Josué 10 - Chuj San Sebastian Bible

Lajwnac 'el eb' amorreo

¹ Ax xyab'n sb'a Adonisedec sreyl Jerusalén, to a Josué a 'ix satn can 'el chon̈b' Hai yet' sreyal, 'ixta pax yutjnac can chon̈b' Jericó yet' sreyl 'a yaln̈tax cha. Xyab'n paxi to a eb' 'aj Gabaón 'ayx junc'ojlal 'a scal eb' yet' eb' israel cha, junn̈j yaj eb' yet' eb',

² yuj cha, 'ix xiw chan̈ winac, yujto a lum chon̈b' Gabaón, caw wal niwquil chon̈ab'. Caw wal b'inab'il, 'ec'b'al 'a yib'n̈ lum chon̈b' Hai, ax eb' 'anma smasnil 'a jun chon̈b' cha, caw wal jeln eb' 'a owal.

³ Yujn̈ej cha, x'at ya'noc Adonisedec alxoc 'a win Hoham sreyl Hebrón, 'a win Piream sreyl Jarmut, 'a win Jafía sreyl Laquis yet' 'a win Debir sreyl Eglón, xyaln 'a eb' 'ixtic:

⁴ —Cotn̈ec, colwjan̈c wet'oc, ca'c owl yet' chon̈b' Gabaón, yujto sb'o strato yet' Josué yic 'ix 'och eb' 'a junc'ojlal yet' eb' israel, xchi.

⁵ 'Ixta x'aj schan 'el'ch sb'a own̈ eb' rey cha, junn̈j xyutj eb' soldado chi smasnil yic tz'at ya'nc eb' owl 'a chon̈b' Gabaón, sb'on chan̈ eb' scamplamento ta'.

⁶ Ax eb' 'aj Gabaón cha, 'ix 'at yac' eb' alxoc 'ixtc 'a Josué, 'a 'aj 'ay scamplamento 'a Gilgal: —Cotn̈ muc'uc, wul coln̈ an̈ a checb' on̈ tic 'a yol sc'ab' smasnil eb' sreyl eb' amorreo cajn 'a lum jolmctac witz, yujto junn̈j xyutj sb'a eb' smasnil yic tzon̈ wul smilnc eb' on̈, xchi eb'.

⁷ Yuj cha, 'ix cot Josué yet' smasnil soldado 'a Gilgal cha, 'ix cot eb' caw jeln 'a owl chi yet'oc.

⁸ 'Ix yaln Jehová 'ixtc 'a Josué cha: —Man̈ ach xiw xon jac yuj ewinac, yujto an 'oj wac' ewin 'a yol e c'ab', may xon wal junc win 'oj ste'wtzoc sb'a ya'n owl eyet'oc, xchi.

⁹ 'Ix cot Josué yet' eb' soldado 'a Gilgal, smasnil 'ac'wl 'ix b'ey eb' yic xc'och eb' 'a stz'ey eb' amorreo yic man̈ nanoc yuj eb'.

¹⁰ Ax Jehová 'ix ya'n 'och xiwlal 'a snab'en eb' amorreo cha. Caw niwn eb' xchamcn 'a Gabaón yuj eb' israel cha. Xlajw cha, 'ix 'at eb' israel chi 'a spatc eb' 'a jun b'e tzq'ue'ch a chon̈b' Bet-horón. Til wal eb' smilcn eb' israel chi 'a yol b'e yic xc'och eb' 'a chon̈b' Azeca yet' 'a chon̈b' Maceda.

¹¹ 'Ay pax eb' xcob' yac' ganar s'at 'elc 'a eb' israel cha, ya' sb'a wan spichlj 'ejm eb' 'a lum span̈nil Bet-horón. Ax Jehová 'ix 'a'n cot jun tzo'n̈ niwc sq'uenal sacb'at 'a yib'n̈ eb', masnto 'a Azeca. Yel xo wal caw niwn eb' xcham yuj q'uen sq'uenal sacb'at cha, 'a yib'n̈ pax eb' xtzu'x cham yuj eb' israel cha.

¹² A yic x'ajx eb' amorreo chi 'a yol sc'ab' eb' israel yuj Jehová, a 'a jun c'u cha, ata xyal Josué 'a Jehová 'ixtc 'a sat smasnil chon̈ab': 'Och cab' wan c'u 'a yib'n̈ chon̈b' Gabaón; 'och cab' wan 'uj 'a yib'n̈ lum ya'lical Ajalón, xchi.

¹³ 'Ix 'och wan sb'ey c'u yet' 'uj, masnto xlajw scham eb' 'ajc'ojl yajch 'a eb' israel cha. Atn jun tic tz'ib'b'il can 'a ch'an̈ slibro win Justo, ata tzyal 'ixtic: 'Ix 'och wan sb'ey c'u 'a spacl satcha'an̈, tecn jun c'u 'ix 'och wan sb'eyi, ma'ix q'uic'b' xon 'a jun c'u cha, xchi.

¹⁴ May juncxo c'u 'aj 'ix uj 'icha jun tic, may 'aj ujnac 'a yic pecti', may pax 'aj 'ix uj jun 'ejmocx 'a spatquil xo, yic xyab'n Dios tas xyal junc 'anma', yujto a xcolwj yet' eb' israel 'a owal.

¹⁵ Masnto 'a yic xlajw owl cha, xpax Josué yet' eb' soldado 'a scamplamento eb' 'aycn 'a Gilgal.

¹⁶ Ax own̈ eb' rey cha, 'ix 'atcn eb' 'eloc; 'ay jun n̈aq'uen 'a yol yic Macedá, ata x'at eb' sc'ub'c 'el sb'a.

¹⁷ Ax x'aji, 'ix 'ilchj pax 'elt eb' 'a yojl n̈aq'uen cha, 'ix 'at alxoc yab' Josué.

¹⁸ Yuj cha, xyaln win 'ixtic: B'alc 'at q'uen niwc q'ue'en 'a 'aj 'ay sti jun n̈aq'uen cha, tzeya'n can 'och stan̈mal.

¹⁹ Ya sb'a ax xo tic, tzex 'atx 'a spatquil eb' 'ajc'ojl wan laj s'at 'elc cha, milc cham junc'aj xo eb' soldado tzlaj can cha. Man̈ e chach eb' 'a yol schon̈b' cha, yujto a Jehová qui Diosalec, a 'ix 'a'n eb' 'a yol qui c'ab'ec, xchi.

²⁰ Til wal eb' amorreo chi xcham yuj Josué yet' pax yuj eb' soldado israel cha. Ax eb' ma'ix cham yuj owl cha, 'ix 'at eb' scol sb'a 'a yol schon̈b' wach' yajch smuroal.

²¹ Ax eb' soldado israel, 'ix meltzj eb' smasnil. May tas x'i'n eb', wach' xc'ochx eb' 'a scamplamento 'aj 'aycn Josué 'a yol yic Maceda. Cojxn cha, man̈x 'a mach 'ix ste'wtzej sb'a yaln tu paxti 'a spatc eb' israel cha.

²² Xlajw cha, xyaln Josué 'ixtic: —'At jacc sti q'uen n̈aq'uen cha, tzeyi'n 'elt eb' rey chi yown̈il 'a yojl q'ue'en, xchi.

²³ 'Ixta 'ix yutj eb' israel chi yi'n 'elt own̈ eb' rey chi 'a yol n̈aq'uen cha, atn win sreyl Jerusalén, win yic Hebrón, win yic Jarmut, win yic Laquis yet' win yic Eglón.

²⁴ A yic xjaw eb' 'a yojltac Josué, 'ix yawtn cot smasnil eb' soldado cha, 'ix yaln 'a eb' syajlil eb' chi 'ixtic: —Nitzc cot e b'a, tze yetz'tan e te'n sjaj jun tzo'n̈ rey tic, xchi 'a eb'. 'Ix cot eb' muc'uc, 'ix yetz'tan eb' stec' sjaj ewin rey cha.

²⁵ 'Ix yaln Josué 'ixtic: Man̈ ex xiwoc, may cab' e chab'c'ojlal; caw te'n tzeyutj e b'a eya'n owal, yujto 'ixtn tic 'oj yutc Jehová smasnil eb' 'ajc'ojl yajch 'ayn̈ec, xchi.

²⁶ Xlajw cha, xya'n Josué milxoc eb' rey cha, 'ix ya'n t'un̈xoc q'ue eb' 'a sc'ab' te', junjn te te chi 'aj xq'ue t'un̈n junjn eb'. 'Ix cann̈j eb' ta', masnto 'ix 'em c'u.

²⁷ Ax yic wan sq'uic'b'cha'an̈, 'ix ya'n Josué jiyxoc 'emt eb' 'a sc'ab' te cha, 'ix 'at ya'n 'ajxoc can pax 'och eb' 'a yol q'uen n̈aq'uen 'aj sc'ub'j 'el sb'a eb' cha. Xlajw cha, 'ix smacn can eb' sti jun n̈aq'uen chi yet' q'uen niwc q'ue'en. 'Ixta x'aj smacchj can jun n̈aq'uen cha.

Jun tzo'n̈ xo chon̈b'*r* 'ix yac' lajwc eb' israel

²⁸ A 'a jun c'u cha, ata 'ix 'och pax Josué 'a yol chon̈b' Maceda yet' eb' soldado. 'Ix satcn 'el eb' jun chon̈b' cha, smiln can eb' smasnil 'anma cajn ta', man̈x 'a xon junc xcani. 'Icha wal yutjnac Josué win sreyl chon̈b' Jericó, 'ixta pax xyutj win sreyl chon̈b' Maceda cha.

²⁹ Xlajw cha, 'ix 'atx Josué yet' smasnil eb' soldado cha, axta xc'ochx eb' yac' owl 'a chon̈b' Libna, 'ix 'ochx owl chi yuj eb' ta'.

³⁰ 'Ix 'ajx jun chon̈b' chi yet' sreyl 'a yol sc'ab' eb' soldado israel yuj Jehová. Man̈x 'a junc mach pitzn xcan 'a jun chon̈b' cha. 'Icha wal 'ajnc win sreyl Jericó yuj eb', 'ixta 'ix yutj eb' win sreyl Libna cha.

³¹ 'Ix 'atx Josué yet' eb' soldado 'a Libna, axta xc'ochx eb' 'a chon̈b' Laquis. Ax 'a yojltac cot jun chon̈b' cha, ata sb'o chan̈ eb' scamplamento. Xlajw cha, 'ix 'och eb' 'a owal.

³² Ax 'a yewial sc'och eb' ta', 'ix 'ajx jun chon̈b' Laquis chi 'a yol sc'ab' eb' yuj Jehová. 'Icha xyutj eb' chon̈b' Libna, 'ixta xyutj eb' smiln cham eb' 'anma smasnil 'a jun chon̈b' cha, yet' pax smasnil no cajb'en noc'.

³³ Ax win Horam, sreyl Gezer, 'ix cot cob' win colwjoc 'a chon̈b' Laquis yet' smasnil eb' soldado. Palta ax x'aji, 'ix cham win yet' smasnil eb' soldado yuj Josué, man̈x 'a xon junc mach pitzn xcan 'a eb'.

³⁴ 'Ix 'atx Josué yet' smasnil eb' soldado 'a Laquis; axta xc'ochx eb' 'a chon̈b' Eglón. 'Ix sb'on pax eb' scamplamento 'a stz'ey jun chon̈b' cha. Xlajw cha, 'ix ya'n pax eb' owl ta'.

³⁵ A 'a jun c'u cha, ata smil cham smasnil eb' 'anma cajn 'a jun chon̈b' cha, yet' smasnil no noc'. 'Icha wal x'ajcn chon̈b' Laquis, 'ixta xyutj can eb' jun chon̈b' cha.

³⁶ 'Ix 'atx Josué yet' smasnil eb' soldado 'a Eglón, axta xc'ochx eb' 'a chon̈b' Hebrón, 'ix ya'n pax eb' owl ta'.

³⁷ A yic x'och eb' 'a jun chon̈b' cha, 'ix lajw can 'el jun chon̈b' chi smasnil yuj eb'. Smiln can eb' win rey, smasnil eb' 'anma', no cajb'en noc' yet' jun tzo'n̈ xo chon̈b' 'a sla'nil cha. 'Icha xyutj can eb' chon̈b' Eglón, 'ixta xyutj can eb'.

³⁸ 'Ix 'atx Josué yet' smasnil eb' soldado, axta xc'ochx eb' yac' owl 'a chon̈b' Debir.

³⁹ 'Ix smiln cham eb' sreyl jun chon̈b' cha, yet' pax smasnil 'anma cajn 'a stz'ey cha. Man̈x 'a xon junc 'anma pitzn xcan ta', c'uxn xlajw 'el eb' smasnil. 'Icha wal xyutj can eb' Hebrón yet' sreyal, Libna yet' sreyal, 'ixta pax xyutj can eb' junx chon̈b' cha.

⁴⁰ A Josué satn 'el smasnil eb' 'anma cajn 'a jun tzo'n̈ lugar cha. 'Ix satl smasnil eb' rey 'ay 'a lum jolmctac witz, eb' 'ay 'a yol yic Neguev, eb' 'ay 'a lum niwc pan̈an yet' eb' 'ay 'a lum pa'ctac. C'uxn xcham eb' smasnil yu'uj, man̈x 'a xon wal junc mach pitzn xcan 'a jun tzo'n̈ chon̈b' cha. C'uxn satl eb' smasnil 'icha yaj yaln Jehová, atn sDiosal Israel.

^41-42 Jun 'ejmn̈ej satl eb' rey chi yuj Josué, 'ix yi'n can 'ec' smasnil slum eb'. 'Ix 'el yich yi'n 'ec' slum eb' chi 'a Cades-barnea masnto 'a Gaza, smasnil pax lum yic Gosén masnto xc'och 'a Gabaón, yujto a Jehová sDiosal Israel, a tz'a'n owal.

⁴³ Xlajw xoj cha, 'ix meltzj Josué yet' smasnil eb' soldado 'a 'aj 'ay scamplamento 'a Gilgal.