericó, Hai, jun 'ayc' 'a sla'nil Bet-el, Jerusalén, Hebrón, Jarmut, Laquis, Eglón, Gezer, Debir, Geder, Horma, Arad, Libna, Adulam, Maceda, Bet-el, Tapua, Hefer, Afec, Sarón, Madón, Hazor, Simron-merón, Acsaf, Taanac, Meguido, Cedes, Jocneam 'a yol yic jolm witz Carmelo, Dor jun 'ay 'a yol yic Dor cha, Goím 'a yol yic Gilgal, yet' Tirsa. 'Ay 31 sb'isl eb' lum chon̈b' chi 'a smasnil, 'ixta pax sb'isl eb' rey chi chamnac.