Josué 1 - Chuj San Sebastian Bible

'Ajxnac yopiso Josué yuj Dios

¹ A yic tox xcham Moisés win schecb' Dios, ax 'a Josué win yunnal Nun, win colwjum 'a Moisés, ata xpaxtin pax Jehová, xyaln 'ixtic:

² Chamnc xo win in checb' Moisés, ax ticnec b'i'an, achxo 'oj a jucb'tzoc eb' 'anma tic, yic tzach 'ec' yet' eb' 'a yojl a Jordán, ax a c'och yet' eb' 'a sat lum lum tzwac' eyico'oc.

³ Smasnil lum lum 'aj 'oj eyeq'ui, 'oj wac' lum 'ayex, 'icha wal xwutj waln 'a win Moisés cha.

⁴ Tzcot lum e lum chi 'a lum cusltac lu'um 'a stojlal sur, masnto 'a lum Líbano 'a stojlal norte. Tzc'och lum 'a sti a niwn a Eufrates 'a stojlal 'aj tzq'uel c'u, yet' pax smasnil lum yic eb' hitita, masnto tzc'och lum 'a sti a niwquil Mar Mediterráneo, 'a stojlal 'aj tz'em c'u.

⁵ May xon wal junc mach 'oj techjoc ya'n owl et'oc yujto 'aynn̈ej 'ec' et' 'icha xwac' yet' win Moisés. May wal b'a'n̈ 'oj ach waccan a ch'ocoj.

⁶ Te'n tzotj a b'a, man̈ ach xiwoc, yujto ach 'oj a pojc smacl lum eb' et israelal tic 'a 'a, atn lum 'aj wa'jnac in ti wa'n 'a eb' e mam eyicham.

⁷ A tas tzwal 'ayach, to tza te'wtzej a b'a, man̈ ach xiwoc, tza yiclni smasnil jun tzo'n̈ ley 'ix yalcn win in checb' Moisés 'ayach. Wach' tzotj a yiclni smasnil, sec wach'n̈j 'oj el'ch yet' tas 'oj a b'o'.

⁸ May cab' b'a'n̈ tzcan awtn ch'an̈ un̈ 'aj tz'ib'b'il can ley, sc'ual, yac'wlil a cuyn ch'an̈, sec wach' 'oj a yiclc tas tz'ib'b'il can 'a ch'an̈. Toto 'oj a yicloc, wach' 'oj 'el'choc smasnil tas 'oj a b'o'.

⁹ An tzwala, te'wtzej a b'a, man̈ ach xiwoc, may cab' a chab'c'ojlal, yujto Jehová in, a Diosal in, 'aynn̈ej 'och et' 'aj tzach 'eq'ui, xchi Dios 'a Josué.

Tzyac' lista sb'a Josué s'at 'a owal

¹⁰ Xlajw xoj cha, 'ix yaln Josué 'ixtc 'a eb' yajl yaj 'a scal eb' chon̈b' cha:

¹¹ 'Ixquec 'a smasnil camplamento, tzeyaln can 'a eb' 'anma', to tzyac' lista eb' tas tzc'uxu, yujto chab'ej tzon̈ 'e'c 'a yojl a Jordán yic tz'at qui chanec lum lum tzyac' Jehová qui Diosalec quico'oc, xchi 'a eb'.

¹² An̈jtona', 'ix yaln Josué chi 'ixtc 'a eb' yin̈tl Rubén, 'a eb' yin̈tl Gad yet' 'a spacl eb' yic Manasés:

¹³ —Nac cot tas yaljnac can Moisés 'ayex, atn win schecb' Dios yic yaln can 'ixtic: A Jehová qui Diosalec, a x'a'n jun lum tic 'ayex, sec wach' ata 'oj e can cajan, xchi.

¹⁴ Ax ticnec jun, 'actjec can eyistzil, eyunnal yet' smasnil e cajb'en noc' 'a sat lum lum 'aj ex yactj can Moisés, atn lum 'ay 'a stojlal 'aj tzq'uel c'u 'a a Jordán tic. Palta ax xo e masnil ex winc to smoj e at 'a owal, 'ijec eyamc'ab' yic owal. Tzex b'ab'lj yuj eb' quit chon̈b'ec tic, yic tzex colwj yet' eb',

¹⁵ masnto 'oj yac' Jehová jun slum eb' 'aj 'oj can cajn cha, 'icha 'ix yutj ya'n eyic ax tic. At yic tzyique'ej eb' lum lum chi yuj Jehová qui Diosalec, 'ixta to b'i'an, tzex meltzj paxt 'a lum eyic 'ay 'a stojlal 'aj tzq'uel c'u 'a a Jordán tic yic tzeyica'an can lum 'a jun 'ejmn̈ej, atn lum xya'cn Moisés 'ayex, win schecb' Jehová, xchi Josué.

¹⁶ Xlajw cha, 'ix ta'w eb' 'a Josué 'ixtic: —A tas tzal 'ayn̈ on̈, 'oj qui yiclc on̈; a 'aj tzon̈ a checb't on̈, 'oj qui 'atn̈j on̈.

¹⁷ 'Icha wal xcutj qui yiclni tas xyal Moisés 'ayn̈ on̈, 'ixtnta 'oj qui yiclc pax tas tzal 'ayn̈ on̈. Cojn b'i'an, 'och cab' Jehová qui Diosalec et'oc, 'icha 'ix yac' yet' Moisés.

¹⁸ Tzann̈j mach matz yiclni mto tztenn tas tzala, tojl cab'n̈ej schami. Cojn tas tzcal 'ayach, to te'n tzotj a b'a, man̈ ach xiwoc, xchi eb' 'a Josué.